Rome 14:23 - Nǫ̀htsı̨ Nı̨htł'è

²³ Hanìkò amìı wegha hotıì-le kò ı̨łaà yeghǫ shètı̨ nı̨dè eyı dǫ wesınìyaetı hǫt'e, wegha ehkw'ı-ahodı k'ę̀ę̀ eda-le ts'ıhɂǫ̀. T'asìı hazǫǫ̀ weghàlats'eedaa sìı gogha ehkw'ı-ahodı k'ę̀ę̀-le nı̨dè eyı gogha hołı̨ı̨ hǫt'e.

Rome 14:23 ပူးပေါင်းရင်းမြစ်များ

Rome 13:2

Eyıt'à dǫ dèe-ts'ǫ̀-k'àowo k'èı̨t'e-le nı̨dè, Nǫ̀htsı̨ dǫ gha nàowo whehtsı̨ı̨ sìı k'èı̨t'e nıìle. Amìı hat'ı̨ı̨ sìı edesınìyahtıì at'ı̨ hǫt'e.

Rome 14:5

Dǫ ı̨łè dzęę̀ hazǫǫ̀ nahk'e dzę ı̨łè wegha degaı hǫt'e. Hanìkò dǫ eyıì-le wegha dzę hazǫǫ̀ ełèht'eè hǫt'e. Dǫ hazǫǫ̀ xàè gınì t'à dànì ehkw'ı agı̨ı̨wǫǫ sìı k'ę̀ę̀ geeda ha hǫt'e.

1 Corınth 8:7

Hanìkò eyı sìı dǫ hazǫǫ̀ deghàà gık'èezǫ nıìle. Dǫ mǫ̀hdaa ı̨nę̀ę nǫ̀htsı̨ą hòèlı̨ı̨ ghǫ hòtł'ò agı̨ı̨wǫ ı̨lè t'à bò hanıı ghǫ shègezhe nı̨dè nǫ̀htsı̨ hòèlı̨ı̨ ghàɂaadìı ne gı̨ı̨wǫ ha. Gınì nàtso-le t'à ekǫ-le nànıgedè xè ekǫ-le eghàlagı̨ı̨dà gı̨ı̨wǫ ha.

Tıtus 1:15

Amìı gıdzeè degaı lanıı sìı t'asìı hazǫǫ̀ gıgha degaı hǫt'e. Hanìkò amìı gınìłı̨ı̨ xè gıgha ehkw'ı-ahodı-le sìı t'asìı hazǫǫ̀ gıgha hołı̨ı̨ hǫt'e. Ededzeè eyıts'ǫ edınì t'à hołı̨ı̨ nàowoò zǫ gı̨ı̨wǫ.

Hebrew 11:6

Dǫ wegha ehkw'ı-ahodı-le nı̨dè Nǫ̀htsı̨ wınà hohtsı̨ ha dìì. Dǫ hazǫǫ̀ Nǫ̀htsı̨ ts'ǫ̀ aget'ı̨ı̨ sìı Nǫ̀htsı̨ wehòhɂǫǫ sìı gıgha ehkw'ı-ahodı ha hǫt'e, eyıts'ǫ amìı ededzeè t'à Nǫ̀htsı̨ nıwǫǫ sìı eyı k'èxa Nǫ̀htsı̨ t'asìı nechàa goghàyeɂà ha gıgha ehkw'ı-ahodı ha hǫt'e.