Rome 12:2 - Nǫ̀htsı̨ Nı̨htł'è

² Dıı nèk'e dǫ dànì geedaa sìı gık'ę̀ę̀ k'ehoahɂa-le, hanìkò naxınì eładı̨į̀ adlà k'ę̀ę̀ aahda. Hanì-ı̨dè Nǫ̀htsı̨ ayìı wınì k'ę̀ę̀ ne sìı deghàà wek'èahsǫǫ̀ aahde ha. Nǫ̀htsı̨ ayìı wegha nezı̨ı̨ xè degaı ne sìı, eyıts'ǫ ayìı wegha sìghà ne sìı wek'èahsǫǫ̀ aahde ha.

Rome 12:2 ပူးပေါင်းရင်းမြစ်များ

Matthew 13:22

Dǫ mǫ̀hdaa sìı wet'à t'asìı dehshee ı̨chį̀ghoò ta nàı̨tł'ı lagı̨ı̨t'e. Godı gıìkw'o hanìkò t'asìı łǫ ghǫ nànıgedè eyıts'ǫ sǫǫ̀mba łǫ gı̨ı̨wǫ t'à edeghǫyageeɂà lanì geeda. Eyıt'à yatı nezı̨ı̨ wedıhogehtsı̨ xè t'asìı nezı̨ı̨ wı̨ı̨zìı xàhogehwhı-le.

Mark 4:19

hanìkò t'asìı łǫ ghǫ nànıgedè, sǫǫ̀mba łǫ eyıts'ǫ t'asìı łǫ gı̨ı̨wǫ t'à edeghǫyageeɂà lanì geeda. Eyıt'à yatı nezı̨ı̨ wedıhogehtsı̨ xè t'asìı nezı̨ı̨ wı̨ı̨zìı xàhogehwhı-le.

John 14:30

Hòt'a dıı nèè ts'ǫ̀ k'àowo sìı nììtła ha t'à, whaà-le-t'ıì naxıts'ǫ̀ gohde-le agode ha. Sı̨ sets'ǫ̀ k'àowo nıìle,

John 15:19

Dıı nèk'e dǫ gıxè aaht'ı̨ nı̨dè xàè edets'ǫ dǫ lanì naxıghǫnegeètǫ ha hǫt'e. Hanìkò dıì, gıts'ǫ dǫ aaht'e nıìle, dıı nèk'e dǫ gıta gots'ǫ naxìhchì hǫt'e. Eyı ts'ıhɂǫ̀ dǫ naxıdzagı̨ı̨hwhǫ hǫt'e.

John 17:14

Neyatıì gıghàehɂǫ hǫt'e, eyıt'à dıı nèk'e ts'ǫ dǫ secheekeè dzagı̨ı̨hwhǫ, sexèht'eè dıı nèk'e gots'ǫ agı̨ı̨t'e-le t'à.

John 7:7

Dıı nèk'e dǫ hazǫǫ̀ naxıdzagı̨ı̨hwhǫ ha dìì, hanìkò sı̨ nàowołı̨ı̨ k'ę̀ę̀ eghàlageeda gèehsı̨ t'à, sedzagı̨ı̨hwhǫ.

Rome 12:1

Eyıt'à sèot'ı̨ı̨, Nǫ̀htsı̨ etegoòɂı̨ wek'èts'eezǫ ne t'à dıı haehsı̨į̀ naxıghǫnàdaehtì: Naxızhį̀į̀ hazǫǫ̀ t'à Nǫ̀htsı̨ ghàdeahtè eyıts'ǫ wegha zǫ aahda. Degaı k'ę̀ę̀ aahda welè, Nǫ̀htsı̨ wınì k'ę̀ę̀ hoahtsı̨ welè. Haaht'e nı̨dè Nǫ̀htsı̨ wegha nezı̨į̀ k'ehoahɂa ha hǫt'e.

Rome 13:14

Hanìkò dıı haaht'ı̨: Gots'ǫ̀ K'àowo Zezì-Krı wınì k'ę̀ę̀ aahda. Dànì gonìłı̨ı̨ k'ę̀ę̀ k'ehots'eɂaa sìı ghǫ nànıahdè-le.

Rome 7:12

Moses wenàowoò hazǫǫ̀ degaı hǫt'e eyıts'ǫ nàowodeè sı degaı, ehkw'ı xè nezı̨ hǫt'e, wek'èts'eezǫ.

Rome 7:14

Moses wenàowoò sìı degaı-deè hǫt'e wek'èts'eezǫ, hanìkò goxı̨ sìı degaı-deè ats'ı̨ı̨t'e nıìle, hołı̨ı̨ gots'ǫ̀ k'àhowo t'à.

Rome 7:22

Sedzeè t'à Nǫ̀htsı̨ wenàowoò degaı ghǫ sınà hǫt'e,

1 Corınth 3:19

Dıı nèk'e gots'ǫ dǫ ayìı gıgha gǫǫzǫ hǫt'e sìı Nǫ̀htsı̨ wegha ezhı̨ne hǫt'e. Dıı hanì dek'eèhtł'è, “Dǫ gogı̨ı̨zǫǫ edegeewǫ xè ełeghǫyageeɂà k'ę̀ę̀ k'ehogeɂaa sìı Nǫ̀htsı̨ gınàowoò t'à gok'èchıìtła lagohɂį̀ hǫt'e,” dek'eèhtł'è.

2 Corınth 4:4

Wehłı̨ı̨ dıı nèè gha k'àowo elı̨ı̨ sìı dǫ gıgha ehkw'ı-ahodı-le sìı gınì t'à gıgha xègaat'ı̨-le agǫ̀ǫ̀là. Eyıt'à Zezì-Krı wegodıì nezı̨ı̨ ts'ıhɂǫ̀ dǫ xè dzęh hòɂǫǫ sìı gıgha wègaat'ı̨ ha dìì, eyıts'ǫ Zezì-Krı enıìyah wehòhɂǫ xè hotıì Nǫ̀htsı̨ xèht'eè wègaat'ı̨ı̨ sìı, gınıedì ha dìì hǫt'e.

2 Corınth 5:17

Eyıt'à dǫ Zezì-Krı xè edaa sìı dǫgòò ìhłè hǫt'e. Wenàowoò zǫą sìı wedę adlà, wenàowogòò wetł'axǫǫ̀ ajà.

Galatıa 1:4

Zezì-Krı dıı nèk'e hołı̨ı̨ nàowoò ch'à edaxàgole ha nıwǫ t'à, Nǫ̀htsı̨-Gotà wınì k'ę̀ę̀ gohołı̨į̀ k'èxa ełaı̨wo adììdlà hǫt'e.

Ephesus 1:18

Naxıda enıìyah hòɂǫ ts'ǫ̀ naxıkayaetıı sìı naxıdzeè t'à hotıì nezı̨į̀ wek'èahsǫ ha, eyı sı gha yahtı hǫt'e. T'asìı enıìyah deè Nǫ̀htsı̨ edets'ǫ dǫ gha ts'atà whehłaa sìı goghàyele ha hǫt'e.

Ephesus 2:2

Hołı̨ı̨ nàowoò k'ę̀ę̀ aahda ı̨lè, eyıts'ǫ dıı nèk'e hołı̨ı̨-hogehtsı̨ı̨-dǫǫ̀ gık'ę̀ę̀ aahda ı̨lè, eyıts'ǫ ı̨nìłı̨ı̨ yat'a ts'ǫ̀ k'àowo elı̨ı̨ sìı wek'èaht'e ı̨lè. Eyı ı̨nìłı̨ı̨ sìı dǫ Nǫ̀htsı̨ k'èagı̨ı̨t'e-le sìı dıì gıgha k'àowo elı̨ hǫt'e.

Ephesus 5:17

Eyıt'à goahsǫ-le k'ę̀ę̀ aahda-le, hanìkò Nǫ̀htsı̨ ayìı dàahłe ha naxı̨ı̨hwhǫǫ sìı wenıahdì.

Colosse 1:9

Eyıt'à, naxıghǫ ts'ıìkw'o gots'ǫ naxıgha yats'ehtı ghǫ nats'et'è-le. Yedàyeh Nezı̨ı̨ t'à deghàà goahsǫ ha eyıts'ǫ t'asìı nıahdì aahde ha t'aats'ǫǫ̀ naxıgha Nǫ̀htsı̨ wets'eekè, hanì-ı̨dè Nǫ̀htsı̨ dànıwǫǫ sìı wek'èahsǫǫ̀ aahde ha.

Colosse 3:10

Goht'ǫ gòò yìı aahde laahjà, Nǫ̀htsı̨ gòèhtsı̨ı̨ sìı deghàà wek'èahsǫǫ̀ aahjà, eyıts'ǫ wexèht'eè aahdaà aahjà.

Colosse 4:12

Epaphras naxıts'ǫ dǫ hǫt'e sìı, Zezì-Krı wecheekeè elı̨. Ededı̨ sı, “Naxıxè sìghà welè,” naxèhdı. Nǫ̀htsı̨ wınì k'ę̀ę̀ aahda ha eyıts'ǫ naxınì gǫǫzǫ xè nàtso ha naxı̨ı̨hwhǫ t'à, t'aats'ǫǫ̀ hòtł'ò naxıgha yahtı hǫt'e.

1 Thessalonıca 4:3

Nǫ̀htsı̨ sìı wegha degaı k'ę̀ę̀ aahda ha naxı̨ı̨hwhǫ hǫt'e: naxızhį̀į̀ t'à hołı̨ı̨ k'alaahdè ch'à edek'èahdì.

Tıtus 3:5

edaxàgoı̨la. Ehkw'ı eghàlats'ı̨ı̨dà t'à agǫ̀ǫ̀là nıìle, hanìkò wedzeè eteèɂı̨ t'à agǫ̀ǫ̀là. Dıı hanì edaxàgoı̨la hǫt'e: Gohołı̨į̀ k'enaı̨htso xè dǫ eładı̨ı̨ ts'ı̨ı̨lı̨į̀ agǫ̀ǫ̀là eyıts'ǫ Yedàyeh Nezı̨ı̨ wet'ǫ̀ǫ̀ dǫ gòò gòèhtsı̨.

James 1:27

Nǫ̀htsı̨ gogha ehkw'ı-ahodı nı̨dè Nǫ̀htsı̨-Gotà dıı hanì wegha eghàlats'eedaa sìı wınì k'ę̀ę̀ degaı xè hołı̨ı̨ dę hǫt'e: eyı sìı ts'ınake eyıts'ǫ ts'èko gıdǫǫ̀ ełaı̨dèe gıgha hoìla sìı gıts'àts'edı, eyıts'ǫ dıı nèk'e nàowołı̨ı̨ ch'à edek'èts'edì.

James 4:4

Naxı̨ sìı Nǫ̀htsı̨ k'èch'a aaht'ı̨ hǫt'e. Dıı nèk'e gots'ǫ dǫ gıàgı̨ą ts'ı̨ı̨lı̨ nı̨dè Nǫ̀htsı̨ wedzats'ı̨ı̨hwhǫ hǫt'e, wek'èahsǫ-le nì? Amìı dıı nèk'e ts'ǫ nàowołı̨ı̨ k'ę̀ę̀ at'ı̨ı̨ sìı Nǫ̀htsı̨ ts'ǫ̀ xànıɂaà ade ha hǫt'e.

1 Peter 1:14

Chekoa edetà k'èı̨t'ee lanì Nǫ̀htsı̨ k'èaht'e. Įnę̀ę godı nezı̨ı̨ k'èahsǫ-le ekò naxınìłı̨ı̨ k'ę̀ę̀ k'ehoahɂa ı̨lè, hanìkò dıì sìı hanì aahda ha nıìle.

1 Peter 1:18

Naxıcho wet'àaɂà-le k'ę̀ę̀ gı̨ı̨dàa sìı hanì aahda ch'à edaxàwhahde hǫt'e. T'asìı wedıhołè ha sìı, sǫǫ̀mbaekwo eyıts'ǫ sǫǫ̀mba degoo lanıı t'à edaxàwhahde nıìle,

1 Peter 2:3

gots'ǫ̀ K'àowo gots'ǫ̀ wınì nezı̨ı̨ wek'èahsǫǫ̀ aahjà t'à.

1 Peter 4:2

Eyı ts'ıhɂǫ̀ dıı nèk'e eda gots'ǫ̀ wınìłı̨ı̨ k'ę̀ę̀ eda-le, hanìkò Nǫ̀htsı̨ wınì k'ę̀ę̀ eda.

2 Peter 1:4

Gots'ǫ̀ hanì naɂa ts'ıhɂǫ̀ t'asìı deè godawhelaà ayį̀į̀làa sìı ghǫ edeyatıì goghàı̨ɂǫ hǫt'e. Eyı ts'ıhɂǫ̀ Nǫ̀htsı̨ xè aaht'ı̨į̀ aahjà eyıts'ǫ dıı nèk'e dǫ gınàowołı̨ı̨ k'ę̀ę̀ aahda ch'à edaxàwhahde hǫt'e.

2 Peter 2:20

Gots'ǫ̀ K'àowo Zezì-Krı Edaxàgolee sìı gık'èezǫǫ̀ agejà t'à dıı nèk'e hołı̨ı̨ nàowoò ch'à edaxàgı̨ı̨de tł'axǫǫ̀, k'achı̨ hołı̨ı̨ nàowoò k'alagedè agejà nı̨dè, nǫǫde ts'ǫ̀ t'akwełǫ̀ǫ̀ nahk'e gıxè deɂǫ̀ǫ̀ hoìla agode ha hǫt'e.

1 John 3:13

Sèot'ı̨ı̨, dıı nèk'e ts'ǫ dǫ naxınìgelı̨-le nı̨dè eyı ghǫ naxıtł'ahk'e welè-le.

1 John 5:19

Nǫ̀htsı̨ weza ats'ı̨ı̨t'e, eyıts'ǫ dıı nèk'e dǫ hazǫǫ̀ Nǫ̀htsı̨ dę geedaa sìı wehłı̨ı̨ gıts'ǫ̀ k'àowo hǫt'e, wek'èts'eezǫ.

John Wenazhıı 12:9

Eyı tıts'aàdìıcho dek'oo sìı ı̨nę̀ę whaà gots'ǫ gòocho hǫt'e. Eyı sìı wehłı̨ı̨ hanì-le-ı̨dè “Satan” wìyeh hǫt'e. Ededı̨ sìı dıı nèk'e dǫ hazǫǫ̀ ekǫ-le ts'ǫ̀ goèhɂa. Wets'ǫ yak'eet'ı̨łı̨ı̨ xè dıı nèk'e ts'ǫ̀ gogeèhde.

John Wenazhıı 13:8

Dıı nèk'e dǫ hazǫǫ̀ tıts'aàdìı nechàa ts'ǫ̀ yagehtı ha. Sahzǫ̀ą ełaàwìgwo wenı̨htł'è k'e gıızì dek'eèhtł'è-le agı̨ı̨t'e. Dıı dèè hòèlı̨ gots'ǫ amìı welǫ whìle ts'ǫ̀ geeda ha sìı eyı enı̨htł'è yìı gıızì dek'eèhtł'è.