Phılıppı 2:7 - Nǫ̀htsı̨ Nı̨htł'è

⁷ T'asìı wı̨ı̨zìı elı̨-le adììdlà, dǫ xèht'eè dǫ-elı̨ ne t'à dǫ gha eghàlaedaa dǫǫ̀ edèhtsı̨.

Phılıppı 2:7 ပူးပေါင်းရင်းမြစ်များ

Matthew 12:18

“Secheekeè wììhchìı sìı jǫ nàwo. Ededı̨ weghǫneehtǫ xè weghǫ sǫdehwhǫ hǫt'e. Yedàyeh Nezı̨ı̨ wets'ǫ̀ ahłe ha eyıts'ǫ dǫ hazǫǫ̀ xàɂaa dànì ehkw'ı geedaa ghǫ hoghàgoehtǫ ha.

Matthew 20:28

Dǫ-wet'àaɂàa-deè ededı̨ kò dǫ yegha eghàlageeda gha jǫ nììtła nıìle, hanìkò dǫ ts'àdı xè dǫ gha ełaàwı gha jǫ nììtła hǫt'e. Dǫ łǫ gıhołı̨į̀ gıghǫ nahoezhe gha ełaàwı ha hǫt'e,” Zezì edecheekeè gòhdı.

Mark 9:12

Zezì hagòhdı, “Ehkw'ı agedı, Elıjah t'akwełǫ̀ǫ̀ nììtła ha hǫt'e, t'asìı hazǫǫ̀ sınìhòɂà ha. Hanìkò nakwenàoɂǫǫ dıı hanì dek'enègı̨ı̨tł'è: Dǫ-wet'àaɂàa-deè daı̨ɂa ha eyıts'ǫ dǫ hazǫǫ̀ gıgha wedę ha.

Luke 22:27

Amìı denahk'e elı̨ dahwhǫ, dǫ ladà gà weghàhodìı hanì-le-ı̨dè dǫ yegha eghàlaedaa? Dǫ ladà gà weghàhodìı sìı eyı denahk'e elı̨ hǫǫwǫ hǫt'e. Hanìkò sı̨ sìı naxını dǫ gha eghàlaedaa-dǫǫ̀ laht'e.

John 1:14

Eyı yatı wehòhɂǫǫ sìı dǫ whelı̨ eyıts'ǫ gota nàı̨dè. Dànì enıìyah deè t'à wehòhɂǫǫ sìı wets'aɂı̨. Ededı̨ ı̨łàet'ee zǫ hanì enıìyah deè elı̨. Ededı̨ sìı Nǫ̀htsı̨-Gotà gots'ǫ nììtła hǫt'e, wesǫnıwǫ deè eyıts'ǫ nàowo ehkw'ıı wets'ǫ̀-èlı̨ hǫt'e.

Rome 1:3

Eyı godı nezı̨ı̨ sìı Nǫ̀htsı̨ Weza weghǫ hǫt'e. Ededı̨ sìı dıı nèk'e k'àowocho Davıd wets'ıhɂǫ̀ǫ-dǫǫ̀ hǫt'e, hanìkò ełaı̨wo gots'ǫ naìdà t'à Įnì Degaı wedahxà Nǫ̀htsı̨ Weza hǫt'e wek'èts'eezǫǫ̀ agǫ̀ǫ̀là. Eyı sìı Zezì-Krı gots'ǫ̀ K'àowo hǫt'e.

Rome 15:3

Zezì-Krı ededı̨ kò edegha sìghà k'ehoɂa-le ı̨lè. Dıı hanì weghǫ dek'eèhtł'è: “Dǫ naxık'adageedè nı̨dè, sı̨ sek'adageedè agedı hǫt'e,” dek'eèhtł'è.

Rome 15:8

Ehkw'ı anaxèehsı̨, Nǫ̀htsı̨ weyatıì ehkw'ı dahxà Zezì-Krı Israel got'ı̨į̀ gogha eghàlaedaa ajà. T'akwe whaà Nǫ̀htsı̨ edeyatıì gocho ghàyı̨ı̨ɂǫǫ ı̨lèe sìı Zezì wek'ę̀ę̀ hòɂǫǫ̀ ayį̀į̀là.

Rome 8:3

Moses wenàowoò gots'àdı ha dìì, goınìłı̨ı̨ ts'ıhɂǫ̀ gogha nàtso-le ajà t'à. Hanìkò Nǫ̀htsı̨ gots'àı̨dì hǫt'e. Xàè Edeza goxèht'eè hołı̨ı̨-hohtsı̨ı̨-dǫǫ̀ k'ę̀ę̀ wègaat'ı̨ı̨ sìı gohołı̨į̀ k'èxa ełaàwı ha gots'ǫ̀ ayį̀į̀là. Hanì hołı̨ı̨-hogehtsı̨ı̨-dǫǫ̀ gıhołı̨į̀ yesınìyaı̨htı hǫt'e.

2 Corınth 13:4

Nàtso-le k'ę̀ę̀ dechı̨et'aa k'e wedıìtsò t'ıį̀t'e, hanìkò dıì Nǫ̀htsı̨ dahxà nàtso eda hǫt'e. Eyı lanì goxı̨ sı wexè nàts'etso-le lats'ı̨ı̨t'e, hanìkò Nǫ̀htsı̨ dahxà naxıgha eghàlats'eeda gha nàts'etsoò ts'eeda hǫt'e.

2 Corınth 8:9

Gots'ǫ̀ K'àowo Zezì-Krı gots'ǫ̀ sǫnıwǫǫ sìı wek'èahsǫ hǫt'e. Ededı̨ sìı ahxe elı̨ ı̨lè hanìkò naxıgha eteèt'ı̨į̀ adììdlà hǫt'e. Eteèt'ı̨į̀ adììdlà t'à naxıxè ahxe hòɂǫ agode ha.

Galatıa 4:4

Hanìkò Nǫ̀htsı̨ wegha deghàà nèhòkw'o ekò Edeza gots'ǫ̀ ayį̀į̀là, ts'èko ts'ǫ dǫ elı̨, eyıts'ǫ Moses wenàowoò tł'a wheda ı̨lè.

Phılıppı 2:6

Ededı̨ xàè Nǫ̀htsı̨ elı̨, eyıts'ǫ Nǫ̀htsı̨ wet'àaɂà xèht'eè elı̨ hanìkò edegha yek'èdì ha nıwǫ-le ts'ıhɂǫ̀ wedę ayį̀į̀là.

Hebrew 12:2

Zezì zǫ wedaànıts'ııdè, ededı̨ sìı Nǫ̀htsı̨ gogha ehkw'ı-ahodıı yexèhoį̀hwho hǫt'e, eyıts'ǫ ededı̨ nǫǫde ts'ǫ̀ deghàà gogha ehkw'ı-ahodıì agole ha hǫt'e. Ededı̨ ı̨daà nı̨dè wınà agode ha yek'èezǫ t'à dechı̨et'aa k'e dàı̨ɂàa sìı yeghǫ į̀į̀zhawhelı̨-le. Eyı tł'axǫǫ̀ Nǫ̀htsı̨ t'asìı hazǫǫ̀ gha K'àowocho elı̨ı̨ sìı yegà nàgòts'ehnèe wheda.

Hebrew 13:3

Naxıta gots'ǫ dǫ mǫ̀hdaa gıdanìı̨laa sìı gıxè naxıdanìı̨la lanì gınaahdì. Eyıts'ǫ dǫ dagı̨ı̨ɂaà agììdlàa sìı naxı̨ gıxèht'eè daahɂa lanì gınaahdì.

Hebrew 4:15

Gogha yahtıı-wet'àaɂàa-deè elı̨ı̨ sìı dànì nàts'etso-le t'à dǫ ts'ı̨ı̨lı̨ı̨ sìı yek'èezǫ hǫt'e. Goxèht'eè t'asìı hazǫǫ̀ t'à weèdzà ı̨lè hǫt'e, hanìkò hołı̨ı̨ wı̨ı̨zìı wek'e wheɂǫ-le.