Phılıppı 2:17 - Nǫ̀htsı̨ Nı̨htł'è

¹⁷ Naxıgha ehkw'ı-ahodı t'à, Nǫ̀htsı̨ wecheekeè aahłı̨ ha weghàdeahła, eyıts'ǫ sı̨ sìı Nǫ̀htsı̨ gha ełaehwhı ha tahkò. Eyıt'à Nǫ̀htsı̨ ts'ǫ̀ t'asìı k'eek'ǫ̀ lanì, wegha sezhį̀į̀ k'ehowı. Ełexè Nǫ̀htsı̨ t'asìı weghàts'eɂà ne t'à, naxıxè sınà hǫt'e.

Phılıppı 2:17 ပူးပေါင်းရင်းမြစ်များ

Zezì Wecheekeèdeè 20:24

Hanìkò edegha ehda ha segha wet'àaɂà-le. Gots'ǫ̀ K'àowo la nechàa seghàı̨ɂǫǫ sìı welǫ ts'ǫ̀ weghǫ naht'è ha, eyı zǫ dehwhǫ. Nǫ̀htsı̨ gots'ǫ̀ sǫnıwǫǫ sìı eyı godı nezı̨ı̨ t'à dǫ ts'ǫ̀ gohde ha hǫt'e.

Zezì Wecheekeèdeè 21:13

Hanìkò Paul hadı, “Ayìıha seghǫ aahtse xè sedzeè etseè aahɂı̨? Zezì wıızì ts'ıhɂǫ̀ dasegeezà gha ts'atà whıhda hǫt'e, eyı zǫǫ̀-le wets'ıhɂǫ̀ ekǫ ełaehwhı ha segha asanìle hǫt'e,” gòhdı.

Rome 12:1

Eyıt'à sèot'ı̨ı̨, Nǫ̀htsı̨ etegoòɂı̨ wek'èts'eezǫ ne t'à dıı haehsı̨į̀ naxıghǫnàdaehtì: Naxızhį̀į̀ hazǫǫ̀ t'à Nǫ̀htsı̨ ghàdeahtè eyıts'ǫ wegha zǫ aahda. Degaı k'ę̀ę̀ aahda welè, Nǫ̀htsı̨ wınì k'ę̀ę̀ hoahtsı̨ welè. Haaht'e nı̨dè Nǫ̀htsı̨ wegha nezı̨į̀ k'ehoahɂa ha hǫt'e.

Rome 15:16

Zezì-Krı wegha yahtıı wılaà ghàlaehda sììchì hǫt'e. Dǫ eyıì-le xàɂaa Nǫ̀htsı̨ wegodıì nezı̨ı̨ t'à hoghàgeehtǫ ha asį̀į̀là. Hanì-ı̨dè dǫ eyıì-le xàɂaa sìı Nǫ̀htsı̨ ghàgets'ele ha. Yedàyeh Nezı̨ı̨ wedahxà degaı agììdlà t'à Nǫ̀htsı̨ goghǫ sìghà anıwǫ ha.

2 Corınth 12:15

Eyıt'à t'asìı hazǫǫ̀ sets'ǫ sìı naxıts'ǫ̀ wek'ehoehwhı gha sınà, eyıts'ǫ naxıghàdèehtè gha sınà hǫt'e. Denahk'e naxıghǫneehtǫ nı̨dè dek'aɂį̀ seghǫnıahtǫ ha nì?

2 Corınth 4:12

Eyıt'à goxı̨ t'aats'ǫǫ̀ ełaàts'ede lanì, hanìkò eyı ts'ıhɂǫ̀ naxı̨ sìı aahda gha adlà hǫt'e.

2 Corınth 6:10

dats'ı̨ı̨ɂà hanìkò t'aats'ǫǫ̀ sìts'eèt'ı̨; etets'eèt'ı̨ hanìkò dǫ łǫ ahxeè lagets'į̀į̀là; t'asìı wı̨ı̨zìı gots'ǫ-le hanìkò t'asìı hazǫǫ̀ gots'ǫ hǫt'e. Eyı hazǫǫ̀ weghàà xàè Nǫ̀htsı̨ wecheekeè ats'ı̨ı̨t'ee sìı dǫ gık'èezǫ ha.

2 Corınth 7:4

Sıì naxıghǫ ehkw'ı aahwhǫ hǫt'e eyıts'ǫ naxıghǫ xàhohdì. Naxıts'ıhɂǫ̀ sınì nàtsoò ajà. Gogha hoìla łǫ kò sıì sınà hǫt'e.

Phılıppı 1:20

T'asìı wı̨ı̨zìı t'à edeghǫ į̀į̀zhaehłı̨ ha-le sìı ghǫ hòtł'ò aahwhǫ hǫt'e hanìkò t'aats'ǫǫ̀ Zezì-Krı wegha sınì nàtso xè wegha hòtł'ò eghàlaehda ha dehwhǫ. Ehda, ehda-le, sezhį̀į̀ t'à t'aats'ǫǫ̀ Zezì-Krı weghàsǫhoedı ha dehwhǫ.

Phılıppı 2:18

Naxı̨ sı sexè naxınà welè.

Phılıppı 2:30

Zezì gha eghàlaeda k'èxa k'àhdzǫ ełaı̨wo t'e. Naxı̨ sets'àahdı ha dìì t'à ededı̨ ełaàwı ha wegha hoejı̨ kò sets'àı̨dì ı̨lè.

Phılıppı 4:18

Hòt'a deghàà naxıt'à hoehwhì hǫt'e, eyıts'ǫ deɂǫ̀ǫ̀ seghàahła hǫt'e. Epaphrodıtus wetł'aà sǫǫ̀mba sedanìahła t'à t'asìı seɂǫ̀atłǫ whelaà ajà. T'asìı sets'ǫ̀ aahłàa sìı Nǫ̀htsı̨ wets'ǫ̀ t'asìı łekǫǫ k'ets'eehk'ǫ̀ lanì, eyı sìı Nǫ̀htsı̨ yeghǫ sìghà anıwǫ hǫt'e.

Colosse 1:24

Naxıgha daıhɂà t'à sınà hǫt'e. Zezì-Krı gogha daı̨ɂà, eyıts'ǫ Nǫ̀htsı̨ wecheekeè gogha denahk'e daı̨ɂa ha nı̨dè, sı̨ sı, sezhį̀į̀ t'à wegha daıhɂa kò dehwhǫ.

1 Thessalonıca 2:8

Sıì naxıghǫnets'eètǫ t'à Nǫ̀htsı̨ wegodıì nezı̨ı̨ naxıghàts'eɂà ha sıì goınà hǫt'e. Eyı zǫǫ̀-le, naxıts'àts'edı ha ts'ı̨ı̨wǫ t'à hanì naxıxè ts'ı̨ı̨dà. Haı̨hcho ts'ǫ̀ sıì naxıghǫnets'eètǫǫ̀ aahjà hǫt'e.

2 Tımothy 4:6

Sı̨ hòt'a selǫ nèhòkw'ı ha nìhǫǫwo, Nǫ̀htsı̨ gha sezhį̀į̀ k'ehǫǫwo lanì. Dıı nèk'e gots'ǫǫ̀ asedle ha nìhǫǫwo.

1 Peter 2:5

Eyı lanì naxı̨ sı kwe edaa laaht'e. Naxı̨ sìı Nǫ̀htsı̨ wekǫ̀ gocho laaht'e eyıts'ǫ yahtıı degaı lanì wegha k'ehoahɂa. Zezì-Krı naxıgha ehkw'ı adı t'à, Nǫ̀htsı̨ wınì k'ę̀ę̀ weghàdeahła.

1 John 3:16

Zezì gogha ełaı̨woo sìı eyı weghàà goghǫneètǫ wek'èts'eezǫǫ̀ ats'ejà. Eyı xèht'eè gòet'ı̨ gıgha ehkw'ı-ahodıı sìı gıgha ełaàts'ıde ts'ı̨ı̨wǫ welì.