4 Naxıgha yahtı taàt'eè sınà xè yahtı.
T'aats'ǫǫ̀ kwe yìı dǫkw'ǫǫ̀ whelaa ta eyıts'ǫ shìh ta at'ı̨. Naìdzeh xè kwe t'à nàdet'à.
Ehkw'ı anaxèehsı̨, eyı xèht'eè hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè Nǫ̀htsı̨ weyak'eet'ı̨į̀ gınà t'à sìgoèt'ı̨ ha hǫt'e,” Zezì gòhdı.
Eyı xèht'eè hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè, yak'e geèhkw'ee sìı sıì gınà ha hǫt'e. Łǫǫ̀tǫènǫ-daats'ǫ̀-łǫǫ̀tǫ ehkw'ı geeda kò, hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè yak'e geèhkw'ee sìı weghǫ denahk'e gınà ha hǫt'e.”
T'aats'ǫǫ̀ naxıgha yahtı Nǫ̀htsı̨ yek'èezǫ hǫt'e. Sedzeè t'à Nǫ̀htsı̨ wegha hòtł'ò eghàlaehda, eyıts'ǫ Weza wegodıì nezı̨ı̨ t'à dǫ hoghàgeehtǫ.
Eyıts'ǫ naxınì ı̨łè zǫ xè naxıdzeè ı̨łè zǫ t'à ełeghǫnıahtǫ nı̨dè, eyıts'ǫ la ı̨łè zǫ gha ełexè eghàlaahda nı̨dè sıì sınà aseahłe ha hǫt'e.
Dǫ łǫ Zezì wedechı̨et'aà ts'ǫ̀ xànıgı̨ı̨ɂa k'ę̀ę̀ geeda hǫt'e. Įnę̀ę gotłǫǫ̀ eyı hanaxèehsı̨ ı̨lè, dıì k'achı̨ senatì xè naxıts'ǫ̀ haehsı̨.
Sèot'ı̨ı̨, gots'ǫ̀ K'àowo wegha naxınì nàtso aahwhǫ eyıts'ǫ wedahxà dànì ts'eeda ghǫ ııhtł'èe sìı wek'ę̀ę̀ aahda. Seàgı̨ą, naxıghǫneehtǫ hǫt'e, naxıxè aht'e ha dehwhǫ, eyıts'ǫ sıì sınà asèahłà xè naxıghǫ xàhohdì.
Sezhį̀į̀ t'à naxıts'ǫ̀ gǫǫwà whıhda, hanìkò sınì t'à naxıxè aht'e. Hotıì ehkw'ı aahda, eyı xè Zezì-Krı ghǫ naxınì nàtso t'à sıì sınà hǫt'e.
Yats'ehtı taàt'eè naxıgha Nǫ̀htsı̨ masì wets'ı̨ı̨hwhǫ.
Sıì dǫ gıghǫneètǫ t'à k'ǫǫnì sınà hǫt'e. Sèot'ı̨ı̨, Nǫ̀htsı̨ wets'ǫ dǫ gıdzeè t'à gınà agìnelà, eyı ts'ıhɂǫ̀ sınì nàtsoò asèneelà hǫt'e.
Naxıts'ǫ dǫ mǫ̀hdaa nàowo ehkw'ıı k'ę̀ę̀ geeda wek'èehsǫ t'à sıì sınà, Nǫ̀htsı̨-Gotà hanì ts'eeda ha gòhdı ı̨lè k'ę̀ę̀.
