Matthew 10:16 - Nǫ̀htsı̨ Nı̨htł'è

¹⁶ Sahzǫ̀ą dìga nı k'eɂa lanì dǫ ta ts'ǫ̀ naxeehɂà t'à edexoahdı. Eyıt'à dǫ gıta goahsǫ k'ehoahɂa xè ekǫ-le eghàlaahda-le.

Matthew 10:16 ပူးပေါင်းရင်းမြစ်များ

Dànì Kèhoį̀wo 3:1

Gòocho sìı Nǫ̀htsı̨ tıts'aàdìı whatsǫǫ̀ edegeedaa whehtsı̨ı̨ sìı hazǫǫ̀ t'à gonahk'e eghǫyaeɂà gha gǫǫzǫ hǫt'e. Ts'èko ts'ǫ̀ hadı, “Nǫ̀htsı̨, dıı dèè-goehshee-k'è ts'ı t'alàa-sìı wets'ǫ shèahtı̨ ha-le, hadı nì?” yèhdı.

Dànì Kèhoį̀wo 3:13

Eyıt'à gots'ǫ̀ K'àowo Nǫ̀htsı̨ ts'èko ts'ǫ̀ hadı, “Dànìghǫ hanì eghàlaneedà?” yèhdı. Ts'èko hadı, “Gòocho seghǫyaàɂǫ t'à jìecho ııhɂà,” hadı.

Matthew 24:25

Hanìkò hagode kwe naxıts'ǫ̀ haehsı̨ı̨ sìı hotıì wenaahdì nǫǫ̀.

Matthew 24:45

“Dǫ nezı̨ı̨ aahłı̨ xè goahsǫǫ̀ k'ehoahɂa. Eyı hanıı dǫ sìı wets'ǫ k'àowo edecheekeè hazǫǫ̀ ts'ǫ̀ k'àowoò ayele ha. Weghǫ shèts'ezhee gı̨ı̨wǫ nı̨dè goghàɂeedı ha.

Matthew 25:2

T'eekoa sı̨làı sìı gogı̨ı̨zǫ-le eyıts'ǫ sı̨làı sìı gogı̨ı̨zǫ.

Matthew 25:4

Ekò t'eekoa gogı̨ı̨zǫǫ sìı tłeèk'ǫ̀ǫ eyıts'ǫ tłeh deɂǫ̀ǫ̀ edexè k'egele.

Matthew 25:9

“Hanìkò t'eekoa gogı̨ı̨zǫǫ sìı gots'ǫ̀ hagedı, ‘Į̀le, hats'ele ha dìì, hazǫǫ̀ gogha tłeh deghàà ade ha-le. Edegha tłeh dǫ ghǫ nàahdì,’ gògedı.

Luke 10:3

Hòt'a ekǫ aahdè. Edexoahdı, sahzǫ̀ą wezaa, dìga nı k'eɂa lanì dǫ ta ts'ǫ̀ naxeehɂà.

Luke 21:15

Yatı wet'à goahde ha sìı eyıts'ǫ wet'à gots'ı̨ı̨zǫǫ sìı naxıts'ǫ̀-èlı̨ ahłe ha. Eyıt'à dǫ naxık'èch'a gı̨ı̨lı̨ı̨ sìı naxık'èch'a xàyagehtı-le agede ha.

Zezì Wecheekeèdeè 20:29

Setł'axǫǫ̀ dàgode ha sìı wek'èehsǫ. Dìga ı̨ghǫǫ lanì naxıta agede ha, naxıts'ǫ sahzǫ̀ą hazǫǫ̀ dzıìgehɂà ha.

1 Corınth 14:20

Sèot'ı̨ı̨, hòt'a chekoa nàowoò k'ę̀ę̀ nànıahdè-le. Nàowołı̨ı̨ ts'ǫǫ̀hk'e nı̨dè bebìa hołı̨ı̨ k'ègeezǫ-le laaht'e, hanìkò naxınì t'à ǫhdah k'ę̀ę̀ nànıahdè.

2 Corınth 1:12

Godzeè t'à nàowo degaı k'ę̀ę̀ eyıts'ǫ ehkw'ı k'ę̀ę̀ eghàlats'ı̨ı̨dà wek'èts'eezǫ hǫt'e. Nǫ̀htsı̨ wek'ę̀ę̀ dıı nèk'e dǫ gıta eyıts'ǫ naxıta hanì denahk'e eghàlats'ı̨ı̨dà hǫt'e. Dıı nèk'e gots'ǫ wet'à gots'ı̨ı̨zǫǫ nàowoò k'ę̀ę̀ ats'ı̨ı̨t'į̀ nıìle, Nǫ̀htsı̨ wesǫnıwǫ k'ę̀ę̀ ats'ı̨ı̨t'į̀ hǫt'e. Eyı weghǫ xàdahots'edì ha dìì-le.

2 Corınth 11:14

Eyı haget'ı̨ı̨ sìı gogha enıìyah nıìle, wehłı̨ı̨ ededı̨ kò yak'eet'ı̨į̀ degaı edeetsı̨ hǫt'e. Eyıt'à dǫ wehłı̨ı̨ gha eghàlageedaa sìı ededı̨ sı ehkw'ı eghàlageeda laget'ı̨. Nǫǫde nı̨dè dànì eghàlagı̨ı̨dà k'ę̀ę̀ gıghàhòt'à ha.

2 Corınth 11:3

Hanìkò Eve gòocho yeghǫyaàɂǫ xèht'eè naxı̨ sı naxıghǫyaeɂà aweahłe ha sǫnı dehwhǫ t'à naxıghǫ dehjı̨. Naxıdzeè t'à Zezì-Krı ghàdeahtı̨ ı̨lèe sìı eyı ch'à naxınì ekǫ-le ayele ha sǫnı.

2 Corınth 8:20

Eyı sǫǫ̀mba haàtłǫǫ k'ets'elee sìı weghǫ yatı łǫ ha ts'ı̨ı̨wǫ-le.

Phılıppı 2:15

Hanì eghàlaahda nı̨dè hołı̨ı̨ dę nezı̨į̀ aahda ha eyıts'ǫ degaı laaht'e ha. Dǫ ehkw'ı geeda-le xè hołı̨ı̨ k'ę̀ę̀ geedaa sìı gıta nàahdè kò hołı̨ı̨ dę Nǫ̀htsı̨ weza aahłı̨ ha. Gıta whǫ̀ wek'e saı̨dı̨ laaht'e ha,

Colosse 1:9

Eyıt'à, naxıghǫ ts'ıìkw'o gots'ǫ naxıgha yats'ehtı ghǫ nats'et'è-le. Yedàyeh Nezı̨ı̨ t'à deghàà goahsǫ ha eyıts'ǫ t'asìı nıahdì aahde ha t'aats'ǫǫ̀ naxıgha Nǫ̀htsı̨ wets'eekè, hanì-ı̨dè Nǫ̀htsı̨ dànıwǫǫ sìı wek'èahsǫǫ̀ aahde ha.

Colosse 4:5

Dǫ gıgha ehkw'ı-ahodı-le sìı gıts'ǫ̀ goahsǫǫ̀ k'ehoahɂa. Godı nezı̨ı̨ t'à gıxè goahdo gha hòɂǫ taàt'eè nezı̨į̀ gıxè goahdo welì.

1 Thessalonıca 2:10

Naxı̨ naxıgha ehkw'ı-ahodıı sìı dànì naxıta nàts'ı̨ı̨dè ghàà gok'èahsǫ eyıts'ǫ Nǫ̀htsı̨ sı yek'èezǫ hǫt'e. Degaı k'ę̀ę̀ ts'ı̨ı̨dàa, ehkw'ı k'ehots'ı̨ı̨ɂaa, eyıts'ǫ dǫ wı̨ı̨zìı t'asìı gok'e nìdahogį̀ı̨ɂǫ whìle.

1 Thessalonıca 5:22

Nàowołı̨ı̨ hazǫǫ̀ xàɂaa ch'à edek'èahdì.