Mark 15:14 - Nǫ̀htsı̨ Nı̨htł'è

¹⁴ K'àowo Pılate gots'ǫ̀ hadı, “Ayìı gha? Ayìı hoìla hòèhtsı̨ k'èxa?” gòhdı. Hanìkò k'èdaà hòtł'ò yagìzeh, hagedı, “Dechı̨et'aa k'e wedeàhtsò!” gıìhdı.

Mark 15:14 ပူးပေါင်းရင်းမြစ်များ

Matthew 27:19

K'àowo Pılate dǫ-sınìyaehtıı daèhchı̨į̀ k'e wheda ekò wets'èkeè yets'ǫ̀ yatı nìı̨ɂǫ, hayèhdı: “Eyı dǫ t'asawı̨ı̨le-le, ekǫ-le wı̨ı̨zìı hòèhtsı̨ nıìle. Dıı dzęę̀ weghǫ nàwhıhtı̨ t'à sıì daıhɂà,” yèhdı.

Matthew 27:4

Hagòhdı, “Dǫ ekǫ-le eghàlaı̨da-le kò sǫǫ̀mba k'èxa naxıtł'àwııhtı̨ t'à hołı̨ı̨ hòwhıhtsı̨,” gòhdı. “Nı̨ nets'ǫ̀ hoèlı̨ ne,” gıìhdı.

Matthew 27:54

Eghǫǫ-dǫǫ̀ gha k'àowo eyıts'ǫ eghǫǫ-dǫǫ̀ Zezì xogııhdı ı̨lèe sìı dèè nàgoèhdǫ eyıts'ǫ hazǫǫ̀ gıdaà hagòjà ekò, sıì geèhyeh, hagedı, “Ehkw'ı t'à Nǫ̀htsı̨ Weza hǫt'e!” gedı.

Mark 15:13

Dǫ hazǫǫ̀ gezeh, hagedı, “Dechı̨et'aa k'e wedeàhtsò!” gedıì yagìzeh.

Mark 15:15

K'àowo Pılate dǫ hazǫǫ̀ gınì k'ę̀ę̀ ha nıwǫ t'à Barabas gots'ǫ̀ xàèhtłaà ayı̨į̀là. Zezì nàgı̨ı̨hkwaà ayı̨į̀là tł'axǫǫ̀ dechı̨et'aa k'e wedıìtsò ha eghǫǫ-dǫǫ̀ gotł'aàyį̀ı̨htı̨.

Luke 23:21

Hanìkò dǫ k'èdaà gezeh xè nàdahogehdè, “Dechı̨et'aa k'e wedı̨į̀htsò! Dechı̨et'aa k'e wedı̨į̀htsò!” gedıì gezeh.

Luke 23:4

Eyıt'à k'àowo Pılate, yahtıı-gha-k'aodèe eyıts'ǫ dǫ łǫ ełèwhedee ts'ǫ̀ hadı, “Dıı dǫ ayìı wek'e nìdahoehɂà ha sìı wek'èehsǫ-le,” gòhdı.

Luke 23:41

Goxı̨ edet'à dats'ı̨ı̨ɂa hǫt'e. Ekò ededı̨ sìı hojıì hòèhtsı̨ı̨ whìle,” yèhdı.

Luke 23:47

Eghǫǫ-dǫǫ̀-gha-k'àowo wedaà hanàhòwo sìı Nǫ̀htsı̨ ghàsǫedı, hadı, “Dıı dǫ ehkw'ı eda ı̨lè nǫǫ̀,” hadı.

John 18:38

K'àowo Pılate hadı, “Nàowo ehkw'ıı ayìı welè?” yèhdı. Hadı tł'axǫǫ̀ k'àowo Pılate k'achı̨ Israel got'ı̨į̀ ts'ǫ̀ xàèhtła, hadı, “Eyı dǫ ayìı wek'e nìdahoehɂà ha sìı wek'èehsǫ-le,” gòhdı.

John 19:6

Yahtıı-gha-k'aodèe eyıts'ǫ gıcheekeè gıaɂı̨ ts'ǫ̀et'ıì yagìzeh, hagedı, “Dechı̨et'aa k'e wedeàhtsò! Dechı̨et'aa k'e wedeàhtsò!” gedı. Hanìkò k'àowo Pılate hagòhdı, “Naxı̨ neweàhchı, dechı̨et'aa k'e wedıìtsò aweahłe! Sı̨ sìı dıı dǫ ayìı wek'e nìdahoehɂà ha sìı wek'èehsǫ-le,” gòhdı.

Zezì Wecheekeèdeè 13:28

Yek'èxa ełaàwı ha whìle kò ełaàgıìhwhı ha k'àowo Pılate ts'ǫ̀ gogı̨ı̨de.

Zezì Wecheekeèdeè 19:34

Hanìkò ededı̨ Israel got'ı̨į̀ hǫt'e gık'èhoèhzà ekò nàke sadzeè haı̨wa ts'ǫ̀ dǫ hazǫǫ̀ ehghàà yagìzeh, hagedı, “Artemıs, Ephesus got'ı̨į̀ gha nǫ̀htsı̨ deè elı̨!” gedıì yagìzeh.

Hebrew 7:26

Hanì yahtıı-wet'àaɂàa-deè sìı gots'àdı ha dìì-le hǫt'e; degaı elı̨ı̨, hołı̨ı̨ wek'e wheɂǫ-le, hołı̨ı̨-hogehtsı̨ı̨-dǫǫ̀ ta gots'ǫ nıìle, yak'e gote-ts'ǫ̀ nıwıìtı̨ hǫt'e.

1 Peter 1:19

hanìkò Zezì-Krı wedoò wet'àaɂàa t'à edaxàwhahde hǫt'e; ededı̨ Sahzǫ̀ą t'asìıjıı wek'e wheɂǫ-le sìı gohołı̨į̀ k'èxa ełaı̨wo hǫt'e.