John Wenazhıı 8:2 - Nǫ̀htsı̨ Nı̨htł'è

² Eyı tł'axǫǫ̀ yak'eet'ı̨į̀ łǫ̀hdı̨ Nǫ̀htsı̨ nadąą̀ nàgeèhza gìgaat'ı̨. Dechı̨shì łǫ̀hdı̨ gıghǫ̀zha.

John Wenazhıı 8:2 ပူးပေါင်းရင်းမြစ်များ

Matthew 18:10

“Dıı chekoa nechà-lea sìı gıt'àhoòɂà-le dahwhǫ sǫ̀ǫ̀. Ehkw'ı anaxèehsı̨, gıts'ǫ yak'eet'ı̨į̀, Setà yak'e whedaa sìı t'aats'ǫǫ̀ wınì ghàgeeda hǫt'e.

Matthew 24:31

Dechı̨shì hòtł'ò dedı ekìıyeè k'e nı̨dè, Dǫ-wet'àaɂàa-deè edeyak'eet'ı̨į̀ dıı nèk'e hazǫǫ̀ welǫ ts'ǫ̀ gohɂa ha, Nǫ̀htsı̨ dǫ gòį̀hchìı sìı nàgogehtsį̀ ha.

Luke 1:19

Yak'eet'ı̨į̀ yets'ǫ̀ hadı, “Sı̨, Gabrıel aht'e, Nǫ̀htsı̨ wenadąą̀ nàhwho hǫt'e. Godı nezı̨ı̨ neghàehɂà ha nets'ǫ̀ sı̨ı̨hɂà,” yèhdı.

Luke 21:36

Eyıt'à t'aats'ǫǫ̀ kexoahdı, hoìla hawee sìı naxıxè agode ha-le gha yaahtı. Eyıts'ǫ Dǫ-wet'àaɂàa-deè wenadąą̀ nàahza nı̨dè edeghǫ į̀į̀zhaahłı̨ ha-le gha yaahtı,” Zezì gòhdı.

1 Corınth 15:52

Dechı̨shì nǫǫde dedı nı̨dè kǫ̀-naìtł'ı̨ı̨ lanì eyıts'ǫ godaà nagoxò lanì hǫtsaa eładı̨į̀ ats'ede ha. Dechı̨shì hotıì dedı ha hǫt'e, dǫ ełaı̨dèe sìı welǫ whìle ts'ǫ̀ nagìdà ha eyıts'ǫ goxı̨ hazǫǫ̀ eładı̨į̀ ats'ede ha.

1 Thessalonıca 4:16

Gots'ǫ̀ K'àowo ededı̨ xàè yak'e gots'ǫ hodàetła ha hǫt'e. Nǫ̀htsı̨ wets'ǫ dechı̨shì hòtł'ò dedı ha, eyıts'ǫ yak'eet'ı̨deè hòtł'ò xàyahtı ha. Ekòet'ıì dǫ Zezì gıgha ehkw'ı-ahodıı xè ełaàgı̨ı̨dèe sìı ededı̨ t'akwełǫ̀ǫ̀ nagìdà ha.

John Wenazhıı 1:4

John, Asıa nèk'e kǫ̀ta łǫ̀hdı̨ yàgòlaa Nǫ̀htsı̨ wecheekeè nàgedèe sìı dıı godı gots'ǫ̀ ı̨ı̨tł'è: Nǫ̀htsı̨ whaà gots'ǫ wehòhɂǫ, dıì wehòhɂǫ, eyıts'ǫ welǫ whìle ts'ǫ̀ wehòhɂǫ ha sìı, eyıts'ǫ ı̨nì degaı łǫ̀hdı̨ Nǫ̀htsı̨ wenadąą̀ nàgeèhza sìı naxıxè sǫgı̨ı̨wǫ welè eyıts'ǫ naxıxè sìghà hòɂǫǫ̀ agııle.

John Wenazhıı 11:15

Yak'eet'ı̨į̀ łǫ̀hdı̨ t'à whedaa sìı edets'ǫ dechı̨shì yeèhdı ekò yak'e gots'ǫ hòtł'ò dıı hats'edıì hǫt'e, “Gots'ǫ̀ K'àowo eyıts'ǫ wets'ǫ Chrıst xè dıı nèk'e gogha k'àowo gı̨ı̨lı̨į̀ agejà eyıts'ǫ ededı̨ sìı welǫ whìle ts'ǫ̀ K'àowo elı̨ ha,” hats'edıì hǫt'e.

John Wenazhıı 15:1

K'achı̨ yak'e enıìyah deè nàhòwo wègoèht'į̀: yak'eet'ı̨į̀ łǫ̀hdı̨ hoìla łǫ̀hdı̨ wet'à nǫǫde dǫ dagı̨ı̨ɂaà agedle ha sìı dagıale. Eyı wet'à Nǫ̀htsı̨ dǫ nàgoehkwa ghǫ nǫǫt'e ha t'à nǫǫde hǫt'e.

John Wenazhıı 16:1

Eyı tł'axǫǫ̀ Nǫ̀htsı̨kǫ̀-gocho gots'ǫ yak'eet'ı̨į̀ łǫ̀hdı̨ ts'ǫ̀ hòtł'ò dıı hats'edıì hǫt'e, “Sǫǫ̀mbaekwo kw'àyį̀ą łǫ̀hdı̨ dıı nèk'e nałaahtł'ì. Ayìı weyìı whetł'ıı sìı eyı t'à Nǫ̀htsı̨ dǫ nàehkwa ha,” hats'edıì hǫt'e.

John Wenazhıı 8:13

Eyı tł'axǫǫ̀ det'ǫcho yat'a k'et'a wègaat'ı̨. Hòtł'ò ezeh xè hadı, “Hoìla ha, hoìla ha, hoìla nechàa agode ha. Įłaà yak'eet'ı̨į̀ taı dechı̨shì geehdı ha t'à dıı nèk'e dǫ hazǫǫ̀ sıì gıxè hoìla agode ha!” hadıì ezeh.

John Wenazhıı 8:6

Eyı tł'axǫǫ̀ yak'eet'ı̨į̀ łǫ̀hdı̨ dechı̨shì łǫ̀hdı̨ geehdı ha sınìgı̨ı̨de.

John Wenazhıı 9:1

Yak'eet'ı̨į̀ sı̨làı t'à whedaa sìı wets'ǫ dechı̨shì yeèhdı ekò yat'a ts'ǫ dıı nèk'e ts'ǫ̀ whǫ̀ hodàdeèwò wègaat'ı̨. Eyı whǫ̀ sìı ı̨zhıì dèè goyìı gǫǫ̀ɂàa yets'ǫdaà xàede ha ladlì weghǫ̀t'ǫ.