John Wenazhıı 2:14 - Nǫ̀htsı̨ Nı̨htł'è

¹⁴ “Hanìkò t'asìı mǫ̀hdaa naxık'e nìdahoehɂà ha: Naxını dǫ mǫ̀hdaa Balaam wenàowoò k'ę̀ę̀ dǫ hoghàgogeehtǫ. Eyı dǫ sìı Israel got'ı̨į̀ hołı̨ı̨ hogehtsı̨ gha k'àowo Balak hoghàehtǫ ı̨lè. T'asìı nǫ̀htsı̨ą hòèlı̨ı̨ ghàgeedıı sìı gedè agohɂı̨, eyıts'ǫ edezhį̀į̀ t'à hołı̨ı̨ k'alagedè agohɂı̨.

John Wenazhıı 2:14 ပူးပေါင်းရင်းမြစ်များ

Matthew 18:7

“T'asìı nezı̨-le łǫ t'à dǫ hołı̨ı̨ hogehtsı̨ ts'ıhɂǫ̀, dıı nèk'e dǫ gıts'ǫ̀ hoìla ha hǫt'e. Eyı hołı̨ı̨ hazǫǫ̀ hagode ha t'ıį̀t'e, hanìkò dǫ wet'à agot'ı̨ı̨ sìı wegha hoìla ha hǫt'e!

Zezì Wecheekeèdeè 15:29

Bò nǫ̀htsı̨ hòèlı̨ı̨ ghàgeedıı sìı aahdè-le. Edoò aahdǫ-le. Tıts'aàdìı gık'à dahdlì t'à ełǫǫ̀wıı sìı gıkwǫ̀ aahdè-le. Hołı̨ı̨ k'ę̀ę̀ ełek'alaahdè-le. Eyı haàtłǫ k'èahdì nı̨dè naxıxè sìghà ha,” hagedıì gots'ǫ̀ gı̨ı̨tł'è.

Zezì Wecheekeèdeè 21:25

Dǫ eyıì-le xàɂaa gıgha ehkw'ı-ahodıı sìı gıts'ǫ̀ dıı hanì ts'ı̨ı̨tł'è ı̨lè. Bò nǫ̀htsı̨ hòèlı̨ı̨ ghàɂaadìı sìı aahdè-le, edoò aahdǫ-le, tıts'aàdìı gık'à dahdlì t'à ełǫǫ̀wıı sìı gıkwǫ̀ aahdè-le. Naxızhį̀į̀ t'à hołı̨ı̨ k'ę̀ę̀ ełek'alaahdè-le. Eyı haàtłǫ haahłe ha-le gìts'edıì gıts'ǫ̀ ts'ı̨ı̨tł'è ı̨lè,” gıìhdı.

Rome 11:9

Eyıts'ǫ K'àowocho Davıd dıı hadı dek'eèhtł'è: “Ayìı ghǫ shègezhee sìı gıgha ehdzodıì welè, eyıt'à ededı̨ et'ıì gık'èchıìtła ha. Wet'à dagıìtà welè, eyıts'ǫ dànì eghàlagı̨ı̨dà k'èxa dagı̨ı̨ɂa welè.

Rome 14:13

Eyıt'à ełesınìyats'ehtı welè-le. Naxèot'ı̨ naxıt'à hołı̨ı̨ hogehtsı̨ ch'à naxınì nàtsoò aahwhǫ xè edek'èahdì.

Rome 14:21

Bò ghǫ shèts'ezhe-le, jìetì ts'edǫ-le eyıts'ǫ t'asìı wet'à naxèot'ı̨ hołı̨ı̨ hohtsı̨ ha sìı k'alats'edè-le nı̨dè eyı denahk'e nezı̨ hǫt'e.

Rome 9:32

Dànìghǫ ehkw'ıì agede ha dìì? Moses wenàowoò k'ègedì wet'ǫ̀ǫ̀ ehkw'ıì agede ha gı̨ı̨wǫ ı̨lè, hanìkò Nǫ̀htsı̨ gıgha ehkw'ı-ahodı-le t'à ehkw'ıì agede ha dìì. “Kwe wek'edats'ıìtàa” sìı wetegeètł'ıì lagejà.

1 Corınth 1:23

Hanìkò goxı̨ sìı Zezì-Krı dechı̨et'aa k'e ełaı̨wo ghǫ gots'ede hǫt'e. Israel got'ı̨į̀ gık'èch'a ats'edı eyıts'ǫ Greece got'ı̨į̀ gıgha ezhı̨ne k'ę̀ę̀ gots'ede.

1 Corınth 7:2

Hanìkò dıì dǫ łǫ hołı̨ı̨ k'ę̀ę̀ ełek'aladèe t'à dǫzhìı gıtaàt'eè xàè gıts'èkeè gǫ̀hłı̨ nı̨dè nezı̨ hǫt'e, eyıts'ǫ ts'èko sı gıtaàt'eè xàè gıdǫǫ̀ gǫ̀hłı̨ nı̨dè nezı̨ hǫt'e.

Hebrew 13:4

Hots'et'ı̨ı̨ nàowoò sìı nezı̨į̀ wek'èahdì ha hǫt'e. Dǫzhìı eyıts'ǫ wets'èkeè ełets'ǫ̀ ehkw'ı geeda ha, eyıts'ǫ dǫ eyıì-le xè aget'ı̨ ha-le. Dǫ ełexè hołı̨ı̨ hogehtsı̨ı̨ eyıts'ǫ edezhį̀į̀ t'à hołı̨ı̨ k'alagedèe sìı Nǫ̀htsı̨ gosınìyaehtı ha hǫt'e.

1 Peter 2:8

eyıts'ǫ dıı hanì dek'eèhtł'è: “Eyı kwe wet'à dǫ dagıìtà eyıts'ǫ wet'à dèè k'e nàgeetł'ì hǫt'e,” hanì dek'eèhtł'è. Godı nezı̨ı̨ k'ę̀ę̀ geeda-le ts'ıhɂǫ̀ dagıìtà. Gıts'ǫ̀ hagot'ı̨ı̨ sìı hanì gıgha hòɂǫǫ̀ adlà hǫt'e.

2 Peter 2:15

Nàowo ehkw'ıı ts'ǫǫ̀ nıwà agejà, Beyor weza Balaam wenàowoò k'ę̀ę̀ geedaà agejà. Eyı dǫ sìı hołı̨ı̨ ghàlaeda k'èxa sǫǫ̀mba ehtsı̨ı̨ wegha nezı̨.

Jude 1:11

Gıxè hoìla nechà ha! Adǫ̀ weza Caın wenàowołı̨ı̨ k'ę̀ę̀ geède hǫt'e. Įnę̀ę gots'ǫ Balaam ekǫ-le hòèhtsı̨ lanì sǫǫ̀mba gha nàhogehdè, eyıts'ǫ Korah Nǫ̀htsı̨ k'èch'a hòèhtsı̨ lanì gıdıhołè ha hǫt'e.

John Wenazhıı 2:20

“Hanìkò t'asìı ı̨łè naxık'e nìdahoehɂà: Eyı ts'èko Jezebel nakwenàoɂǫǫ edèedıı sìı nàweahɂǫ nıìle. Secheekeè hoghàgoehtǫ t'à ts'ıɂǫ̀ geède, edezhį̀į̀ t'à hołı̨ı̨ k'alagedè eyıts'ǫ t'asìı nǫ̀htsı̨ą hòèlı̨ı̨ ghàgeedıı sìı gedè agohɂı̨.

John Wenazhıı 2:4

“Hanìkò t'asìı ı̨łè naxık'e nìdahoehɂà: T'akwełǫ̀ǫ̀ dànì seghǫnıahtǫ k'ę̀ę̀ seghǫnıahtǫ-le aahjà.

John Wenazhıı 21:8

Hanìkò dǫ gınì nàtso-le sìı, dǫ ehkw'ı-ahodı gı̨ı̨wǫ-le sìı, dǫjıı, dǫ ełaàgehdee dǫǫ̀, hołı̨ı̨ k'alagedèe dǫǫ̀, ı̨k'ǫǫ̀ gı̨ı̨lı̨ı̨, kwe t'à nǫ̀htsı̨ą hòèlı̨ı̨ ts'ǫ̀ yagehtıı, eyıts'ǫ hots'ìı-dǫǫ̀, hazǫǫ̀ kwe dèk'ǫ̀ǫ whehtǫǫ weta ts'ǫ̀ agedle ha. Nàekeè t'à ełaàgede ha,” sets'ǫ̀ hadı.

John Wenazhıı 22:15

Hanìkò hołı̨ı̨-dǫǫ̀ mǫ̀ht'a geèhkw'e ha, ı̨k'ǫǫ̀-gı̨ı̨lı̨ı̨-dǫǫ̀, hołı̨ı̨ k'ę̀ę̀ dǫ k'alagedèe dǫǫ̀, dǫ ełaàgehdee dǫǫ̀, nǫ̀htsı̨ą hòèlı̨ı̨ ts'ǫ̀ yagehtıı dǫǫ̀, eyıts'ǫ hogets'ìı ghageewıı dǫǫ̀, hazǫǫ̀ mǫ̀ht'a geèhkw'e ha.