John Wenazhıı 14:13 - Nǫ̀htsı̨ Nı̨htł'è

¹³ Eyı tł'axǫǫ̀ yak'e gots'ǫ dıı hats'edıì hǫt'e: “Dıı dek'enìı̨tł'è: Jǫ gots'ǫ ı̨daà amìı gots'ǫ̀ K'àowo gıgha ehkw'ı adıı xè ełaàgedee sìı gıxè sìghà hǫt'e,” hats'edıì hǫt'e. Yedàyeh Nezı̨ı̨ hadı, “Hęɂę, hòtł'ò eghàlagı̨ı̨dà k'èxa k'èhogeèɂa ha eyıts'ǫ ayìı dàgı̨ı̨laa sìı t'aats'ǫǫ̀ gıxè whela ha,” hadı.

John Wenazhıı 14:13 ပူးပေါင်းရင်းမြစ်များ

Matthew 3:17

Yak'e gots'ǫ hats'edıì hǫt'e, “Dıı sìı Seza hǫt'e, weghǫneehtǫ eyıts'ǫ weghǫ sìghà dehwhǫ,” hats'edıì hǫt'e.

Luke 16:25

“Hanìkò Abraham yets'ǫ̀ hadı, ‘Ekò seza, dıı nèk'e nàądè ekò t'asìı nezı̨ı̨ zǫ t'à ı̨da ı̨lè; ekò Lazarus t'aa wexè hoìla zǫ ı̨lè. Dıì Lazarus wexè hoı̨zı̨į̀ agòjà, ekò nı̨ sìı nexè hoìla hǫt'e.

Luke 16:9

Eyıt'à dıı hanaxèehsı̨, dıı nèk'e t'asìı naxıts'ǫ sìı wet'à edeàgı̨ą aahtsı̨. Hanì-ı̨dè t'asìı naxıghǫ whìle agòjà nı̨dè, welǫ whìle ts'ǫ̀ dǫ nàdèe sìı goyaahdè anaxegele ha.

Rome 14:8

Ts'eeda nı̨dè gots'ǫ̀ K'àowo wegha ts'eeda hǫt'e, eyıts'ǫ ełaàts'ewı nı̨dè wegha ełaàts'ewı hǫt'e. Eyıt'à ts'eedaa, ts'eeda-le ehk'ę̀ę̀ t'aats'ǫǫ̀ gots'ǫ̀ K'àowo wets'ǫ dǫ ats'ı̨ı̨t'e hǫt'e.

1 Corınth 15:18

Hanì-ı̨dè dǫ Zezì gıgha ehkw'ı-ahodıı xè ełaàgı̨ı̨dèe sìı edaxàgı̨ı̨de-le hǫt'e.

1 Corınth 15:20

Hanìkò Zezì-Krı ełaı̨wo gots'ǫ hotıì naìdà awììdlà hǫt'e, eyıt'à Nǫ̀htsı̨ wenadąą̀, dǫ hazǫǫ̀ ełaı̨dèe sìı gıta gots'ǫ ededı̨ t'akwełǫ̀ǫ̀ naìdà hǫt'e.

1 Corınth 15:58

Eyıt'à sèot'ı̨ı̨, naxınì nàtsoò aahłe. T'asìı wı̨ı̨zìı t'à naxınì nàtso-le awede sǫ̀ǫ̀. Naxıdzeè t'à t'aats'ǫǫ̀ gots'ǫ̀ K'àowo wegha eghàlaahda, k'ètł'ǫ̀ gots'ǫ̀ K'àowo wegha eghàlaahda nıìle, wek'èahsǫ hǫt'e.

2 Corınth 5:8

Eyı sìı hotıì godzeè t'à gogha ehkw'ı-ahodı hǫt'e. Gozhį̀į̀ wets'ǫǫ̀ nàts'edèe gà gots'ǫ̀ K'àowo wexè ats'ı̨ı̨t'ee sìı, eyı denahk'e gogha nezı̨ hǫt'e.

Phılıppı 2:17

Naxıgha ehkw'ı-ahodı t'à, Nǫ̀htsı̨ wecheekeè aahłı̨ ha weghàdeahła, eyıts'ǫ sı̨ sìı Nǫ̀htsı̨ gha ełaehwhı ha tahkò. Eyıt'à Nǫ̀htsı̨ ts'ǫ̀ t'asìı k'eek'ǫ̀ lanì, wegha sezhį̀į̀ k'ehowı. Ełexè Nǫ̀htsı̨ t'asìı weghàts'eɂà ne t'à, naxıxè sınà hǫt'e.

1 Thessalonıca 4:14

Zezì ełaı̨wo eyıts'ǫ naìdà eyı sìı gogha ehkw'ı-ahodı hǫt'e. Eyıt'à dǫ Zezì gıgha ehkw'ı adıı xè ełaàgı̨ı̨dèe sìı Zezì jǫ anajà nı̨dè, Nǫ̀htsı̨ Zezì xè negıìdè agole ha, eyı sìı gogha ehkw'ı-ahodı hǫt'e.

1 Thessalonıca 4:16

Gots'ǫ̀ K'àowo ededı̨ xàè yak'e gots'ǫ hodàetła ha hǫt'e. Nǫ̀htsı̨ wets'ǫ dechı̨shì hòtł'ò dedı ha, eyıts'ǫ yak'eet'ı̨deè hòtł'ò xàyahtı ha. Ekòet'ıì dǫ Zezì gıgha ehkw'ı-ahodıı xè ełaàgı̨ı̨dèe sìı ededı̨ t'akwełǫ̀ǫ̀ nagìdà ha.

1 Thessalonıca 5:10

Zezì gogha ełaı̨wo hǫt'e, eyıt'à ts'eedaa, ełaàts'edee, ehk'ę̀ę̀ t'aats'ǫǫ̀ wexè ts'eeda ha agǫ̀ǫ̀là hǫt'e.

1 Tımothy 5:24

Hołı̨ı̨ hogehtsı̨ gha sìı, dǫ mǫ̀hdaa gıhołı̨į̀ hoɂıì wègaat'ı̨, gıhołı̨į̀ gınakweè wek'èhoedzǫ. Ekò dǫ mǫ̀hdaa sìı gıhołı̨į̀ ekòet'ıì wègaat'ı̨-le t'à nǫǫde nı̨dè wek'èhoedzǫ hǫt'e.

1 Tımothy 5:25

Eyı xèht'eè, Nǫ̀htsı̨ gha nezı̨į̀ eghàlats'ı̨ı̨dà nı̨dè hoɂıì wègaat'ı̨ ha hǫt'e, ekò goılaà mǫ̀hdaa hoɂıì wègaat'ı̨-le kò wek'èhoedzǫǫ̀ adle ha hǫt'e.

John Wenazhıı 1:11

dıı hats'edıì hǫt'e: “Nenazhıı dàgot'ı̨ı̨ sìı enı̨htł'è k'e dek'enìı̨tł'è gà kǫ̀ta łǫ̀hdı̨ Nǫ̀htsı̨ wecheekeè nàgedèe sìı gıts'ǫ̀ anele. Dıı kǫ̀ta łǫ̀hdı̨ hǫt'e: Ephesus, Smyrna, Pergamum, Thıyatıra, Sardıs, Phıladelphıa eyıts'ǫ Laodısıya,” hats'edıì hǫt'e.

John Wenazhıı 10:4

Eezhıı łǫ̀hdı̨ goı̨de kò ayìı dàgedıı sìı dek'enèehtł'è ha dehwhǫ ı̨lè, hanìkò yak'e gots'ǫ sets'ǫ̀ hats'edıì hǫt'e, “Eyı eezhıı łǫ̀hdı̨ dàgedıı sìı dǫ wı̨ı̨zìı ts'ǫ̀ haı̨dı-le eyıts'ǫ dek'enìı̨tł'è-le,” hasèts'edıì hǫt'e.

John Wenazhıı 11:15

Yak'eet'ı̨į̀ łǫ̀hdı̨ t'à whedaa sìı edets'ǫ dechı̨shì yeèhdı ekò yak'e gots'ǫ hòtł'ò dıı hats'edıì hǫt'e, “Gots'ǫ̀ K'àowo eyıts'ǫ wets'ǫ Chrıst xè dıı nèk'e gogha k'àowo gı̨ı̨lı̨į̀ agejà eyıts'ǫ ededı̨ sìı welǫ whìle ts'ǫ̀ K'àowo elı̨ ha,” hats'edıì hǫt'e.

John Wenazhıı 11:19

Eyı tł'axǫǫ̀ yak'e ts'ǫ Nǫ̀htsı̨kǫ̀-gocho enìxàetǫ. Nǫ̀htsı̨kǫ̀-gocho goyìı nakenahòdlı̨ı̨ gha sǫǫ̀mbaekwo-ladzè wègoèht'į̀. Hǫtsaa eezhı xè kǫ̀ naìtł'ı̨, dèè hòtł'ò nàèhdǫ xè ı̨hlı łǫ hodàètł'ı.

John Wenazhıı 16:17

Eyı tł'axǫǫ̀ yak'eet'ı̨į̀ łǫ̀hdı̨ t'à elı̨ı̨ sìı edets'ǫ kw'àyį̀ą yat'a nałayeèhtł'ı ekò Nǫ̀htsı̨kǫ̀-gocho goyìı daèhchı̨cho gots'ǫ hòtł'ò dıı hats'edıì hǫt'e, “Hòt'a enahǫ̀t'e!” hats'edıì hǫt'e.

John Wenazhıı 19:9

Eyı tł'axǫǫ̀ yak'eet'ı̨į̀ sets'ǫ̀ hadı, “Dıı dek'enìı̨tł'è: ‘Amìı eyı sahzǫ̀ą honìdza wets'ǫ nàsı̨ nàgedè ha gıxayaetıı sìı gıxè sìghà hǫt'e,’ ” sets'ǫ̀ hadı. K'achı̨ sets'ǫ̀ hadı, “Dıı sìı xàè Nǫ̀htsı̨ weyatıì hǫt'e,” hadı.

John Wenazhıı 2:1

“Kǫ̀ta Ephesus Nǫ̀htsı̨ wecheekeè nàgedèe sìı dıı yatı gıts'ǫ yak'eet'ı̨į̀ ts'ǫ̀ ı̨ı̨tł'è: “Ededı̨ nàgòts'ehnèe whǫ̀ łǫ̀hdı̨ welatł'aà whela xè ek'aèk'ǫchı̨į̀ łǫ̀hdı̨ ta k'etłoo sìı dıı weyatıì hǫt'e:

John Wenazhıı 2:7

“Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. T'aa hołı̨ı̨ ghǫ hoehnèe sìı ts'ı wet'à ts'eedaa gots'ǫ shètı̨į̀ awehłe ha. Eyı ts'ı sìı Nǫ̀htsı̨ wets'ǫ hoı̨zı̨-nèk'e nàı̨ɂa hǫt'e.

John Wenazhıı 20:6

Eyı t'akwełǫ̀ǫ̀ dǫ nagìdàa sìı degaı agı̨ı̨t'e eyıts'ǫ gıxè sìghà agǫ̀ht'e. K'achı̨ ełaàgııde ha nıìle, hanìkò Nǫ̀htsı̨ wets'ǫ yahtıı gı̨ı̨lı̨ ha eyıts'ǫ ı̨łè-lemì xo gots'ǫ̀ wexè k'àowo gı̨ı̨lı̨ ha.

John Wenazhıı 21:5

Eyı daèhchı̨cho k'e whedaa sìı hadı, “T'asìı hazǫǫ̀ wegòò ahłe ha!” eyıts'ǫ sets'ǫ̀ hadı, “Eyı hazǫǫ̀ dek'enìı̨tł'è, dıı yatı sìı hotıì ehkw'ı hǫt'e eyıts'ǫ weghàà aahda ha hǫt'e.”

John Wenazhıı 22:17

Yedàyeh Nezı̨ı̨ eyıts'ǫ ts'èko honìda ha sìı dıı hagedı, “Hęɂę, gots'ǫ̀ anede!” gedı. Amìı gogeèhkw'ǫǫ sìı, “Hęɂę, gots'ǫ̀ anede!” gedıì welì. Eyıts'ǫ amìı tı ghageewıı sìı tı wet'à ts'eedaa ts'ǫ̀ agııde gà t'asìı k'èxa-le gıìhchı.

John Wenazhıı 6:11

Eyı tł'axǫǫ̀ hazǫǫ̀ ɂeh degoo nedèe gıghǫ̀zha eyıts'ǫ dıı hagèts'edı, “Įłaà whaà hoògǫ gots'ǫ̀ naahɂı̨ ha. Dànì ełaànaxegį̀ı̨hdèe sìı eyı lanì, naxıxèht'eè Nǫ̀htsı̨ wecheekeè gı̨ı̨lı̨ı̨ sìı mǫ̀hdaa ełaàgede ha. Hazǫǫ̀ ełaàgogį̀ı̨hdè tł'axǫǫ̀ nı̨dè ayìı k'enaahɂı̨ ı̨lèe sìı wek'ę̀ę̀ agode ha,” gìts'edıì hǫt'e.