John Wenazhıı 13:16 - Nǫ̀htsı̨ Nı̨htł'è

¹⁶ Dǫ hazǫǫ̀ nàgòts'ehnèe gılà k'e hanì-le-ı̨dè gıts'abeè k'e t'asìı dek'eèhtł'è ha agǫ̀ǫ̀là. Dǫ wet'àaɂàa, dǫ wet'àaɂà-le, dǫ ahxee, dǫ-teèt'ı̨ı̨, dǫ edets'ǫ̀ k'agedèe eyıts'ǫ dǫ edets'ǫ̀ k'agedè-le, hazǫǫ̀ t'asìı gık'e dek'eèhtł'è ha agǫ̀ǫ̀là.

John Wenazhıı 13:16 ပူးပေါင်းရင်းမြစ်များ

Zezì Wecheekeèdeè 26:22

Hanìkò dıı dzęę̀ ts'ǫ̀ Nǫ̀htsı̨ sets'àı̨dì hǫt'e, eyıt'à jǫ nàhwho gà dǫ hazǫǫ̀ wet'àaɂàa eyıts'ǫ wet'àaɂà-le į̀łah gıts'ǫ̀ gohde. Moses eyıts'ǫ nakwenàoɂǫǫ ayìı dàgode ha gedı ı̨lèe sìı k'èch'a gohde nıìle.

1 Corınth 12:13

Yedàyeh Nezı̨ı̨ ı̨łè zǫ t'à hazǫǫ̀ gok'ètaìdzǫ hǫt'e, eyıt'à Zezì-Krı wezhį̀į̀ ı̨łè zǫ ts'ı̨ı̨lı̨į̀ ats'ejà. Israel got'ı̨į̀ ts'ı̨ı̨lı̨, Greece got'ı̨į̀ ts'ı̨ı̨lı̨ kò eyı wet'àaɂà-le ajà, eyıts'ǫ edets'ǫ̀ k'àts'ewo, edets'ǫ̀ k'àts'ewo-le eyı hazǫǫ̀ wet'àaɂà-le ajà, goxı̨ hazǫǫ̀ Yedàyeh Nezı̨ı̨ godzeè yìı adlà, eyı wet'à ı̨łè zǫ lats'ı̨ı̨t'e.

Galatıa 3:28

Zezì-Krı wexè naxı̨ hazǫǫ̀ ı̨łè laaht'e hǫt'e t'à, Israel got'ı̨į̀ eyıts'ǫ Greece got'ı̨į̀ gıxè eładı̨į̀ hòɂǫ-le, dǫ edets'ǫ̀ k'àowo-le, eyıts'ǫ dǫ edets'ǫ̀ k'àowo gıxè eładı̨į̀ hòɂǫ-le, dǫzhìı eyıts'ǫ ts'èko gıxè eładı̨į̀ hòɂǫ-le.

Galatıa 6:17

Eyı weghǫ nǫǫde dıı haehsı̨ ha dehwhǫ, dǫ wı̨ı̨zìı segha hoìla hogıhtsį̀-le. Zezì wegha eghàlaehda k'èxa sezhį̀į̀ k'e seghoò whela hǫt'e.

Ephesus 6:8

Dǫ edets'ǫ̀ k'agedè-le, edets'ǫ̀ k'agedèe, ehk'ę̀ę̀ gots'ǫ̀ K'àowo sìı dǫ hazǫǫ̀ ełèht'eè dànì eghàlagı̨ı̨dà k'èxa goghàhòɂà ha wek'èahsǫ hǫt'e.

Colosse 3:11

Zezì-Krı wegha ts'eeda nı̨dè hazǫǫ̀ ełèts'ı̨ı̨ht'e hǫt'e. Israel got'ı̨į̀, Greece got'ı̨į̀ ełexègı̨ı̨ht'ee, nàgoet'àa, nàgoet'à-le, nàowo eładı̨ı̨ k'ę̀ę̀ geedaa dǫǫ̀, dǫ edets'ǫ̀ k'agedè-le, edets'ǫ̀ k'agedèe, hazǫǫ̀ ełexègı̨ı̨ht'e. Zezì-Krı ededı̨ zǫ gogha K'àowo elı̨, eyıts'ǫ goxı̨ hazǫǫ̀ godzeè yìı eda.

2 Tımothy 3:8

Jannes eyıts'ǫ Jamber lagı̨ı̨t'e. Įnę̀ę whaà eyı dǫ nàke Moses k'èch'a gogı̨ı̨de ı̨lè, eyıts'ǫ nàowo ehkw'ıı k'èch'a eghàlagı̨ı̨dà ı̨lè. Hanıı dǫ edınìłı̨ı̨ k'ę̀ę̀ nànıgedèe sìı Zezì-Krı gıgha ehkw'ı-ahodı-le t'à Nǫ̀htsı̨ sìı gıdę agǫ̀ǫ̀là.

John Wenazhıı 11:18

Dǫ hazǫǫ̀ xàɂaa gìch'è, eyıt'à dıì nàgı̨ı̨hkwa ha. Dǫ ełaı̨dèe sìı dıì gısınìyaetı ha nèhòı̨wo. Nakwenàoɂǫǫ negha eghàlagı̨ı̨dàa, nets'ǫ dǫ gı̨ı̨lı̨ı̨, eyıts'ǫ nets'ǫ̀ nezı̨į̀ kànegı̨ı̨ɂaa sìı nezı̨į̀ gıts'ǫ̀ eghàlaı̨da ha. Eyıts'ǫ dǫ wet'àaɂàa, dǫ wet'àaɂà-le, nek'èagı̨ı̨t'ee sìı nezı̨į̀ gıts'ǫ̀ eghàlaı̨da ha. Hanìkò amìı dıı dèè yedıhohtsı̨ı̨ sìı godıhohtsı̨ ha hǫt'e,” hagedı.

John Wenazhıı 15:2

Tıdeè lanıı, eja wek'e saı̨de xè weta kǫ̀ dèk'ǫ̀ǫ lanıı wègoèht'į̀. Amìı eyı tıts'aàdìı nechàa “ek'ètaekw'eènǫ-daats'ǫ̀-ek'ètaènǫ-daats'ǫ̀-ek'ètaı” (666) wìyeh eyıts'ǫ kwe wek'ę̀ę̀ wègaat'ı̨ı̨ ghǫgeèhnǫǫ sìı eyı tıdeè lanıı gà nàgeèhza, Nǫ̀htsı̨ tł'ık'eetı̨ı̨ goghàyı̨ı̨laa sìı dagıale.

John Wenazhıı 19:18

K'àowocho gıkwǫ̀, eghǫǫ-dǫǫ̀ gha k'aodèe gıkwǫ̀, dǫ wet'àaɂàa gıkwǫ̀, tłı̨cho eyıts'ǫ dǫ gık'eèhkw'ee sìı gıkwǫ̀ ghǫ shèahzhe ha. Dǫ edets'ǫ̀ k'agedèe eyıts'ǫ dǫ edets'ǫ̀ k'agedè-le gıkwǫ̀ eyıts'ǫ dǫ wet'àaɂàa eyıts'ǫ dǫ wet'àaɂà-le gıkwǫ̀, dǫkwǫ̀ hazǫǫ̀ ghǫ shèahzhe ha,” yak'eet'ı̨į̀ gòhdı.

John Wenazhıı 19:20

Hanìkò tıts'aàdìı nechàa dagıachì eyıts'ǫ wets'ǫ nakwenàoɂǫǫ ehkw'ı gode-le sìı eyı sı dagıachì. Eyı nakwenàoɂǫǫ sìı tıts'aàdìı nechàa dahxà enıìyah hòèhtsı̨ t'à dǫ łǫ tıts'aàdìı nechàa wıızì gık'e wheɂǫǫ eyıts'ǫ kwe wek'ę̀ę̀ hòèlı̨ ts'ǫ̀ nàgògı̨ı̨hgèe sìı ts'ıɂǫ̀ geèdeè agǫ̀ǫ̀là. Eyı tıts'aàdìı nechàa eyıts'ǫ wets'ǫ nakwenàoɂǫǫ-łı̨ı̨ ı̨łaà geeda et'ıì, kwe dèk'ǫ̀ǫ ta ts'ǫ̀ gogeèhde.

John Wenazhıı 19:5

Eyı daèhchı̨cho gots'ǫ dıı hats'edıì hǫt'e: “Naxı̨ hazǫǫ̀ wecheekeè yàahłı̨ı̨ sìı, naxı̨ hazǫǫ̀ wek'èaht'ee sìı, eyıts'ǫ dǫ wet'àaɂàa, wet'àaɂà-le yàahłı̨ı̨ sìı Gonǫ̀htsı̨ weghàsǫahdı,” hats'edıì hǫt'e.

John Wenazhıı 20:12

Eyıts'ǫ dǫ ełaı̨dèe sìı gìgoèht'į̀. Dǫ wet'àaɂàa eyıts'ǫ dǫ wet'àaɂà-le hazǫǫ̀ eyı daèhchı̨cho degoo gà nàgeèhza. Enı̨htł'ècho mǫ̀hdaa ts'ǫdaà xàaza wègaat'ı̨, eyıts'ǫ k'achı̨ enı̨htł'è ı̨łè wets'ǫdaà xàatǫ. Eyı enı̨htł'è wek'e dǫ welǫ whìle ts'ǫ̀ geeda gha gıızì dek'eèhtł'è. T'akwełǫ̀ǫ̀ enı̨htł'è whelaa wek'e ayìı dek'eèhtł'èe sìı eyı weghàà dǫ ełaı̨dèe sìı gısınìyaetı hǫt'e.

John Wenazhıı 20:4

Eyı tł'axǫǫ̀ daèhchı̨cho łǫ wègoèht'į̀, dǫ sınìyagehtı ha gıghàhòt'ǫǫ sìı gık'e dèhkw'e. Eyıts'ǫ dǫ łǫ gıdą̀ązhį̀ı̨ senadąą̀ wègoèht'į̀. Zezì wegodıì eyıts'ǫ Nǫ̀htsı̨ weyatıì t'à gogede k'èxa gıkwì k'egı̨ı̨hkàa sìı agı̨ı̨t'e. Tıts'aàdìı nechàa eyıts'ǫ kwe wek'ę̀ę̀ hòèlı̨ ts'ǫ̀ nàgògı̨ı̨hgè-le eyıts'ǫ gıts'abeè eyıts'ǫ gılà k'e tıts'aàdìı nechàa wıızì dek'eèhtł'è-le agı̨ı̨t'e. Eyı dǫ hazǫǫ̀ nagìdà, eyıts'ǫ ı̨łè-lemì xo gots'ǫ̀ Chrıst wexè k'aodèe gı̨ı̨lı̨.

John Wenazhıı 6:15

Dıı nèk'e k'aodèe, gıza hazǫǫ̀, eghǫǫ-dǫǫ̀-gha-k'aodèe hazǫǫ̀, dǫ ahxee, dǫ wet'àaɂàa gı̨ı̨lı̨ı̨, dǫ edets'ǫ̀ k'agedè-le eyıts'ǫ dǫ edets'ǫ̀ k'agedèe hazǫǫ̀ kwe yìı eyıts'ǫ shìh ta kwe whelaa ta nàdegeeɂį̀.

John Wenazhıı 7:3

“Nǫ̀htsı̨ wecheekeè gıts'abeè k'e nàts'eekwį̀ gots'ǫ̀, dèè, tıcho eyıts'ǫ ts'ı tsį̀ahwhı-le,” gòhdı.