John 17:26 - Nǫ̀htsı̨ Nı̨htł'è

²⁶ Nek'ègeezǫ agèhłà, deɂǫ̀ǫ̀ nek'ègeezǫǫ̀ agehłe ha. Hanì-ı̨dè dànì seghǫneètǫǫ sìı ededı̨ sìı hanì ełeghǫnegeètǫǫ̀ agede ha, eyıts'ǫ sı̨ gıxè ı̨łè zǫ laht'e ha,” Zezì hadıì Edetà ts'ǫ̀ xàyahtı.

John 17:26 ပူးပေါင်းရင်းမြစ်များ

John 14:20

Eyı dzęę̀ k'e nı̨dè sı̨ Setà wexè ı̨łè zǫ aht'e wek'èahsǫ ha; naxı̨ sexè ı̨łè zǫ aaht'e eyıts'ǫ sı̨ naxıxè ı̨łè zǫ aht'e wek'èahsǫ ha.

John 14:23

Zezì yets'ǫ̀ hadı, “Dǫ seghǫneètǫ nı̨dè seyatıì k'èı̨t'e ha. Setà yeghǫneètǫ ha, wets'ǫ̀ ats'ede ha, eyıts'ǫ wexè ats'ı̨ı̨t'e ha.

John 15:15

Jǫ gots'ǫ ı̨daà segha eghàlaedaa-dǫǫ̀ naxèehsı̨ ha-le, k'àowo sìı dǫ yegha eghàlaedaa sìı t'asìı hazǫǫ̀ yedaadı nıìle t'à. Setà t'asìı hazǫǫ̀ sets'ǫ̀ hadıı sìı naxıts'ǫ̀ haehsı̨ t'à seàgı̨ą naxèehsı̨ hǫt'e.

John 15:4

Sexè aahda nı̨dè sı̨ sı naxıxè nàhdè ha. Kw'ıhchı̨į̀ wı̨ı̨zìı ts'ı dę whatsǫǫ̀ wek'e jìecho dehshe ha dìì. Ts'ı k'e kw'ıhchı̨į̀ dehshe nı̨dè zǫ, wek'e jìecho dehshe hǫt'e. Eyı xèht'eè naxı̨ sı sedę aahda ha dìì.

John 15:9

“Setà seghǫneètǫ lanì naxıghǫneehtǫ. Naxıghǫneehtǫ t'à t'aats'ǫǫ̀ sexè aaht'e.

John 17:23

Sı̨ gıxè aht'ı̨, eyıts'ǫ nı̨ sexè anet'ı̨. Hotıì ı̨łè zǫ lagııt'è agı̨ı̨le, hanì-ı̨dè dıı nèk'e gots'ǫ dǫ sìı nı̨ seneehɂà, eyıts'ǫ seghǫneètǫ lanì gıghǫneehtǫ gık'èezǫ ha.

John 17:6

“Dıı nèk'e dǫ hazǫǫ̀ seghàneelaa sìı nek'ègeezǫǫ̀ agèhłà. Nets'ǫ agı̨ı̨t'e ı̨lèe sìı seghàgınèela, eyıts'ǫ neyatıì k'èagı̨ı̨t'e.

John 17:8

Yatı seghàneeɂǫǫ sìı gıghàehɂǫ xè gıgha ehkw'ı-ahodı. Nets'ǫ aht'ı̨ hotıì sek'ègeezǫ, eyıts'ǫ nı̨ seneehɂàa sìı gıgha ehkw'ı-ahodı.

John 6:56

Amìı sezhį̀į̀ ghǫ shètı̨ xè sedoò edǫǫ sìı, sexè nàdè ha, eyıts'ǫ sı̨ sı wexè nàhdè ha.

John 8:50

Dǫ seghàsǫgeedı gha jǫ ts'ǫ̀ ahjà nıìle. Hanìkò ededı̨ seghàsǫhoedı ha nıwǫǫ sìı dǫ sınìyaehtı elı̨ hǫt'e.

Rome 8:10

Hanìkò Zezì-Krı naxıdzeè yìı nàde nı̨dè, hołı̨ı̨ ts'ıhɂǫ̀ naxızhį̀į̀ ełaı̨wo lanì, hanìkò Nǫ̀htsı̨ gha ehkw'ı anaxììdlà ts'ıhɂǫ̀ naxıts'ǫ ı̨nì eda hǫt'e.

1 Corınth 1:30

Nǫ̀htsı̨ wets'ıhɂǫ̀ Zezì-Krı wexè aaht'e. Nǫ̀htsı̨ sìı Zezì-Krı t'à gots'ı̨ı̨zǫǫ̀ agǫ̀ǫ̀là, wet'ǫ̀ǫ̀ ehkw'ıì ats'ejà, wet'ǫ̀ǫ̀ degaı ts'ı̨ı̨lı̨, eyıts'ǫ wet'ǫ̀ǫ̀ welǫ whìle ts'ǫ̀ edaxàts'eedè hǫt'e.

1 Corınth 12:12

Gozhį̀į̀ ı̨łè zǫ hǫt'e hanìkò wek'e t'asìı łǫ xàɂaa whela. T'asìı ładı̨ı̨ łǫ wek'e whela kò gozhį̀į̀ ı̨łè zǫ elı̨ hǫt'e. Zezì wexè eyı lanì hǫt'e.

Galatıa 2:20

Zezì-Krı wexè dechı̨et'aa k'e ełaıhwho hǫt'e, eyıt'à sı̨ xàè ehda nıìle, hanìkò Zezì-Krı ededı̨ sedzeè yìı eda hǫt'e. T'aı̨waà sezhį̀į̀ t'à ehda gots'ǫ̀ Nǫ̀htsı̨ Weza segha ehkw'ı-ahodı t'à ehda hǫt'e. Ededı̨ sìı seghǫneètǫ t'à segha ełaı̨wo hǫt'e.

Ephesus 1:6

Edeza ghǫneètǫǫ sìı wets'ıhɂǫ̀ t'asìı k'èxa-le wesǫnıwǫ enıìyah goghàı̨ɂǫ t'à, hazǫǫ̀ weghàsǫts'eedı welì.

Ephesus 3:17

Hanì-ı̨dè naxıgha ehkw'ı-ahodı t'à Zezì-Krı naxıdzeè yìı nàdè welè. Eyıts'ǫ dıı sı gha yahtı: denahk'e ts'ǫ̀ ełeghǫnıahtǫ xè

Ephesus 5:30

Goxı̨ wets'ǫ dǫ ats'ı̨ı̨t'ee sìı wezhį̀į̀ ts'ǫ ats'ı̨ı̨t'e hǫt'e.

Ephesus 5:32

Dıı sìı gogha enıìyah dìì eyıts'ǫ wenıts'eedì ha dìì. Eyı sìı Zezì-Krı eyıts'ǫ wets'ǫ dǫ ghǫ gohde aehsı̨.

Colosse 1:27

Eyı dǫ degaı gı̨ı̨lı̨ı̨ sìı dıı nèk'e dǫ hazǫǫ̀ Nǫ̀htsı̨ k'ègeezǫ-le gıta gots'ǫ Nǫ̀htsı̨ gòį̀hchì agı̨ı̨t'e. Weyatıì enıìyah xè deɂı̨į̀ wheɂǫǫ sìı gık'èezǫǫ̀ agǫ̀ǫ̀là. Eyı weyatıì sìı Zezì-Krı naxıdzeè yìı nàdè awèts'edı, eyı wet'à welǫ whìle ts'ǫ̀ enıìyah xè aahda ha.

Colosse 2:10

eyıts'ǫ naxı̨ sı Zezì-Krı wet'à t'asìı hazǫǫ̀ naxıghǫ̀zha. Ededı̨ k'àowo hazǫǫ̀ gha K'àowodeè elı̨ hǫt'e.

Colosse 3:11

Zezì-Krı wegha ts'eeda nı̨dè hazǫǫ̀ ełèts'ı̨ı̨ht'e hǫt'e. Israel got'ı̨į̀, Greece got'ı̨į̀ ełexègı̨ı̨ht'ee, nàgoet'àa, nàgoet'à-le, nàowo eładı̨ı̨ k'ę̀ę̀ geedaa dǫǫ̀, dǫ edets'ǫ̀ k'agedè-le, edets'ǫ̀ k'agedèe, hazǫǫ̀ ełexègı̨ı̨ht'e. Zezì-Krı ededı̨ zǫ gogha K'àowo elı̨, eyıts'ǫ goxı̨ hazǫǫ̀ godzeè yìı eda.

2 Thessalonıca 2:16

Nǫ̀htsı̨-Gotà goghǫneètǫǫ sìı wesǫnıwǫ t'à welǫ whìle ts'ǫ̀ ts'eeda ha edeyatıì nàtsoo goghàı̨ɂǫ, eyıts'ǫ wet'à goınì nàtsoò agǫ̀ǫ̀là. Gots'ǫ̀ K'àowo Zezì-Krı xàè ededı̨ eyıts'ǫ Nǫ̀htsı̨-Gotà

Hebrew 2:12

Zezì, Nǫ̀htsı̨ ts'ǫ̀ dıı hadı, “Neghǫ sechı gıts'ǫ̀ gohde ha, łą̀ą nègedè nı, gınadąą̀ enıìyah deè anet'e dehsı̨ xè shı̨ t'à neghàsǫehdı ha,” hadı.

1 John 3:24

Amìı yenàowoò k'èı̨t'ee sìı Nǫ̀htsı̨ xè eda hǫt'e, eyıts'ǫ Nǫ̀htsı̨ yexè eda hǫt'e. Yedàyeh Nezı̨ı̨ goghàı̨ɂǫ t'à goxè eda wek'èts'eezǫ hǫt'e.