Ephesus 4:5 - Nǫ̀htsı̨ Nı̨htł'è

⁵ Eyıts'ǫ gots'ǫ̀ K'àowo ı̨łè zǫ gǫ̀hłı̨, gogha ehkw'ı-ahodı ı̨łè zǫ gǫ̀hłı̨, eyıts'ǫ t'asìı ı̨łè zǫ gha gok'ètaìdzı̨ hǫt'e.

Ephesus 4:5 ပူးပေါင်းရင်းမြစ်များ

Matthew 28:19

Eyıt'à hazǫǫ̀ nèk'e ts'ǫ̀ aahde, dǫ hazǫǫ̀ xàɂaa secheekeè aahtsı̨. Nǫ̀htsı̨-Gotà wıızì, Weza wıızì eyıts'ǫ Yedàyeh Nezı̨ı̨ wıızì t'à gık'ètaìdzǫǫ̀ agıahłe.

Zezì Wecheekeèdeè 10:36

Nǫ̀htsı̨ Israel got'ı̨į̀ yatı gots'ǫ̀ ayį̀į̀làa sìı wek'èahsǫ hǫt'e. Zezì dǫ hazǫǫ̀ ts'ǫ̀ k'àowo elı̨ı̨ sìı wets'ıhɂǫ̀ dǫ xè sìghà hòɂǫ hǫt'e. Nǫ̀htsı̨ hanì yatı gots'ǫ̀ ayį̀į̀là ı̨lè.

Zezì Wecheekeèdeè 2:36

“Eyıt'à Israel got'ı̨į̀ hazǫǫ̀ Nǫ̀htsı̨ dànì gogha eghàlaı̨dàa sìı hotıì gık'èezǫ ha: Eyı Zezì dechı̨et'aa k'e wedeàhtsòo sìı Nǫ̀htsı̨ gogha K'àowo yèhtsı̨ eyıts'ǫ Chrıst sı yèhtsı̨,” Peter hadıì dǫ ts'ǫ̀ goı̨de.

Rome 3:30

Israel got'ı̨į̀ gıkwǫ̀ nàt'àa gı̨ı̨lı̨ı̨ sìı Zezì gıgha ehkw'ı-ahodı t'à ehkw'ıì agole ha hǫt'e, eyıts'ǫ dǫ eyıì-le xàɂaa gıkwǫ̀ nàt'à-le sìı ededı̨ sı Zezì gıgha ehkw'ı-ahodı t'à ehkw'ı geedaa k'ę̀ę̀ agole ha hǫt'e.

1 Corınth 1:13

Asį̀į̀ Zezì-Krı ı̨łak'aà awììdlà? Asį̀į̀ Paul naxıgha dechı̨et'aa k'e wedıìtsò nǫǫ̀? Paul wıızì dahxà naxık'ètaìdzǫ nì?

1 Corınth 12:13

Yedàyeh Nezı̨ı̨ ı̨łè zǫ t'à hazǫǫ̀ gok'ètaìdzǫ hǫt'e, eyıt'à Zezì-Krı wezhį̀į̀ ı̨łè zǫ ts'ı̨ı̨lı̨į̀ ats'ejà. Israel got'ı̨į̀ ts'ı̨ı̨lı̨, Greece got'ı̨į̀ ts'ı̨ı̨lı̨ kò eyı wet'àaɂà-le ajà, eyıts'ǫ edets'ǫ̀ k'àts'ewo, edets'ǫ̀ k'àts'ewo-le eyı hazǫǫ̀ wet'àaɂà-le ajà, goxı̨ hazǫǫ̀ Yedàyeh Nezı̨ı̨ godzeè yìı adlà, eyı wet'à ı̨łè zǫ lats'ı̨ı̨t'e.

1 Corınth 12:5

La ładı̨ı̨ łǫ xàɂaa ghàlats'eeda hǫt'e, hanìkò gots'ǫ̀ K'àowo ı̨łè zǫ gha eghàlats'eeda hǫt'e.

1 Corınth 8:6

hanìkò goxı̨ gogha sìı Nǫ̀htsı̨ ı̨łè zǫ gǫ̀hłı̨, eyı sìı Nǫ̀htsı̨-Gotà hǫt'e. Ededı̨ t'asìı hazǫǫ̀ whehtsı̨ eyıts'ǫ ededı̨ wegha ts'eeda hǫt'e. Eyıts'ǫ gots'ǫ̀ K'àowo ı̨łè zǫ gǫ̀hłı̨, eyı sìı Zezì-Krı hǫt'e. Ededı̨ wet'ǫ̀ǫ̀ t'asìı hazǫǫ̀ hòèlı̨, eyıts'ǫ wet'à ts'eeda hǫt'e.

2 Corınth 11:4

Dǫ ładı̨ı̨ naxıts'ǫ̀ nììtła gà Zezì eyıì-le ghǫ hoghànaxeehtǫ nı̨dè naxıgha t'asanìle. Yedàyeh Nezı̨ı̨ naxıghǫ̀t'ǫǫ sìı wedę ı̨nì eładı̨ı̨ naxıgha ehkw'ı-ahodı nı̨dè, hanì-le-ı̨dè godı nezı̨ı̨ naxıghǫ̀t'ǫǫ sìı wedę godı eładı̨ı̨ naxıgha ehkw'ı-ahodı nı̨dè, nàhotì-le gıyatıì ààhchı hǫt'e.

Galatıa 5:6

Zezì-Krı gogha ehkw'ı-ahodı nı̨dè nàgoet'àa, nàgoet'à-le, ehk'ę̀ę̀ gogha wet'àaɂà-le. Edaxàts'eedè ha, gogha ehkw'ı-ahodıı eyı zǫ gogha wet'àaɂà hǫt'e, eyıts'ǫ ełeghǫnets'eètǫ sìı dǫ yek'èezǫ ats'ehɂı̨ hǫt'e.

Phılıppı 2:11

Eyıts'ǫ hazǫǫ̀ edewà t'à dıı hagedı ha, “Zezì-Krı gots'ǫ̀ K'àowo hǫt'e.” Hagedıì Nǫ̀htsı̨-Gotà ghàsǫgeedı ha.

Phılıppı 3:8

Eyı zǫǫ̀-le! Zezì-Krı wek'èehsǫ ha, eyı denahk'e segha wet'àaɂà ne t'à, t'asìı hazǫǫ̀ segha wedę lajà. Sets'ǫ̀ K'àowo gha t'asìı hazǫǫ̀ ɂǫ̀ehde. Zezì-Krı ededı̨ zǫ weehwhǫ, eyıts'ǫ wexè ı̨łè laaht'e ha dehwhǫ t'à t'asìı hazǫǫ̀ segha t'asìı-ts'ıì lajà. Moses wenàowoò k'èaht'e t'à ehkw'ı ehda k'ę̀ę̀ sııtà ha dehwhǫ-le, hanìkò Zezì-Krı segha ehkw'ı adı t'à ehkw'ı ehda k'ę̀ę̀ sııtà ha dehwhǫ. Ehkw'ı ts'eeda k'ę̀ę̀ goıtàa sìı Nǫ̀htsı̨ wedahxà hǫt'e, eyıts'ǫ goxı̨ ehkw'ı adı wets'ı̨ı̨hwhǫ t'à.

Tıtus 1:1

Sı̨ Paul Nǫ̀htsı̨-Gotà wegha eghàlaehda eyıts'ǫ Zezì-Krı wecheekeèdeè aht'e. Nǫ̀htsı̨-Gotà dǫ gòį̀hchìı sìı gıgha ehkw'ı-ahodı agehłe gha eyıts'ǫ nàowo ehkw'ıı wet'à Nǫ̀htsı̨ wek'ę̀ę̀ ts'eeda ha sìı gık'èhoezǫǫ̀ agehłe gha Zezì-Krı dǫ ts'ǫ̀ sı̨ı̨hɂà hǫt'e.

Tıtus 1:4

Tıtus, nets'ǫ̀ eehtł'è. Setł'aà Zezì-Krı gha eghàlaı̨da t'à, xàè seza lanet'e. Nǫ̀htsı̨-Gotà eyıts'ǫ Zezì-Krı Edaxàgolee elı̨ı̨ sìı nets'ǫ̀ sǫgı̨ı̨wǫ welè, eyıts'ǫ nexè sìghà hòɂǫǫ̀ agııle.

Hebrew 13:7

Naxıgha k'aodèe gı̨ı̨lèe sìı dànì Nǫ̀htsı̨ yatıì t'à naxıts'ǫ̀ gogı̨ı̨de ı̨lèe sìı gınaahdì. Ełaàgı̨ı̨dè gots'ǫ̀ dànì gı̨ı̨dàa sìı ghǫ nànıahdè, eyıts'ǫ dànì gıgha ehkw'ı-ahodıı ı̨lèe sìı k'ę̀ę̀ naxıgha ehkw'ı-ahodı welè.

Hebrew 6:6

Nǫ̀htsı̨ ts'ǫǫ̀ ek'èt'à anagejà nı̨dè k'achı̨ edehołı̨į̀ k'egı̨ı̨lı̨į̀ agedle ha dìì hǫt'e. Nǫ̀htsı̨ Weza k'achı̨ dechı̨et'aa k'e wedıìtsò agehɂı̨ lanì, eyıts'ǫ k'achı̨ dǫ gıghàedlò agehɂı̨ t'à edets'ǫ̀ hoìla eghàlageeda hǫt'e.

James 2:18

Hanìkò dǫ sets'ǫ̀ dıı hadı nı̨dè, “Nı̨ negha ehkw'ı-ahodı, hanìkò sı̨ nezı̨į̀ eghàlaehda,” sèhdı nı̨dè, wets'ǫ̀ dıı haehsı̨ ha. “Negha ehkw'ı kò wek'ę̀ę̀ eghàlaı̨da-le sìı weghàıhdà, ekò sı̨ ayìı dàhɂı̨ weghàà segha ehkw'ı-ahodıı sìı weghàı̨daà anehłe ha,” haehsı̨ ha.

1 Peter 3:21

Eyı tı sìı wet'à naxık'ètaìdzǫ lanì hǫt'e, wet'à edaxàwhahde ne t'à. Naxızhį̀į̀ k'e tsǫ̀ whìle adle gha naxık'ètaìdzǫ nıìle, hanìkò wet'à Nǫ̀htsı̨ ts'ǫ̀ sıì naxınì ehkw'ıì ade gha naxık'ètaìdzǫ hǫt'e. Zezì-Krı k'achı̨ naìdà eyıts'ǫ naxık'ètaìdzǫ t'à edaxàwhahde hǫt'e.

2 Peter 1:1

Sı̨ Sımon-Peter, Zezì-Krı wegha eghàlaehda eyıts'ǫ wecheekeèdeè aht'e. Dǫ Nǫ̀htsı̨ gıgha ehkw'ı-ahodıì agììdlàa sìı gıts'ǫ̀ aatł'è hǫt'e. Nǫ̀htsı̨ eyıts'ǫ Zezì-Krı Edaxàgolee gıts'ıhɂǫ̀ ehkw'ı aahdaa k'ę̀ę̀ naxııtà hǫt'e. Goxı̨ gogha ehkw'ı-ahodıì agòìdlàa sìı gogha t'asìı wet'àaɂàa deè hǫt'e, eyı xèht'eè naxı̨ sı naxıgha t'asìı wet'àaɂàa deè hǫt'e.

Jude 1:20

Hanìkò naxı̨ seàgı̨ą aaht'ee sìı degaı k'ę̀ę̀ naxıgha ehkw'ı-ahodı t'à naxınì nàtsoò aahłe, eyıts'ǫ Yedàyeh Nezı̨ı̨ wınì k'ę̀ę̀ yaahtı.

Jude 1:3

Seàgı̨ą, dànì Nǫ̀htsı̨ edaxàgoı̨laa sìı weghǫ naxıts'ǫ̀ eehtł'è ha sıì haehwhǫ ı̨lè, hanìkò dıì nàowo ehkw'ıı k'èahdì ghǫ naxıts'ǫ̀ eehtł'è ha naxıgha wet'àaɂà hǫt'e. Nàowo ehkw'ıı sìı Nǫ̀htsı̨ wets'ǫ dǫ t'aats'ǫǫ̀ gıxè wheɂǫ gha goghàyı̨ı̨ɂǫ hǫt'e.