Ephesus 4:25 - Nǫ̀htsı̨ Nı̨htł'è

²⁵ Eyıt'à naxı̨ hazǫǫ̀ hots'ets'ìı k'ę̀ę̀ goahde-le eyıts'ǫ naxèot'ı̨ ts'ǫ̀ ehkw'ı goahde, Zezì-Krı wezhį̀į̀ ı̨łè zǫ gots'ǫ ats'ı̨ı̨t'e t'à.

Ephesus 4:25 ပူးပေါင်းရင်းမြစ်များ

John 8:44

Wehłı̨ı̨ sìı naxıtà hǫt'e, naxıtà wınì k'ę̀ę̀ eghàlaahda ha dahwhǫ. Kèhoį̀wo gots'ǫ wehłı̨ı̨ eweèt'ı̨ı̨ elı̨ hǫt'e. Nàowo ehkw'ıı wets'ǫ̀-èlı̨-le t'à ehkw'ı eghàlaeda-le. Hots'ìı zǫ t'à gode, eyı weyatıì hǫt'e, eyıts'ǫ hots'ets'ìı nàowoò hazǫǫ̀ yèhtsı̨ hǫt'e.

Rome 12:5

Goxı̨ Zezì-Krı wexè ats'ı̨ı̨t'ee sìı goxè hagǫ̀ht'e. Goxı̨ łǫ ts'eet'eè ats'ı̨ı̨t'e kò gozhį̀į̀ ı̨łè zǫ lanì, eyıts'ǫ ełets'ǫ ats'ı̨ı̨t'e.

1 Corınth 10:17

Łèt'è ı̨łè zǫ hǫt'e eyıts'ǫ goxı̨ hazǫǫ̀ eyı łèt'è ı̨łè weghǫ shèts'ezhe t'à, goxı̨ goı̨tłǫ ats'ı̨ı̨t'e kò wezhį̀į̀ ı̨łè zǫ lats'ı̨ı̨t'e.

2 Corınth 7:14

Wets'ǫ̀ naxıghǫ xàdahohdì ı̨lè, eyıts'ǫ naxıghǫ į̀į̀zhaehłı̨-le asèahłà. T'asìı hazǫǫ̀ naxıts'ǫ̀ hats'edıı sìı ehkw'ı zǫ hǫt'e, eyı xèht'eè Tıtus ts'ǫ̀ naxıghǫ xàdahots'edìı sìı eyı sı ehkw'ı hǫt'e wek'èhoedzǫǫ̀ ajà.

Ephesus 4:15

Hanìkò ełeghǫnets'eètǫ t'à ehkw'ı ełets'ǫ̀ gots'ede ha. Goxı̨ Nǫ̀htsı̨ wets'ǫ dǫ ats'ı̨ı̨t'ee sìı Zezì wezhį̀į̀ lats'ı̨ı̨t'e, eyıts'ǫ Zezì ededı̨ gokwì elı̨ lanì hǫt'e. T'asìı hazǫǫ̀ t'à Zezì-Krı wexè nàts'etsoò ats'ede ha hǫt'e.

Ephesus 4:22

Įnę̀ę dànì naxınìłı̨ı̨ k'ę̀ę̀ aahda ı̨lèe sìı wek'ę̀ę̀ aahda-le gha hoghànaxeètǫ ı̨lè. Hołı̨ı̨ gha hòtł'ò kànıahɂaa sìı wet'à naxınì wedıhołè hǫt'e.

Ephesus 4:31

T'asìı hazǫǫ̀ t'à ełek'èch'a aaht'ee sìı wedę aahłe. Ełets'ǫ̀ naxınì nàìtłoo, ełets'ǫ̀ ààhch'ee, ełetawhıahdèe, ełek'adaahdèe, eyıts'ǫ hołı̨ı̨ hazǫǫ̀ k'ę̀ę̀ k'ehoahɂaa sìı wedę aahłe.

Ephesus 5:30

Goxı̨ wets'ǫ dǫ ats'ı̨ı̨t'ee sìı wezhį̀į̀ ts'ǫ ats'ı̨ı̨t'e hǫt'e.

Colosse 3:8

Hanìkò dıı hazǫǫ̀ wedę aahłe: ts'ìch'ee, goınì nàìtłoo, hołı̨ı̨ k'ę̀ę̀ k'ehots'eɂaa, dǫ k'adats'edèe, eyıts'ǫ whàdagots'etsǫ̀ǫ, eyı hazǫǫ̀ wedę aahłe.

Colosse 3:9

Naxınìłı̨ı̨ k'ę̀ę̀ aahda-le aahjà t'à ełets'ǫ̀ hoahts'ì-le. Naxıgoht'ǫǫ̀ wezǫą yìı xàahde lanì hǫt'e.

1 Tımothy 1:10

ełexè hołı̨ı̨ hogehtsı̨ı̨ dǫǫ̀, dǫzhìı hołı̨ı̨ k'ę̀ę̀ ełek'alagedèe dǫǫ̀, dǫ gıghǫ nàedìı dǫǫ̀, hogets'ìı-dǫǫ̀, eyıts'ǫ nàyaetıı gonı ehkw'ı xàyagehtı-le dǫǫ̀. Dǫ hazǫǫ̀ Nǫ̀htsı̨ enıìyah t'à wegodıì nezı̨ı̨ k'ę̀ę̀ hoghàgoetǫ k'èch'a eghàlageedaa sìı gıgha adlà hǫt'e. Nǫ̀htsı̨ weghàsǫts'eedıı sìı wegodıì t'à dǫ hoghàgeehtǫ ha setł'aà wheɂǫǫ̀ ayį̀į̀là hǫt'e.

1 Tımothy 4:2

Dǫ negezı̨-le sìı eyı nàowo dǫ hoghàgogeehtǫ hǫt'e. Eyı dǫ nezı̨į̀ gìgaat'ı̨ hanìkò hogets'ì agı̨ı̨t'e. Gınì ełaı̨dèe lanì, ayìı ehkw'ıı eyıts'ǫ ayìı ekǫ-le sìı gınıehdì-le.

Tıtus 1:12

Gıts'ǫ nakwenàoɂǫǫ ı̨łè dıı hadı goghǫ goı̨de ı̨lè, “Crete got'ı̨į̀ sìı t'aats'ǫǫ̀ hogets'ì, tıts'aàdìıłı̨ı̨ lagı̨ı̨t'e, eyıts'ǫ gots'egeedì xè bò gha egedì-le,” gòhdı.

Tıtus 1:2

Nǫ̀htsı̨ hots'ì-le sìı, dıı dèè hòèlı̨ kwe gots'ǫ welǫ whìle ts'ǫ̀ ts'eeda agodle gha edeyatıì goghàı̨ɂǫ ı̨lè. Eyıt'à gogha ehkw'ı-ahodı xè nàowo ehkw'ıı k'èts'eezǫ ha dìì-le.

Hebrew 12:1

Dǫ łǫ gıgha ehkw'ı-ahodıı k'ę̀ę̀ gı̨ı̨dàa sìı gomǫǫ̀ goòɂà ts'ǫ̀ geèhkw'e lanì, eyıt'à t'asìı hazǫǫ̀ wet'à goınì nàtso-le sìı wedę ats'ııle. Goınì nàtso-le t'à nàhotì-le gohołı̨į̀ godaèht'è, eyıt'à Nǫ̀htsı̨ wenàowoò k'ę̀ę̀ ts'eeda gha goınì nàtso ats'ı̨ı̨hwhǫ ha hǫt'e.

James 1:21

Eyıt'à hołı̨ı̨ nàowoò hazǫǫ̀ wet'à hołı̨ı̨ k'ę̀ę̀ k'ehoahɂaa sìı wedę aahłe. Nǫ̀htsı̨ yatıì naxıdzeè yìı adlàa sìı k'èeweèt'ı̨ lanì wek'ę̀ę̀ aahda, eyı wet'à edaxànaxeetè ha dìì-le.

1 Peter 2:1

Hanìkò dıì sìı hołı̨ı̨ hazǫǫ̀ k'ę̀ę̀ k'ehoahɂaa, ełeghǫyaahɂàa, degaı daahtsı̨ı̨, ełeghǫ ts'oxoahdıı, ełıızì jıı aahtsı̨ı̨, eyı hazǫǫ̀ wedę aahłe.

John Wenazhıı 21:8

Hanìkò dǫ gınì nàtso-le sìı, dǫ ehkw'ı-ahodı gı̨ı̨wǫ-le sìı, dǫjıı, dǫ ełaàgehdee dǫǫ̀, hołı̨ı̨ k'alagedèe dǫǫ̀, ı̨k'ǫǫ̀ gı̨ı̨lı̨ı̨, kwe t'à nǫ̀htsı̨ą hòèlı̨ı̨ ts'ǫ̀ yagehtıı, eyıts'ǫ hots'ìı-dǫǫ̀, hazǫǫ̀ kwe dèk'ǫ̀ǫ whehtǫǫ weta ts'ǫ̀ agedle ha. Nàekeè t'à ełaàgede ha,” sets'ǫ̀ hadı.

John Wenazhıı 22:15

Hanìkò hołı̨ı̨-dǫǫ̀ mǫ̀ht'a geèhkw'e ha, ı̨k'ǫǫ̀-gı̨ı̨lı̨ı̨-dǫǫ̀, hołı̨ı̨ k'ę̀ę̀ dǫ k'alagedèe dǫǫ̀, dǫ ełaàgehdee dǫǫ̀, nǫ̀htsı̨ą hòèlı̨ı̨ ts'ǫ̀ yagehtıı dǫǫ̀, eyıts'ǫ hogets'ìı ghageewıı dǫǫ̀, hazǫǫ̀ mǫ̀ht'a geèhkw'e ha.