Ephesus 2:3 - Nǫ̀htsı̨ Nı̨htł'è

³ Goxı̨ sı hołı̨ı̨ k'ę̀ę̀ ts'eedaà ekò gıxèts'ı̨ht'e ı̨lè. Hołı̨ı̨ ghats'eewı eyıts'ǫ gonìłı̨ı̨ t'à dàts'ı̨ı̨wǫǫ sìı k'èats'ı̨ı̨t'e ı̨lè. Dǫ hazǫǫ̀ gıxèht'eè gonìłı̨ı̨ k'èxa nàgoehkwa ha gogha hòɂǫ ı̨lè.

Ephesus 2:3 ပူးပေါင်းရင်းမြစ်များ

Dànì Kèhoį̀wo 5:3

Adam ı̨łèakw'eènǫ-daats'ǫ̀-taènǫ (130) weghoò ekò wezaa hotıì yexèht'eè wègaat'ı̨ı̨ wegǫ̀hłı̨, Set wìyeh ayį̀į̀là.

Dànì Kèhoį̀wo 6:5

Gots'ǫ̀ K'àowo dıı nèk'e dǫ sıì hołı̨ı̨ k'ę̀ę̀ geedaà agejàa, gok'èezǫ. Ekìı t'aats'ǫǫ̀ dedzeè t'à hołı̨ı̨ zǫ ghǫ nànıgedè agejà.

Dànì Kèhoį̀wo 8:21

Gots'ǫ̀ K'àowo t'asìı wets'ǫ̀ wek'eek'ǫ̀ǫ sìı wegha nezı̨ t'à edets'ǫ̀ hadı, “Dǫ negechà-lea gots'ǫ t'aats'ǫǫ̀ ededzeè t'à hołı̨ı̨ nàowoò zǫ danıgedè kò, k'achı̨ wı̨ı̨zìı dèè k'e hanì hoìla agohłe ha nıìle. Eyıts'ǫ k'achı̨ wı̨ı̨zìı t'asìı hazǫǫ̀ edaa sìı gıdıhohtsı̨ ha nıìle.

Mark 4:19

hanìkò t'asìı łǫ ghǫ nànıgedè, sǫǫ̀mba łǫ eyıts'ǫ t'asìı łǫ gı̨ı̨wǫ t'à edeghǫyageeɂà lanì geeda. Eyıt'à yatı nezı̨ı̨ wedıhogehtsı̨ xè t'asìı nezı̨ı̨ wı̨ı̨zìı xàhogehwhı-le.

John 1:13

Wezaa gı̨ı̨lı̨ı̨ sìı dǫkwǫ̀ t'à gıgǫ̀hłı̨ı̨ awèts'edı-le, dǫ hanıwǫ t'à le, eyıts'ǫ dǫzhìı wınì k'ę̀ę̀ sı t'à le, hanìkò Nǫ̀htsı̨ dahxà gıgǫ̀hłı̨ t'à Nǫ̀htsı̨ wezaa gı̨ı̨lı̨ hǫt'e.

John 8:44

Wehłı̨ı̨ sìı naxıtà hǫt'e, naxıtà wınì k'ę̀ę̀ eghàlaahda ha dahwhǫ. Kèhoį̀wo gots'ǫ wehłı̨ı̨ eweèt'ı̨ı̨ elı̨ hǫt'e. Nàowo ehkw'ıı wets'ǫ̀-èlı̨-le t'à ehkw'ı eghàlaeda-le. Hots'ìı zǫ t'à gode, eyı weyatıì hǫt'e, eyıts'ǫ hots'ets'ìı nàowoò hazǫǫ̀ yèhtsı̨ hǫt'e.

Zezì Wecheekeèdeè 14:16

Įnę̀ę sìı dıı nèk'e dǫ hazǫǫ̀ edenàowoò k'ę̀ę̀ geeda ı̨lè, hanìkò Nǫ̀htsı̨ edets'ǫ̀ geèlı̨į̀ agǫ̀ǫ̀là.

Rome 1:24

Eyıt'à Nǫ̀htsı̨ sìı goghàèhdı, whatsǫǫ̀ edınìłı̨ı̨ k'ę̀ę̀ geeda ts'ǫ̀ geèlı̨į̀ agǫ̀ǫ̀là. Eyıt'à hołı̨ı̨ k'ę̀ę̀ ełek'alagedè t'à edezhį̀į̀ tsį̀gehwhı.

Rome 11:30

Įnę̀ę naxı̨ sı Nǫ̀htsı̨ k'èaht'e-le ı̨lè, hanìkò Israel got'ı̨į̀ Nǫ̀htsı̨ k'èagı̨ı̨t'e-le ts'ıhɂǫ̀ dıì Nǫ̀htsı̨ naxıts'ǫ̀ wedzeè eteèɂı̨ hǫt'e.

Rome 13:14

Hanìkò dıı haaht'ı̨: Gots'ǫ̀ K'àowo Zezì-Krı wınì k'ę̀ę̀ aahda. Dànì gonìłı̨ı̨ k'ę̀ę̀ k'ehots'eɂaa sìı ghǫ nànıahdè-le.

Rome 2:14

(Ehkw'ı t'à, dǫ eyıì-le xàɂaa sìı Moses wenàowoò gıghǫ̀t'ǫ-le kò ededı̨ whatsǫǫ̀ edınì dahxà nàowodeè k'ę̀ę̀ ehkw'ı k'ehogeɂa hǫt'e. Nàowodeè gıts'ǫ-le kò edınì t'à edegha nàowo gı̨ı̨lı̨.

Rome 5:10

Įłaà Nǫ̀htsı̨ wek'èch'a ts'eeda ekò weza gogha ełaı̨wo t'à Nǫ̀htsı̨ wexè ts'èwhı̨į̀ ts'eedaà agǫ̀ǫ̀là. Nǫ̀htsı̨ wexè ts'èwhı̨į̀ ts'eeda agòìdlà zǫǫ̀-le, dıì Zezì wexè ts'eeda t'à denahk'e edaxàgole ha hǫt'e.

Rome 5:9

Zezì wedoò dahxà ehkw'ı agòìdlà. Ehkw'ı agòìdlà zǫǫ̀-le, Zezì wexè ts'eeda t'à Nǫ̀htsı̨ nàgoehkwa ch'à edaxàts'eedè ha hǫt'e.

Rome 6:12

Eyıt'à naxınìłı̨ı̨ t'anıwǫ k'ę̀ę̀ aahda-le. Naxızhį̀į̀ ełaàwı ha sìı hołı̨ı̨ yets'ǫ̀ k'àowo welè-le.

Rome 7:18

T'asìı nezı̨ı̨ wı̨ı̨zìı sets'ǫ̀-èlı̨ nıìle wek'èehsǫ, sınì hazǫǫ̀ hołı̨ı̨ zǫ hǫt'e. Ayìı nezı̨ı̨ sìı weghàlaehda ha dehwhǫ, hanìkò t'asìı nezı̨ı̨ weghàlaehda ha segha dìì hǫt'e.

Rome 9:22

Eyı lanì Nǫ̀htsı̨ wexè hòɂǫ hǫt'e. Nǫ̀htsı̨ dǫ ts'ǫ̀ wek'èch'a gık'èezǫ ha, eyıts'ǫ dànì t'asìı wegha dìì-le wexè hòɂǫǫ sìı dǫ gık'èezǫ ha nıwǫ nı̨dè wets'ǫ̀ hoèlı̨ hǫt'e. Whaà gots'ǫ dǫ xè wek'èch'a kò goxè ts'èwhı̨į̀ nıwǫ ı̨lè, hanìkò godıhohtsı̨ ha nıwǫ nı̨dè ededı̨ wets'ǫ̀ hoèlı̨ hǫt'e.

1 Corınth 4:7

Amìı dǫ nahk'e aaht'eè anaxį̀į̀là? T'asìı naxıts'ǫ sìı naxıghǫ̀t'ǫ hǫt'e. T'asìı naxıghǫ̀t'ǫ nı̨dè dànìghǫ t'asìı naxıghǫ̀t'ǫ-le lanì xàdahoahdì?

2 Corınth 7:1

Seàgı̨ą, Nǫ̀htsı̨ hanì goxè yatı whehtsı̨ t'à, t'asìı hazǫǫ̀ hołı̨ı̨ ne sìı wedę ats'ııle. Gozhį̀į̀ eyıts'ǫ goınì t'à hołı̨ı̨ hots'ehtsı̨ı̨ sìı k'alats'ııdè-le. Nǫ̀htsı̨ gots'ǫ̀ wek'èch'a sǫ̀ǫ̀ ts'ı̨ı̨wǫ t'à hotıì degaı k'ę̀ę̀ ts'ııdà.

Galatıa 3:22

Hanìkò Nǫ̀htsı̨ Nı̨htł'è k'e, dǫ hazǫǫ̀ hołı̨ı̨ nàowoò gıts'ǫ̀ k'ahowo, dek'eèhtł'è. Hanì ts'ıhɂǫ̀ Zezì-Krı gogha ehkw'ı-ahodı nı̨dè eyı Nǫ̀htsı̨ yatı whehtsı̨ı̨ sìı goghǫ̀t'à ha hǫt'e.

Ephesus 2:2

Hołı̨ı̨ nàowoò k'ę̀ę̀ aahda ı̨lè, eyıts'ǫ dıı nèk'e hołı̨ı̨-hogehtsı̨ı̨-dǫǫ̀ gık'ę̀ę̀ aahda ı̨lè, eyıts'ǫ ı̨nìłı̨ı̨ yat'a ts'ǫ̀ k'àowo elı̨ı̨ sìı wek'èaht'e ı̨lè. Eyı ı̨nìłı̨ı̨ sìı dǫ Nǫ̀htsı̨ k'èagı̨ı̨t'e-le sìı dıì gıgha k'àowo elı̨ hǫt'e.

Ephesus 4:22

Įnę̀ę dànì naxınìłı̨ı̨ k'ę̀ę̀ aahda ı̨lèe sìı wek'ę̀ę̀ aahda-le gha hoghànaxeètǫ ı̨lè. Hołı̨ı̨ gha hòtł'ò kànıahɂaa sìı wet'à naxınì wedıhołè hǫt'e.

Colosse 1:21

Įłàà naxınì t'à Nǫ̀htsı̨ wets'ǫ̀ nıwà dahkw'e ı̨lè. Naxınàowołı̨ı̨ k'ę̀ę̀ aahda ts'ıhɂǫ̀ Nǫ̀htsı̨ wets'ǫ̀ xànıahɂa ı̨lè.

1 Thessalonıca 4:13

Sèot'ı̨ı̨, dǫ ełaàgı̨ı̨dèe sìı gıxè dàgode ha sìı hotıì nezı̨į̀ wek'èahsǫ ha naxıts'ı̨ı̨hwhǫ hǫt'e. Dǫ eyıì-le gıgha ı̨ka whìle lanì, naxèot'ı̨ ełaàgı̨ı̨dèe sìı ghǫ naxıdzeè nànııtì ha naxets'ı̨ı̨hwhǫ-le.

1 Thessalonıca 5:6

Eyıt'à dǫ gıgha ehkw'ı-ahodı-le sìı ekìı gete lanì geeda lats'ııt'è-le. Eyıt'à kexots'ııhdı xè hołı̨ı̨ nàowoò ch'à edek'èts'ııdì.

1 Tımothy 6:9

Dǫ deɂǫ̀ǫ̀ sǫǫ̀mba łǫ gı̨ı̨wǫǫ sìı hołı̨ı̨ nàowoò k'ę̀ę̀ geeda aget'į̀ t'à, gık'èchıìtła laget'į̀. Ezhı̨ne laget'į̀ xè hołı̨ı̨ zǫ k'alagedè ha gı̨ı̨wǫ. Hanì geeda nı̨dè wet'à gıdıhołè ha.

Tıtus 3:3

Įnę̀ę sìı goxı̨ sı gots'ı̨ı̨zǫ-le ı̨lè, ek'èats'ı̨ı̨t'e-le ı̨lè, goghǫyageeɂà eyıts'ǫ gonàowołı̨ı̨ k'ę̀ę̀ zǫ ts'eeda ı̨lè. T'aats'ǫǫ̀ hołı̨ı̨ hots'ehtsı̨ xè ełeghǫ ts'ohots'eedı ı̨lè. Dǫ dzats'ı̨ı̨hwhǫ eyıts'ǫ dǫ godzagı̨ı̨hwhǫ hanì ts'eeda ı̨lè.

1 Peter 1:14

Chekoa edetà k'èı̨t'ee lanì Nǫ̀htsı̨ k'èaht'e. Įnę̀ę godı nezı̨ı̨ k'èahsǫ-le ekò naxınìłı̨ı̨ k'ę̀ę̀ k'ehoahɂa ı̨lè, hanìkò dıì sìı hanì aahda ha nıìle.

2 Peter 2:14

T'aats'ǫǫ̀ gınìłı̨ı̨ t'à ts'èko ghàgeeda, hołı̨ı̨ hogehtsı̨ı̨ gıgha hòt'a-le, dǫ gınì nàtso-le sìı ts'ıɂǫ̀ geele, egedì-le gha nàgeghò. Dǫ hanıı sìı Nǫ̀htsı̨ hòtł'ò nàgoehkwa ha hǫt'e.

2 Peter 2:18

Yatı wet'àaɂà-le t'à xàdahogedì, dǫ gınìłı̨ı̨ t'à hołı̨ı̨ hogehtsı̨ ha gok'alagedè, eyıts'ǫ hołı̨ı̨ k'ę̀ę̀ geedaa gıta gots'ǫ dǫ edaxàwhedee sìı k'achı̨ hołı̨ı̨ hogehtsı̨ ha gok'alagedè.

1 John 2:16

Dıı nàowo sìı dıı nèk'e gots'ǫ hǫt'e: hołı̨ı̨-hogehtsı̨ı̨-dǫǫ̀ ekǫ-le ts'ǫ̀ hòtł'ò kànegı̨ı̨ɂaa, t'asìı ghàgeedaa sìı ghageewı, t'asìı gıts'ǫ eyıts'ǫ ayìı ghàlagı̨ı̨dàa sìı ghǫ xàdahogedì. Eyı hanıı nàowo sìı Nǫ̀htsı̨-Gotà wenàowoò nıìle, dıı nèè gots'ǫ hǫt'e.

1 John 2:8

Hanìkò dıì nàowo gòò ghǫ naxıts'ǫ̀ eehtł'è. Wenàowoò ehkw'ıı sìı Zezì wexè wheɂǫ eyıts'ǫ naxı̨ sı naxıxè wheɂǫ wègaat'ı̨ hǫt'e. Togoòtł'òo hòɂǫǫ sìı whìle agodaade eyıts'ǫ dzęh wedeèdlı̨ı̨ sìı hòt'a gok'e hodàsaı̨dı̨į̀ ajà.