Ephesus 2:12 - Nǫ̀htsı̨ Nı̨htł'è

¹² Ekìıyeè k'e Zezì-Krı wets'ǫ̀ nıwà aaht'e ı̨lè, eyıts'ǫ Israel got'ı̨į̀ gha naxıtà-le ı̨lè, eyı wenaahdì. Eyıt'à ekìıyeè k'e Nǫ̀htsı̨ edets'ǫ dǫ xè nakenawhehtsı̨ı̨ sìı naxıgha ayį̀į̀là-le ı̨lè. Naxıgha ahxe whìle ı̨lè, eyıts'ǫ dıı nèk'e Nǫ̀htsı̨ wedę aahda ı̨lè.

Ephesus 2:12 ပူးပေါင်းရင်းမြစ်များ

Dànì Kèhoį̀wo 15:18

Ekò k'e gots'ǫ̀ K'àowo Abram xè nàowo nàtsoo whehtsı̨, hayèhdı, “Egypt nèk'e ts'ǫ̀ nıwà-le deh nıɂàa gots'ǫ, yeè dehcho Yufrates wìyeh ts'ǫ̀ dèè haı̨hcho nets'ıhɂǫ̀ǫ-dǫǫ̀ gıghàehɂǫ hǫt'e.

Luke 1:72

Eyıts'ǫ gocho etegoèhɂı̨ ha, hadı ı̨lè eyıts'ǫ goxè nakenawhehtsı̨ı̨ degaı sìı yenadì ha,’ hadı ı̨lè.

John 10:16

Sesahzǫ̀ą eyıì-le gǫ̀hłı̨, jǫ gık'èhodìı gots'ǫ agı̨ı̨t'e-le. Ededı̨ sı goyageehwha ha hǫt'e. Gıts'ǫ̀ gohde nı̨dè, segıìkw'o ha hǫt'e. Hanì-ı̨dè sesahzǫ̀ą hazǫǫ̀ ełexè geèhkw'e ha, eyıts'ǫ gok'èdìı-dǫǫ̀ ı̨łè zǫ gǫ̀hłı̨ ha.

John 15:5

“Sı̨ ts'ı laht'e, naxı̨ kw'ıhchı̨į̀ laaht'e. Dǫ sexè eda nı̨dè wexè nàhdè ha. Kw'ıhchı̨į̀ wek'e jìecho łǫ dehshe lanì eda ha. Sedę t'asìı wı̨ı̨zìı haahłe ha dìì hǫt'e.

John 4:22

Naxı̨ dǫ yàahłı̨ı̨ sìı ayìı ts'ǫ̀ yaahtıı sìı wek'èahsǫ nıìle; goxı̨ amìı ts'ǫ̀ yats'ehtıı sìı wek'èts'eezǫ hǫt'e, dǫ edaxàlee sìı Israel got'ı̨į̀ gots'ǫ ne t'à.

Zezì Wecheekeèdeè 2:39

Nǫ̀htsı̨ sìı naxıgha, naxıza gıgha, dǫ hazǫǫ̀ nıwà nàgedèe sìı gıgha, eyıts'ǫ t'aa Nǫ̀htsı̨ gokayahtı ha sìı hanì gogha yatı nìı̨ɂǫ hǫt'e,” gòhdı.

Zezì Wecheekeèdeè 28:20

Eyı hanì nàhòwo t'à naxıkàwhıhɂà hǫt'e, eyıts'ǫ naxıts'ǫ̀ gohde ha dehwhǫ t'à. Israel got'ı̨į̀ dǫ ı̨łè gıkanıèɂàa sìı eyı wets'ıhɂǫ̀ dıı satsǫ̀tł'ıì sek'e whela hǫt'e,” Paul gòhdı.

Zezì Wecheekeèdeè 3:25

Nakwenàoɂǫǫ ayìı ghǫ gogı̨ı̨de ı̨lèe sìı naxıgha hǫt'e eyıts'ǫ ı̨dèe whaà, Nǫ̀htsı̨ naxıcho xè nakenawhehtsı̨ı̨ sìı naxıgha hǫt'e. Abraham ts'ǫ̀ dıı hadı ı̨lè, ‘Nets'ıhɂǫ̀ǫ-dǫǫ̀ wet'à dıı nèk'e dǫ hazǫǫ̀ gıxè sìghà hòɂǫ ha hǫt'e,’ dek'eèhtł'è.

Rome 9:8

Eyıt'à dıı hats'edı ha dìì-le, Abraham wets'ıhɂǫ̀ǫ-dǫǫ̀ hazǫǫ̀ Nǫ̀htsı̨ weza gha gııtà nıìle, hanìkò Nǫ̀htsı̨ chekoa Abraham ghàyele ha dıı sìı eyı zǫ Abraham weza gha gııtà ha hǫt'e.

Galatıa 4:8

Įnę̀ę Nǫ̀htsı̨ k'èahsǫ-le ekò xàè nǫ̀htsı̨ agı̨ı̨t'e-le sìı naxıts'ǫ̀ k'agedè ı̨lè.

Ephesus 2:19

Eyıt'à naxı̨ sìı Nǫ̀htsı̨ ts'ǫ̀ nıwà aaht'e-le aahjà, hanìkò Nǫ̀htsı̨ wets'ǫ dǫ gıxè aaht'e, eyıts'ǫ Nǫ̀htsı̨ weza aaht'e.

Ephesus 4:18

Gınì t'à gıxè togoòtł'ò lanì t'à Nǫ̀htsı̨ ts'ǫǫ̀hk'e t'asìı nıgeedì-le xè gık'ę̀ę̀ eda-le. Ededzeè t'à egeèhkw'ǫ ha gı̨ı̨wǫ-le xè gıkwì nàtsoo t'à Nǫ̀htsı̨ nàowoò k'ègeezǫ-le hǫt'e.

Colosse 1:21

Įłàà naxınì t'à Nǫ̀htsı̨ wets'ǫ̀ nıwà dahkw'e ı̨lè. Naxınàowołı̨ı̨ k'ę̀ę̀ aahda ts'ıhɂǫ̀ Nǫ̀htsı̨ wets'ǫ̀ xànıahɂa ı̨lè.

Colosse 1:27

Eyı dǫ degaı gı̨ı̨lı̨ı̨ sìı dıı nèk'e dǫ hazǫǫ̀ Nǫ̀htsı̨ k'ègeezǫ-le gıta gots'ǫ Nǫ̀htsı̨ gòį̀hchì agı̨ı̨t'e. Weyatıì enıìyah xè deɂı̨į̀ wheɂǫǫ sìı gık'èezǫǫ̀ agǫ̀ǫ̀là. Eyı weyatıì sìı Zezì-Krı naxıdzeè yìı nàdè awèts'edı, eyı wet'à welǫ whìle ts'ǫ̀ enıìyah xè aahda ha.

Colosse 1:5

Yak'e t'asìı deè naxıdawhelaa sìı naxıgha ehkw'ı-ahodı t'à dǫ ghǫnıahtǫ. Yatı ehkw'ıı sìı weàhkw'ǫ ı̨lè t'à, eyı t'asìı deè naxıdawhelaa sìı hòt'a wek'èahsǫ hǫt'e. Eyı yatı ehkw'ıı sìı godı nezı̨ı̨

1 Thessalonıca 4:13

Sèot'ı̨ı̨, dǫ ełaàgı̨ı̨dèe sìı gıxè dàgode ha sìı hotıì nezı̨į̀ wek'èahsǫ ha naxıts'ı̨ı̨hwhǫ hǫt'e. Dǫ eyıì-le gıgha ı̨ka whìle lanì, naxèot'ı̨ ełaàgı̨ı̨dèe sìı ghǫ naxıdzeè nànııtì ha naxets'ı̨ı̨hwhǫ-le.

1 Thessalonıca 4:5

Dǫ Nǫ̀htsı̨ k'ègeezǫ-le lanì naxınìłı̨ı̨ t'anıwǫ k'ę̀ę̀ aahda-le.

2 Thessalonıca 2:16

Nǫ̀htsı̨-Gotà goghǫneètǫǫ sìı wesǫnıwǫ t'à welǫ whìle ts'ǫ̀ ts'eeda ha edeyatıì nàtsoo goghàı̨ɂǫ, eyıts'ǫ wet'à goınì nàtsoò agǫ̀ǫ̀là. Gots'ǫ̀ K'àowo Zezì-Krı xàè ededı̨ eyıts'ǫ Nǫ̀htsı̨-Gotà

1 Tımothy 1:1

Sı̨ Paul, Nǫ̀htsı̨ Edaxàgolee sìı eyıts'ǫ Zezì-Krı wet'ǫ̀ǫ̀ welǫ whìle ts'ǫ̀ ts'eeda ha sìı gıdahxà Zezì-Krı wecheekeèdeè aht'e.

Hebrew 11:34

Eyı dǫ sìı gıgha ehkw'ı-ahodı ts'ıhɂǫ̀, kǫ̀ nàtsoo dèk'ǫ̀ǫ kò gıxèhdı-le, behcho t'à ełaàgogìhde ch'à kwı̨geèhde, nàgetso-le sǫnı kò nàgetsoò agììdlà, eyıts'ǫ ełegegǫ gha nàgeghò agejà xè eghǫǫ-dǫǫ̀ eyıì-le ghǫ geèhnǫ.

Hebrew 6:18

Nǫ̀htsı̨ sìı t'asìı nàke ładı̨į̀ adle ha-le t'à yatı whehtsı̨ hǫt'e, eyı weghàà Nǫ̀htsı̨ hots'ì ha honàedı nıìle wek'èts'eezǫ. Goxı̨ hoìla ch'à edaxàgoeze gha Nǫ̀htsı̨ ts'ǫ̀ kwı̨ts'eèhdee sìı eyı ghǫ goınì nàtso welì.

Hebrew 8:6

Hanìkò Zezì la weghǫ̀t'ǫǫ sìı yahtıı-wet'àaɂàa-deè gılaà nahk'e wet'àaɂà hǫt'e. Nakenahòdlı̨ı̨ wegòò k'ę̀ę̀ dǫ gha eyıts'ǫ Nǫ̀htsı̨ gha tanı wheda. Eyı nakenahòdlı̨ı̨ wegòò sìı ı̨nę̀ę gots'ǫ nakenahòdlı̨ı̨ nahk'e elı̨ hǫt'e, eyıts'ǫ yatı denahk'e nezı̨į̀ whehtsı̨ k'e wehòèlı̨ hǫt'e.

1 Peter 1:21

Wets'ıhɂǫ̀ Nǫ̀htsı̨-Gotà naxıgha ehkw'ı-ahodı eyıts'ǫ edaxànaxeehtè gha naxınì nàtso. Nǫ̀htsı̨-Gotà ededı̨ sìı Zezì-Krı k'achı̨ naìdà ayį̀į̀là hǫt'e eyıts'ǫ wexè enıìyah hòɂǫǫ̀ ayį̀į̀là.

1 Peter 1:3

Nǫ̀htsı̨, Zezì-Krı wetà, weghàsǫts'eedı welè. Sıì gots'ǫ̀ wedzeè eteèɂı̨ t'à k'achı̨ dǫ nats'edlı̨į̀ agǫ̀ǫ̀là hǫt'e. Gots'ǫ̀ K'àowo Zezì naìdà ts'ıhɂǫ̀, ts'eeda ha gogha hòɂǫǫ̀ ayį̀į̀là.

1 Peter 3:15

Hanìkò naxıdzeè t'à Zezì-Krı naxıts'ǫ̀ K'àowo elı̨į̀ aahłe. Naxıgha ehkw'ı-ahodı ghǫ dǫ danaxeehke nı̨dè eyı ghǫ yatı weahɂà gha ts'atà dahkw'e ha hǫt'e. Naxıdzeè nezı̨ı̨ t'à wets'ǫ̀ goahde eyıts'ǫ eyı dǫ nezı̨į̀ wets'ǫ̀ naahɂa.

1 John 3:3

Dǫ hazǫǫ̀ eyı hagode ha gıgha ehkw'ı-ahodıı sìı degaı k'ę̀ę̀ edek'ègedì ha hǫt'e, Zezì-Krı dànì degaı elı̨ k'ę̀ę̀.