Dànì Kèhoį̀wo 26:3 - Nǫ̀htsı̨ Nı̨htł'è

³ Łatsaa dıı yeè nèk'e nàądè, nexè aht'ı̨ ha eyıts'ǫ nexè sìghà hòɂǫǫ̀ agohłe ha. Nı̨ eyıts'ǫ nets'ıhɂǫ̀ǫ-dǫǫ̀ dıı dèè hazǫǫ̀ naxıghàehɂà ha. Netà Abraham wets'ǫ̀ yatı nàtsoo xàyaehtıı sìı wek'ę̀ę̀ hòɂǫǫ̀ agohłe ha.

Dànì Kèhoį̀wo 26:3 ပူးပေါင်းရင်းမြစ်များ

Dànì Kèhoį̀wo 12:7

Ekǫ nèk'e gots'ǫ̀ K'àowo Abram ts'ǫ̀ wègoèht'į̀, hayèhdı, “Jǫ dèè gòɂǫǫ sìı nets'ıhɂǫ̀ǫ-dǫǫ̀ gıghàehɂà ha,” yèhdı. Eyıt'à Abram, eyı nèk'e gots'ǫ̀ K'àowo ts'ǫ̀ t'asìı k'eehk'ǫ̀ gha kwe ełeka nèyı̨ı̨wa t'à kwe-ladà whehtsı̨.

Dànì Kèhoį̀wo 13:15

Dèè hazǫǫ̀ weghàı̨daa sìı nı̨ eyıts'ǫ nets'ıhɂǫ̀ǫ-dǫǫ̀ naxıghàehłe ha, welǫ whìle ts'ǫ̀ naxıghaelı̨ ha.

Dànì Kèhoį̀wo 13:17

Dıı dèè hazǫǫ̀ neghàehłe ha hǫt'e, eyıt'à dıı dèè hazǫǫ̀ wek'e k'eı̨tło,” gots'ǫ̀ K'àowo Abram ts'ǫ̀ hadı.

Dànì Kèhoį̀wo 15:18

Ekò k'e gots'ǫ̀ K'àowo Abram xè nàowo nàtsoo whehtsı̨, hayèhdı, “Egypt nèk'e ts'ǫ̀ nıwà-le deh nıɂàa gots'ǫ, yeè dehcho Yufrates wìyeh ts'ǫ̀ dèè haı̨hcho nets'ıhɂǫ̀ǫ-dǫǫ̀ gıghàehɂǫ hǫt'e.

Dànì Kèhoį̀wo 17:19

Nǫ̀htsı̨ yets'ǫ̀ hadı, “Hęɂę, hanìkò nets'èkeè Sarah nezaa nìhtè ha, Isaac wìyeh awı̨ı̨le ha. Ededı̨ wexè nàowo nàtsoo ehtsı̨ ha, eyıts'ǫ wetł'axǫǫ̀ wets'ıhɂǫ̀ǫ-dǫǫ̀ welǫ whìle ts'ǫ̀ gıxè senàowoò k'ę̀ę̀ eghàlaehda ha.

Dànì Kèhoį̀wo 17:8

Dıì Kanan nèk'e xàhtǫ lanì wek'e nàądè kò dıı dèè hazǫǫ̀ welǫ whìle ts'ǫ̀ neghaelı̨į̀ ahłe ha. Eyıts'ǫ netł'axǫǫ̀ nets'ıhɂǫ̀ǫ-dǫǫ̀ gı̨ı̨lı̨ı̨ sìı dıı dèè gıghaelı̨į̀ ahłe ha, eyıts'ǫ Sı̨ Gınǫ̀htsı̨ ehłı̨ ha,” yèhdı.

Dànì Kèhoį̀wo 20:1

Abraham eyı nèk'e gots'ǫ naèhtła, Negev nèk'e ts'ǫ̀ ajà. Kǫ̀ta nàke Kadesh eyıts'ǫ Shur gòyeh goge nàı̨dè. Kǫ̀ta Gerar ekǫ sìghaı̨waà ts'ǫ̀ nàı̨dè.

Dànì Kèhoį̀wo 25:11

Abraham ełaı̨wo tł'axǫǫ̀ Nǫ̀htsı̨ Isaac xè sìghà hòɂǫǫ̀ ayį̀į̀là. Ekò k'e Isaac Ber-Lahaı-Roı gòyeh gà nàde ı̨lè.

Dànì Kèhoį̀wo 26:12

Isaac eyı nèk'e t'asìı dehshee nìı̨la. Gots'ǫ̀ K'àowo yegha sìghà agǫ̀ǫ̀là t'à eyı xo k'e et'ıì t'asìı dehshee ı̨łèakw'eènǫ deɂǫ̀atłǫ nàwhehtsı̨.

Dànì Kèhoį̀wo 26:14

Sahzǫ̀ą eyıts'ǫ ejıe łǫ wets'ǫ eyıts'ǫ wecheekeè łǫ t'à Fılıstea got'ı̨į̀ gıghǫ ts'ohogeedı.

Dànì Kèhoį̀wo 26:24

Eyı toò k'e gots'ǫ̀ K'àowo yets'ǫ̀ wègoèht'į̀, hayèhdı, “Netà Abraham Wenǫ̀htsı̨ aht'e. Nek'èhdì ne t'à nı̨ı̨jı̨-le. Nexè sìghà hòɂǫǫ̀ agohłe ha eyıts'ǫ nets'ıhɂǫ̀ǫ-dǫǫ̀ łǫǫ̀ agehłe ha. Secheekeè Abraham wets'ıhɂǫ̀ negha hagohłe ha,” yèhdı.

Dànì Kèhoį̀wo 28:13

Įdòo dechı̨ehka weka gots'ǫ̀ K'àowo nàwo, yets'ǫ̀ dıı hadı, “Nets'ǫ̀ K'àowo aht'e, necho Abraham Wenǫ̀htsı̨ aht'e, eyıts'ǫ Isaac Wenǫ̀htsı̨ aht'e. Nı̨ eyıts'ǫ nets'ıhɂǫ̀ǫ-dǫǫ̀ dıı dèè wek'e wheętı̨ı̨ sìı naxıghàehɂà ha.

Dànì Kèhoį̀wo 28:15

Nexè aht'e ha. Edı̨į̀ ts'ǫ̀ k'ehoı̨hwhoo sìı nexoehdı ha, eyıts'ǫ jǫ nèk'e ts'ǫ̀ naneehchı ha. Seyatıì neghàehɂǫǫ sìı wek'ę̀ę̀ hòèhtsı̨ gots'ǫ̀ nets'ǫǫ̀ anahde ha-le,” yèhdı.

Dànì Kèhoį̀wo 31:3

Eyı tł'axǫǫ̀ gots'ǫ̀ K'àowo Jacob ts'ǫ̀ hadı, “Necho gınèk'e nèot'ı̨ gıts'ǫ̀ anaąde, nexè aht'ı̨ ha,” yèhdı.

Dànì Kèhoį̀wo 35:12

Netseè Abraham eyıts'ǫ netà Isaac, dèè gıghàehɂǫǫ sìı nı̨ sı neghàehɂà ha, eyıts'ǫ netł'axǫǫ̀ nets'ıhɂǫ̀ǫ-dǫǫ̀ sı gıghàehɂà ha,” Nǫ̀htsı̨ yèhdı.

Dànì Kèhoį̀wo 39:2

Nǫ̀htsı̨ Joseph k'èdì t'à Joseph wexè nezı̨į̀ hòɂǫǫ̀ agòjà, wets'ǫ k'àowo Potıfar wekǫ̀ nàdè.

Dànì Kèhoį̀wo 39:21

Nǫ̀htsı̨ yek'èdì. Joseph ts'ǫ̀ wedzeè eteèɂı̨ t'à dǫ-danìı̨laa-kǫ̀ ts'ǫ̀ k'àowo Joseph ts'ǫ̀ sǫnıwǫǫ̀ ayį̀į̀là.

Dànì Kèhoį̀wo 48:21

Eyı tł'axǫǫ̀ Israel, Joseph ts'ǫ̀ hadı, “Hòt'a ełaehwhı ha nìkw'o, hanìkò Nǫ̀htsı̨ nexè at'ı̨ ha, eyıts'ǫ necho gınèk'e ts'ǫ̀ anele ha.

Dànì Kèhoį̀wo 50:24

Eyı tł'axǫǫ̀ Joseph edı̨ı̨de gots'ǫ̀ hadı, “Hòt'a ełaehwhı ha nìkw'o. Hanìkò Nǫ̀htsı̨ naxıts'àdı ha hǫt'e. Jǫ nèk'e ts'ǫ xànaxeewa ha, Kanan nèk'e ts'ǫ̀ anaxele ha. Abraham, Isaac eyıts'ǫ Jacob xè yatı nàtsoo whehtsı̨ı̨ sìı k'ę̀ę̀ eghàlaeda ha,” gòhdı.

Phılıppı 4:9

T'asìı hazǫǫ̀ hoghànaxeèhtǫ sìı k'ę̀ę̀ aahda. Yatı hazǫǫ̀ wet'à nezı̨į̀ aahda ha naxıghàıhɂǫǫ sìı, eyıts'ǫ naxıdaà dànì ıhdàa, eyı hazǫǫ̀ wek'ę̀ę̀ aahda. Hanì-ı̨dè Nǫ̀htsı̨ naxıxè sìghà hòɂǫ ayele ha.

Hebrew 11:9

Wegha ehkw'ı ahodı t'à dèè weghǫ̀t'à ha sìı k'e xàhtǫ lanì nı̨hbàa yìı nàı̨dè. Isaac eyıts'ǫ Jacob ededı̨ sı Nǫ̀htsı̨ eyı xèht'eè goxè yatı whehtsı̨ı̨ sìı ededı̨ sı ekǫ xàhtǫ lanì nı̨hbàa yìı nàgı̨ı̨dè.

Hebrew 6:17

Nǫ̀htsı̨ edeza edeyatıì goghàı̨ɂǫǫ sìı t'aats'ǫǫ̀ edeyatıì k'èdì ha gık'èezǫ ha nıwǫ t'à, ededı̨ edet'à yatı nàtsoo whehtsı̨ ı̨lè.