Colosse 2:2 - Nǫ̀htsı̨ Nı̨htł'è

² Gıdzeè nàtso ha, eyıts'ǫ dǫ ı̨łè lanì ełeghǫnegeètǫ ha, gıgha daıhɂa. Hanì-ı̨dè deghàà t'asìı k'ègeezǫǫ̀ agede ha, eyıts'ǫ Nǫ̀htsı̨ t'asìı deɂı̨į̀ whehɂǫǫ sìı k'ègeezǫǫ̀ agede ha, Zezì-Krı k'ègeezǫǫ̀ agede ha t'à.

Colosse 2:2 ပူးပေါင်းရင်းမြစ်များ

Matthew 11:25

Ekìıyeè k'e Zezì hadı, “Setà, neghàsǫehdı, yak'e eyıts'ǫ dıı nèk'e ts'ǫ̀ K'àowo anet'e. Dǫ gogı̨ı̨zǫǫ xè hoghàgeètǫǫ sìı eyı hazǫǫ̀ gıch'à deɂı̨į̀ wheɂǫ anelà, hanìkò chekoa nechà-lea sìı gık'èezǫǫ̀ anelà.

Matthew 11:27

“Setà t'asìı hazǫǫ̀ setł'aà whelaà ayı̨į̀là. Dǫ wı̨ı̨zìı Nǫ̀htsı̨ Weza k'èezǫ nıìle; Nǫ̀htsı̨-Gotà zǫ yek'èezǫ. Dǫ wı̨ı̨zìı Nǫ̀htsı̨-Gotà k'èezǫ nıìle; Weza zǫ yek'èezǫ hǫt'e. Eyıts'ǫ Weza amìı gòìhchıı sìı Nǫ̀htsı̨-Gotà k'ègeezǫǫ̀ agohɂı̨.

Matthew 13:11

Eyıt'à Zezì gots'ǫ̀ hadı, “Naxı̨ sìı Nǫ̀htsı̨ Wenàowoò k'ę̀ę̀ hòɂǫǫ k'èahsǫ ha naxıghàhòt'ǫ hǫt'e, hanìkò dǫ eyıì-le sìı hanì gıghàhòt'ǫ nıìle.

Luke 1:1

K'àowo Theophılus, ı̨dèe whaà yatı goghǫ̀t'ǫ wek'ę̀ę̀ goxè dànàhòwoo sìı dǫ łǫ gıxàeta xè gıghǫ gı̨ı̨tł'è ı̨lè.

John 10:30

Sı̨ eyıts'ǫ Setà sı ı̨łè zǫ lawììt'e,” Zezì gòhdı.

John 10:38

Hanìkò Setà xèht'eè eghàlaehda nı̨dè, naxıgha ehkw'ı aehsı̨-le kò enıìyah ghàlaehdaa sìı eyı weghàà naxıgha ehkw'ı-ahodı welè. Hanì-ı̨dè, Setà sexè at'ı̨ eyıts'ǫ sı̨ Setà xè aht'ı̨ı̨ sìı, eyı wek'èahsǫ xè wenıahdì ha,” Zezì gòhdı.

John 16:15

T'asìı hazǫǫ̀ Setà wets'ǫ sìı sets'ǫ hǫt'e. Eyıt'à dıı hanaxèehsı̨, ‘Yedàyeh Nezı̨ı̨ ayìı sets'ǫ ne sìı yìhchı gà wek'èahsǫ anaxele ha.’

John 17:3

Welǫ whìle ts'ǫ̀ ts'eedaa ts'edıı sìı dıı awèts'edı: Nı̨ nek'ègeezǫ ha, nı̨ zǫ Nǫ̀htsı̨ ehkw'ıı anet'e gık'èezǫ ha, eyıts'ǫ Zezì-Krı, jǫ ts'ǫ̀ weneehɂàa sìı, gık'èezǫ ha.

John 5:17

“Nǫ̀htsı̨ Dzęę̀ k'e kò Setà t'aats'ǫǫ̀ edılaà ghàlaeda hǫt'e t'à, sı̨ sı t'aats'ǫǫ̀ eghàlaehda hǫt'e,” Zezì gòhdı.

John 5:23

Hanì-ı̨dè dǫ hazǫǫ̀ Gotà ts'ǫ̀ nezı̨į̀ nageɂa lanì Weza ts'ǫ̀ nezı̨į̀ nageɂa ha. Gotà Edeza gots'ǫ̀ yı̨ı̨hɂà t'à, amìı Weza ts'ǫ̀ nezı̨į̀ nageɂa-le sìı Wetà ts'ǫ̀ nezı̨į̀ nageɂa-le hǫt'e.

John 6:69

Nı̨ sìı Nǫ̀htsı̨ wets'ǫ Degaı anet'e wek'èts'eezǫ, eyı gogha ehkw'ı-ahodı,” yèhdı.

Zezì Wecheekeèdeè 4:32

Hazǫǫ̀ gıgha ehkw'ı-ahodıı sìı gıdzeè eyıts'ǫ gınì ı̨łè zǫ lajà. Dǫ t'asìı gıts'ǫ sìı edegha zǫ gık'èdì-le, t'asìı hazǫǫ̀ gıts'ǫ sìı ełetaàgeelè.

Rome 15:13

Nǫ̀htsı̨ edaxàgolee sìı sıì naxınà eyıts'ǫ naxıxè sìghà hòɂǫ ayııle. Nǫ̀htsı̨ naxıgha ehkw'ı adı welè, hanì-ı̨dè Yedàyeh Nezı̨ı̨ wedahxà naxınì deɂǫ̀ǫ̀ nàtsoò ade ha hǫt'e.

Rome 2:4

Nǫ̀htsı̨ naxıts'ǫ̀ wedzeè nezı̨ı̨, eyıts'ǫ naxıxè ts'èwhı̨į̀ nıwǫǫ sìı naxıgha wet'àaɂà-le nì? Nǫ̀htsı̨ hanì naxıts'ǫ̀ wedzeè nezı̨ı̨ sìı wek'èahsǫ-le nì? Edek'eahłı̨ ha naxı̨ı̨hwhǫ t'à naxıts'ǫ̀ wedzeè nezı̨ hǫt'e.

1 Corınth 14:31

Hazǫǫ̀ ełek'èdaà Yedàyeh Nezı̨ı̨ dahxà xàyaahtı nı̨dè, dǫ hazǫǫ̀ hoghàgeetǫ ha eyıts'ǫ gıdzeè t'à nàgetsoò agede ha.

1 Corınth 2:12

Dıı nèè gots'ǫ ı̨nì goghǫ̀t'ǫ nıìle, hanìkò Nǫ̀htsı̨ edets'ǫ Įnì Degaı goghàı̨ɂǫ hǫt'e, eyıts'ǫ Nǫ̀htsı̨ t'asìı k'èxa-le ayìı goghàı̨ɂǫǫ sìı wets'ǫ Įnì Degaı t'à wenıts'eedì agole ha.

Galatıa 3:28

Zezì-Krı wexè naxı̨ hazǫǫ̀ ı̨łè laaht'e hǫt'e t'à, Israel got'ı̨į̀ eyıts'ǫ Greece got'ı̨į̀ gıxè eładı̨į̀ hòɂǫ-le, dǫ edets'ǫ̀ k'àowo-le, eyıts'ǫ dǫ edets'ǫ̀ k'àowo gıxè eładı̨į̀ hòɂǫ-le, dǫzhìı eyıts'ǫ ts'èko gıxè eładı̨į̀ hòɂǫ-le.

Ephesus 1:7

Nǫ̀htsı̨ enıìyah t'à wesǫnıwǫ dahxà Zezì wedoò t'à gohołı̨į̀ hazǫǫ̀ goghǫ nahoazha eyıts'ǫ edaxàgoı̨la hǫt'e.

Ephesus 3:16

Ededı̨ sìı enıìyah nàtsoo wets'ǫ̀-èlı̨ t'à edets'ǫ Įnì Degaı t'à naxıdzeè yìı nàahtsoò anaxele ha, eyı gha yahtı.

Ephesus 3:3

Eyı t'asìı deɂı̨į̀ wheɂǫ t'à wenıts'eedì-le sìı Nǫ̀htsı̨ wek'èehsǫǫ̀ asį̀į̀là. Eyı weghǫ hòt'a yatı łǫ-lea t'à naxıts'ǫ̀ ııhtł'è ı̨lè.

Ephesus 6:22

Eyıt'à goxè dànì hòɂǫǫ sìı wek'èahsǫ ha, eyıts'ǫ naxıdzeè nàtsoò ayele ha naxıts'ǫ̀ wııhɂà hǫt'e.

Phılıppı 2:1

Zezì-Krı wexè ı̨łè aaht'e t'à naxınì nàtso welè, naxıghǫneètǫ t'à naxınà welè, Yedàyeh Nezı̨ı̨ wexè naxınì ı̨łè zǫ welè, naxıdzeè t'à dǫ eteahɂı̨ welè.

Phılıppı 3:8

Eyı zǫǫ̀-le! Zezì-Krı wek'èehsǫ ha, eyı denahk'e segha wet'àaɂà ne t'à, t'asìı hazǫǫ̀ segha wedę lajà. Sets'ǫ̀ K'àowo gha t'asìı hazǫǫ̀ ɂǫ̀ehde. Zezì-Krı ededı̨ zǫ weehwhǫ, eyıts'ǫ wexè ı̨łè laaht'e ha dehwhǫ t'à t'asìı hazǫǫ̀ segha t'asìı-ts'ıì lajà. Moses wenàowoò k'èaht'e t'à ehkw'ı ehda k'ę̀ę̀ sııtà ha dehwhǫ-le, hanìkò Zezì-Krı segha ehkw'ı adı t'à ehkw'ı ehda k'ę̀ę̀ sııtà ha dehwhǫ. Ehkw'ı ts'eeda k'ę̀ę̀ goıtàa sìı Nǫ̀htsı̨ wedahxà hǫt'e, eyıts'ǫ goxı̨ ehkw'ı adı wets'ı̨ı̨hwhǫ t'à.

Colosse 1:26

Nǫ̀htsı̨ weyatıì ı̨nę̀ę whaà gots'ǫ dǫ gıgha deɂı̨į̀ wheɂǫ ı̨lèe, hanìkò dıì Nǫ̀htsı̨ wets'ǫ dǫ gık'èezǫ agììdlà.

Colosse 1:27

Eyı dǫ degaı gı̨ı̨lı̨ı̨ sìı dıı nèk'e dǫ hazǫǫ̀ Nǫ̀htsı̨ k'ègeezǫ-le gıta gots'ǫ Nǫ̀htsı̨ gòį̀hchì agı̨ı̨t'e. Weyatıì enıìyah xè deɂı̨į̀ wheɂǫǫ sìı gık'èezǫǫ̀ agǫ̀ǫ̀là. Eyı weyatıì sìı Zezì-Krı naxıdzeè yìı nàdè awèts'edı, eyı wet'à welǫ whìle ts'ǫ̀ enıìyah xè aahda ha.

Colosse 1:9

Eyıt'à, naxıghǫ ts'ıìkw'o gots'ǫ naxıgha yats'ehtı ghǫ nats'et'è-le. Yedàyeh Nezı̨ı̨ t'à deghàà goahsǫ ha eyıts'ǫ t'asìı nıahdì aahde ha t'aats'ǫǫ̀ naxıgha Nǫ̀htsı̨ wets'eekè, hanì-ı̨dè Nǫ̀htsı̨ dànıwǫǫ sìı wek'èahsǫǫ̀ aahde ha.

Colosse 2:19

Zezì gokwì elı̨ı̨ sìı xè aget'ı̨-le agejà t'à aget'ı̨. Goxı̨ wezhį̀į̀ lats'ı̨ı̨t'ee sìı hazǫǫ̀ dǫ ı̨łè zǫ lats'ı̨ı̨t'e, godzats'ìı eyıts'ǫ gokw'èh t'à gozhį̀į̀ hazǫǫ̀ yàłııtǫ̀. Zezì gokwì elı̨ lanì ts'ıhɂǫ̀ goxı̨ wezhį̀į̀ ts'ı̨ı̨lı̨ı̨ sìı Nǫ̀htsı̨ ełexè ts'eezheè agohɂı̨ hǫt'e.

Colosse 3:14

Eyı nàowo nezı̨ı̨ hazǫǫ̀ k'ę̀ę̀ aahda, eyı wedaats'ǫ̀ ełeghǫnıahtǫ, hanì-ı̨dè eyı nàowo nezı̨ı̨ hazǫǫ̀ sìı nàowodeè ı̨łè zǫ k'ę̀ę̀ aahda ha.

Colosse 4:3

Eyıts'ǫ goxı̨ sı gogha yaahtı, weyatıì t'à dǫ ts'ǫ̀ gots'ede ha Nǫ̀htsı̨ gogha ehkw'ı goòɂà ayele gha. Hanì-ı̨dè Zezì-Krı wegodıì dǫ ts'ǫ̀ deɂı̨į̀ wheɂǫǫ sìı t'à gıxè gots'edo ha, eyı k'èxa jǫ sedaàtǫ hǫt'e.

Colosse 4:8

Dànì goxè hòɂǫǫ sìı naxıts'ǫ̀ hadı ha eyıts'ǫ naxıdzeè nàtsoò ayele ha t'à, naxıts'ǫ̀ awehłe ha.

1 Thessalonıca 1:5

Godı nezı̨ı̨ naxıts'ǫ̀ nèts'ı̨ı̨ɂǫ ekò, yatı zǫ naxıghàts'ı̨ı̨ɂǫ nıìle. Hanìkò Yedàyeh Nezı̨ı̨ ts'ıhɂǫ̀ naxıta enıìyah nàhòwo t'à, eyı godı nezı̨ı̨ hotıì ehkw'ı hǫt'e wek'èahsǫ anaxį̀į̀là. Naxıts'àts'edı ha t'à dànì naxıta nàts'ı̨ı̨dèe sìı wek'èahsǫ hǫt'e.

1 Thessalonıca 3:2

Gòet'ı̨ Tımothy, Nǫ̀htsı̨ gha eghàlaedaa eyıts'ǫ goxè Zezì-Krı wegodıì nezı̨ı̨ k'eɂaa sìı naxınì nàtsoò ayele ha, eyıts'ǫ denahk'e naxıgha ehkw'ı-ahodı gha naxıts'ǫ̀ wets'ı̨ı̨hɂà hǫt'e.

1 Thessalonıca 5:14

Sèot'ı̨ı̨, dıı naxıghǫnàdats'eetì: Dǫ gots'egeedìı sìı yatı nàtsoo gıghàahɂà. Dǫ edègeejı̨ı̨ sìı gınì nàtsoò aahłe, dǫ nàgetso-le sìı gıts'àahdı, dǫ hazǫǫ̀ xè ts'èwhı̨į̀ k'ehoahɂa.

1 Tımothy 3:16

Nǫ̀htsı̨ Zezì weghǫ ayìı k'èts'eezǫǫ̀ agǫ̀ǫ̀làa sìı sıì enıìyah dìì: Dǫ k'ę̀ę̀ wègoèht'į̀ı̨, Yedàyeh Nezı̨ı̨ ehkw'ı eghàlaı̨dà yeghǫ hadı, yak'eet'ı̨į̀ ts'ǫ̀ wègoèht'į̀ı̨, wegodıì dǫ hazǫǫ̀ xàɂaa ts'ǫ̀ nègı̨ı̨ɂǫǫ, hazǫǫ̀ nèk'e wegodıì dǫ gıgha ehkw'ı-ahodı, eyıts'ǫ enıìyah xè ı̨dòo yak'e ts'ǫ̀ nıwıìtı̨.

Hebrew 10:22

hotıì gogha ehkw'ı-ahodı eyıts'ǫ godzeè ehkw'ıı xè Nǫ̀htsı̨ ts'ǫ̀ ats'ııde. Wedoò godzeè k'e adlà t'à k'achı̨ hołı̨ı̨ edek'e nìdahots'eeɂà ha-le, eyıts'ǫ yak'e gots'ǫ tı t'à gok'enaatso hǫt'e.

Hebrew 6:11

Naxı̨ hazǫǫ̀ nǫǫde dzęę̀ ts'ǫ̀ hotıì k'èdaà hanì eghàlaahda naxıts'ı̨ı̨hwhǫ, hanì-ı̨dè ayìı wekanıahɂàa sìı wek'ę̀ę̀ agode ha.

2 Peter 1:10

Eyıt'à sèot'ı̨ı̨, naxıkayaetı xè naxììchì k'ę̀ę̀ aahda, eyı ghǫ naxınì nàtsoò aahłe hanì-ı̨dè naxıxè hagode ha. Hanì edeghàlaahda nı̨dè hołı̨ı̨ naxıdaèht'è hǫı̨lı̨ ha nıìle.

2 Peter 1:3

Nǫ̀htsı̨ nàtso wehòhɂǫ t'à, wet'à ts'eeda gha eyıts'ǫ wınì k'ę̀ę̀ ts'eeda gha t'asìı hazǫǫ̀ goghàı̨la hǫt'e. Nǫ̀htsı̨ gots'ǫ̀ wedzeè nezı̨ı̨ xè enıìyah wehòhɂǫ t'à gokayaı̨htıı sìı wek'èts'eezǫǫ̀ ats'ejà.

2 Peter 3:18

Gots'ǫ̀ K'àowo Zezì-Krı Edaxàgolee elı̨ı̨ sìı denahk'e nezı̨į̀ wek'èahsǫ xè denahk'e wesǫnıwǫ xè aahda. Dıì gots'ǫ welǫ whìle ts'ǫ̀ ededı̨ weghàsǫts'eedı ha hǫt'e! Amen.

1 John 3:19

Hats'ı̨ı̨t'e nı̨dè nàowo ehkw'ıı wets'ǫ ats'ı̨ı̨t'e wek'èts'eezǫ ha. Godzeè t'à edesınìyats'ehtı nı̨dè Nǫ̀htsı̨ ts'ǫ̀ ats'ııde, hanì-ı̨dè wenadąą̀ godzeè xè ts'èwhı̨į̀ hòɂǫ ha. Nǫ̀htsı̨ sìı godzeè nahk'e elı̨ hǫt'e eyıts'ǫ t'asìı hazǫǫ̀ k'èezǫ hǫt'e.

1 John 5:7

T'asìı taı xàyagehtı hǫt'e: