12 Tychıcus kǫ̀ta Ephesus ts'ǫ̀ awèhłà.
Kǫ̀ta Ephesus nègı̨ı̨de ekò Paul, Prıscılla eyıts'ǫ Aquıla ekǫ gots'ǫǫ̀ naèhtła. Ededı̨ t'aa ełègehdèe-kǫ̀ ts'ǫ̀ ajà, ekǫ Israel got'ı̨į̀ ts'ǫ̀ goı̨de.
Paul naetła kwe, hagòhdı, “Nǫ̀htsı̨ hanıwǫ nı̨dè k'achı̨ jǫ ts'ǫ anahde ha,” gòhdı. Eyı tł'axǫǫ̀ elàcho t'à kǫ̀ta Ephesus gots'ǫǫ̀ naèhɂe.
Apollos kǫ̀ta Corınth wheda ekò Paul tı̨lı k'èè kǫ̀ta Ephesus ts'ǫ̀ naèhtła. Ekǫ Nǫ̀htsı̨ wecheekeè mǫ̀hdaa goaɂı̨.
“Naxı̨, Nǫ̀htsı̨ Wenàowoò t'à naxıts'ǫ̀ goıhde ı̨lèe sìı k'achı̨ seahɂį̀ ha-le, wek'èehsǫ hǫt'e.
Dǫ gıxè at'ı̨ı̨ sìı Berea got'ı̨į̀ Pyrhus weza, Sopater wìyeh, eyıts'ǫ Thessalonıca got'ı̨į̀ nàke Arıstarchus eyıts'ǫ Secundus, eyıts'ǫ Derbe got'ı̨į̀ Gaıus. Tımothy, Asıa got'ı̨į̀ Tychıcus eyıts'ǫ Trophımus goxè aget'ı̨.
Tychıcus, sèot'ı̨ weghǫneehtǫǫ sìı t'aats'ǫǫ̀ gots'ǫ̀ K'àowo gha eghàlaeda hǫt'e. Sexè dàgǫ̀ht'ee sìı hazǫǫ̀ yeghǫ naxıxè godo ha, hanì-ı̨dè dànì sexè hòɂǫǫ eyıts'ǫ ayìı ghàlaehdaa sìı wek'èahsǫ ha.
Eyıt'à goxè dànì hòɂǫǫ sìı wek'èahsǫ ha, eyıts'ǫ naxıdzeè nàtsoò ayele ha naxıts'ǫ̀ wııhɂà hǫt'e.
Seàgı̨ą Tychıcus seghǫ godı hazǫǫ̀ naxıts'ǫ̀ hadı ha. Eyı sechı weghǫneehtǫǫ sìı gots'ǫ̀ K'àowo wecheekeè elı̨ hǫt'e, t'aats'ǫǫ̀ godı nezı̨ı̨ gha eghàlaeda.
Macedonıa nèk'e nawhıhtła ekò kǫ̀ta Ephesus wheęda nèehsı̨ ı̨lè. Įłaà ekǫ wheęda ha dehwhǫ. Hanì-ı̨dè dǫ mǫ̀hdaa nàowo ekǫ-le t'à dǫ hoghàgogeehtǫǫ sìı haget'ı̨ ha-le gìı̨dı.
Artemas hanì-le-ı̨dè Tychıcus nets'ǫ̀ awèhłà ts'ǫ̀et'ıì, kǫ̀ta Nıcopolıs ekǫ sets'àątła ha edenį̀ı̨dzà nǫǫ̀, ekǫ sexè xohoewı ha t'à.
