2 Tımothy 2:2 - Nǫ̀htsı̨ Nı̨htł'è

² Eyıts'ǫ dǫ łǫ gıdaà ayìı dàehsı̨ı̨ sı̨į̀kw'oo sìı dǫ gıgha dìì-le laneewǫǫ sìı, eyıts'ǫ dǫ hoghàgeetǫ ha dìì-le sìı seyatıì gıtł'aà wheɂǫǫ̀ anele.

2 Tımothy 2:2 ပူးပေါင်းရင်းမြစ်များ

Matthew 13:52

Zezì gots'ǫ̀ hadı, “Nǫ̀htsı̨-yatıì-k'èdìı-dǫǫ̀ Nǫ̀htsı̨ Wenàowoò k'ę̀ę̀ hoghàweehtǫ nı̨dè dǫ ahxee lanì hǫt'e. Eyı dǫ whaà gots'ǫ t'asìı nezı̨ı̨ eyıts'ǫ t'asìı nezı̨ı̨ wegòò edets'ǫ xehkǫ̀ gots'ǫ xàyele hǫt'e.”

Matthew 24:25

Hanìkò hagode kwe naxıts'ǫ̀ haehsı̨ı̨ sìı hotıì wenaahdì nǫǫ̀.

Luke 12:42

Zezì yets'ǫ̀ hadı, “Dǫ nezı̨ı̨ aahłı̨ xè goahsǫǫ̀ k'ehoahɂa. Eyı hanıı dǫ sìı wets'ǫ̀ k'àowo edecheekeè hazǫǫ̀ ts'ǫ̀ k'àowoò ayele ha. Weghǫ shèts'ezhee gı̨ı̨wǫ nı̨dè goghàɂeedı ha.

1 Corınth 4:2

Dǫ t'asìı gıtł'aà wheɂǫǫ̀ agììdlàa sìı t'aats'ǫǫ̀ gıt'à nezı̨į̀ eghàlageeda ha hǫt'e.

2 Corınth 2:14

Hanìkò Nǫ̀htsı̨ sìı masì wets'ı̨ı̨hwhǫ hǫt'e, ededı̨ t'aats'ǫǫ̀ Zezì-Krı wexè k'egohɂı̨. Zezì-Krı edegha dǫ dèhnǫǫ ats'ı̨ı̨t'e t'à, dǫ hazǫǫ̀ gınadąą̀ enıìyah xè wek'èts'adè hǫt'e. Hazǫǫ̀ nèk'e k'ets'edèe sìı goxı̨ got'à dǫ Zezì-Krı k'ègeezǫǫ̀ agohɂı̨, t'asìı łekǫǫ łedìı lats'ı̨ı̨t'eè agǫ̀ǫ̀là hǫt'e.

2 Corınth 3:5

Goxı̨ godahxà hats'edı nıìle. Goxı̨ whatsǫǫ̀ t'asìı ts'ı̨ı̨lı̨ nıìle, hanìkò Nǫ̀htsı̨ hanì eghàlats'eeda ha goghàhòı̨ɂǫ hǫt'e.

Colosse 1:7

Epaphras ededı̨ sìı godı nezı̨ı̨ hoghànaxeèhtǫ hǫt'e. Eyı dǫ weghǫnets'eètǫ hǫt'e, goxèht'eè Nǫ̀htsı̨ cheekeè elı̨. Gogha Zezì-Krı gha t'aats'ǫǫ̀ ehkw'ı eghàlaeda.

1 Tımothy 1:12

Gots'ǫ̀ K'àowo Zezì-Krı sedzeè t'à masì weehwhǫ. Sınì nàtsoò asį̀į̀là t'à, ehkw'ı eghàlaedaa dǫǫ̀ aht'e sı̨ı̨hwhǫ t'à, eyıts'ǫ wegha eghàlaehda ha sį̀į̀hchì t'à masì weehwhǫ.

1 Tımothy 1:18

Tımothy seza lanet'e, Yedàyeh Nezı̨ı̨ dahxà neghǫ nadąą̀ xàyagı̨ı̨htı ı̨lèe k'ę̀ę̀ yatı neghàehɂà ha. Dıı yatı nets'ǫ̀ eehtł'èe sìı wek'ènedì nı̨dè, nınì nàtso xè nàowo ehkw'ıı gha hòtł'ò eghàlaı̨da ha,

1 Tımothy 4:14

Ayìı neghǫ̀t'ǫǫ sìı wek'ę̀ę̀ eghàlaı̨da, wedę anele-le. Nǫ̀htsı̨ wets'ǫ dǫ k'aodèe edılà nek'e agį̀į̀là ekò Yedàyeh Nezı̨ı̨ dahxà neghǫ xàyagı̨ı̨htı ı̨lè hǫt'e.

1 Tımothy 4:6

Gòet'ı̨ hanì hoghàgı̨ı̨htǫ nı̨dè, Zezì-Krı wegha nezı̨į̀ eghàlaı̨da ha hǫt'e. Haąt'ı̨ nı̨dè Zezì-Krı weyatıì ehkw'ıı wet'à negeèhsǫǫ sìı wek'ę̀ę̀ anet'ı̨ hǫt'e, eyıts'ǫ ayìı ehkw'ıı hoghàneètǫǫ xè ayìı wek'èaneet'èe sìı wek'ę̀ę̀ eghàlaı̨da ha hǫt'e.

1 Tımothy 5:22

Nǫ̀htsı̨ la eghàlageeda gha dǫ k'eèyatıı sìı ekòet'ıì nılà gık'e anele-le. Hanejà nı̨dè gıhołı̨į̀ k'ę̀ę̀ eghàlaı̨daà anede ha sǫnı. Hołı̨ı̨ nàowoò ch'à edek'ènedì.

1 Tımothy 6:12

Daneeɂa ha sǫnı kò, Zezì negha ehkw'ı-ahodıı sìı t'aats'ǫǫ̀ wek'ę̀ę̀ ı̨da. Dǫ gınadąą̀, “Zezì segha ehkw'ı-ahodı,” nı̨ı̨dıì xàyanehtı ekò, welǫ whìle ts'ǫ̀ ı̨da ha nekayaı̨htı. Eyı yatı nezı̨ı̨ neghǫ̀t'ǫǫ sìı wedı̨ı̨chı-le, hanì-ı̨dè welǫ whìle ts'ǫ̀ ı̨da ha hǫt'e.

2 Tımothy 3:10

Hanìkò nı̨ sìı ayìı hoghàehtǫǫ, dànì ehdaa, ayìı gha eghàlaehdaa, dànì segha ehkw'ı-ahodıı, dànì ts'èwhı̨į̀ dehwhǫǫ, dànì dǫ gıghǫneehtǫǫ, daıhɂà sǫnı kò sınì nàtso xè ehdaa, hazǫǫ̀ wek'èı̨zǫ hǫt'e.

2 Tımothy 3:14

Hanìkò nı̨ sìı ayìı hoghàneètǫ eyıts'ǫ ayìı negha ehkw'ı-ahodıı sìı wek'ę̀ę̀ ı̨da, dǫ eyı hazǫǫ̀ hoghànegeèhtǫǫ sìı gık'èı̨zǫ t'à.

Hebrew 2:17

Eyı ts'ıhɂǫ̀ dànì dǫ ts'ı̨ı̨lı̨ı̨ sìı hotıì goxèht'eè wehòèlı̨ hǫt'e. Hanì-ı̨dè Nǫ̀htsı̨ ghǫ wınì nàtso xè yegha eghàlaeda ha welì. Yahtıı-wet'àaɂàa-deè dǫ ts'ǫ̀ wedzeè eteèɂı̨ı̨ elı̨ ha welì, eyıts'ǫ dǫ gıhołı̨į̀ k'èxa ełaàwı ha welì.