1 Tımothy 1:16 - Nǫ̀htsı̨ Nı̨htł'è

¹⁶ Eyı ts'ıhɂǫ̀ Nǫ̀htsı̨ sets'ǫ̀ wedzeè eteèɂı̨ ı̨lè. Sı̨ hołı̨ı̨-hohtsı̨ı̨-dǫǫ̀ aht'e ı̨lè kò, set'à, dǫ hazǫǫ̀ ts'ǫ̀ wedzeè nezı̨ı̨ xè ts'èwhı̨į̀ godanaèhɂı̨ı̨ sìı wek'èedzǫǫ̀ adììdlà. Sexè ts'èwhı̨į̀ nıwǫ t'à, dǫ gıgha ehkw'ı-ahodıı sìı, eyıts'ǫ welǫ whìle ts'ǫ̀ geeda agììdlàa sìı Nǫ̀htsı̨ dǫ xè sıì ts'èwhı̨į̀ nıwǫ gık'èezǫǫ̀ agǫ̀ǫ̀là.

1 Tımothy 1:16 ပူးပေါင်းရင်းမြစ်များ

Luke 15:10

Ehkw'ı anaxèehsı̨, eyı xèht'eè hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè Nǫ̀htsı̨ weyak'eet'ı̨į̀ gınà t'à sìgoèt'ı̨ ha hǫt'e,” Zezì gòhdı.

Luke 23:43

Zezì yets'ǫ̀ hadı, “Ehkw'ı anèehsı̨, dıı dzęę̀ k'e Hoı̨zı̨-Nèk'e sexè wheęda ha ne,” yèhdı.

Luke 7:47

Eyıt'à, dıı hanèehsı̨ ha, dıı ts'èko wehołı̨į̀ łǫ weghǫ nahoazha, eyıt'à sıì seghǫneètǫ hǫt'e. Hanìkò amìı wehołı̨į̀ łǫ-lea weghǫ nahoezhee sìı hòtł'ò seghǫneètǫ nıìle,” yèhdı.

John 20:31

Hanìkò ayìı dek'eèhtł'èe sìı naxıgha adlà hǫt'e. Zezì, Nǫ̀htsı̨ Weza, Chrıst hǫt'ee sìı, eyı naxıgha ehkw'ı-ahodı gha dek'eèhtł'è hǫt'e. Naxıgha ehkw'ı-ahodı nı̨dè Zezì wets'ıhɂǫ̀ welǫ whìle ts'ǫ̀ aahda ha.

John 3:36

Amìı Nǫ̀htsı̨ Weza ehkw'ı adı yı̨ı̨hwhǫǫ sìı welǫ whìle ts'ǫ̀ eda ha. Amìı Weza nıwǫ-le sìı welǫ whìle ts'ǫ̀ eda ha-le, Nǫ̀htsı̨ hoìla yeghàhòɂà ha sìı wedawheɂǫ hǫt'e,” John-Baptıst edecheekeè gòhdı.

John 5:24

“Ehkw'ı anaxèehsı̨, amìı seyatıì ıìkw'o xè t'aa sı̨ı̨hɂàa sìı ehkw'ı adı yı̨ı̨hwhǫǫ sìı welǫ whìle ts'ǫ̀ eda ha, eyıts'ǫ hoìla awedle ha-le. Ełaı̨wo gots'ǫ eda ts'ǫ̀ łataèhtła hǫt'e.

John 6:37

Setà dǫ hazǫǫ̀ seghàı̨laa sìı sets'ǫ̀ agede ha, amìı sets'ǫ̀ at'ı̨ı̨ sìı naweehɂà hǫı̨lı̨ ha-le.

John 6:40

Dǫ hazǫǫ̀ Weza ts'ǫ̀ nageɂa xè gıgha ehkw'ı ahodıı sìı welǫ whìle ts'ǫ̀ geeda ha, Setà hanì ha nıwǫ hǫt'e. Amìı ehkw'ı aehsı̨ sı̨ı̨hwhǫǫ sìı nǫǫde dzęę̀ k'e nı̨dè naìdà awehłe ha,” Zezì hadı edeghǫ gode.

John 6:54

Dǫ sezhį̀į̀ ghǫ shètı̨ xè sedoò edǫǫ sìı welǫ whìle ts'ǫ̀ edaà awììdlà hǫt'e, eyıts'ǫ nǫǫde dzęę̀ k'e naìdà awehłe ha.

Zezì Wecheekeèdeè 13:39

Dǫ hazǫǫ̀ Zezì ehkw'ı adı gı̨ı̨wǫǫ sìı Nǫ̀htsı̨ xè ehkw'ıì agedle ha hǫt'e. Moses wenàowoò k'èahdì t'à hanì ehkw'ıì anaxedle ha dìì.

Rome 15:4

Įnę̀ę whaà Nǫ̀htsı̨ Nı̨htł'è k'e t'asìı hazǫǫ̀ dek'eèhtł'èe sìı wet'à hoghàgoetǫ gha adlà hǫt'e. Ayìı dek'eèhtł'èe sìı wek'eyats'ehtı nı̨dè wet'à goınì nàtsoò ade ha hǫt'e eyıts'ǫ edaxàts'eedè ha.

Rome 6:23

Hołı̨ı̨ hots'ehtsı̨ k'èxa ełaàts'ede hǫt'e. Hanìkò gots'ǫ̀ K'àowo Zezì-Krı wet'ǫ̀ǫ̀ Nǫ̀htsı̨ welǫ whìle ts'ǫ̀ ts'eedaà agǫ̀ǫ̀là hǫt'e.

1 Corınth 7:25

Ekò ts'èko hogıat'į̀ whìle sìı gıghǫ gots'ǫ̀ K'àowo t'asasèhdı-le, hanìkò Nǫ̀htsı̨ wesǫnıwǫ t'à ehkw'ı eghàlaehda k'ę̀ę̀ sı̨ dàahwhǫǫ sìı yatı naxıghàehɂà ha:

2 Corınth 4:1

Nǫ̀htsı̨ wesǫnıwǫ dahxà dıı la goghǫ̀t'ǫ hǫt'e, eyıt'à gogha gots'eèdı ha nıìle.

Ephesus 1:12

Hanì-ı̨dè goxı̨ t'akwełǫ̀ǫ̀ Zezì-Krı gogha ehkw'ı-ahodıı sìı enıìyah wexè hòɂǫ t'à weghàsǫts'eedı welì.

Ephesus 1:6

Edeza ghǫneètǫǫ sìı wets'ıhɂǫ̀ t'asìı k'èxa-le wesǫnıwǫ enıìyah goghàı̨ɂǫ t'à, hazǫǫ̀ weghàsǫts'eedı welì.

Ephesus 2:7

Hanì-ı̨dè ı̨daà hòɂǫ nı̨dè, Nǫ̀htsı̨ enıìyah t'à wesǫnıwǫǫ sìı gots'ǫ̀ wègaat'ı̨į̀ ayele ha. Zezì-Krı xè dànì eghàlaı̨dà, eyı weghàà gots'ǫ̀ wedzeè nezı̨ı̨ wek'èts'eezǫǫ̀ agǫ̀ǫ̀là.

2 Thessalonıca 1:10

Zezì jǫ nǫ̀ǫtłaa dzęę̀ k'e nı̨dè wets'ǫ dǫ degaı gıghàsǫedı ha, eyıts'ǫ dǫ gıgha ehkw'ı-ahodıı sìı gıxè enıìyah deè ha hǫt'e. Godı nezı̨ı̨ naxıts'ǫ̀ nèts'ı̨ı̨ɂǫǫ sìı naxıgha ehkw'ı-ahodı t'à naxı̨ sı naxıxè agode ha hǫt'e.

1 Tımothy 1:13

Įnę̀ę Nǫ̀htsı̨ wek'èch'a xàyahtı ı̨lèe, eyıts'ǫ yıdaeht'e t'à Nǫ̀htsı̨ wecheekeè dagìıhɂa ı̨lè. Hanìkò dàht'ı̨į̀-aht'ı̨ı̨ sìı wek'èehsǫ-le ı̨lè eyıts'ǫ segha ehkw'ı-ahodı-le t'à hanì eghàlaıhdà t'à Nǫ̀htsı̨ sets'ǫ̀ wedzeè eteèɂı̨ ı̨lè.

Hebrew 7:25

Eyıt'à Zezì ededı̨ wet'ǫ̀ǫ̀ amìı Nǫ̀htsı̨ ts'ǫ̀ at'ı̨ı̨ sìı deghàà edaxàgole ha wegha dìì-le hǫt'e. T'aats'ǫǫ̀ eda t'à dǫ gha Nǫ̀htsı̨ ts'ǫ̀ yahtı ha dìì-le hǫt'e.

1 Peter 3:20

T'akwe whaà Noah elàcho whehtsı̨ ekò ekìıyeè k'e Nǫ̀htsı̨ k'èagı̨ı̨t'e-le ı̨lè. Ekò k'e Nǫ̀htsı̨ ts'èwhı̨į̀ godanaèhɂı̨ ı̨lè, hanìkò eyı elàcho wet'à dǫ łǫ-lea zǫ edaxàwhede; dǫ ek'èdı̨ zǫ tı t'à ełaàgı̨ı̨dè-le ı̨lè.

2 Peter 3:15

Gots'ǫ̀ K'àowo ts'èwhı̨į̀ godanaèhɂı̨ t'à ı̨łaà dǫ łǫ edaxàgole ha nıwǫ, eyı wedaànıahdè. Gòet'ı̨ Paul weghǫnets'eètǫǫ sìı ededı̨ sı Nǫ̀htsı̨ dahxà hanì naxıts'ǫ̀ gǫǫzǫǫ̀ ı̨ı̨tł'è ı̨lè.

2 Peter 3:9

Gots'ǫ̀ K'àowo edeyatıì goghàı̨ɂǫǫ sìı yek'ę̀ę̀ eghàlaeda ha whį̀at'ı̨ nıìle, hanìkò dǫ mǫ̀hdaa whį̀at'ı̨ gı̨ı̨wǫ. Nǫ̀htsı̨ sìı ts'èwhı̨į̀ naxıdanaèhɂı̨ hǫt'e, dǫ wı̨ı̨zìı wedıhołè ha nıwǫ-le, dǫ hazǫǫ̀ edek'egı̨ı̨lı̨ ha goı̨hwhǫ hǫt'e.