1 Peter 5:4 - Nǫ̀htsı̨ Nı̨htł'è

⁴ Haaht'ı̨ nı̨dè Nǫ̀htsı̨ wesahzǫ̀ą-k'èdìı-deè nììtła nı̨dè welǫ whìle ts'ǫ̀ enıìyah k'ę̀ę̀ aahdaà anaxedle ha hǫt'e.

1 Peter 5:4 ပူးပေါင်းရင်းမြစ်များ

John 10:11

“Sı̨ sahzǫ̀ą-k'èdìı-dǫǫ̀ nezı̨ı̨ aht'e. Sahzǫ̀ą-k'èdìı-dǫǫ̀ nezı̨ı̨ sìı edesahzǫ̀ą gha ełaàwı hǫt'e.

1 Corınth 9:25

Amìı ehdaàtı̨mǫgeedè goxè at'ı̨ ha nıwǫǫ sìı eyı gha edexè sınìhòɂà hǫt'e. Dǫ hanıı sìı t'asìı sǫǫ̀mbaekwo t'à hòèlı̨ı̨ eyıts'ǫ t'asìı whaà ts'ǫ̀ wheɂǫ ha-le sìı geehnè gha aget'ı̨, hanìkò goxı̨ sìı t'asìı deè welǫ whìle ts'ǫ̀ goghaelı̨ gha ats'et'ı̨ hǫt'e.

2 Tımothy 4:8

Ehkw'ı gha sııtà xè hoehnǫ ts'ıhɂǫ̀ t'asìı sǫǫ̀mbaekwo t'à hòèlı̨ı̨ nǫǫde dzęę̀ k'e seghǫ̀t'à ha. Gots'ǫ̀ K'àowo ededı̨ zǫ ehkw'ı dǫ sınìyaehtı hǫt'e eyıts'ǫ ayìı dehnǫǫ sìı seghàyııɂà ha. Sı̨ zǫ hasele ha nıìle, hanìkò dǫ hazǫǫ̀ wègoèht'į̀ gha kànegı̨ı̨ɂaa sìı ededı̨ sı hagole ha hǫt'e.

Hebrew 13:20

Nǫ̀htsı̨ wet'à ts'èwhı̨į̀ hòɂǫǫ sìı Zezì sahzǫ̀ą-k'èdìı-deè elı̨ı̨ sìı naìdà ayį̀į̀là, eyıts'ǫ wedoò t'à goxè nakenawhehtsı̨ hǫt'e.

James 1:12

Dǫ weèdzà t'à wexè hoìla kò wınì nàtso-le ade-le sìı wexè sìghà hǫt'e. Ayìı t'à weèdzàa sìı yeghǫèhnǫ nı̨dè wek'èxa welǫ whìle ts'ǫ̀ edaà awedle ha. Amìı Nǫ̀htsı̨ ghǫnegeètǫǫ sìı hanì edeyatıì goghàı̨ɂǫ hǫt'e.

1 Peter 1:4

Nǫ̀htsı̨ ayìı naxıda ts'atà whehłaa sìı naxıghǫ̀t'à ha hǫt'e, yak'e naxıgha wek'èhodì ne t'à wezǫą ade hǫı̨lı̨ ha-le, ek'eèhtsǫ̀ ade hǫı̨lı̨ ha-le, eyıts'ǫ ı̨hjıì ade hǫı̨lı̨ ha-le.

1 Peter 2:25

Naxı̨ hazǫǫ̀ sahzǫ̀ą dıkǫèdee laaht'e, hanìkò dıì amìı sahzǫ̀ą k'èdìı elı̨ı̨ sìı ts'ǫ̀ anaahde; ededı̨ sìı naxıdą̀ązhį̀ı̨ k'èdìı elı̨ hǫt'e.

1 Peter 5:2

Nǫ̀htsı̨ wesahzǫ̀ą nezı̨į̀ gık'èahdì. Eyı la naxıghǫ̀t'ǫ ne t'à, k'àowo nezı̨ı̨ aahłı̨. Hanì naxıgha hòɂǫ zǫ t'à gıxoahdı-le, hanìkò Nǫ̀htsı̨ wınì k'ę̀ę̀ naxıdzeè t'à gıxoahdı. Sǫǫ̀mba ghǫ hòtł'ò aahwhǫ-le, hanìkò dǫ ts'àahdı gha ts'atà dahkw'e.

1 John 3:2

Seàgı̨ą, dıì Nǫ̀htsı̨ weza ats'ı̨ı̨t'e, ı̨daà dǫ dàhòt'ı̨ı̨ ts'ı̨ı̨lı̨ ha sìı ı̨łaà wek'èts'eezǫ nıìle. Hanìkò Zezì-Krı dànì wègaat'ı̨ k'ę̀ę̀ wets'eɂį̀ ha ne t'à nììtła nı̨dè wexèht'eè lats'ede ha wek'èts'eezǫ.

John Wenazhıı 1:7

Įdòo k'eaht'į̀, k'oh k'e gots'ǫ̀ nììtła ha. Dǫ hazǫǫ̀ geɂį̀ ha. Dǫ behkà t'à gıghaı̨hkoo sìı ededı̨ kò geɂį̀ ha. Eyıts'ǫ dıı nèk'e dǫ hazǫǫ̀ wets'ıhɂǫ̀ geejı̨ xè getse ha. Hanì hòɂǫ welè! Amen.

John Wenazhıı 2:10

Whaà-le-t'ıì ayìı t'à daahɂa ha sìı weghǫ dahjı̨-le. Ehkw'ı anaxèehsı̨, wehłı̨ı̨ naxeèhdzà ha nıwǫ t'à dǫ-danìı̨laa-kǫ̀ ts'ǫ̀ anaxele ha hǫt'e. Hoònǫ dzęę̀ ts'ǫ̀ danaxegį̀ı̨hɂa ha. Naxıweè hogehtsı̨ kò naxınì nàtsoò aahłe. Wek'èxa welǫ whìle ts'ǫ̀ ts'eedaa naxıghàehɂà ha.

John Wenazhıı 3:11

“Whaà-le-t'ıì naxıts'ǫ̀ ehtła ha. Seghǫ naxınì nàtsoo sìı hotıì wek'èahdì, hanì-ı̨dè edegha t'asìı deahnǫǫ sìı dǫ wı̨ı̨zìı naxıghǫ neyıìwa ha-le.