1 Peter 2:8 - Nǫ̀htsı̨ Nı̨htł'è

⁸ eyıts'ǫ dıı hanì dek'eèhtł'è: “Eyı kwe wet'à dǫ dagıìtà eyıts'ǫ wet'à dèè k'e nàgeetł'ì hǫt'e,” hanì dek'eèhtł'è. Godı nezı̨ı̨ k'ę̀ę̀ geeda-le ts'ıhɂǫ̀ dagıìtà. Gıts'ǫ̀ hagot'ı̨ı̨ sìı hanì gıgha hòɂǫǫ̀ adlà hǫt'e.

1 Peter 2:8 ပူးပေါင်းရင်းမြစ်များ

Luke 2:34

Sımeyon gok'eèyaı̨htı tł'axǫǫ̀ wemǫ Mary ts'ǫ̀ hadı, “Dıı chekoa wet'à Israel got'ı̨į̀ łǫ gıdıhołè ha eyıts'ǫ dǫ łǫ edaxàgole gha, dıı chekoa wììchı hǫt'e. Dǫ nadąą̀ t'asìı enıìyah elı̨ ha, hanìkò dǫ gık'èch'a agedı ha.

Rome 9:22

Eyı lanì Nǫ̀htsı̨ wexè hòɂǫ hǫt'e. Nǫ̀htsı̨ dǫ ts'ǫ̀ wek'èch'a gık'èezǫ ha, eyıts'ǫ dànì t'asìı wegha dìì-le wexè hòɂǫǫ sìı dǫ gık'èezǫ ha nıwǫ nı̨dè wets'ǫ̀ hoèlı̨ hǫt'e. Whaà gots'ǫ dǫ xè wek'èch'a kò goxè ts'èwhı̨į̀ nıwǫ ı̨lè, hanìkò godıhohtsı̨ ha nıwǫ nı̨dè ededı̨ wets'ǫ̀ hoèlı̨ hǫt'e.

1 Corınth 1:23

Hanìkò goxı̨ sìı Zezì-Krı dechı̨et'aa k'e ełaı̨wo ghǫ gots'ede hǫt'e. Israel got'ı̨į̀ gık'èch'a ats'edı eyıts'ǫ Greece got'ı̨į̀ gıgha ezhı̨ne k'ę̀ę̀ gots'ede.

2 Corınth 2:16

Dǫ edaxàgeedèe sìı gıt'à eda gha t'asìı łekǫǫ łedìı lats'ı̨ı̨t'e, hanìkò dǫ gıdıhołèe sìı gıt'à ełaàde gha t'asìı wejıı łedìı lats'ı̨ı̨t'e. Amìı la hadeèzhì yeghàlaeda ha yexèht'eè?

Galatıa 5:11

Sèot'ı̨ı̨, Moses wenàowoò k'ę̀ę̀ nàgoet'àa ghǫ dǫ hoghàehtǫ nı̨dè dànìghǫ ı̨łaà dasegį̀ı̨hɂa? Sı̨ hanì dǫ hoghàehtǫ nı̨dè, Zezì-Krı dechı̨et'aa k'e ełaı̨wo ghǫ gohde t'à gık'èch'a aehsı̨ ha-le ı̨lè.

1 Thessalonıca 5:9

Nǫ̀htsı̨ sìı gosınìyaehtı eyıts'ǫ nàgoehkwa gha gòį̀hchì nıìle, hanìkò gots'ǫ̀ K'àowo Zezì-Krı gogha ehkw'ı-ahodı t'à edaxàgole ha gòį̀hchì hǫt'e.

1 Peter 2:6

Nǫ̀htsı̨ Nı̨htł'è k'e dıı hanì dek'eèhtł'è: “Aàhkw'o! Jerusalem ekǫ kwe wheɂǫ ahłà. Eyı kwe ìhchì hǫt'e eyıts'ǫ segha wet'àaɂà hǫt'e. Amìı yegha ehkw'ı adıı sìı yek'eelı̨ hǫı̨lı̨ ha nıìle,” hanì dek'eèhtł'è.

1 Peter 2:7

Naxıgha ehkw'ı adı t'à eyı kwe naxıgha sıì wet'àhoòɂà hǫt'e. Hanìkò amìı wegha ehkw'ı-ahodı-le sìı gıgha dıı hanì dek'eèhtł'è: “Kwekǫ̀-gogehtsı̨ı̨-dǫǫ̀ kwe ɂǫ̀geèhk'aa sìı eyı kwe denahk'e wet'àhoòɂà whelı̨,”

2 Peter 2:3

Eyı dǫ hoghàgogeehtǫǫ sìı t'asìı gha egedì-le t'à ededı̨ godı gèhtsı̨ı̨ sìı t'à naxıxè gogedo. Whaà gots'ǫ nàgeekwa ha gıgha hòɂǫ hǫt'e, hanìkò amìı godıhohtsı̨ ha sìı whetı̨ nıìle.

Jude 1:4

Dǫ mǫ̀hdaa ekǫ-le dǫ hoghàgogeehtǫǫ sìı naxınaàhtǫ naxıta gı̨ı̨de hǫt'e. Hanıı dǫ sìı gısınìyaetı ha whaà gots'ǫ hanì dek'eèhtł'è hǫt'e. Dǫ hanıı Nǫ̀htsı̨ gıgha wedę sìı Nǫ̀htsı̨ wesǫnıwǫ eładı̨į̀ dǫ hoghàgogeehtǫ, hagedı, “Nǫ̀htsı̨ wedzeè sǫnıwǫ t'à hołı̨ı̨ k'ę̀ę̀ eghàlats'eeda kò wegha t'asanìle,” gedı. Hagedı t'à Zezì-Krı ededı̨ zǫ Gots'ǫ̀ K'àowodeè t'asìı wegha dìì-le elı̨ı̨ sìı wedę welè gedı.