1 Peter 1:4 - Nǫ̀htsı̨ Nı̨htł'è

⁴ Nǫ̀htsı̨ ayìı naxıda ts'atà whehłaa sìı naxıghǫ̀t'à ha hǫt'e, yak'e naxıgha wek'èhodì ne t'à wezǫą ade hǫı̨lı̨ ha-le, ek'eèhtsǫ̀ ade hǫı̨lı̨ ha-le, eyıts'ǫ ı̨hjıì ade hǫı̨lı̨ ha-le.

1 Peter 1:4 ပူးပေါင်းရင်းမြစ်များ

Matthew 25:34

“Eyı tł'axǫǫ̀-ı̨dè k'àowocho dǫ nàgòts'ehnèe nàgeèhzaa sìı gots'ǫ̀ dıı hadı ha, ‘Jǫ aahdè, Setà naxıxè sìghà anıwǫ hǫt'e. Dıı nèè hòèlı̨ gots'ǫ Nǫ̀htsı̨ Wenàowoò k'ę̀ę̀ hòɂǫǫ naxıda sınìhòt'ǫǫ sìı ts'ǫ̀ goyaahdè.

Mark 10:17

Zezì t'asį̀ı̨ ts'ǫ̀ naèhtła ekò dǫ ı̨łè yets'ǫ̀ tı̨mǫèhza gà yegà nàgòı̨hgè, hayèhdı, “K'àowo nezı̨ı̨, ayìı dàhłà nı̨dè welǫ whìle ts'ǫ̀ ehdaà asedle ha?” yèhdı.

Zezì Wecheekeèdeè 20:32

“Hòt'a Nǫ̀htsı̨ ghànaxèehła, eyıts'ǫ naxıts'ǫ̀ wesǫnıwǫǫ godı t'à naxınì nàtsoò awede. Hanì-ı̨dè ı̨daà Nǫ̀htsı̨ dǫ hazǫǫ̀ edegha gòį̀hchìı sìı gıxè ayìı godawhehłaa sìı naxıghàyele ha hǫt'e.

Rome 8:17

Eyıt'à Nǫ̀htsı̨ weza ats'ı̨ı̨t'e nı̨dè Nǫ̀htsı̨-Gotà ayìı edeza ghàyele ha sìı goxı̨ sı goghàyele ha hǫt'e. Zezì-Krı wexè Nǫ̀htsı̨ weza ats'ı̨ı̨t'e nı̨dè Weza xè t'asìı goghàyele ha hǫt'e. Zezì-Krı wexè dats'ı̨ı̨ɂa nı̨dè goxı̨ sı wexè enıìyah deè goghàhòt'à ha hǫt'e.

1 Corınth 9:25

Amìı ehdaàtı̨mǫgeedè goxè at'ı̨ ha nıwǫǫ sìı eyı gha edexè sınìhòɂà hǫt'e. Dǫ hanıı sìı t'asìı sǫǫ̀mbaekwo t'à hòèlı̨ı̨ eyıts'ǫ t'asìı whaà ts'ǫ̀ wheɂǫ ha-le sìı geehnè gha aget'ı̨, hanìkò goxı̨ sìı t'asìı deè welǫ whìle ts'ǫ̀ goghaelı̨ gha ats'et'ı̨ hǫt'e.

Galatıa 3:18

Nǫ̀htsı̨, Abraham ghà-t'asìı-yele ha yatı whehtsı̨ı̨ sìı Moses wenàowoò k'èts'edì zǫ t'à goıtà ha nı̨dè, Nǫ̀htsı̨ edeyatıì Abraham ghàı̨ɂǫǫ sìı wek'ę̀ę̀ hòɂǫ-le agode ha. Hanìkò Nǫ̀htsı̨ wesǫnıwǫ dahxà edeyatıì yeghàı̨ɂǫ t'à Abraham ghà-t'asìı-yele ha.

Ephesus 1:11

Ededı̨ wets'ıhɂǫ̀ whaà gots'ǫ Nǫ̀htsı̨ dànì sınìhòɂǫǫ sìı k'ę̀ę̀ gòį̀hchì hǫt'e. Ededı̨ sìı edınì k'ę̀ę̀ t'asìı hazǫǫ̀ ghàlaı̨da hǫt'e.

Ephesus 1:14

Nǫ̀htsı̨, edets'ǫ dǫ hazǫǫ̀ deghàà edaxàgole gots'ǫ̀ Yedàyeh Nezı̨ı̨ godzeè yìı nàdè ayį̀į̀là. Yedàyeh Nezı̨ı̨ godzeè yìı nàdè t'à t'asìı hazǫǫ̀ Nǫ̀htsı̨ goghàyele ha dıı sìı goghàhòt'à ha wek'èts'eezǫ. Eyı ts'ıhɂǫ̀ Nǫ̀htsı̨ enıìyah wexè hòɂǫǫ sìı weghàsǫts'eedı hǫt'e.

Ephesus 1:18

Naxıda enıìyah hòɂǫ ts'ǫ̀ naxıkayaetıı sìı naxıdzeè t'à hotıì nezı̨į̀ wek'èahsǫ ha, eyı sı gha yahtı hǫt'e. T'asìı enıìyah deè Nǫ̀htsı̨ edets'ǫ dǫ gha ts'atà whehłaa sìı goghàyele ha hǫt'e.

Colosse 1:12

Nǫ̀htsı̨-Gotà masì wèahdı ha. Nǫ̀htsı̨ Wenàowoò k'ę̀ę̀ hòɂǫǫ sìı t'aats'ǫǫ̀ dzęh nı̨ı̨dı̨ lanì hǫt'e. Ekǫ Nǫ̀htsı̨ wets'ǫ dǫ t'asìı gıda whelaa sìı gıxè naxıghǫ̀zhe ha hǫt'e.

Colosse 1:5

Yak'e t'asìı deè naxıdawhelaa sìı naxıgha ehkw'ı-ahodı t'à dǫ ghǫnıahtǫ. Yatı ehkw'ıı sìı weàhkw'ǫ ı̨lè t'à, eyı t'asìı deè naxıdawhelaa sìı hòt'a wek'èahsǫ hǫt'e. Eyı yatı ehkw'ıı sìı godı nezı̨ı̨

Colosse 3:24

Eyı wek'èxa gots'ǫ̀ K'àowo naxıda t'asìı whehłaa sìı naxıghàɂà ha wek'èahsǫ t'à hanì eghàlaahda welì. Gots'ǫ̀ K'àowo Zezì-Krı wegha eghàlaahda aaht'ı̨ hǫt'e.

2 Tımothy 4:8

Ehkw'ı gha sııtà xè hoehnǫ ts'ıhɂǫ̀ t'asìı sǫǫ̀mbaekwo t'à hòèlı̨ı̨ nǫǫde dzęę̀ k'e seghǫ̀t'à ha. Gots'ǫ̀ K'àowo ededı̨ zǫ ehkw'ı dǫ sınìyaehtı hǫt'e eyıts'ǫ ayìı dehnǫǫ sìı seghàyııɂà ha. Sı̨ zǫ hasele ha nıìle, hanìkò dǫ hazǫǫ̀ wègoèht'į̀ gha kànegı̨ı̨ɂaa sìı ededı̨ sı hagole ha hǫt'e.

Hebrew 10:34

Dǫ gıdanìı̨laa sìı etegıahɂı̨ ı̨lè, eyıts'ǫ t'asìı naxıghǫ gį̀į̀hchì kò ı̨łaà naxınà ı̨lè, eyı wenahk'e t'asìı nezı̨ı̨ sìı, welǫ whìle ts'ǫ̀ naxıghaelı̨ ha wek'èahsǫ t'à.

Hebrew 9:15

Eyı ts'ıhɂǫ̀ Zezì-Krı nakenahòdlı̨ı̨ wegòò k'ę̀ę̀ dǫ eyıts'ǫ Nǫ̀htsı̨ gogha tanı wheda hǫt'e. Įłaà nakenahòdlı̨ı̨ wezǫą tł'a geèhkw'e ekò dǫ gıhołı̨į̀ k'èxa ełaı̨wo t'à nàgeekwa ch'à agǫ̀ǫ̀là. Eyıt'à dǫ gıkayaetıı sìı Nǫ̀htsı̨ dǫ xè yatı whehtsı̨ k'ę̀ę̀ welǫ whìle ts'ǫ̀ geeda ha.

James 1:11

Sadeè nàtsoo wexèıdı nı̨dè eyı ı̨t'ǫ̀chàa sìı egǫ xè weɂı̨t'ǫ̀ą nàtł'ì, eyıts'ǫ wèdaat'ı̨-le at'į̀. Dǫ ahxee eyı lanì hǫt'e, ı̨łaà edılaà ghàlaeda et'ıì wewhìle ade ha.

1 Peter 3:9

Dǫ naxıts'ǫ̀ hojıì eghàlageeda nı̨dè ek'èt'à gıts'ǫ̀ hojıì eghàlaahda-le, dǫ naxık'adageedè nı̨dè ek'èt'à gık'adaahdè-le, hanìkò gıgha yaahtı. Dǫ ts'ǫ̀ sìghà eghàlaahda ha naxììchì hǫt'e, hanì-ı̨dè Nǫ̀htsı̨ naxıts'ǫ̀ sìghà eghàlaeda ha hǫt'e.

1 Peter 5:4

Haaht'ı̨ nı̨dè Nǫ̀htsı̨ wesahzǫ̀ą-k'èdìı-deè nììtła nı̨dè welǫ whìle ts'ǫ̀ enıìyah k'ę̀ę̀ aahdaà anaxedle ha hǫt'e.

John Wenazhıı 21:27

T'asìı wejıı sìı eyı kǫ̀godeè ts'ǫ̀ adle ha-le, eyıts'ǫ dǫ wı̨ı̨zìı hołı̨ı̨ hohtsı̨ı̨ xè hots'ì godee sìı eyı kǫ̀godeè goyaetła ha-le. Dǫ welǫ whìle ts'ǫ̀ geeda xè Sahzǫ̀ą wenı̨htł'è k'e gıızì dek'eèhtł'èe sìı eyı kǫ̀godeè goyageedè ha.