1 John 2:13 - Nǫ̀htsı̨ Nı̨htł'è

¹³ Gotà yàahłı̨ı̨ sìı ededı̨ kèhoį̀wo gots'ǫ wehòhɂǫǫ sìı wek'èahsǫ t'à naxıts'ǫ̀ eehtł'è. Cheko yàahłı̨ı̨ sìı wehłı̨ı̨ weghǫahnǫ t'à naxıts'ǫ̀ eehtł'è. Chekoa yàahłı̨ı̨ sìı, Nǫ̀htsı̨-Gotà wek'èahsǫǫ̀ aahjà t'à naxıts'ǫ̀ eehtł'è.

1 John 2:13 ပူးပေါင်းရင်းမြစ်များ

Matthew 11:27

“Setà t'asìı hazǫǫ̀ setł'aà whelaà ayı̨į̀là. Dǫ wı̨ı̨zìı Nǫ̀htsı̨ Weza k'èezǫ nıìle; Nǫ̀htsı̨-Gotà zǫ yek'èezǫ. Dǫ wı̨ı̨zìı Nǫ̀htsı̨-Gotà k'èezǫ nıìle; Weza zǫ yek'èezǫ hǫt'e. Eyıts'ǫ Weza amìı gòìhchıı sìı Nǫ̀htsı̨-Gotà k'ègeezǫǫ̀ agohɂı̨.

Matthew 13:19

Eyı dǫ Nǫ̀htsı̨ Wenàowoò godıì yıìkw'o kò yenıedì-le sìı eyı godı wedzeè yìı ajà ı̨lèe sìı ekòet'ıì wehłı̨ı̨ yeghǫnıyıìchì. Eyı sìı wet'à t'asìı dehshee tı̨lı k'e nàı̨tł'ı lanì hǫt'e.

Matthew 13:38

Eyı dèè sìı dıı nèk'e dǫ hazǫǫ̀ agı̨ı̨t'e, eyıts'ǫ wet'à t'asìı nezı̨ı̨ dehshee sìı dǫ Nǫ̀htsı̨ Wenàowoò gı̨ı̨wǫ agı̨ı̨t'e. Tł'oh nezı̨-le dehshee sìı dǫ wehłı̨ı̨ nàowoò gı̨ı̨wǫ agı̨ı̨t'e.

Matthew 5:37

‘Hęɂę,’ dahdı nı̨dè wek'ę̀ę̀ eghàlaahda, eyıts'ǫ ‘į̀le,’ dahdı nı̨dè wek'ę̀ę̀ eghàlaahda; eyı weɂǫ̀ǫ̀ yatı nàtsoo t'à xàyaahtıı sìı wehłı̨ı̨ weyatıì hǫt'e.

Luke 10:22

“Setà t'asìı hazǫǫ̀ setł'aà whelaà ayį̀į̀là. Dǫ wı̨ı̨zìı Nǫ̀htsı̨ Weza k'èezǫ nıìle; Gotà zǫ yek'èezǫ. Dǫ wı̨ı̨zìı Nǫ̀htsı̨-Gotà k'èezǫ nıìle; Weza zǫ yek'èezǫ hǫt'e. Eyıts'ǫ Weza dǫ gòį̀hchìı sìı Nǫ̀htsı̨-Gotà k'ègeezǫǫ̀ agohɂı̨,” Zezì hadı.

John 14:7

Amìı aht'ee sìı hotıì sek'èahsǫ nı̨dè Setà sı wek'èahsǫ hǫt'e. Jǫ gots'ǫ ı̨daà Setà hotıì wek'èahsǫ xè weahɂı̨ hǫt'e,” Zezì gòhdı.

John 14:9

Zezì hayèhdı, “Phılıp, whaà naxıxè aeht'į̀, hanìkò ı̨łaà sek'èı̨zǫ-le nì? Amìı saɂı̨ı̨ sìı hòt'a Setà ghàı̨dà hǫt'e. Eyıt'à dànìghǫ ‘Netà weghàts'eedaà agoı̨le,’ sìı̨dı?

John 16:3

Setà eyıts'ǫ sı̨ gok'ègeezǫ-le t'à hanì naxıts'ǫ̀ eghàlageeda ha hǫt'e.

John 16:33

“Dıı hazǫǫ̀ naxıts'ǫ̀ haehsı̨ hǫt'e, hanì-ı̨dè sı̨ set'à naxıgha ts'èwhı̨į̀ hòɂǫ ha. Dıı nèk'e naxıxè hoìla ha hǫt'e. Hanìkò sı̨ sìı dıı nèk'e hazǫǫ̀ gıghǫèhnǫ ne t'à, naxınì nàtsoò aahłe,” Zezì gòhdı.

John 17:21

Hanì-ı̨dè hazǫǫ̀ ı̨łè zǫ lagı̨ı̨t'e ha. Setà, nexè aht'ı̨ eyıts'ǫ nı̨ sexè anet'ı̨, ededı̨ sı goxèht'eè ı̨łè lagı̨ı̨t'e ha. Goxè ı̨łè lagııt'è, hanì-ı̨dè dıı nèk'e gots'ǫ dǫ jǫ ts'ǫ̀ seneehɂà, gıgha ehkw'ı-ahodı ha.

John 17:3

Welǫ whìle ts'ǫ̀ ts'eedaa ts'edıı sìı dıı awèts'edı: Nı̨ nek'ègeezǫ ha, nı̨ zǫ Nǫ̀htsı̨ ehkw'ıı anet'e gık'èezǫ ha, eyıts'ǫ Zezì-Krı, jǫ ts'ǫ̀ weneehɂàa sìı, gık'èezǫ ha.

John 8:19

Eyıt'à dageehke, “Edı̨į̀ netà wheda?” gıìhdı. Zezì gots'ǫ̀ hadı, “Sek'èahsǫ nıìle eyıts'ǫ Setà sı wek'èahsǫ nıìle. Sek'èahsǫ nı̨dè Setà sı wek'èahsǫ ha ı̨lè,” gòhdı.

2 Corınth 4:6

Nǫ̀htsı̨ hadı, “Togoòtł'òo yìı gots'ǫ dzęh xàı̨dı̨į̀ awede,” hadıı sìı godzeè yìı dzęh nı̨ı̨dı̨į̀ ayį̀į̀là, eyı ts'ıhɂǫ̀ Zezì-Krı weghàts'eeda nı̨dè Nǫ̀htsı̨ dànì enıìyah elı̨ı̨ sìı wek'èts'eezǫ ats'et'į̀.

1 Tımothy 5:1

Ǫhdah ekǫ-le hòèhtsı̨ nı̨dè yatı nàtsoo t'à wets'ǫ̀ goı̨de-le, hanìkò netà ts'ǫ̀ goı̨de lanì weghǫnàdaı̨tì. Eyıts'ǫ cheko sìı nechı lanì gıts'ǫ̀ k'ehoı̨ɂa.

Tıtus 2:6

Eyı xèht'eè cheko sìı nàowołı̨ı̨ ch'à edek'ègedì gha hotıì gıts'ǫ̀ goı̨de.

1 John 1:1

Ededı̨ kèhǫǫ̀wo gots'ǫ wehòhɂǫǫ sìı wets'eèhkw'ǫ ı̨lè, xàè godaà t'à wets'aɂı̨ xè weghàts'ı̨ı̨dà ı̨lè eyıts'ǫ goılà t'à dawets'aachì ı̨lè. Eyı Yatı wet'à ts'eedaa elı̨ı̨ sìı weghǫ gots'edeè ats'edı.

1 John 2:1

Sèot'ı̨ı̨, hołı̨ı̨ hoahtsı̨ ch'à hanì naxıts'ǫ̀ ııhtł'è hǫt'e. Hanìkò dǫ hołı̨ı̨ hòèhtsı̨ nı̨dè, gogha dǫ k'edaedıı dǫǫ̀ gǫ̀hłı̨, gogha Edetà ts'ǫ̀ gode ha, eyı sìı Zezì-Krı hǫt'e, Ehkw'ı Edaa Elı̨ı̨ wìyeh.

1 John 2:12

Sèot'ı̨ı̨, Zezì wıızì dahxà naxıhołı̨į̀ naxıghǫ nahoazha t'à naxıts'ǫ̀ eehtł'è hǫt'e.

1 John 2:14

Gotà yàahłı̨ı̨ sìı ededı̨ kèhoį̀wo gots'ǫ wehòhɂǫǫ sìı wek'èahsǫ t'à naxıts'ǫ̀ eehtł'è. Cheko yàahłı̨ı̨ sìı nàahtso xè Nǫ̀htsı̨ yatıì naxıdzeè yìı wheɂǫǫ eyıts'ǫ wehłı̨ı̨ weghǫahnǫ t'à naxıts'ǫ̀ eehtł'è.

1 John 3:12

Caın wexèaht'e-le, ededı̨ sìı wehłı̨ı̨ wets'ǫ dǫ hǫt'e, eyıts'ǫ edechı ełaı̨hwho ı̨lè. Dànìghǫ ayį̀į̀là? Ededı̨ wenàowoò jıı t'à ełaàyį̀ı̨hwho, hanìkò wechı wenàowoò ehkw'ı hǫt'e.

1 John 4:4

Sèot'ı̨ı̨, naxı̨ sìı Nǫ̀htsı̨ gots'ǫ aaht'e, eyıt'à ı̨nì nezı̨-le gıghǫahnǫǫ aaht'e, ededı̨ naxıdzeè yìı nàdèe sìı dıı nèk'e ts'ǫ dǫ yìı nàdèe nahk'e elı̨ hǫt'e.

1 John 5:18

Amìı Nǫ̀htsı̨ gots'ǫ wegǫ̀hłı̨ı̨ sìı ı̨łaà hołı̨ı̨ k'ę̀ę̀ eda nıìle wek'èts'eezǫ. Zezì-Krı Nǫ̀htsı̨ gots'ǫ wegǫ̀hłı̨ ı̨lèe sìı yek'èdì hǫt'e, eyıt'à wehłı̨ı̨ t'asayele ha dìì.

1 John 5:20

Nǫ̀htsı̨ Weza sìı dıı nèk'e ts'ǫ̀ ajà, eyıts'ǫ wenàowoò wenıts'eedì agǫ̀ǫ̀là wek'èts'eezǫ, eyıt'à ededı̨ sìı ehkw'ı hǫt'e wek'èts'eezǫ. Nǫ̀htsı̨ Weza Zezì-Krı ehkw'ı hǫt'e sìı wexè ats'ı̨ı̨t'e. Ededı̨ xàè Nǫ̀htsı̨ ehkw'ı elı̨, eyıts'ǫ ededı̨ wet'à welǫ whìle ts'ǫ̀ ts'eeda ha hǫt'e.

John Wenazhıı 12:11

Gòet'ı̨ Sahzǫ̀ą wedoò t'à eyıts'ǫ edeyatıì sı t'à gıghǫèhnǫ hǫt'e. Eyı gha ełaàgııde kò gıgha t'asanìle hǫt'e.

John Wenazhıı 2:7

“Amìı wedzıì gǫ̀hłı̨ı̨ sìı Yedàyeh Nezı̨ı̨ Nǫ̀htsı̨ wecheekeè dàgòhdıı sìı gıìkw'o welè. T'aa hołı̨ı̨ ghǫ hoehnèe sìı ts'ı wet'à ts'eedaa gots'ǫ shètı̨į̀ awehłe ha. Eyı ts'ı sìı Nǫ̀htsı̨ wets'ǫ hoı̨zı̨-nèk'e nàı̨ɂa hǫt'e.