God-waŋarrwuŋ djämapuy mala 2:19 - Djambarrpuyŋu New Testamen

¹⁹ Yurr ŋarrapiny dhu djäma romdja malany yindin mirithirra, ŋayaŋu-ganyim'thunamirra, nhäman nhuma dhu ga ŋunhawala djiwarr'lila ga dhipala banydjiwal munatha'lila, ganydjarrnydja yindin mirithirra dhu ga maḻŋ'thundja, balanyan nhakun gulaŋnha, ga wiripuny balanyan nhakun gurthan, ga wiripuny dhu marrtji ŋunhi rur'yun balanyan nhakun ŋunhi ŋawulul'nha ŋuli marrtji rur'yun gaḏumgaḏumdhunna.

God-waŋarrwuŋ djämapuy mala 2:19 ပူးပေါင်းရင်းမြစ်များ

Djon 4:48

Ga ŋayiny Djesuny waŋan nhanukal bitjarr, “Ŋunhi nhuma ŋuli gi yaka nhäŋu ŋunhi mirithiny yindiny rom, nhumany dhu ŋunhi yakayi ŋarrakuny märr-yuwalkthirr.”

God-waŋarrwuŋ djämapuy mala 2:18

Yo, balanyamirriynydja waluy, ŋunhi ŋarra dhu rarryundja ŋarrakuwuynydja ŋarra Dhuyu-Birrimbirrnhany ŋurikiwurruŋgala ŋayaŋulilnydja ŋunhi ŋarrakalaŋuwala djämamirriwalnydja walalaŋgal, ḏirramuwurruŋgal ga miyalkkurruwurruŋgal, bala walalnha dhu ga ŋunhi lakaramany ŋunhin dhäwuny' ŋarrakuŋun gurrupanawuy.

God-waŋarrwuŋ djämapuy mala 2:20

Ga waluny dhu buku-munha'yirra ŋunhalnydja garrwarnydja, ga ŋaḻindiny dhu ŋunha miku'thirra gulaŋdhirra. Yo, wäŋany dhuwal munathany' ga djiwarrny'tja dhu wiripuŋuyirra, yurrnha dhu Garraywuny ŋunhi dharrpalnydja walu galkithirr, bunanharawnydja nhanŋu.

God-waŋarrwuŋ djämapuy mala 2:22

“Nhumany ŋunhi yolŋu walal wäŋa-Yitjuralpuynydja* mala, buthuru-bitjurr muka dhiyakuny dhäwuw. Yol bili ŋayi ŋunhi yolŋuny Djesuny wäŋa-Nätjuritjpuynydja? Nhäthinya ŋayi ŋunhi yolŋuny? God-Waŋarryuny gan ŋunhi ŋayipiny milkuŋal ŋanyanhany Djesunhany, lakaraŋalnydja ŋanya ŋayi gan ŋunhi, ŋunhi ŋayiny beŋur warray God-Waŋarrwuŋ djuy'yunawuy, bili djämany ŋayi gan ŋunhi God-Waŋarryuny dhuwalatjarryi muka Djesuwalaŋuwurra, ga nhumany ŋunhi wäŋa-dhuwalaŋuwuyyuny mala, nhumapiny nhäŋal muka ŋanya, ŋunhi ŋayi ŋuli ganha djäma ganydjarr yindi mirithirr ŋayaŋu-ganyim'thunamirr rom.