1 Mel 7:14 - JAM DE NHIALIC 2011

¹⁴ Wun acï thou, ku aa ye raan wun ë Tayer, ku aa ye atën de maläŋ aya, ku man ee nyan dhiën ë Naptali. Ku Ɣuram aa pelnɔm arëët në tëët ë ŋïny de thäth ë maläŋ ëbɛ̈n. Go cɔ̈t de melik Tholomon gam, në luɔi bï yen nu e thäth ë maläŋ nɔm ëbɛ̈n.

1 Mel 7:14 ပူးပေါင်းရင်းမြစ်များ

2 Lëk 2:14

Man ee nyan dhiën de Dan ku wun ë raan ë bɔ̈ ë Tayer. Yen aa atën ee käŋ thɔ̈ɔ̈th në adhääp, ku maläŋ, ku ateek, ku wëëth, ku kur, ku tiim. Yen aduëër lupɔ aräu, ku lupɔ ayaau, ku lupɔ thith amujuŋ, ku lupɔ piɛth lɔ mot looi. Yen aa atën ee käŋ thɔ̈ɔ̈th kedhie, agut të cïï ë yen yɔ̈ɔ̈k an looi wulë, luɔi cï gäm en aye looi ë tëët. Tɔ lui kekë atëëtku, ku lui ke kɔc wään cï ee wuur melik Debid luööi.

2 Lëk 2:6

Ku eeŋa lëu bï Yen yiɛ̈k ɣöt, në luɔi cïï paannhial Yen duëër ɣääc? Yɛn ya ŋa në biäk bän Yen yiɛ̈k ɣöt, ee të bïï ë wal ŋïr aa nyop ë Yenɔm tei.

2 Lëk 4:11

Go Ɣuram töny, ku thialtuŋ, ku guöl looi. Acï ka wään cï keek lɛ̈k melik Tholomon an bïï ke looi ë biäk de yïŋ de ɣön ë Nhialic thöl ë luɔi: Wai kaarou ku guöl, muuk kaarou nu ë wai nïïm, ku akuum kaarou bï ë guöl kum nɔm ë muuk nïïm nhial aber ke pomegraneet bïï ë guöl kaarou kum ë muuk nïïm nhial Ku bot kaŋuan de pomegraneet de maläŋ në aber ee yic rou abëël kathiëër thɛ̈k kathiëër Lɔ̈ɔ̈r de pïïu, miöör kathiëër ku rou kony biäk piny. Töny, ku pur, ku thialtuŋ, ku lɔ kajuëc kɔ̈k ke luɔi, acï Ɣuram keek luöi melik Tholomon në biäk bïï ë Luaŋdït yïk, aake looi ë maläŋ awai.

Bɛ̈n 28:3

Cɔl atëët cä gäm tëët kedhie, ku tɔ ke lui Aron lupɔɔ, ke bï jɔ gäm luɔi de Nhialic, ke ye bɛ̈ny de kake Nhialic.

Bɛ̈n 35:30

Na wën, ke lëk ë Mothe kɔc ke Yithriɛl an, “Tiëŋkï, Bɛ̈nydït ë Bedhalel wën ë Yuri lɔc, Yuri ee wën ë Ɣur raan dhiën ë Juda.

Bɛ̈n 35:31

Ku acïï Bɛ̈nydït thiɔ̈ɔ̈ŋ në wëike, ku gëm tëët, ku nɔm pɛl ku riɛl de ŋïny de käŋ ëbɛ̈n, kë kɔɔr tëët.

Bɛ̈n 35:35

Acï keek gäm tëët de këriëëc ëbɛ̈n, në luɔi bï kek aa tëët, ku yek kɔc ee käŋ kiëët, ku yek linɔn lɔ mot gut, ku gutkï lupɔ aräu, ayï lupɔ amujuŋ, ayï lupɔ thith, ayï lupɔɔ kɔ̈k. Ayek atëët ŋic käŋ kiëët, ku alëukï bïk këriëëc ëbɛ̈n looi.

Bɛ̈n 36:1

“Ku Bedhalel kekë Yooliap, ku atëët kɔ̈kë kedhie, atëët cïï Bɛ̈nydït gäm tëët, ku nɔm pɛl ku ŋïny de käŋ, kɔc ŋic luɔi de këriëëc kɔɔr rɔt tëɣeric ëbɛ̈n, abïk këriëëc looi ëbɛ̈n cït man cïï Bɛ̈nydït e lueel.”

Bɛ̈n 36:8

Ku atëët pel nïïm në atëët luiyë yiic, acïk paany de mät bɛ̈n looi. Acïk bɛ̈n looi në gëlgël kathiëër, gëlgël cï cuëëc në linɔn lɔ mot, ku lupɔ aräu, ku lupɔ amujuŋ, ku lupɔ thith. Ku gutkï kekɔ̈ɔ̈th cerubiim.

Yith 28:26

Aŋic luɔi bï yen luɔide looi, në biäk cïï Nhialic en wɛ̈ɛ̈t.