1 Kor 5:11 - JAM DE NHIALIC 2011

¹¹ Ku ënɔɔnë, acä gäär week an: Duökï ee mat ëtök në raan cï tɔ ye mɛnhkënëda, të ee yen dhööm, ku nɔn ee yen raan dït piɔ̈u, ku nɔn ee yen raan ë yiëth lam, ayï raan ee kɔc läät, ayï raan ee rɔt tɔ wit ë mɔu, ayï cuɛ̈ɛ̈r, raan cït ee kënë, acakaa këcam, ke we duökï rɔ̈m në yen.

1 Kor 5:11 ပူးပေါင်းရင်းမြစ်များ

Diɛt 10:3

Kɔc rac ayek röt lɛɛc në kërɛɛc de kek piɔ̈ɔ̈th, röördït piɔ̈ɔ̈th ayek lam aciɛɛn ku reeckï Bɛ̈nydït.

Diɛt 101:5

Ku yɛn bï raan ee kɔc tuöm gup karɛc nɔ̈k, ku raan rɔ̈th ku raan ee rɔt lɛɛc acä bï pɔ̈l.

Edhekiɛl 22:12

Kɔckuön kɔ̈k aye keek riɔp në luɔi bïï kek näk. Kɔ̈k ayek aŋuëk nööm ë wëu cï kek kɔckɛn ke Yithriɛl kony kɔ̈ɔ̈th, ku jɔkï kuɛth në cäm ciɛm keek. Acïk nïïm määr në yɛn.” Bɛ̈nydït Awärjäŋ yen aa jam.

Math 18:17

Ku të reec en keek piŋ thook, ke yï lɛ̈kë ɣön ë Nhialic, ku të reec en ɣön ë Nhialic piŋ thok, ke tɔ cït jur kuc Nhialic tëde yïn ku cït raan ë athölbö tɔ kut.

Math 23:25

“Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! We ye abïny rɔɔth kɔ̈u ayï aduök abïk piath, ku keyiic thïn acïk thiäŋ ë cäm de kalei, ku kuny ee raan rɔt kuöc muk.

Luk 18:11

Go raan ë Parithai kɔ̈ɔ̈c nhial ku jɔ lɔ̈ŋ alë ë yepiɔ̈u an, ‘Nhialic, yïn lɛc nɔm, nɔn cän cït kɔc kɔ̈k, kɔc ee käŋ rum, kɔc ee kɔc cam, kɔc ee diëër lei kɔɔr, ku cä cït raanë aya, raan ë athölbö tɔ kutë.

Luk 21:34

“Yak röt tiit, ke we cïï piɔ̈ɔ̈th bï aa thiäŋ në kajuëc yak cam, ku wïn ee mɔu we wit, ku diɛɛr në ka ke pïïr ënɔɔnë, ke we cïï ëköölë bï mook ëthiäu.

Luɔi 1:15

Ë aköölkë ke Petero jɔt rɔt ë kɔc yiic cil kɔcpiööcë (kuën ë rinken kedhie acït bɔt tök ku thiërrou),

Luɔi 9:17

Go Anania jäl, le ɣöt, na wën, ke thɛny ecin ë yenɔm, ku lueel an, “Thaulo mɛnhkäi, yɛn aa tooc Bɛ̈nydït Yecu, raan ë tiëc tëde yïn kueer wään bï yïn eenë, yen aa toc ɛn, ke yï bï piny bɛ tïŋ, ku bä thiäŋ në Wëidït ɣer.”

Romai 13:13

Yok ŋiëc rëër apiɛth, luɔi ee yen aköl, yok thuëëc pɔ̈l, ku wïn ee mɔ̈u wo wit, ayï ŋɔ̈ɔ̈ŋ de tik ayï luɔi rac, ayï ater ayï tiɛɛl.

Romai 16:17

Ku wek yɔ̈ɔ̈k, wek mïthëkɔckuɔ, wɔikï kɔc ee kɔc pääk, kɔc ee kak ee kɔc tɔ wäc käŋ cak, kɔc ee wëët ë wëëtë week riɔ̈ɔ̈k, päkkï në keek.

1 Kor 10:14

Yen aa wek kat ë läm de yiëth, wek kɔckiën nhiaar.

1 Kor 11:21

Raan ëbɛ̈n ee këcam de yenguöp nööm ku ciɛm, ku ŋɛk acï cɔk nɔ̈k, ku wit ŋɛk ë mɔ̈u.

1 Kor 5:13

Ku kɔc ë tɔ̈u biic löŋden abïï Nhialic guiir. Cït man cï këcïgɔ̈ɔ̈r ye lueel an, “Jakï raan rɛɛcë bɛ̈ɛ̈i bei ë weyiic.”

1 Kor 6:10

ayï cuɛ̈ɛ̈r, ayï kɔc ee wëu nhiaar, ayï kɔc ye mɔ̈u wit, ayï kɔc ë kɔc läät, ayï kɔc ë kɔc rum, keek kedhie, acïkï ciɛɛŋ de Nhialic bï lɔ̈ɔ̈k lak.

1 Kor 6:6

Ku ënɔɔnë, raan ee lɔ gööny ke mɛnhkënë, acakaa ë kɔc reec gäm nïïm.

1 Kor 6:9

Kuöckï kɔc racpiɔ̈ɔ̈th nɔn cïï kek ciɛɛŋ de Nhialic bï lɔ̈ɔ̈k lak? Duökï röt ë tɔ mɛnhë: dhööm, ayï kɔc ee yiëth lam, ayï kɔc ee diëër lei kɔɔr, ayï diëër ee röör kɔɔr, ayï röör ee röt tɔ ye diäär, ayï röör ë niin ë röör,

1 Kor 7:12

Ku kɔc kɔ̈k kek a yɔ̈ɔ̈k, acie Bɛ̈nydït, ee yɛn ë yöök keek an: Na de mɛnhkënëda, raan de nɔm tiiŋ kën gam, ku tik agam rëër kekë yen, ke du tɔ cieec.

1 Kor 7:15

Ku raan kën gam, të jël en, ke lɔ: na loi yen aya, ke raan cï gam, nɔn ee yen moc ku nɔn ee yen tik, acïn kë cï e mac, cït man ë lïm: ku Nhialic acï wo cɔɔl në këde mät.

1 Kor 8:11

Ku në ŋïnyduön ë käŋ, bï mɛnhkui kɔ̈c määr, mɛnh cï Kërtho thou në baŋde?

Galatai 2:12

Ɣɔn ŋootë kɔc kɔ̈k ë ke kën bɛ̈n tëde Jakop, aaye cam kekë juöör ëtök: na wën, aacï kɔckë bɛ̈n, ke jɔ enɔm dak ciëën, go rɔt tɔ̈ɔ̈u pei, në riɔ̈ɔ̈c ee yen riɔ̈ɔ̈c ë aŋueel.

Epethiei 5:18

Ku duökï röt ee tɔ wit mɔ̈u, ee mumënɔm bɛ̈ɛ̈i, yak röt tɔ thiäŋ ë Wëidït.

Epethiei 5:5

Kënë aŋiɛckï ëgɔk an, acïn raan ee diäär kɔɔr, ku cïn tiiŋ ee röör kɔɔr, ku cïn raan ee luɔi col looi, ku cïn raan ee kalei woi, yen aye raan ee yath lam, acïn raan ë keyiic, raan bï dɛ kë bï lɔ̈ɔ̈k lak ë Ciɛɛŋ de Kërtho yic kekë Nhialic.

Kolothai 3:5

Yak ka ke wegup tɔ thou, ka nu ë piny nɔm, kɔ̈ɔ̈rëdiäär, luɔi col, tum ee raan e piɔ̈u tuöm ka ke piny, ŋɔ̈ɔ̈ŋ de kërac, ku wui de kalei, yen aye läm de yiëth.

2 Theth 3:14

Ku na de raan reec jamda piŋ jam nu ë awerekë yic, yak raanë gɔɔk guöp, ku duökï ee mat ë yen, ke bï yäär.

2 Theth 3:6

Ku ënɔɔnë, we yöökku, wek mïthëkɔckuɔ, në rin ke Bɛ̈nydan Yecu Kërtho, an, Ratkï röt wei ë mɛnhkënëda lɔ̈ɔ̈m ëbɛ̈n mɛnh kuc rëër, ku reec jam aa piŋ jam cäk yök tëde wook.

1 Tim 3:3

raan cïï mɔ̈u ee nhiaar, ku cïï kɔc ee dui, ku cïï ee wäth ë wëu ke ayäär, raan lir piɔ̈u, ku cïn piɔ̈u ater, ku acïï wëu ee nhiaar.

1 Tim 6:5

ku bïï lööŋ ɣäär yiic lööŋ ke kɔc cï piɔ̈ɔ̈th riääk, kɔc cïn yic cath ke keek, kɔc ee ye lueel an, Riëëu ee raan Nhialic riëëu ee kueer bï kake ŋuak nyïïn: ratë rɔt wei ë kɔc cït ee kakë lɔ̈m.

2 Jɔn 1:10

Na bɔ̈ raan tëde week, ku cïï wëëtë bïï, ke duökï gam ɣöndun, ku duökï lëk thieithieei.

Nyuuth 2:14

Ku yɛn cath wo cök liaakäŋ cök bän yï jɔ̈ɔ̈ny, cöök tök kï, nɔn de yïn kɔc ëtɛ̈ɛ̈n kɔc ee wëët ë Balaam muk, raan ɣɔn wëët Balak, an, bï kë bï kɔc tɔ kɔ̈th cuat kueer ë mïth ke Yithriɛl, an, bï ka cï lam aa cam, ku bïk diäär aa kɔɔr.

Nyuuth 2:20

Ku yɛn cath wo cöök bän yïn jɔ̈ɔ̈ny, päl ee yïn tiiŋ cɔl Jedhebel pɔ̈l, tiiŋ ee rɔt tɔ ye tiiŋ tiët, ku ye lïïmkï wɛ̈ɛ̈t, mɛth en keek, an, bïk diäär aa kɔɔr, ku bïk ka cï läm yiëth aa cam.

Nyuuth 21:8

Ku na ariɔ̈c, ku kɔc reec gäm, ku kɔc nhiany piɔ̈ɔ̈th, ku kɔc ee kɔc nɔ̈k akurkï, ku kɔc ee diäär kɔɔr, ku kɔc ee thuëth, ku kɔc ee yiëth lam, ku aluɛth kedhie, këden ee täu bï kek tɔ̈u ë baar ë dëp ë macic ku thulpuric, yen aye thon ee kek rou.”

Nyuuth 22:15

Ku jɔ̈k, ku kɔc ee thuëth, ku kɔc ee diäär kɔɔr, ku kɔc ee kɔc nɔ̈k akurkï, ku kɔc ee yiëth lam, kek atɔ̈ukï biic, ayï raan ëbɛ̈n raan nhiaar lueth ku ye lueth töör.