1 Kor 2:8 - JAM DE NHIALIC 2011

⁸ Yen aye pɛlënɔm cïn raan töŋ de bäny ke pinyë nɔm ë cï e ŋic, tëë cïk ŋic, adï kënkï Bɛ̈nydïït de dhuëëŋ piäät ë tim cï rïïu nɔm kɔ̈u.

1 Kor 2:8 ပူးပေါင်းရင်းမြစ်များ

Math 11:25

Ë aköölkë go Yecu bɛ̈ɛ̈r ku lueel an, “Yïn lɛc nɔm, yïn Wäär, Bɛ̈nydït ë paannhial ku piny, ë luɔi cï yïn kakë mɔ̈ny kɔc pelnïïm, ku kɔc de nïïm, ku nyuöthë ke mïththii thuët.

Math 13:22

Ku kë cï com ë kuɔɔth yiic, yen aye raan piŋ jam, na wën ke diɛɛr ë ka ke pinyë nɔm, ku mɛth ee juëc de wëu raan math, ke ke nyiic jam, go cïï lok.

Luk 23:34

Na wën, ke lueel Yecu an, “Wäär, päl keek, në kuny kuc kek ke loikï.” Gokï lupɔɔke tɛ̈k röt në deeny deeny kek gɛk.

Jɔn 16:3

Ku kakë abïk ke luöi week, në kuny kuc kek Wäär, ayïk ɛn.

Jɔn 7:48

De raan töŋ cï ye gam në bäny yiic ayï Parithai yiic?

Jɔn 8:19

Agokï thiëëc an, “Nu Wuur ënou?” Go Yecu bɛ̈ɛ̈r an, “Kuc ɛn ayï Wäär: tëë we ŋic ɛn, adï ŋiɛckï Wäär aya.”

Luɔi 13:27

Ku kɔc rɛ̈ɛ̈r ë Jeruthalem kekë bäny ceŋ keek, në kuny kuc kek en, ku kuckï jam ë tït, jam ye cool ë kueenë yeyic ë akööl ke Thabath kedhie, acïk jamden tɔ ye yic, në mäny cï kek e mäc yeth kërac.

Luɔi 7:2

Go lueel an, “Wek wɛ̈ɛ̈t ke wäär ku wärkuɔ, piɛŋkï këdï! Nhialic cath ke dhuëëŋ, yen acï tuöl tëde wäärdan Abraɣam të ɣɔn nu yen Methopotamia, aŋoot ke kën guɔ ceŋ ë Ɣaran,

1 Kor 1:20

Raan pelnɔm akou? Raan ee löŋ gɔ̈ɔ̈r akou? Raan ŋic wël teet nu nou, raan ë pinyë nɔm? Pɛlënɔm ë kɔc ke pinyë nɔm kënë Nhialic tɔ ye këɣɔ̈ric?

1 Kor 2:6

Ku wok ee jam de pɛlënɔm lueel wokë kɔc cï ŋuɛ̈ɛ̈n, ku acie pɛlënɔm ee pinyë ënɔɔnë, ku acie pɛlënɔm ë bänydït ke pinyë nɔm, bäny bï ciën naamden rial.

2 Kor 3:14

Acïk nïïm riɛl: ku aɣet cï ëköölë lupɔ manë guöp ë döŋ akënë nyaai, të ye awerek kueenic awerek de löŋ cï mac thɛɛr, ku lupɔyë aye nyaai në Kërtho yic.

Epethiei 1:17

ke Wun Bɛ̈nydan Yecu Kërtho, yen aye Wun de nɔm lɛc, ke bï we miɔɔc në wëi ke pɛlënɔm ku nyuuth bï we nyuöth käŋ, luɔi bä wek e ŋic apiɛth.

Epethiei 4:18

kɔc col piɔ̈ɔ̈th ku liukï ë pïïr ë Nhialicic në biäk de kuny kuc kek käŋ, ku në riɛl ril kek nïïm,

1 Tim 1:13

Acakaa yɛn ë ye raan ee Nhialic läät ɣɔn, raan ee kɔc yɔŋ, ku ya ke kuur: ku yɛn ë kokdepiɔ̈u yök, luɔi cän e looi ke kuöc në ciën gäm.

Jakop 2:1

Wek mïthëkɔckuɔ, duökï gäm de Bɛ̈nydan Yecu Kërtho, Bɛ̈nydïït de dhuëëŋ ee muk në kuëny aa wek kɔc kuany yiic.