Zaburi 27:1 - Digo Bible

¹ Mwenyezi Mlungu ndiye mwanga wangu na wokofu wangu, nimuogophe ani? Mwenyezi Mlungu ndiye ngome ya maisha gangu, nimuogophe ani?

Zaburi 27:1 ပူးပေါင်းရင်းမြစ်များ

Ayubu 29:3

Wakati taaye kala inaaka dzulu ya chitswa changu, na kunimwirikira mwanga wakati kala nanyendeka jizani.

Zaburi 11:1

Mwenyezi Mlungu ndiye chimbiriro rangu. Mnawezadze kuniamba, “Uruka dza nyama wa mapha uchimbirire myangoni,

Zaburi 118:21

Nakushukuru kpwa kukala ukanijibu na ukakala wokofu wangu.

Zaburi 118:6

Mwenyezi Mlungu a uphande wangu, nami sindaogopha chochosi. Mwanadamu andanihendani?

Zaburi 18:28

Uwe Mwenyezi Mlungu, ndiwe uasaye taa yangu. Mlungu wangu nkuhenda jiza rangu rikakala nuru.

Zaburi 18:29

Kpwa msadao, ninashambulia jeshi, kpwa msada wa Mlungu wangu ninaturya midzi yenye ngome.

Zaburi 18:46

Mwenyezi Mlungu a moyo! Naatogolwe hiye ariye mwamba wangu! Náaunulwe Mlungu wa wokofu wangu.

Zaburi 19:14

Maneno nigombago na maazo ga mwangu moyoni nagakubalike phako matsoni, Ee Mwenyezi Mlungu, mwamba wangu na mkomboli wangu.

Zaburi 3:8

Wokofu ula kpwako uwe Mwenyezi Mlungu. Barakazo nazikale dzulu ya atuo.

Zaburi 43:2

Uwe Mlungu ndiwe nkuchimbiriraye, mbona unaniricha? Kpwa utu wani niangaike na sonono kpwa kuteswa ni maadui?

Zaburi 62:2

Iye ndiye mwamba wangu na wokofu wangu, ngome yangu, sindakakamiswa ni utu.

Zaburi 62:6

Iye macheye ndiye mwamba na wokofu wangu, ndiye ngome yangu, sindakakamiswa ni utu.

Zaburi 84:11

Mana Mwenyezi Mlungu ni dzuwa na ni ngao, nkuhupendeleya na kuhujaliya ishima. Mwenyezi Mlungu kaalafya chochosi chiricho chinono hinyo ahendao garigo sawa.

Kutsama 15:2

Mwenyezi Mlungu ndiye mkpwotse na nguvu yangu iye ndiye achiyenitivya. Iye ni Mlungu wangu, nami ndamtogola kpwa mawira. Iye ni Mlungu wa akare angu, nami nindaimba kumtogola.

Isaya 12:2

Kpwa kpweli Mlungu ndiye muokoli wangu, ndamkuluphira wala sindaogopha. Mwenyezi Mlungu ndiye nguvu zangu na wira wangu, iye akakala wokofu wangu.”

Isaya 2:5

Mwi atu a nyumba ya Jakobo, ndzoni, nahunyendekeni kpwenye mwanga wa Mwenyezi Mlungu.

Isaya 45:24

Atu andagomba kunihusu kuamba, ‘Kpwa Mwenyezi Mlungu macheye, ndiko kuriko na haki na nguvu.’ Osi ariomtsukirirwa andamwedzera, nao andatiywa waibu.

Isaya 61:10

Nindahamirwa sana kahi za Mwenyezi Mlungu, roho yangu indashangiliya kahi ya Mlungu wangu, mana akanibwiningiza vwazi ra wokofu, akanivwika vwazi ra haki, dza viratu bwana harusi adzipambavyo na chiremba chinono dza cha mlavyadzi-sadaka, dza bibi harusi adzipambavyo na vitu vya samani.

Jeremia 20:11

Ela uwe Mwenyezi Mlungu u phamwenga nami dza sujaa wa viha. Kpwa hivyo anigayisao andadzikpwala, na taandaweza kuniturya. Andaaibika sana, mana taandafwaulu. Takuna ndiye yala waibu wao.

Malaki 4:2

Ela mwimwi muogophao dzina rangu, dzuwa ra haki rindakutulukirani na mwangawe undareha uphozi. Mundatina-tina kpwa raha dza ana ngʼombe achiotuluka chaani.”

Mathayo 8:26

Naye achiaambira, “Mwi atu msioamini, mbona mu aoga?” Phahi waunuka na achidemurira rira phuto na go maimbi, gachihurira hu.

Luka 2:30

Mana nkamuona Muokoli kula kpwako

Luka 3:6

Anadamu osi andaona wokofu wa Mlungu.’ ”

Johana 1:9

Hiye mwanga wa kpweli, angʼariraye chila mmwenga, kala aredza duniani.

Johana 8:12

Jesu waenderera kugomba na atu achiamba, “Mimi ni mwanga ungʼarirao atu himu duniani. Mutu ndiyenilunga mimi kandanyendeka jizani kamare, ela andaphaha mwanga uaphao atu uzima.”

Arumi 8:31

Vino, huambedze kuhusu mambo higa? Ichikala Mlungu a uphande wehu, kpwa kpweli takuna mutu awezaye kuhushinda.

2 Akorintho 12:9

ela achiniamba, “Mbazi zangu zinakutosha, mana unaphokala mnyonje, uwezo wangu unahendwa ukamilike.” Kpwa hivyo nahererwa kudzikarya na unyonje wangu ili uwezo wa Jesu ukale nami.

Kumbukumbu 7:18

Msiaogophe, ela tambukirani vira Mwenyezi Mlungu, Mlungu wenu, arivyomuhenda mfalume wa Misiri na tsi ndzima ya Misiri.

Kumbukumbu 7:21

Phahi, msiaogophe, kpwa sababu Mwenyezi Mlungu, Mlungu wenu, a kahi yenu. Iye ni Mlungu mkpwulu na wa kutisha.

Afilipi 4:13

Mana naweza kuhenda chila chitu kpwa msada wa iye aniphaye nguvu.

Aeburania 13:6

Ndiyo mana hunaweza kugomba bila wuoga hukaamba, “Mwenyezi Mlungu ndiye msaidizi wangu, sindaogopha chochosi. Mwanadamu andanihendani?”

Maono 21:23

Mudzi hinyo tauna haja ya mwanga wa dzuwa ama mwezi, mana nkungʼarirwa ni utukufu wa Mlungu, na Mwana ngʼondzi ndiye taa ya nyo mudzi.

Maono 22:5

Ndani ya mudzi hinyo takundakala na usiku tsona; atu taandakala na haja ya taa wala dzuwa, mana Bwana Mlungu ndiye ndekala mwanga wao. Atu hinyo andatawala hata kare na kare.

Maono 7:10

Achikala anapiga kululu kuno anaamba, “Wokofu ula kpwa Mlungu wehu asagalaye chihi cha chifalume, na kpwa Mwana ngʼondzi.”