2 Afalume 8:12 - Digo Bible

¹² Hazaeli achimuuza, “Bwana wangu, mbona unarira?” Elisha wamjibu achiamba, “Kpwa sababu namanya mai ambago undaahendera atu a Iziraeli. Undaocha ngome zao na moho, na kuaolaga barobaro ao, undaakata ana aho vipande-vipande na achetu aho enye mimba undaahula.”

2 Afalume 8:12 ပူးပေါင်းရင်းမြစ်များ

1 Afalume 18:13

Kpwani kuyaambirwa bwana wangu vyo nrivyohenda siku Jezebeli ariphokala anaolaga manabii a Mwenyezi Mlungu, mino náhala manabii gana mwenga nchiafwitsa mirongo mitsano-mitsano pangoni, nchiarisa chakurya na kuapha madzi?

1 Afalume 19:17

Phahi, mutu yeyesi ndiyepona kuolagbwa na upanga wa Hazaeli, Jehu andamuolaga na yeyesi ndiyepona kuolagbwa na upanga wa Jehu, Elisha andamuolaga.

2 Afalume 12:17

Wakati hinyo Hazaeli mfalume wa Aramu waambuka kpwendapiga mudzi wa Gathi, na achiuhala mateka. Bada ya higo Hazaeli waelekeya Jerusalemu ili aushambuliye.

2 Afalume 12:18

Joashi mfalume wa Juda wahala vitu vyosi vyotengbwa ni afalume ariomtanguliya kutawala Juda, Jehoshafati, Jehoramu na Ahaziya, na achienjereza na vyakpwe vyokala vikatengbwa ni akaree, phamwenga na zahabu yosi yokala kpwenye hazina ya nyumba ya Mwenyezi Mlungu, na ndani ya dzumba ra mfalume, achizihuma kpwa Hazaeli mfalume wa Aramu. Naye Hazaeli achiuka Jerusalemu.

2 Afalume 13:22

Mfalume Hazaeli wa Aramu waagayisa sana atu a Iziraeli wakati wosi wa utawala wa Jehoahazi.

2 Afalume 13:3

Mwenyezi Mlungu watsukirwa, achiahenda atu a Iziraeli ashindwe kpwenye viha kano kpwa kano ni mfalume Hazaeli wa Aramu na mwanawe Beni-Hadadi.

2 Afalume 13:7

Jehoahazi kayasarirwa ni anajeshi, ela wakala na anajeshi akuhumira farasi mirongo mitsano, magari kumi ga kuvwehwa ni farasi na anajeshi akunyendeka na magulu elufu kumi tu. Yakala hivyo kpwa sababu mfalume wa Aramu kala akaangamiza makundi ga anajeshi a Iziraeli na kugavyoga-vyoga photsi dza mavumbi.

2 Afalume 15:16

Menahemu wabomola kabisa mudzi wa Tifusa kuandzira Tirisa na kuaangamiza enyezie phamwenga na tsi yosi iriyouzunguluka kpwa sababu taayamvugurira ryango. Wahala vitu na achiahula ndani za achetu a mimba ariokala himo.

2 Afalume 4:28

Hiye mchetu wamuambira; “Bwana wangu, mino nakuvoya mwana? Siyakuamba kpwamba usiniphe matumaini ga handzo?”

Isaya 13:16

Ana aho andabandwa-bandwa myambani kuno enye analola, vitu vya mwao madzumbani vindahalwa na achetu aho agbwavukirwe.

Isaya 13:18

Hinya andaolaga mabarobaro na maha. Taandaaonera mbazi ana atsanga wala anache adide.

Hosea 10:14

Kpwa hivyo kundagbwa viha kahi ya atuo, ngome zenu zindabomolwa dza viratu mfalume Shalimani arivyobananga mudzi wa Bethi-Aribeli wakati wa viha, ambapho achetu na ana ao abundwa na photsi.

Hosea 13:16

Atu a Samariya andatiywa adabu kpwa ajili ya makosa gao, kpwa sababu amuasi Mlungu wao. Aho andaolagbwa na upanga ana aho atsanga andakatwa-katwa vipande-vipande na achetu aho enye mimba andaahulwa.

Hosea 14:1

Mwimwi Aiziraeli, muuyireni Mwenyezi Mlungu, Mlungu wenu, kpwa kukala dambi zenu ndizo chizokuhendani mugbwe.

Amosi 1:13

Mwenyezi Mlungu anaamba, “Kpwa sababu atu a Amoni akahenda dambi vivyo kpwa vivyo, ni niatiye adabu. Wakati anapigana ili kupanula miphaka yao, aahula achetu a mimba a Giliadi.

Nahumu 3:10

Ela gago tagayaokola chitu. Thebesi yatekpwa na atue achitsamizwa kpwa lazima. Ana aho atsanga abundwa na photsi, phenye mawe hadi achifwa kpwenye maganiko ga nyo mudzi. Vilongozi a nyo mudzi afungbwa silisili, na go maadui gao achiaganya kpwa kuapigira kura.