Yõaannẽ 3:16 - ꞌBuuk cĩ Thõõth cĩ Nyekuci

¹⁶ “Hĩnĩngĩtĩ baa ammĩnan Nyekuci eet cĩg looc nicci gẽrrẽẽt ũdũt, ĩnõõ ꞌcĩ ẽlẽmanaanĩ Ngeerĩnĩ ꞌcĩ odoyyii ẽlẽ cĩnnĩ, hátĩ hiittiõõ ẽẽtĩ ꞌcĩ ẽlẽmĩ Ngeerĩnĩ hõllõngaa adaahĩ. Ammũda hatĩ ẽẽtĩ ꞌcĩ ẽlẽmĩ ĩnõõnnõ ho, rũgẽt ꞌcĩ aalla ooo.

Yõaannẽ 3:16 ပူးပေါင်းရင်းမြစ်များ

ꞌThianaattõ 22:12

Ma nĩngaata, ĩĩnnĩk aajĩlõ ĩnõõnnõ, “Ma haruhi loholeec! Hagawa naa ngaatĩ iꞌngoliini nii Nyekuc dĩdĩ, hĩnĩngĩtĩ hõllõngaa ẽdẽnĩ nii ngeeruni ꞌcĩ odoyyii ho.”

ꞌThianaattõ 22:2

Ma ho, uduhaak Nyekuci Abũrahaamõ ĩĩnnĩk “Bĩtĩ ngeeruni Iꞌthaako, ꞌcĩ odoyyii, ꞌcĩ ammĩnani gẽrrẽẽt ko ngaatĩ haĩ Moria nẽ ĩbboorĩhaa nganĩĩt hĩĩ ꞌgaarrieenit ꞌcĩ ĩĩn ꞌbaaninit. Bĩĩt ꞌbõõr ĩnõõnnõ muuraa ꞌcĩ hatĩ hõkõ heterꞌtheekii naana.”

Maatteeo 9:13

Õõt da nõõ umuddia thõõth baa aduha ꞌBuuhi cĩ Nyekuci aĩ, ‘Haccamanaa naa tamaati, hõllõngaa haccamanaa ꞌgaarrieenit,’ hadiimmuung naa ngagiit atamaatĩk ꞌgoonogu. Baa hõllõngaa hakuu naa hikia hũtũvva eet ꞌcĩg abũnnaa. Hakuu naa havva ꞌthẽccanniook.”

Maarko 12:6

“Baa nga aꞌnyak baattĩ manu ngeerĩnĩ hõdẽẽthõng ꞌcĩ ammĩnan nẽẽ gẽrrẽẽt. Ma baa urutaa cĩ thooꞌthiok iccig vẽlẽk, ikia aattĩ ĩꞌthõ nẽẽ ngeerĩnĩ dẽẽdẽ. Baa ammuk hinnia nẽẽ aĩ, ‘Õõ hatĩ iꞌngolli nẽẽg loholeec caannĩ.’

ꞌLuuka 2:14

“Bulẽẽnĩt hĩ Nyekuc hẽẽtkujjieen, nẽ ganõn hĩ eet ꞌcĩg accamana Nyekuci loota nĩnga.”

Yõaannẽ 1:14

Ma nĩngaata, ikia Thõõth baa ĩĩn lanyit ĩĩ eet nẽ hũrũmtĩ hĩ ngagĩĩt hõdẽĩ loota nĩnga. Hiita hĩcĩnĩt naag bulẽẽnĩt cĩnnĩ dĩdĩ, bulẽẽnĩt cĩ Ngeertĩ Nyekuc Maaꞌnyĩ ꞌcĩ odoyyii. Aꞌnyahaakeet nẽẽ ngagĩĩt loota nĩnga, bũnnai hĩ thõõth vẽlẽk ꞌcĩ ĩĩn dĩdĩ, ꞌcĩ aku hĩ Nyekuc.

Yõaannẽ 1:18

Nga hĩcĩn eet umwaa Nyekuc, Ngeerĩnĩ ꞌcĩ odoyyii dioo, ꞌcĩ ĩĩn Nyekuc dĩdĩ nẽ õbõhõõ hĩ Maaꞌnyĩ ꞌcĩ etereꞌtheet ngagĩĩt hagaac Nyekuc.

Yõaannẽ 1:29

Ma loohoth cĩnnĩ, udtuuha Yõaannẽ Yeesu ngaatĩ akuuni hĩ ĩnõõnnõ, nĩngĩtĩ õthõõthĩ Yõaannẽ aĩnnĩ, “Ĩcĩnĩt Mĩꞌnyõõn cĩ Nyekuci ꞌcĩ attik ꞌthẽccanẽẽt cĩg eetuk!

Yõaannẽ 10:28

Haaꞌnyihi naa aꞌtha rũgẽt ꞌcĩ aalla ooo nẽ aitiõõ hatĩ nẽẽg hõllõngaa adaahĩ ũdũt. Nẽ aitiõõ eet ꞌcĩ occa avvucanaanna nganĩĩt ĩhõõggõ athĩnĩĩ cĩgannĩg tõõ.

Yõaannẽ 3:15

Nẽẽthĩ hatĩ ummuddia eeta vẽlẽk ꞌcĩg aꞌnyak lemiinit hĩ Ngeertĩ Eeto, rũgẽt ꞌcĩ aalla ooo.

Yõaannẽ 3:18

Hõllõngaa hatĩ uuki ẽẽtĩ ꞌcĩ ẽlẽmĩ Ngeertĩ Nyekuci, nẽẽthĩ, ẽẽtĩ ꞌcĩ hõllõngaa ẽlẽmĩ ĩnõõnnõ, ẽttẽẽdĩ thõõth cĩnnĩ ẽlẽk, hĩnĩngĩtĩ hõllõngaa ẽlẽmĩ nẽẽ Ngeertĩ Nyekuci ꞌcĩ odoyyii.

Yõaannẽ 3:36

Ammũda hatĩ eeta vẽlẽk ꞌcĩg ẽlẽmĩ Ngeertĩ Nyekuci rũgẽt ꞌcĩ aalla ooo nẽ ẽẽtĩ ꞌcĩ abũrĩ thõõth cĩ Ngeertĩ Nyekuci, hõllõngaa hatĩ ammũda rũgẽt niccia, alĩĩllĩk hatĩ Nyekuci eet tĩho nẽ uuk ĩnõõnnõ ũdũt!”

Yõaannẽ 6:40

Hĩnĩngĩtĩ tabiiniti cĩ Baaba, adiim eet vẽlẽk ꞌcĩg acĩn Ngeerĩnĩ nẽ elemit ĩnõõnnõ, humuddia rũgẽt ꞌcĩ aalla ooo nẽ hũrũgũthaa ĩhõõggõ kõr cĩ decciaanĩt cĩ lootu.”

ꞌRooma 5:10

Tananga baa hĩĩtõ naag mĩrõk cĩg Nyekuci, ikia aganĩꞌtheet nẽẽ ngagĩĩta, hĩnĩngĩtĩ baa adaahĩ Ngeerĩnĩ, hĩnĩngĩtĩ ngagĩĩta. Nẽẽthĩ, nga aayyiaa ꞌgiimwaa ꞌcĩ ĩllõõan ꞌgõnnaꞌthẽẽt cĩnaac. Nẽẽthĩ ꞌyioko, hĩcĩ hagayyiõõ naag hĩ Nyekuc ko, heelliaa hatĩ naag rũgẽtaa cĩ Ngeerĩnĩ.

ꞌRooma 5:8

Nẽẽthĩ eteretheeheet Nyekuci ngagĩĩt mĩnnan cĩnnĩ ꞌgõõlaa ĩĩcĩ, baa nga hĩĩgĩn naag ꞌthẽccanniook, ikia adaak Krĩstõ, hĩnĩngĩtĩ ngagĩĩta.

ꞌRooma 8:32

Baa hõllõngaa ẽdẽnĩ Nyekuci Ngeerĩnĩ, nẽẽthĩ, baa aaꞌnyeet nẽẽ ĩnõõnnõ ngagĩĩta. Má baa adĩman Nyekuci hoti, ĩcca occa hatĩ hõllõngaa aaꞌnyeet nẽẽ hẽlẽggĩ vẽlẽk haaga?

Eevvetho 2:4

Nẽẽthĩ, hĩnĩngĩtĩ mĩnnan cĩnnĩ cobbi ꞌcĩ aꞌnyaheekeet nẽẽ ngagĩĩta, ikia Nyekuci ꞌcĩ aꞌnyak tamaati ꞌcĩ maka,

2 Tẽꞌthaloonika 2:16

Aꞌnyĩĩk Makayyioohit cĩnaac Yeesu Krĩstõ hĩ Nyekuc Baangeet cĩnaac ꞌcĩ ammĩnanneet ngagĩĩt bũnnaiitta cĩnnĩ nẽ aaꞌnyeet kũttan ꞌcĩ aalla ooo hĩ muhẽẽnĩt ꞌcĩ abũnnaa,

Tiito 3:4

Nẽẽthĩ, ma baa edeeꞌnyia tarbalꞌthẽẽt hĩ mĩnnan cĩ Nyekuc Ellioohit cĩnaac,

Ebereei 2:9

Hĩcĩnĩt naag Yeesu baa arritanniaa hĩdĩhĩdĩĩc hĩllõõan aajĩlẽẽt. Nẽẽthĩ ꞌyioko, itihimoothĩk ĩnõõnnõ tẽmẽdẽhĩ cĩ bulẽẽttõ hĩcĩ tẽẽlꞌthĩtõõ, hĩnĩngĩtĩ baa adaak nẽẽnĩ. Bũnnaiittaa cĩ Nyekuci dĩdĩ, ikia atar Yeesu daahĩth hĩnĩngĩtĩ eet vẽlẽk.

1 Yõaannẽ 3:1

Ĩcĩnĩt nõõ ngaatĩ ammĩnanneet Baangẽẽtĩ ngagĩĩt gẽrrẽẽt, aũũyyeet nẽẽ ngagĩĩt anneekeet lõhõlĩ cĩgĩnnĩg, nẽẽꞌthẽk hĩĩgĩn naag lõhõlĩ cĩgĩnnĩg dĩdĩ! Nẽẽthĩ, aitiõõ eeta cĩg looc nicci hõllõngaa aga ngaatĩ hĩĩgĩnnĩ naag lõhõlĩ cĩg Nyekuci, hĩnĩngĩtĩ hõllõngaa aga nẽẽg ĩnõõnnõ.

1 Yõaannẽ 4:19

Hammĩnanõõ naag, hĩnĩngĩtĩ baa itiman Nyekuci ngaatĩ ammĩnanneet ngagĩĩt baa ĩĩcĩ oou.

Terethiinit 1:5

Aꞌnyĩĩk Yeesu Krĩstõ ꞌcĩ aduhaakeet thõõth ꞌcĩ ĩĩn dĩdĩ cĩ Maacõnĩ, haaꞌnyuung ngagiit ĩĩtõ tarbalĩg nẽ aꞌnyaktu authet ꞌcĩ aattiyyu lõꞌngõõc. Baa Yeesu ꞌcĩ atiman ngaatĩ arũgnaanĩ daahĩtha nẽ aggam habuẽẽt vẽlẽk cĩg looc nicci. Ammĩnanneet Yeesu Krĩstõ ngagĩĩt nẽ õõgaeet ꞌthẽccanẽẽtĩĩ, biyyiẽẽtĩĩ cĩgĩnnĩg.