Tiito 1:4 - ꞌBuuk cĩ Thõõth cĩ Nyekuci

⁴ Ẽlẽ Tiito, hẽhẽẽdakii naa nganiit waraga icci, aau nii hĩ loholeec caannẽẽnĩ, hĩnĩngĩtĩ helemit naag hĩ nganiit thõõth cĩ Nyekuci hõdẽĩ. Aꞌnyĩĩk Nyekuc Baangeet cĩnaac hĩ Makayyioohit Ellioohit cĩnaac Yeesu Krĩstõ, haanyti bũnnai nẽ aau lõꞌngõõc.

Tiito 1:4 ပူးပေါင်းရင်းမြစ်များ

ꞌLuuka 2:11

Ittirria Ellioohiti cunuung iyyieni ꞌtaaũnaa cĩ Daavide, ĩnõõnnõ Krĩstõ Makayyioohiti.

Yõaannẽ 4:42

Ma baa ho, iita uduktaak nẽẽg ngaa nicci ĩĩttĩk, “Hẽlẽmta naag Yeesu, hĩnĩngĩtĩ thõõth ꞌcĩ aduha nẽẽ dẽẽdẽ, hõllõngaa hẽlẽmma, hĩnĩngĩtĩ thõõth baa aduhaakeet nii diooni. Hẽlẽmta, hĩnĩngĩtĩ ĩko ĩĩn nẽẽ Ellioohit cĩ lootu dĩdĩ!”

ꞌRooma 1:12

Thõõth ꞌcĩ haduha naa ho, haini aꞌnyĩĩk lemiinit cĩnaac hũkũtaneet ngagĩĩta.

ꞌRooma 1:7

Hẽhẽẽdakuung naa ngagiit vẽlẽk waraga icci ꞌRoomattĩ. Ammĩnannuung Nyekuci ngagiit nẽ ẽbẽraauung ĩĩtõ eet cĩgĩnnĩg ꞌcĩg ẽllẽẽmĩthĩ. Aꞌnyĩĩk bũnnai hĩ ganõn ꞌcĩ aku hĩ Nyekuc Baangeet cĩnaac hĩ Makayyioohit cĩnaac Yeesu Krĩstõ, haau hĩ ngagiita.

2 Korinthia 12:18

Baa haduhaahi naa Tiito hikia hẽhẽẽrõnaahuung ngagiita, ĩnõõnnõ hĩ ꞌgotooneet umwa. Baa hõllõngaa iggoolluung Tiito ngagiit thõng, iggooluung baallĩ? Hõllõngaa baa haattiyyia naag ꞌgõõla hõdẽẽthõng hĩ nẽẽnĩ?

2 Korinthia 2:13

Baa nga apuppudii nganĩĩt ꞌthĩnĩt ngaatĩ hõllõngaa hammũdõõthĩkĩ ꞌgõtõna Tiito, nĩngĩtĩ hannẽẽkĩ ĩhõõggõ ĩlaallẽ nẽ hedeceeha hũũha ĩĩcĩ looc cĩ Maccedoonia.

2 Korinthia 4:13

Aĩ ꞌBuuhi cĩ Nyekuci nẽẽ, “Baa helemi naa Nyekuc, ĩnõõ ꞌcĩ hõthõõthĩ naa ho.” Nẽ haꞌnyak naag buúk lemiinit icci, hátĩ hothoothit,

2 Korinthia 7:6

Nẽẽthĩ, Nyekuc ꞌcĩ amammaayan eet ꞌcĩg ahayũngattĩ ꞌthinneeti, amammaayanneet ngagĩĩt ngaatĩ ĩꞌthõõakeet Tiito.

2 Korinthia 8:16

Hatali naa Nyekuc ꞌcĩ aaꞌnyĩk ꞌthĩnĩt cĩ Tiito hĩrrĩcanaauung ngagiit haau hĩcĩ harrĩcanaannuung naa ngagiit ko.

2 Korinthia 8:23

Nẽẽthĩ, Tiito, ĩĩn nẽẽ eet ꞌcĩ hadticaniinna hõdẽĩ hĩ ngagĩĩta, hĩnĩngĩtĩ ngagiita nẽ ꞌgotoonoga ꞌcĩg ĩĩn ꞌramma hataa, ĩĩn nẽẽg ꞌthooyyiak ꞌcĩg ĩꞌthõõa lothippiꞌnya cĩg lemmiook cĩggĩĩng cũũmõ cũũmõ looccaa cĩ Maccedoonia. Aꞌnyahaak Krĩstõ bulẽẽnĩt thooꞌthiohĩĩ cĩg adtican nẽẽgĩ.

2 Korinthia 8:6

Baa Tiito ꞌcĩ baa ꞌthẽk aaꞌnyuung iꞌthiattaaĩ dtiic icci abũnnaa ho. Nĩngĩtĩ haduhaaka ĩnõõnnõ heeluung ngagiit edecciaak dtiic baa iꞌthianaannu niig ko.

ꞌGalaaꞌthia 2:3

Nẽ tananga Tiito baa haggameehi aꞌthiit buúk, nga hĩttĩnganoothĩk ngaatĩ ẽttẽẽdĩ ẽlẽ, tananga baa ĩĩn nẽẽ ꞌGiriheenit.

ꞌGalaaꞌthia 3:26

Iittu niig vẽlẽk lõhõlĩ cĩg Nyekuci, hĩnĩngĩtĩ elemtu Yeesu Krĩstõ,

ꞌGalaaꞌthia 3:28

Aaꞌnyuung lemiiniti ꞌcĩ aꞌnyaku niig, hĩnĩngĩtĩ Yeesu Krĩstõ, udukto niig vẽlẽk aaut ꞌgõõla hõdẽẽthõng, tananga ĩĩnĩ ꞌJudeeinit, hode ꞌGiriheenit, tananga ĩĩnĩ appahaca, hode eet ꞌcĩ hõllõngaa ĩĩn appahaca, tananga ĩĩnĩ eet ꞌcĩ maacĩ, hode ngaa ꞌcĩ ngayyi.

Eevvetho 1:2

Halayyi naa, hátĩ hĩĩtõ Nyekuci Baangẽẽtĩ hĩ Makayyioohit cĩnaac Yeesu Krĩstõ, tarbalĩg hĩ ngagiit nẽ aggatattuung ngagiit ganõõna.

Kolooꞌthe 1:2

Hẽhẽẽdakuung naag ngagiit waraga eet ꞌcĩg elleemmu nẽ aallannu elemmu thõõth cĩ Nyekuci, ꞌgotoonoga hĩ ngoonoga cĩg Krĩstõ ꞌtaaũnaa cĩ Kolooꞌthe. Aꞌnyĩĩk bũnnai hĩ ganõn ꞌcĩ aku hĩ Nyekuc Baangeet cĩnaac haau hĩ ngagiita.

1 Timotteeo 1:12

Hatali naa Yeesu Krĩstõ Makayyioohit cĩnaac baa aaꞌnya nganĩĩt ꞌtirrian, hĩnĩngĩtĩ acĩnna nẽẽ nganĩĩt ngaatĩ haꞌthũũnnĩ thõõth ꞌcĩ hadticanĩĩ dtiic cĩnnĩ dĩdĩ.

2 Timotteeo 1:1

Nganĩĩt Paaulo ꞌthooyyiahit cĩ Yeesu Krĩstõ. Baa Nyekuc ꞌcĩ ẽbẽraanna nganĩĩt nẽ aaꞌnya rũgẽt baa aduha nẽẽ aĩ, aku hĩ Yeesu Krĩstõ.

2 Timotteeo 1:2

Timotteeo, ĩĩnĩ nii loholeec caannĩ cĩ ꞌthĩnĩtõ. ꞌNyaak bũnnai hĩ tamaati hĩ authet ꞌcĩ aayyi lõꞌngõõc, ꞌcĩ aku hĩ Nyekuc Baangeet hĩ Makayyioohit cĩnaac Yeesu Krĩstõ.

2 Timotteeo 4:10

hĩnĩngĩtĩ ĩmmĩnan ꞌDẽẽma hẽlẽggĩ cĩg looc nicci ũtũngeeha haau ẽmmẽn, ĩtĩnga ũũk ꞌtaaũnaa cĩ Tẽꞌthaloonika. Nẽ tarĩ ĩtĩnga Kerethenĩ buúk ũũk looccaa cĩ ꞌGalaaꞌthia, õkõ adtican dtiic cĩ Makayyiookto nẽ ũũk Tiito looccaa cĩ Dalamatia.

Tiito 1:3

Ma kõr baa ẽbẽraanna nẽẽ nganĩĩta, ikia uppulanaaha Nyekuci Ellioohiti cĩnaac nyeemuut icci, ꞌlimmaanaa baa aaꞌnyĩhoothĩkaa nganĩĩta.

Tiito 2:13

nga haꞌnyak muhẽẽnĩt ꞌcĩ hẽrẽẽĩ kõr cĩ decciaanĩt cĩ lootu ꞌcĩ hatĩ edeeꞌnyianĩ bulẽẽnĩtĩ cĩ Yeesu Krĩstõ ꞌcĩ ĩĩn Nyekuc hĩ Ellioohit cĩnaac.

2 Pẽẽtũrũ 1:1

Aku waraga ciee hĩ nganĩĩt ꞌThimõõnẽ Pẽẽtũrũ dticciannioohit hĩ ꞌthooyyiahit cĩ Yeesu Krĩstõ. Hẽhẽẽdakuung naa waraga icci ngagiit eet ꞌcĩg hõthõl lemiinit ꞌcĩ haꞌnyak naag ko. Baa aaꞌnyĩhoothĩkeet lemiiniti ciee ngagĩĩt, hĩnĩngĩtĩ bũnnai cĩ Yeesu Krĩstõ, ꞌcĩ ĩĩn Nyekuc nẽ ĩĩ Ellioohit cĩnaac.

2 Pẽẽtũrũ 1:11

Nẽ hatĩ elemuung ngagiit Makayyioohiti Ellioohiti cĩnaac Yeesu Krĩstõ bulẽẽtta nẽ aaꞌnyuung uduhunit habuccieetaa cĩnnĩ ĩĩcĩ aalla ooo.

2 Pẽẽtũrũ 2:20

Nẽ ma iliittia eeta bathi cĩ lootu ꞌgõõlaa ꞌcĩ agaĩ Makayyioohit Ellioohit cĩnaac Yeesu Krĩstõ nẽ ĩĩtõ appahacaaꞌnya cĩg ꞌthẽccaanak tarĩ, au hatĩ abathoothi nẽẽg hĩllõõanit authet cĩnĩĩng baa ĩĩcĩ oou.

2 Pẽẽtũrũ 3:18

Aꞌnyĩĩk bũnnai hĩ gaiinit ꞌcĩ aku hĩ Makayyioohit hĩ Ellioohit cĩnaac Yeesu Krĩstõ, heelluung ngagiit ĩtĩlĩthĩt. Ĩdĩhĩthĩt Yeesu ꞌyioko hĩ ooo! Aamẽn.

2 Pẽẽtũrũ 3:2

Hadiimmuung naa ngagiit ummuhuttooth thooꞌthiok baag aduha põrõvẽtaaꞌnya baag ẽllẽẽmĩth baag baarkit, hĩ tilooinit cĩ Makayyioohit Ellioohit cĩnaac baa allimaneekuung ꞌthooyyiaha cugguung.

1 Yõaannẽ 5:14

Haga naag jurrung haĩ, ẽlẽmĩ hatĩ Nyekuci laiinit cĩnaac, hatĩ hajin naag ĩnõõnnõ thõõth ꞌcĩ accamana nẽẽnĩ.

ꞌJuud 1:3

ꞌGotoonoga hĩ ngoonoga, baa habũraneehi naa gẽrrẽẽt ngaatĩ hẽhẽẽdakuung ngagiit thõõth cĩ elliaanĩt cĩ Nyekuci ꞌcĩ hatĩ hõthõl naag vẽlẽk ko. Nẽẽthĩ ꞌyioko, hummuha hĩĩna hidiima hẽtẽhẽẽdahuung thõõth umwa cĩrrĩĩng, hátĩ hũkũtanuung eteyyiõõĩ lemiinit baa aaꞌnyĩk Nyekuci eet cĩgĩnnĩg vẽlẽk ꞌcĩg ẽllẽẽmĩth tabattĩ hõdẽẽthõng.