Pilippi 4:8 - ꞌBuuk cĩ Thõõth cĩ Nyekuci

⁸ Nẽẽthĩ ꞌyioko, ꞌgotoonoga hĩ ngoonoga, thõõthaa ꞌcĩ adtuurna, ummuhit thooꞌthiok ꞌcĩg ĩĩn dĩdĩ hĩ thooꞌthiok ꞌcĩg hiꞌngolli hĩ thooꞌthiok ꞌcĩg aũlanĩ, hĩ thooꞌthiok ꞌcĩg tẽllĩg hĩ thooꞌthiok cĩg occa hammĩnanĩ hĩ thooꞌthiok ꞌcĩg accamana ꞌthinneeti. Ummuhit thooꞌthiok ꞌcĩg ẽllẽẽmĩth gẽrrẽẽt ꞌcĩg occa hadĩhĩthĩ.

Pilippi 4:8 ပူးပေါင်းရင်းမြစ်များ

ꞌThianaattõ 18:19

Baa hẽbẽra naa ĩnõõnnõ, hátĩ heteretheek lõhõlĩ cĩgĩnnĩg hĩ lõhõlĩ cĩg lõhõlĩ cĩgĩnnĩg, hĩthĩhĩt hatĩ gõõng nẽ uꞌthuutti thõõth cĩ Makayyiookto, ngaatĩ adĩmanĩ thooꞌthiok ꞌcĩg aũlanĩ ꞌcĩg ĩĩn dĩdĩ, hátĩ haꞌnyahaak Makayyioohiti Abũrahaamõ thooꞌthiok baag aduhaak nẽẽ ĩnõõnnõ.”

Maatteeo 22:16

Ma ho, ĩꞌthooyyia nẽẽg nuyyiook cĩggĩĩng hõdẽĩ hĩ eet cĩg Ẽrõõdẽ, hiita hĩ ĩnõõnnõ. Iita uduktaak nẽẽg ĩnõõnnõ ĩĩttĩk, “ꞌLimmannioohit, hagayyi naag ĩĩnĩ eet ꞌcĩ abũnnaa nẽ allimani thõõth cĩ Nyekuci ꞌgõõlaa ꞌcĩ ĩĩn dĩdĩ. Acini nii eet vẽlẽk ꞌgõõlaa ꞌcĩ aduhõõ thõng nẽ hagayyia ngaatĩ hõllõngaa ũũhũĩ thõõth ꞌcĩ allimani, hĩnĩngĩtĩ thooꞌthiok ꞌcĩg aduhaaki eeta ꞌcĩg obbitig nganiita.

Maarko 6:20

Baa iꞌngolli Ẽrõõdẽ Yõaannẽ nẽ ẽẽla ĩnõõnnõ, hĩnĩngĩtĩ baa aga aĩ ĩĩn nẽẽ eet ꞌcĩ abũnnaa ꞌcĩ ẽllẽẽmĩthĩ. Nẽ tarĩ, baa ahayũnganni Ẽrõõdẽ gẽrrẽẽt, baa athĩhĩ nyeemuut cĩ Yõaannẽ, tananga accamana ngaatĩ athĩknĩ thõõth cĩnnĩ gẽrrẽẽt.

ꞌLuuka 16:15

Nĩngĩtĩ annẽẽkĩ Yeesu ĩhõõggõ, “Gõõng ꞌthẽk ngagiit ꞌcĩg athĩngõnyannu ainnu abũnnayyu hẽbẽrẽẽnnĩĩ cĩg eet vẽlẽk. Nẽẽthĩ, aga Nyekuci ꞌthinneeti cugguung. ꞌGii ꞌcĩ tiiri hĩ eeta, ĩĩn ꞌgii ꞌcĩ abathĩ hĩ Nyekuc.”

ꞌLuuka 2:25

Baa ammũdeek aaĩ ẽẽtĩ umwaa ꞌcĩ haĩ ꞌThimiõõnẽ ꞌJeruꞌthalẽma, ꞌcĩ baa itieelli Nyekuc nẽ ala ĩnõõnnõ gẽrrẽẽt ũdũt. Baa ẽrẽ nẽẽ Ellioohit hikia hẽẽla eet cĩg Ĩꞌthĩraẽlĩ, nẽ baa aaĩ Lorii ꞌcĩ Ẽllẽẽmĩth hĩ ĩnõõnnõ.

ꞌLuuka 23:50

Nẽẽthĩ, baa aaĩ ẽẽtĩ ꞌcĩ abũnnaa ꞌcĩ haĩ Yothebo ꞌcĩ ĩĩn eet cĩ lothippit cĩ makayyiook cĩ eetuk nẽ baa ĩĩn eet ꞌcĩ tẽllĩ gẽrrẽẽt.

Yõaannẽ 7:18

Ẽẽtĩ ꞌcĩ õthõõthĩ ẽlẽ cĩnnĩ ẽmmẽn, abuluth nẽẽ ẽlẽ cĩnnĩ. Nẽẽthĩ, ẽẽtĩ ꞌcĩ adticanoothĩk eet baa ĩꞌthõõa ĩnõõnnõ, ĩĩn eet ꞌcĩ aduha thõõth ꞌcĩ ĩĩn dĩdĩ. Aitiõõ thõõth ꞌcĩ ĩĩn õlõng ꞌcĩ aduha nẽẽ tõõ.

Dtiicanĩ cĩg ꞌThooyyiahu 10:22

Ẽdẽcĩ eeta niccieeg aĩ, “Ĩꞌthõõanneet ꞌgaalacĩ umwaa cĩ ũũrũta ꞌcĩ haĩ Korneellio. Ĩĩn nẽẽ eet ꞌcĩ abũnnaa ꞌcĩ ala Nyekuc nẽ ammĩnan eeta cĩg ꞌJudeei vẽlẽk ĩnõõnnõ. Aduhaak aajĩlõ ꞌcĩ ẽllẽẽmĩth ĩnõõnnõ hutuvvii nganiit õlõõ cĩnnĩ, hátĩ hũũk hĩthĩk nẽẽ thõõth ꞌcĩ aduhaahi niina.”

Dtiicanĩ cĩg ꞌThooyyiahu 22:12

“Ma ho, uppwaanna eet umwaa ꞌcĩ haĩ Anania hikia hĩcĩnaanĩ. Baa ĩĩn ẽẽtĩ ciee eet ꞌcĩ aꞌthũũnnĩ nyattal nẽ itingolli eeta cĩg ꞌJudeei vẽlẽk ꞌcĩg aattĩg ngaatĩho.

Dtiicanĩ cĩg ꞌThooyyiahu 6:3

ꞌGotoonoga hĩ ngoonoga, eberria eet tũkĩramma hõrggẽẽnaa cunuung ꞌcĩg iꞌngolli eeta nẽ agayyi ngaatĩ aꞌnyahĩ ꞌgẽẽnyĩth hĩ ngaatĩ aayyi Lorii cĩ Nyekuci hĩ ĩhõõggõ. Haaꞌnyĩk hatĩ ĩhõõggõ haggamit dtiic icci.

ꞌRooma 13:13

Ĩdĩmanit thooꞌthiok ꞌcĩg abũnnaa ꞌcĩg accamana Nyekuci, ma hookoroonnu hĩ eet ꞌcĩg abathĩ, hode aduunnu thõng, ma hattihoonnu tahatak, hode eggerꞌnyoonnu hode ma hiinannu hẽlẽggĩ cĩg eetuk.

ꞌRooma 13:3

Hĩnĩngĩtĩ hõllõngaa uuk makayyiooha eet ꞌcĩg adĩman thõõth ꞌcĩ aũlanĩ, nẽẽthĩ uuk nẽẽg eet ꞌcĩg ẽꞌthẽcan thooꞌthiok. Adiimmu niig hiittiõõ hõllõngaa uukuung makayyiooha ꞌcĩg aggammuung ngagiita? Ĩdĩmanit thĩ thooꞌthiok ꞌcĩg aũlanĩ, hátĩ haccamattaauung nẽẽgĩ.

ꞌRooma 14:18

Má adticanoothiku niig Krĩstõ ꞌgõõlaa cĩ, aaꞌnyiku hatĩ Nyekuc haccamanoothĩk nẽ itingollieeuung eeta.

ꞌRooma 2:29

Aitiõõ, ĩĩn ẽẽtĩ ꞌJudeeinit hatĩ ĩĩn ꞌJudeeinit ꞌthĩnĩtatõõ dĩdĩ nẽ hõllõngaa ĩĩn ciee ꞌteedinit cĩ ello, ĩĩn ꞌteedinit cĩ ꞌthĩnĩtõ Loriiaa ꞌcĩ Ẽllẽẽmĩthĩ nẽ hõllõngaa nyattaala ꞌcĩ eheeddi loota. Aku dĩhĩthẽẽnĩtĩ cĩ eet ꞌcĩ aaĩ hoti hĩ Nyekuc, hõllõngaa aku hĩ eeta.

1 Korinthia 4:5

Nẽẽthĩ hoti ho, ma hetteeddu thõõth umwa, hatĩ nga hũttũbanoothĩk kõrra, ereeyyio ĩꞌthõng hikia Makayyioohiti. Aku hatĩ appulanaak nẽẽ thooꞌthiok ꞌcĩg ammiꞌthi muguuratõõ battaali nẽ aꞌthalana muhẽẽnĩt cĩ ꞌthinneeti cĩg eetuk. Nẽ kõr niccia, ammũda hatĩ eeta hõdẽĩ hõdẽĩ dĩhĩthẽẽnĩt hĩ Nyekuc.

2 Korinthia 13:7

Nẽ ꞌyioko, halayya naag Nyekuc, hátĩ hiittiõõ hõllõngaa adĩmannu niig hẽlẽggĩ ꞌcĩg abathĩ. Hõllõngaa hĩnĩngĩtĩ acĩn eeta aĩ hĩttĩmmateea naag ẽlẽk, ĩĩn hĩnĩngĩtĩ adticannu niig thooꞌthiok ꞌcĩg aũlanĩ, tananga haau hĩcĩ hudhuktaawa naag ꞌtĩmmaanaa ĩĩcĩ.

2 Korinthia 6:8

Tananga baa hitingollieet eeta ũgẽẽgĩ ngagĩĩta, hode hõllõngaa iꞌngoliinneeta, hode abuluꞌtheeta, hode accĩĩnneeta, hode aĩ hĩĩgĩnna naag oloꞌngiaak, aalla hõthõõꞌtha naag hõdõõkõthĩ thõõth cĩ eleeti cĩggaang ꞌcĩg ĩĩn dĩdĩ ho noho.

2 Korinthia 8:18

Hĩꞌthõõanna naag Tiito hookorria hĩ ꞌgõõnĩ umwa ꞌcĩ ĩĩn nuyyioohit cĩ Makayyiookto hĩ nẽẽnĩ, ꞌcĩ agayyi lothippiꞌnyaannĩĩ cĩg lothippit cĩ lemmioohu, ngaatĩ irriõõnĩ nyeemuut ꞌcĩ abũnnaa cĩ Krĩstõ.

2 Korinthia 8:21

Nẽ hadiimma naag hadticanna ꞌgii ꞌcĩ aaꞌnyĩk Makayyioohit hatal nẽ aaꞌnyĩk eet hummuhit hĩĩtõ aũlan thõõth cieeni.

ꞌGalaaꞌthia 5:22

Nẽẽthĩ, aaꞌnyeet Lorii ꞌcĩ Ẽllẽẽmĩth hĩmmĩnattõ, haccamattoothĩk, haaut lõꞌngõõc, haꞌnyahit ꞌthinneeti ꞌcĩg makatĩg, hĩĩtõ tarbalĩg, hũbũttaath, huꞌthuutti lemiinit,

Eevvetho 4:25

Ma nga hoolongeeku ꞌgoonogu, iꞌthiattaaĩ uduktaak ĩhõõggõ thõõth ꞌcĩ ĩĩn dĩdĩ, hĩnĩngĩtĩ hĩĩgĩn naag ũbũtĩ cĩ ẽlẽ hõdẽẽthõng.

Eevvetho 5:9

hĩnĩngĩtĩ aꞌnyaha lanyit ciee aaĩ hĩ ngagiit ko, thõõth ꞌcĩ abũnnaa hĩ ꞌcĩ aũlanĩ hĩ ꞌcĩ ĩĩn dĩdĩ diooni.

Eevvetho 6:14

Ũkũmattoothĩk! Itihimit thõõth ꞌcĩ ĩĩn dĩdĩ haau hĩ hadẽẽngõ nẽ aanytĩhu bũnnai cĩ Nyekuci heteooyyuung ngagiit hatĩ ooyyu jora.

Pilippi 3:1

ꞌGotoonoga hĩ ngoonoga, thõõthaa ꞌcĩ adtuurna vẽlẽk, accamattoothĩk, hĩnĩngĩtĩ iittu niig eet cĩg Makayyiooktak. Hõllõngaa hahari naa ngaatĩ hẽhẽẽdakuung ngagiit thõõth baa ĩĩcĩ oou tarĩ nẽ dĩdĩ, hẽhẽẽdakuung hĩnĩngĩtĩ bũnnai cunuung.

Kolooꞌthe 4:5

Aaut jurrung hatĩ arũmeennu hĩ eet ꞌcĩg hõllõngaa ĩĩn lemmiook, illimatteek ĩhõõggõ nyeemuut cĩ Nyekuci hatĩ ammũdaannu ꞌgõõl ꞌcĩ arũmeennu hĩ ĩhõõggõ.

1 Tẽꞌthaloonika 4:12

Nẽẽthĩ hatĩ ꞌgõõlaa cĩ, au hatĩ iꞌngoliinnuung eeta cĩg battaalu ꞌcĩg nga hagaacõ thõõth cĩ Makayyiookto nẽ hatĩ iittiõõ hõllõngaa alihinnu ꞌgiimwa hĩ eet umwa tarĩ.

1 Timotteeo 2:2

Laõõĩ habuẽẽt ꞌcĩg obbitig hĩ ꞌgaala vẽlẽk, hátĩ haaut naag vẽlẽk lõꞌngõõc, ꞌgõõlaa ꞌcĩ hiꞌngoliini Nyekuc nẽ huꞌthuutti thõõth cĩnnĩ.

1 Timotteeo 3:11

Nẽ ꞌgõõlaa cĩ buúk, abũnnaa iꞌngolli ngaaĩ cĩggĩĩng eet nẽ udukta thõõth ꞌcĩ ĩĩn dĩdĩ nẽ hõllõngaa õngõmĩt eeta, hode hõllõngaa ĩĩn duuttiak nẽ aanytĩk huꞌthuutti thooꞌthiok vẽlẽk ꞌcĩg abũnnaa ꞌcĩg adĩman nẽẽgĩ.

1 Timotteeo 3:4

Nẽ abũnnaa makayyioohiti cĩ lothippit cĩ lemmioohu ĩĩn eet dĩdĩ ꞌcĩ aꞌthũũnnĩ õlõ cĩnnĩ jurrung nẽ irrioonĩk lõhõlĩ cĩgĩnnĩg hĩthĩhĩt nẽ itingolli thõõth ꞌcĩ aduha nẽẽnĩ.

1 Timotteeo 4:12

Ma haaꞌnyihi eet umwa hatamaaci, hĩnĩngĩtĩ aĩ nga ĩĩnĩ hĩdĩca. Aꞌnyĩĩk lemmiook hĩcĩtta hĩ nganiit ꞌgõõl ꞌcĩ anũĩ nẽẽg thõõth cĩ Nyekuci, ꞌrioona cunni, hĩ authetaa ꞌcĩ aayyi jurrung, hĩ ꞌgõõlaa ꞌcĩ ammĩnanĩĩ eet, hĩ ngaatĩ ẽlẽmmĩ thõõth cĩ Nyekuci, hĩ ꞌgõõlaa ꞌcĩ hõllõngaa adĩmani thooꞌthiok ꞌcĩg ĩĩn ꞌriiring.

1 Timotteeo 5:10

Abũnnaa agayyi nẽẽ gẽrrẽẽt ngaatĩ adticanĩ thooꞌthiok ꞌcĩg abũnnaa, ꞌcĩg aattĩg hĩ ꞌcĩg iroktaanĩ lõhõlĩ cĩgĩnnĩg jurrung, hĩ ngaatĩ akũmanẽẽkĩ hẽẽrõn õlõõ cĩnnĩ, akũmaneek eet cĩg Nyekuci õlõõ cĩnnĩ jurrung, ẽẽl pĩĩrnattiaak nẽ ĩrrĩcana ngaatĩ adticanĩ thooꞌthiok vẽlẽk ꞌcĩg abũnnaa.

1 Timotteeo 5:2

Tingõlĩ ngaaĩ ꞌcĩg obbitig, haau hĩcĩ iꞌngolli ngaanu. Cĩĩn buheeci hĩcĩ acĩnĩ ngoonogu.

Tiito 1:8

Abũnnaa ĩĩn eet cĩ eetu ꞌcĩ ammĩnan thõõth ꞌcĩ abũnnaa. Abũnnaa ĩĩn eet ꞌcĩ aꞌnyak muhẽẽnĩt ꞌcĩ abũnnaa nẽ ĩĩ eet ꞌcĩ aꞌthũũnnĩ ẽlẽ, ꞌcĩ ẽllẽẽmĩthĩ.

Tiito 2:14

Baa ẽlẽmana nẽẽ ẽlẽ cĩnnĩ hadaak hĩnĩngĩtĩ ngagĩĩta, hátĩ hõõgaeet ꞌthẽccanẽẽtĩ vẽlẽk nẽ aaꞌnyeet hĩĩtõ eet cĩgĩnnĩg ꞌcĩg ũtũũnyeet nẽẽ hĩĩtõ eet cĩgĩnnĩg, ꞌcĩg hadiim hadtican thooꞌthiok ꞌcĩg abũnnaa dĩdĩ.

Tiito 2:2

ꞌLimman eet ꞌcĩg obbitig hillimanit ngaatĩ aꞌthũũnnĩ eleeti cĩggĩĩng, aꞌnyĩĩk haꞌnyahit authet ꞌcĩ iꞌngoliini eeta ĩhõõggõ, abũnnaa aꞌnyak lemiinit ꞌcĩ ĩĩn dĩdĩ hĩ mĩnnan hĩ ꞌgõõl ꞌcĩ ẽmmẽẽꞌthĩ thooꞌthiok.

Tiito 2:7

Nẽ nii buúk, ꞌrĩccana ngaatĩ ẽtẽrꞌthẽẽkĩ eet ꞌgõõl ꞌcĩ adĩmanĩĩ thõõth ꞌcĩ abũnnaa. ꞌLimman eet ꞌthĩnĩta dĩdĩ hĩ ꞌgõõlaa ꞌcĩ õkõmmĩ eeta.

Tiito 3:14

Abũnnaa adticanni eeta cĩggaac jurrung, hátĩ haꞌnyahit hẽlẽggĩ vẽlẽk ꞌcĩg adiim nẽẽgĩ, hĩnĩngĩtĩ abathĩ ngaatĩ ĩĩnĩ nẽẽg nyamuttiook.

Ebereei 11:2

Baa aaꞌnyĩk lemiiniti hĩbaangĩ cĩggaac haccamana Nyekuci.

Ebereei 13:18

Alayyiooyyieetu ngagĩĩta. Tẽllĩg ꞌthinneeti cĩggaang nẽ hattĩmanna hõdõõkõthĩ ngaatĩ hadĩmanna thooꞌthiok ꞌcĩg aũlanĩ.

ꞌJeemith 1:27

Thõõth cĩ Nyekuci ꞌcĩ tẽllĩ ꞌcĩ ẽlẽmĩ Nyekuci Baangẽẽtĩ cieeni, ꞌcĩ haꞌthũũnnĩ booyyiok hĩ ngaatĩbõyyĩꞌnya pĩĩrnattaa cĩnĩĩng nẽ huꞌthuutti eleeti ngaatĩ ẽꞌthẽcanneet lõõcĩ niccieeni.

ꞌJeemith 3:17

Nẽẽthĩ ĩĩcĩ oou, tẽlla ꞌgẽẽnyĩthĩ ꞌcĩ aku hẽẽtahujjieen. Abbĩꞌthĩĩ tamaati hĩ dtiicanĩ ꞌcĩg abũnnaa. Hõllõngaa ahal eeta nẽ aduha thõõth ꞌcĩ ĩĩn dĩdĩ hõdõõkõthĩ.

1 Pẽẽtũrũ 1:22

Baa ũtũũnytau niig ꞌthẽccanẽẽt cugguung baa elemmu thõõth ꞌcĩ ĩĩn dĩdĩ, nẽẽthĩ ꞌyioko, ammĩnanoonnu niig dĩdĩ. Nẽ adiim aallattia ĩmmĩnanit eleeti cugguung ꞌthinneetini dĩdĩ.

1 Pẽẽtũrũ 2:12

Aaut jurrung hatĩ arũmeennu hĩ eet ꞌcĩg nga helemit Nyekuc, tananga õhõppõõcannuung nẽẽg ngagiit thooꞌthiohĩĩ ꞌcĩg abathĩ. Ma hatĩ kõr ꞌcĩ ẽttẽẽdĩ Nyekuci thooꞌthiok, adĩhĩth hatĩ nẽẽg Nyekuc ngaatĩ aduhaanĩ thooꞌthiok ꞌcĩg abũnnaa ꞌcĩg baag acĩn adĩmani niina.

1 Pẽẽtũrũ 4:8

Hĩllõõan vẽlẽk, ĩmmĩnattõ gẽrrẽẽt, hĩnĩngĩtĩ ũũny mĩnnanĩ ꞌthẽccanẽẽt ꞌcĩg mẽẽlĩg ꞌrĩng.

2 Pẽẽtũrũ 3:1

ꞌGotoonoga hĩ ngoonoga, waraga ꞌcĩ hẽhẽẽdakuung naa ngagiit ꞌcĩ ĩĩn ꞌramma cieeni. Hẽhẽẽdakuung, hátĩ hũkũtanuung haaꞌnyuung aꞌnyahit muhẽẽnĩt ꞌcĩ ĩĩn dĩdĩ.

1 Yõaannẽ 3:18

Niig lohollia, hõllõngaa occa hammĩnan naag eleeti cĩggaac thõõthaa ꞌcĩ hõthõõth ũtũũga haaga, hĩmmĩnattõ dtiicanẽẽnnĩ hĩ thõõthaa ꞌcĩ ĩĩn dĩdĩ.

1 Yõaannẽ 3:3

Aaꞌnyeet thõõth ꞌcĩ haarĩkĩ ꞌthinneeti thõõth icci ho, helleemit hĩcĩ ẽllẽẽmĩth Krĩstõ.

1 Yõaannẽ 4:1

ꞌGotoonoga hĩ ngoonoga, ma helemmu eet vẽlẽk ꞌcĩg aĩ haꞌnyaka Lori cĩ Nyekuci. Ĩttĩmanit ĩhõõggõ vẽlẽk, hátĩ ummuddia, hatĩ aꞌnyak nẽẽg lori ꞌcĩ aku hĩ Nyekuc dĩdĩ. Mẽẽlĩg põrõvẽtaaꞌnya ꞌcĩg ĩĩn oloꞌngiaak ꞌcĩg ĩꞌthaattothoothĩk looc nicci ẽlẽk.

ꞌRuuth 3:11

Nẽẽthĩ ꞌyioko, ma hiꞌngolli thõõth umwa loholeec caannĩ. Hadĩmaneekii ꞌthẽk hatĩ naa nganiit ꞌgii vẽlẽk ꞌcĩ adiimmaa nii nganĩĩt hĩdĩmaneehiina, hĩnĩngĩtĩ agayyi eeta vẽlẽk cĩgannĩg cĩg ꞌtaaũnaak nganiit ngaatĩ ĩĩnnĩ ngaa ꞌcĩ abũnna gẽrrẽẽt.