Kolooꞌthe 1:10 - ꞌBuuk cĩ Thõõth cĩ Nyekuci

¹⁰ Nẽ hatĩ aꞌnyaktu rũgẽt ꞌcĩ adĩhĩꞌthu Makayyioohit nẽ aanytĩhu ĩnõõnnõ haccamanoothĩk hõdõõkõthĩ, ngaatĩ adĩmannu dtiicanĩ ꞌcĩg abũnnaa. Au hatĩ agayyu niig Nyekuc hĩllõõan.

Kolooꞌthe 1:10 ပူးပေါင်းရင်းမြစ်များ

Yõaannẽ 15:16

“Baa hõllõngaa ẽbẽrannaangu niig nganĩĩta, nganĩĩt ꞌcĩ baa hẽbẽraannuung ngagiita nẽ hĩꞌthooung õõt ĩꞌthaattĩk nyeemuut caannĩ looc. Nẽẽthĩ hatĩ aaꞌnyuung Baaba ꞌgii ꞌcĩ ajinnu niig ĩnõõnnõ ꞌthaarĩĩ cĩgannĩg.

Yõaannẽ 15:8

Ĩĩn thõõth ciee bulẽẽnĩt hĩ Baaba ngaatĩ hatĩ oddongottu jurrung nẽ etereꞌthiaau eleeti cugguung, ngaatĩ iiginnu nuyyiook cĩgannĩg.

Yõaannẽ 17:3

Nẽẽthĩ ꞌyioko, rũgẽt ꞌcĩ aalla ooo cieeni, hátĩ hagayyi nẽẽg nganiit Nyekuc hõdẽẽthõng ꞌcĩ ĩĩnĩ dĩdĩ, hĩ Yeesu Krĩstõ baa ĩꞌthõõa niina.

ꞌRooma 1:13

ꞌGotoonoga hĩ ngoonoga, hõllõngaa hadiimmuung naa ngagiit herehuung ngaatĩ hammuhi naa tabattĩ mẽẽlĩg hikia hicinuung ngagiita, nẽẽthĩ hinnia, hũlũhoothĩha hĩĩ noho, hátĩ hũlũllũũmana eet hõrggẽẽnaa cunuung helemit Nyekuc, hĩ baa hadĩmani eetinii ꞌcĩg hõllõngaa ĩĩn ꞌJudeei.

ꞌRooma 4:12

Nẽ tarĩ ĩĩ Abũrahaamõ buúk maaꞌnyĩ eet ꞌcĩg etteeddi eleeti nẽ hõllõngaa ĩĩn maaꞌnyĩ eet ꞌcĩg etteeddi eleeti diooni, nẽẽthĩ, ĩĩn maaꞌnyĩ eet ꞌcĩg anũ ꞌgõõl cĩ lemiinit baa aꞌnyak baangẽẽtĩ cĩnaac Abũrahamĩ baa nga hẽttẽẽdĩ ẽlẽ.

ꞌRooma 6:4

Baa haggam naag baattithimo, baa haauto naag hĩ eeta ꞌcĩg hadaahito nẽ hadayyi hĩ Krĩstõ. Nẽ hĩ baa arũgthaa Krĩstõ daahĩtha bulẽẽttaa cĩ Nyekuc Maaꞌnyĩ, hau hatĩ haꞌnyak naag buúk rũgẽt ꞌcĩ ĩĩn ngeju.

2 Korinthia 2:14

Ĩlaallẽ hĩ Nyekuc ngaatĩ aaꞌnyĩkĩ Krĩstõ hutuanõõĩ nyeitee. Eelleet ngagĩĩt Nyekuci buúk, ngaatĩ hõõ hĩꞌthaanĩka nyeemuut cĩ Krĩstõ ꞌcĩ ẽmmẽdĩ loonyini vẽlẽk nẽ õꞌngõlĩ nyeemuut ciee haau hĩgõõng mõhõõkacĩ.

2 Korinthia 4:6

Baa aduha Nyekuci aĩ, “Aꞌnyĩĩk lanyit haara muguratõõ.” Nẽ ꞌyioko, aara lanyit cĩnnĩ ꞌthinneetinii cĩggaac, lanyit tĩho ꞌcĩ aaꞌnyeet hagaac hĩĩtõ, edeeꞌnyia bulẽẽnĩtĩ cĩnnĩ hĩ Yeesu Krĩstõ.

2 Korinthia 5:9

Tananga haaut õlõ hẽẽtahujjieen hĩ Makayyioohit hode nga harũgĩ naag loota nĩnga, nga ꞌthẽk hadiim naag Makayyioohit haccamanoothĩk.

2 Korinthia 9:8

Nẽ aaꞌnyuung hatĩ Nyekuci ngagiit vẽlẽk bũnnaiittaa cĩnnĩ, ꞌgii ꞌcĩ adiimmu niiga. Nẽẽthĩ hatĩ gõõng aꞌnyaktu hẽlẽggĩ vẽlẽk ꞌcĩg adiimmu niiga, hinyigiꞌthiaa ꞌcĩg mẽẽlĩg ꞌcĩg occa othollu hĩ ꞌgoonogu.

Eevvetho 1:17

Hara naa hala Nyekuc Baangeet ꞌcĩ abuli cĩ Makayyioohit cĩnaac Yeesu Krĩstõ, hátĩ haaꞌnyuung Lori ꞌcĩ Ẽllẽẽmĩthĩ. Aaꞌnyuung hatĩ Lorii ꞌcĩ Ẽllẽẽmĩth ko ngagiit eggeenyit nẽ agayyu thõõth ꞌcĩ hagaĩ Nyekuc jurrung.

Eevvetho 2:10

Hĩĩgĩn naag eet ꞌcĩg ẽhẽnyta Nyekuci ꞌcĩg ĩĩn ngeju, baag hẽhẽnytaa haaut hõdẽĩ hĩ Yeesu Krĩstõ, hátĩ hĩdĩmanit dtiicanĩ ꞌcĩg abũnnaa baag ũkũmaneekeet Nyekuci ngagĩĩt baa ĩĩcĩ oou hĩdĩmanit.

Eevvetho 4:1

Halayyuung naa ngagiit baabutheeniti cĩ Makayyiookto, aaut ꞌgõõlaa ꞌcĩ abũnnaa hĩ baa ẽbẽraauung Nyekuci ngagiit ĩĩtõ eet cĩgĩnnĩg.

Eevvetho 4:13

Õkõ hatĩ dtiici ciee ĩĩcĩ oou ĩꞌthõng hũrũmeet lemiiniti nẽ hagaacõ Ngeertĩ Nyekuci. Nẽẽthĩ hatĩ hiita hĩtĩlĩthĩt naag hĩĩtõ makatĩg, lemiittaa hĩ Yeesu Krĩstõ nẽ hiita haauto naag hĩ nẽẽnĩ.

Eevvetho 5:10

Nẽ ummuddia thõõth ꞌcĩ aaꞌnyĩk Makayyioohit haccamanoothĩk.

Eevvetho 5:15

Nẽẽthĩ, ĩcĩnĩt authet ꞌcĩ aattiyyu jurrung. Ma haattiyyu hĩ ꞌgiiꞌthiaha, aaut hĩ ꞌgeeꞌnyiaha.

Eevvetho 5:2

nẽ ĩmmĩnattoou hĩ baa ammĩnanneet Krĩstõ ngagĩĩt nẽ ẽlẽmana ẽlẽ cĩnnĩ hĩĩ ꞌgaarrieenit ꞌcĩ õꞌngõlĩ ẽmmẽdĩ, ꞌcĩ abũnnaa ꞌcĩ aaꞌnyĩhoothĩk Nyekuc.

Pilippi 1:11

Aaꞌnyuung hatĩ Yeesu Krĩstõ aallattia idticanit dtiicanĩ ꞌcĩg abũnnaa, ꞌcĩg aꞌnyahaak Nyekuc bulẽẽnĩt hĩ dĩhĩthẽẽnĩt.

Pilippi 1:27

Thooꞌthiohĩ vẽlẽk, aaut ꞌgõõlaa ꞌcĩ aꞌnyahaaku nyeemuut ꞌcĩ abũnnaa cĩ Krĩstõ bulẽẽnĩt. Tananga hẽhẽẽrõnaakuung hode aitiõõ, hathĩkna hatĩ aĩ, aꞌnyaku niig vẽlẽk muhẽẽnĩt ꞌgõõla hõdẽẽthõng. Nẽ hatĩ hagawa hĩĩna, adticaniinnu niig vẽlẽk hõdẽĩ nẽ attĩmannu gẽrrẽẽt ngaatĩ aꞌnyahaannu eet ũgĩ hiita helemit nyeemuut ꞌcĩ abũnnaa,

Pilippi 4:18

Nẽ ꞌyioko, haꞌnyaha naa ꞌgii vẽlẽk ꞌcĩ hadiimi hĩllõõan. Aanytaangu niig nganĩĩt ꞌbaaninit ꞌcĩ maka baa ĩꞌthõõakaangu haꞌnyahaaha Epavorodito. Aaĩ ꞌbaaniniti ciee hĩ ꞌgaarrieeniti ꞌcĩ õꞌngõlĩ ẽmmẽdĩ ꞌcĩ accamana Nyekuci.

Kolooꞌthe 2:19

Iittiõõ eeta cieeg hõllõngaa ĩĩn dhoorit ꞌcĩ ẽlẽ cĩ Krĩstõ ꞌcĩ ĩĩn Makayyioohit cĩ ello, hĩnĩngĩtĩ arũm nẽẽ dhooriꞌnya cĩg ẽllaak vẽlẽk hĩĩtõ hõdẽẽthõng hĩtĩlĩth ꞌtirriaanaa cĩ Nyekuci.

Kolooꞌthe 2:6

Nẽẽthĩ ꞌyioko, hĩcĩ elemtu niig Yeesu Krĩstõ hĩĩ Makayyioohit cunuung ko, aallattia ũnnẽẽc ĩnõõnnõ diooni.

Kolooꞌthe 3:20

Niig lohollia, ĩthĩhĩt maajihu hĩ ngaaggu thooꞌthiohĩ vẽlẽk, hĩnĩngĩtĩ ma adĩmannu hoti, accamanoothĩk Makayyioohiti gẽrrẽẽt.

Kolooꞌthe 4:5

Aaut jurrung hatĩ arũmeennu hĩ eet ꞌcĩg hõllõngaa ĩĩn lemmiook, illimatteek ĩhõõggõ nyeemuut cĩ Nyekuci hatĩ ammũdaannu ꞌgõõl ꞌcĩ arũmeennu hĩ ĩhõõggõ.

1 Tẽꞌthaloonika 2:12

Baa haduhaakuung naag ngagiit hanneekuung aaut jurrung nẽ hiittihuung ũnnẽẽc thõõth cĩ Nyekuci, hĩ ngaatĩ hamammaayannuung ngagiit aaut ꞌgõõlaa ꞌcĩ accamana Nyekuci, hĩnĩngĩtĩ ĩnõõnnõ ꞌcĩ ẽbẽraannuung ngagiit aĩ iita otholit hĩ ĩnõõnnõ bulẽẽnĩt cĩ habuccieet cĩ õlõ cĩnnĩ.

1 Tẽꞌthaloonika 4:1

ꞌGotoonoga hĩ ngoonoga, baa haduhaakuung naag authet ꞌcĩ abũnnaa ꞌcĩ haaꞌnyĩkĩ Nyekuc hatal dĩdĩ, hĩcĩ aattiyyu niig ꞌyioko ho. Hanneekuung ngagiit ĩdĩmanit hoti hĩllõõan ꞌthaarĩĩ cĩg Makayyioohit cĩnaac Yeesu Krĩstõ.

2 Timotteeo 2:4

Hõllõngaa ũũrũtaacĩ aduknoothĩk dtiicanĩ cĩg eet ꞌcĩg hollig, adiim ꞌthẽk nẽẽ haaꞌnyĩk makayyioohit cĩnnĩ haccamanoothĩk.

Tiito 3:1

Duhaak eet cugunnig hĩthĩhĩt thõõth ꞌcĩ aduha makayyiooha cĩg ꞌgaala, hiittiõõ hõllõngaa õjõthẽẽkĩ thõõth cĩnĩĩng. Aꞌnyĩĩk hũkũmattoothĩk nẽẽg hatĩ hĩdĩmanit thõõth ꞌcĩ abũnnaa hõdõõkõthĩ,

Tiito 3:14

Abũnnaa adticanni eeta cĩggaac jurrung, hátĩ haꞌnyahit hẽlẽggĩ vẽlẽk ꞌcĩg adiim nẽẽgĩ, hĩnĩngĩtĩ abathĩ ngaatĩ ĩĩnĩ nẽẽg nyamuttiook.

Ebereei 11:5

Baa lemiinit ꞌcĩ aaꞌnyĩk Ẽẽnõk hũũk hẽẽtahujjieen rũgẽtẽẽt ko, “Baa aꞌnginoothi nẽẽ, hĩnĩngĩtĩ Nyekuc ꞌcĩ baa õkõõĩ ĩnõõnnõ ho.” Baa nga hũũk Ẽẽnõhĩ hẽẽtahujjieen, baa agayyi nẽẽ ngaatĩ ĩĩnnĩ eet ꞌcĩ aaꞌnyĩk Nyekuc haccamanoothĩk.

Ebereei 13:16

Nẽ ma hatarroꞌthu ngaatĩ eellu ꞌgoonogu nẽ othollu ijjio cugguung hĩ ĩhõõggõ. Aduhõõ thõõth ciee hĩ ngaatĩ aaꞌnyiku Nyekuc ꞌgarrieenit ꞌcĩ atalĩ nẽẽ thõng.

Ebereei 13:21

Halayyi naa haini, aꞌnyĩĩk Nyekuc haaꞌnyuung ĩthĩhĩt ĩnõõnnõ nẽ hatĩ gõõng ĩdĩmattu thooꞌthiok ꞌcĩg aũlanĩ. Aꞌnyĩĩk Yeesu heeluung ĩdĩmanit thõõth ꞌcĩ aaꞌnyĩk Nyekuc haccamanoothĩk. Aꞌnyĩĩk bulẽẽnĩt haau hĩ Yeesu Krĩstõ ooo! Aamẽn.

2 Pẽẽtũrũ 1:8

Má aalla aliꞌthu niig ꞌgõõlaa cĩ, ẽtẽrꞌtha hatĩ aĩ eeluung ngagiit thõõth ꞌcĩ agayyu Makayyioohit cĩnaac Yeesu Krĩstõ nẽ aaꞌnyĩk rũgẽt cunuung hĩĩ tiir.

2 Pẽẽtũrũ 3:18

Aꞌnyĩĩk bũnnai hĩ gaiinit ꞌcĩ aku hĩ Makayyioohit hĩ Ellioohit cĩnaac Yeesu Krĩstõ, heelluung ngagiit ĩtĩlĩthĩt. Ĩdĩhĩthĩt Yeesu ꞌyioko hĩ ooo! Aamẽn.

1 Yõaannẽ 3:22

Aaꞌnyeet hatĩ nẽẽ ngagĩĩt ꞌgii vẽlẽk ꞌcĩ hajin naag ĩnõõnnõ, hĩnĩngĩtĩ hathĩhĩ naag thõõth cĩnnĩ nẽ hĩdĩmanit thooꞌthiok ꞌcĩg accamana nẽẽnĩ.

1 Yõaannẽ 5:20

Hagaacõ naag buúk haĩ, ikia Yeesu Krĩstõ Ngeertĩ Nyekuci nẽ eteretheeheet ngagĩĩt Nyekuc ꞌcĩ ĩĩn dĩdĩ. Nẽ haattĩg naag hĩ ĩnõõnnõ ꞌcĩ ĩĩn dĩdĩ nẽ tarĩ, hũrũmtĩ hĩ Loholeec cĩnnĩ Yeesu Krĩstõ ꞌcĩ ĩĩn Nyekuc dĩdĩ nẽ aaꞌnyeet ngagĩĩt rũgẽt ꞌcĩ aalla ooo.

3 Yõaannẽ 1:6

Uduktaak nẽẽg lothippit cĩ lemmioohu mĩnnan cunni. Athithan nẽẽg aĩ, baa abũnna nii gẽrrẽẽt ngaatĩ aaꞌnyĩkĩĩ ĩhõõggõ hiita halangatõõ cunni nẽ ĩꞌthooihuu ĩhõõggõ hõõt dtiicaa cĩnĩĩng ꞌgõõlaa ꞌcĩ occa ĩꞌthooini dticcianniooha cĩg Nyekuci.