Mika 5:3 - MUMA MALER 2015

³ Kuom mano, Ruoth Nyasaye biro weyo joge e lwet wasikgi nyaka dhako ma muoch kayo nywol wuode. Bang’e jowete wuowino modong’ mak otho e tuech, noduogi mi chak riwre gi jowetegi.

Motingʼo Loko Manyien

³ Kuom mano Israel ibiro jwangʼ nyaka kinde ma dhako man-gi ich nonywolie nyathi, kendo owetene mamoko nodwogi mi riwre gi jo-Israel.

Mika 5:3 ပူးပေါင်းရင်းမြစ်များ

1 Ruodhi 14:16

Enojwang’ jo-Israel nikech richo Jeroboam, mane omiyo jo-Isarel bende otimo.”

2 Weche mag Ndalo 30:7

Kik uchal gi kwereu kod oweteu mane oweyo ruoth Nyasaye ma Nyasach kweregi, momiyo noweyogi ma gikethore chuth kaka uneno.

Zaburi 67:3

A Nyasaye, onego ogendini duto paki. Adier, ogendini duto mondo opaki!

Isaya 11:11

E kindego, Ruoth Nyasaye norie bade mondo odwok joge manok modong’ mapod Asuria gi Misri ma nyandwat kod ma milambo gi ma Ethiopia gi Elam, gi Babulon gi Hamath, kod mag pinje manie dhonam.

Isaya 49:6

“Tich dwoko jo-Israel ma nyikwa Jakobo mane oke en tich ma in jatichna ihingo. Kuom mano, abiro loki ler mar ogendini, mondo iter warruokna e tung’ piny gi tung’ piny.”

Jeremia 23:5

“Ndalo biro ma nayierie nyakwar Daudi hie mondo obed ruoth. Enorit piny gi rieko, kotimo gik ma owinjore kendo makare e piny.

Jeremia 31:1

Ruoth Nyasaye wacho niya, “Ndalo biro ma anabedie Nyasach dhout Israel duto, kendo ginibed joga.

Ezekiel 34:16

“Anamany rombe molal, mi achok mago moke, bende anachom mago motur, kendo anathiedh mago matuo, mi arit mago mangima kendo machue, nimar an e jakwath marito rombe e yo makare.

Hosea 11:8

“To ere kaka daweu, un jo-Israel? Koso ere kaka dajwang’u? Bende datieku adier, kaka ne atieko jo-Adma? Koso anyalo timonu kaka ne atimo ni jo-Zeboim? Ooyo, ok anyal timonu kamano, nikech aherou ahinya.

Hosea 2:14

“To koro winjuru! Abiro kawe, mi atere e thim, kendo abiro wuoyo kode maber kuno, mi aduog chunye.

Hosea 2:9

Omiyo e ndalo keyo, to anakaw cham gi divai mane amiye, kaachiel gi yie rombe gi pamba mane amiye mondo ochwego nanga orwaki.

Amos 5:15

Beduru mamon gi gik maricho, to heruru gik mabeyo, kendo gururu bura makare e ut bura, nikech dipo ka Ruoth Nyasaye Manyalo Gik Moko Duto otimo ng’wono ni joka Josef modong’.

Mika 4:4

To ng’ato ka ng’ato nodag e dalane gi kue, koyueyo e tipo yiend mzabibu mare kod ng’ope, ma onge gima goye kibaji. Ruoth Nyasaye Manyalo Gik Moko Duto ema osesingore kamano.

Mika 4:7

Ging’ol kendo osedargi mabor gi pinygi, to kata ginok kamano, to abiro miyo gibed oganda maduong’, kendo abiro bedo ruodhgi e got Sayun, chakre chieng’no nyaka chieng’.”

Mika 5:7

Jo-Israel modong’ mak otho nochal ni ogendini mang’eny ka koth ma Ruoth Nyasaye okelo ni cham, nikech dhano ok nyal kelo koth, to Nyasaye ema kele.

Mika 5:8

Ee, jo-Israel motony nobed e kind ogendini mana ka sibuor ma dwaro le e bungu, kata madwaro rombe e lek. Ka odonjo kuom rombe to opodho kuomgi kendo okidhogi matindo tindo ma onge ng’ama resogi.

Mika 6:14

Kuom mano, unuchiem to ok unuyieng’, kendo kech pod nokau akaya. Ka ugolo gik moko e uteu mondo upandi, to ok unyal. To kapo ni ureso gimoro, to abiro miyo okethre e lweny!

Mika 7:13

To piny nokethre, mi lokre thim, nikech timbe maricho mag joma odakie.

Zekaria 10:6

Abiro miyo jo-Juda bed marateke, kendo abiro miyo jo-Israel locho. Bende anachak aguedhgi, nikech asekechogi, mi ginichal ka gima ne ok ajwang’ogi, nikech an Ruoth Nyasachgi, kendo abiro dwoko kwayogi.

Mathayo 1:21

Obiro nywolo wuowi, mi ichak ni Yesu, tiende ni Jawar, nikech enowar joge kuom richogi.”

Mathayo 12:50

nimar ng’ato ang’ata matimo gima Wuora mae polo dwaro e owadwa, gi nyamera, kod mama.”

Mathayo 25:40

Eka Ruoth nodwokgi ni, ‘Awachonu adier ni gimoro amora mane utimo ni ng’at achiel matinie moloyo kuom owetenagi, to an ema nutimona.’

Jo-Rumi 8:29

Gin e joma noyiero chon, mi oketo obedo gi kido machal gi kit Wuode, mondo Wuode obed wuowi maduong’ e kind owetene mang’eny.