Malaki 2:17 - MUMA MALER 2015

¹⁷ Wecheu osemiyo Ruoth Nyasaye ool. To kupenjo ni ere kaka usemiyo ool, to odwokou niya, “Umiyo aol kuwacho ni Ruoth Nyasaye kwano joma richo ka joma beyo, kendo oherogi. Bende usemiyo aol kupenjo ni, ‘Ere Nyasachwa ma ng’ado bura kare?’ ”

Motingʼo Loko Manyien

¹⁷ Uolo Jehova Nyasaye gi wecheu. To upenjo niya, “Ere kaka wechewa oole?” Uole kuom wacho niya, “Joma timo marach gin joma beyo e nyim wangʼ Jehova Nyasaye, kendo omor kodgi,” kata uwacho niya, “Ere Nyasaye mangʼado bura makare?”

Malaki 2:17 ပူးပေါင်းရင်းမြစ်များ

Ayub 34:17

Iparo ni ng’ama mon gi adiera nyalo bedo gi loch? Koso in ichayo Nyasaye makare?

Ayub 34:36

Paruru ane weche duto ma Ayub wacho, to ubiro neno ni owuoyo ka jaricho.

Ayub 36:17

To koro sani iyudo kum moromo gi timni.

Ayub 9:24

Nyasaye oseketo piny e lwet joma timbegi richo, bende omiyo jong’ad bura duto bedo muofni. To ka ok en ema ne otimo kamano, to kara, ng’ano mane otime?

Eklesiastes 8:11

Ji ketho aketha ma ok odewo, mana nikech gineno ni kata ka ng’ato oketho, to ok yud kum piyo kaka owinjore.

Isaya 1:14

Ok ayie kodgi! Giwang’o iya, kendo ok adwar nenogi chuth!

Isaya 29:15

Yaye, unune malit, un joma temo pando parogi ni Nyasaye, kendo ma, kosetimo timbegi e mudho, to wacho niya, “Ere ng’ama nenowa, koso ere ng’ama ong’eyo gima watimo?”

Isaya 30:18

To kata kamano, Ruoth Nyasaye pod dwaro ng’wononu, kendo ogombo ahinya mondo okechu, nimar en Nyasaye ma jaadiera. Mano kaka jogo duto mogeno kuome gin johawi!

Isaya 43:22

To neyeuru ni, ne ok uluonga mondo akonyu, yaye joka Jakobo! Useol koda, A Israel!

Isaya 43:24

Ne ok ung’iewona niang’ gi pesau, kata dhila gi boche mag misengniu, ne ok udhila. To ne utura mana gi richou, kendo ne uola mana gi timbeu mamono.

Isaya 7:13

Bang’e Isaya nowacho niya, “Un joka Daudi, chikuru itu. Olo chuny ji ma uolo pok oromou koso, ma pod udwaroe mana olo Nyasacha bendeni?

Jeremia 12:1

“A Ruoth Nyasaye, ang’eyo ni kata ka akeloni ywakna, to biro yudore ni in ema in kare. Kata kamano pod daher penjie wach kuom adiera mari. Ere gimomiyo joma richo yudo mwandu? Koso ere gimomiyo joma jowuond dhi maber?.

Jeremia 15:6

Ne uweya, kendo udagi wachna, omiyo ne abiro, mi atiekou, nikech ne ok anyal geng’o mirimba kendo.

Jeremia 17:15

Ji penja ni, ‘Ere masiche mane Ruoth Nyasaye obwogowago? Wadwaro mondo okelgi sani!’

Jeremia 44:22

Kata mana sani, pinyu okethore maonge ng’ama odakie. Oselokore gima bwogo ji, kendo giluongo nyinge ka gima okuong’, nikech Ruoth Nyasaye ne ok nyal weyo mak okumou kuom timbeu maricho.

Ezekiel 16:43

Wiyi ne owil gi rit mane aritigo kapod itin, mi iwang’o iya gi gik moko duto mane itimo. Mano emomiyo anakumi moromo gi timbeni duto, nimar ne imedo timbe mag dwanyruok kuom timbe duto makuero ma isetimo! An Ruoth Nyasaye ema awacho kamano.”

Ezekiel 18:25

“Un uwacho niya, ‘Gima Ruoth Nyasaye timo ok ni kare.’ To koro winjuru, un jo-Israel. Un ema utimo gik ma ok ni kare, to ok an!

Ezekiel 8:12

Ruoth Nyasaye nopenja niya, “Wuod dhano, bende ineno gik ma jodong Israel timo kama opondo kae? Ng’ato ka ng’ato lemo mana e od nyasache manono. Giwuondore niya, ‘Ruoth Nyasaye ok newa! Osejwango pinyni.’ ”

Ezekiel 9:9

Nyasaye nodwoka niya, “Jo-Israel kod jo-Juda josetimo richo madongo ahinya. Gisenego ji mathoth e pinyni, mi gipong’o Jerusalem gi timbe maricho. Giwacho niya, ‘Ruoth Nyasaye osejwang’o pinywani. Ok onewa!’

Amos 2:13

Koro abiro diyou piny kama untie, mana kaka gari mopong’ gi cham sikore e lowo.

Zefania 1:12

“Chieng’no anamany Jerusalem, kamenye gi taya, mi akum joma osiko katimo atima richo, kendo wacho ni Ruoth Nyasaye ok bi timo gimoro kata matin.

Malaki 2:14

To eka pod ng’ato ka ng’ato kuomu penjo gimomiyo otimo kamano. Ruoth Nyasaye dwoko ni mano timore nikech uketho singruok mane utimo gi mon mane ukendo ka pod un yawuowi. Ne gin mondeu, to useketho singruok mane utimonigi, kata obedo ni ne usingoru e nyim Nyasaye ni ok unuwegi.

Malaki 3:8

Dhano bende nyalo mayo Nyasaye gire koso?’ To adwokou niya, ‘Umaya adier!’ To ka upenja niya, ere kaka umaya? To adwokou niya, ‘Usemaya kuom dagi miya chiwo mar achiel kuom apar kod mag misengni kaka chik dwaro.’

Rapar mar Chik 32:4

En lwanda, ma tichne long’o, nikech yorene duto ni kare. En Nyasaye ma jaadiera, kendo maonge ketho, ma timbene kare, kendo ma jaratiro.

1 Samuel 2:3

Weuru sungruok mukwarorugo, kendo ng’ayi kik wuog e dhou, nikech Ruoth Nyasaye en Nyasaye mong’eyo gik moko duto, kendo en ema opimo timbe dhano.