Malaki 2:14 - MUMA MALER 2015

¹⁴ To eka pod ng’ato ka ng’ato kuomu penjo gimomiyo otimo kamano. Ruoth Nyasaye dwoko ni mano timore nikech uketho singruok mane utimo gi mon mane ukendo ka pod un yawuowi. Ne gin mondeu, to useketho singruok mane utimonigi, kata obedo ni ne usingoru e nyim Nyasaye ni ok unuwegi.

Motingʼo Loko Manyien

¹⁴ To upenjo niya, “Nangʼo?” En kamano nikech Jehova Nyasaye obedo kaka janeno e kindi kod chiegi mane ikendo ka in wuowi, nikech useketho singruok mane ni e kindu koda. Kata obedo ni en chiegi mane itimogo singruok mar kend.

Malaki 2:14 ပူးပေါင်းရင်းမြစ်များ

Chakruok 2:18

Ruoth Nyasaye nowacho niya, “Ok ber ka dhano obet kende. Omiyo abiro miye ng’ama konye.”

Chakruok 31:50

Laban nomedo wacho niya, “Kapo ni ithago nyiga, kata ka ikendo mon moko ka onge janeno, to ng’e ni Nyasaye e janeno e kindwa kodi.”

Ngeche 2:17

En dhako ma ok oluoro chwore, kendo ma ok dew kuong’ruok mane okuong’orego e nyim Nyasaye.

Ngeche 30:20

Kit dhako ma miganga chalo kama: Oterore, bang’e olwokore, eka owacho niya, “Onge gima rach masetimo.”

Ngeche 5:20

Wuoda, ere gima omiyo onego iher dhako moro nono? Koso ang’o momiyo chi ng’ato nono dilombi?

Eklesiastes 9:9

Cham ngima gi chiegi e ndalo duto ma idak e ngima manono ma Nyasaye omiyini, nimar mano kende e gima niyudi kuom chandruok michandorigo e piny ka.

Wer Mamit 1:15

“Mano kaka ijaber, yaye jaherana! Mano kaka ijaber! Wengeni nyiso mana hera lilo.”

Isaya 54:6

Ruoth Nyasaye oseduoki ire, mana ka dhako mane oyudo osejwang’ ma chunye lit ahinya, Ruoth Nyasaye penjo niya, Bende ng’ato dijwang’ chiege mane okendo ka en wuowi adier?

Isaya 58:3

Gipenja niya, “Ere gima omiyo watueyo chiemo ka in to ok ine mano? Koso ang’o momiyo wasandore ka in to ok ine?” An to adwokogi niya, “Winjuru! Chieng’ ma utueyo chiemo, to utimo gik ma un uwegi ema udwaro, kendo jotichu ema uturo gi tich matek.

Jeremia 29:23

Mano e gima biro timorenigi nikech ne gilokore joma ofuwo, ka giterore, kendo giwacho miriambo e nyinga, to ne ok amiyogi wach mondo gihul. Ang’eyo gima gisetimo, kendo asebedo janeno kuom timbegi. An Ruoth Nyasaye ema awacho kamano.’ ”

Jeremia 42:5

Eka ne giwachone niya, “Ruoth Nyasaye ma Nyasachwa mondo obed janeno makare kendo maradiera ka ok warito chik duto ma omiyi mondo watigo. Wakuong’ore ni wabiro timo gimoro amora ma Ruoth Nyasaye ma Nyasachi owachoni mondo inyiswa,

Jeremia 8:12

Bende uparo ni wigi okuot nikech timbe makuero mane gitimogo koso? Ooyo, wigi ok okuot kata matin, bende gionge gi wichkuot. Kuom mano, gibiro podho kaka ji mamoko osepodho, kendo ka akumogi to ginirum. An Ruoth Nyasaye ema awacho kamano.

Jeremia 9:2

Mad abed ki kiru mar bworo e thim, kuma anyalo betie mabor gi joga, nimar giduto gin joma terore, kendo oganda ma andhoga.

Ezekiel 16:8

“Kane achako akadho machiegni kodi, ne ayudo ka iseromo mako osiep, omiyo ne ayaro lawa, mi aumogo dugi, kendo ne ayie ni abiro kendi. Adier, ne atimo kodi singruok, mi idoko mara. An Ruoth Nyasaye ema awacho kamano.

Mika 1:2

Winjuru un ogendini duto! Chikuru itu, un ji duto modak e piny! Ruoth Nyasaye nowuog e Hekalu maler, mondo onyis gik musetimo.

Malaki 2:15

Donge Nyasaye notimou ringruok achiel kendo chuny achiel kodgi? Donge otimo kamano mana ni mondo wabed gi nyithindo maluwo Nyasaye adier? Kuom mano, nyaka uritru mondo kik ng’ato kuomu keth singruok mane otimo ni dhako mane okendo ka en wuowi.

Malaki 3:5

Ruoth Nyasaye Manyalo Gik Moko Duto owacho niya, “Abiro ng’adonu bura, kendo bedo janeno kuomu piyo piyo, ka ayalo ajuoke gi joma terore gi joma kuong’ore kayiem gi joma wuondo jotichgi e yor misara, kod joma ok oluora, ma timo marach ni mond liete gi nyithi kiye kod jopinje mamoko modak kuomu.”

Malaki 3:8

Dhano bende nyalo mayo Nyasaye gire koso?’ To adwokou niya, ‘Umaya adier!’ To ka upenja niya, ere kaka umaya? To adwokou niya, ‘Usemaya kuom dagi miya chiwo mar achiel kuom apar kod mag misengni kaka chik dwaro.’

Jong’ad Bura 11:10

Jodong Gilead nodwoke niya, “Wakuong’re gi nying Ruoth Nyasaye ma janeno e kindwa kodi, ni wanatim mana gima iwacho.”

1 Samuel 12:5

Samuel nowachonigi niya, “Tinende Ruoth Nyasaye obedo janeno kuomu, kendo ruoth moseyiero bende obedo janeno, ni pok amulo gimoro.” Mi ne gidwoke ni, “Ee, obedo janeno.”