Luka 6:7 - MUMA MALER 2015

⁷ To noyudo jopuonj Chik moko kod jo-Farisai rango Yesu mondo gine ane konyalo chango ng’ato chieng’ Sabato, mondo giyud gima digidonjnego.

Motingʼo Loko Manyien

⁷ Jo-Farisai kod jopuonj chik ne dwaro yo ma digiyudgo ketho kuom Yesu. Kuom mano ne gingʼiyogo machiegni, mondo gine ka dochang ngʼatno chiengʼ Sabato.

Luka 6:7 ပူးပေါင်းရင်းမြစ်များ

Zaburi 38:12

Joma dwaro nega chikona obadho, kendo jogo ma dwaro hinya bwoga gi weche maricho. Odiechieng’ duto gihangona wach mondo gihinya.

Isaya 29:21

Gin jogo ma ketho nying ji, kendo ma buto mondo ohiny jong’ad bura, bende gimiyo buch ng’at makare iketho kayiem nono.

Jeremia 20:10

Awinjo ka ji kuodha gi nying’ ma gichaka ni ‘Masira ni kuonde duto,’ kendo giwacho niya, ‘Kwedeuru! Ee, wakwede!’ Kata mana osiepena ma ageno bende gombona mana chwanyruok. Giwacho niya, ‘Dipo ka oyondhe, mi omoko, kendo wachulone kuor.’

Mathayo 5:39

An to awachonu ni kik uchul kuor ni joma otimonu marach. Ka ng’ato othalo lembi ma korachwich, to lokne komachielo bende mondo othal.

Mariko 3:2

Ji moko ne ni kanyo mane dwaro donjo ni Yesu kuom ketho Chik. Kuom mano ne girange ahinya mondo gine ane ka onyalo chango ng’atno chieng’ Sabato.

Luka 13:14

Kane jaduong’ od lemo oneno ka Yesu ochango dhakono chieng’ Sabato kamano, mirima nomake, mi owacho ni ji niya, “Nitie ndalo auchiel ma onego ji tiye, omiyo biuru e ndalogo mondo ochangu, to kik ubi chieng’ Sabato.”

Luka 20:20

Omiyo ne girito mondo giyud thuolo maber. Ne gioro jombetre mane owuondore ni joma kare, mondo omake kowinjo kowacho gimoro marach, kendo okete e lwet ruoth.

Johana 9:16

Jo-Farisai moko nowacho ni, “Ng’at mane otimo kamano ok nyal bet ng’at Nyasaye, nikech ok orito Chik Sabato.” To moko nowacho ni, “Bende ng’at ma jaricho ditim honni ma kamagi adier?” Kamano ne gipogore kuom wachno chutho.