Jeremia 32:37 - MUMA MALER 2015

³⁷ Kinde moro anachokgi, kagologi e pinje duto ma nobed ka asekeyogie, ka akecho kendo ka mirimba ger, mi aduoggi ka eri mondo gidagie gi kue.

Motingʼo Loko Manyien

³⁷ Adiera anachokgi duto gia e pinje duto kamane ariembogie gi ich wangʼ kod mirimba mager; anadwog-gi kae kendo awegi gidag gi kwe.

Jeremia 32:37 ပူးပေါင်းရင်းမြစ်များ

Zaburi 106:47

Reswa, A Ruoth Nyasaye ma Nyasachwa, kendo golwa kuom ogendini mamoko, iduogwa e pinywa, mondo wapak nyingi maler, kendo wayud mor kuom goyoni erokamano.

Jeremia 12:14

Ruoth Nyasaye wacho niya, “An gi gima adwaro wacho kuom ogendini maricho mokiewo gi jo-Israel. Abiro pudhogi oko e pinygi ka yien mipudho, mi nares jo-Juda kuomgi.

Jeremia 16:14

To ndalo biro ma onge ng’ama nokuong’re gi nyinga ka Nyasaye mangima mane ogolo jo-Israel e piny Misri.

Jeremia 16:15

To ginikuong’re gi nyinga mana ka Nyasaye mangima mane ogolo jo-israel e piny man yo nyandwat gi pinje mamoko duto mane osekeyogie. Anaduoggi e pinygi giwegi mane amiyo kweregi. An Ruoth Nyasaye ema awacho kamano.

Jeremia 21:5

An awuon abiro kedo kodu ka iya owang’, kendo ka an gi mirima mager.

Jeremia 23:3

Abiro choko joga modong’, kagolo e pinje duto mane akeyogie, kendo nadwokgi e pinygi. Gininywol nyithindo mang’eny mi ginya.

Jeremia 23:6

E ndalo lochne, jo-Juda nodag gi kue, kendo jo-Israel bende nodag maonge ng’ama chandogi. Ginichak ruodhno ni ‘Ruoth Nyasaye ma resowa.’ ”

Jeremia 23:8

to ginikuongre gi nyinga mana ka Nyasaye mangima mane ogolo jo-Israel e piny man nyandwat, kendo e pinje mamoko duto mane asekeyogie. Bang’e eka ginidag e pinygi giwegi.’ ”

Jeremia 24:6

Abiro ritogi maber, kendo anaduoggi e pinyni. Abiro gerogi, kendo ok namukgi. Abiro pidhogi, kendo ok napudhgi.

Jeremia 29:14

Adier, awacho ni un uyuda, mi anadwoku e pinyu. Anagolu e pinje duto kuonde ma asekeyoue, mi anadwoku e piny mane agoloue, kane amiyo oteru e tuech. An Ruoth Nyasaye ema awacho kamano.

Jeremia 30:18

Ruoth Nyasaye wacho niya, “Abiro dwoko nyikwa Jakobo e pinygi, mi aguedh ng’ato ka ng’ato e ode. Dala ka dala nochak oger mana kama ne entie, kendo ot ka ot ji nodagie mana kaka nodakie chon.

Jeremia 31:10

“Un ogendini, winjuru, an Ruoth Nyasaye, mondo uland wachna e pinje man loka nam. An ema ne akeyo jo-Israel, to koro abiro chako chokogi, mi aritgi kaka jakwath rito jambe.

Jeremia 32:15

nikech Ruoth Nyasaye Manyalo Gik Moko duto kendo ma Nyasach Israel osewacho ni udi gi puothe mag mzabibu nochak ong’iew kendo e pinyni.”

Jeremia 33:16

E ndalogo nores jo-Juda, kendo jo-Jerusalem nodag gi kue. Omiyo ginichak dalagi ni, ‘Ruoth Nyasaye moresowa.’

Jeremia 33:7

Abiro miyo jo-Juda gi jo-Israel dhi nyime maber, kendo anachak agergi, mi gibed mana kaka ne gin chon.

Ezekiel 11:17

Kuom mano, nyisgi ni an Ruoth Nyasaye awacho ni abiro chokogi kagologi e pinje mane akeyogie, kendo abiro dwokonigi piny Israel.

Ezekiel 20:34

Adier, ka agolou e pinje mane akeyoue, mi achokou kanyakla, to abiro nyisou tekona maduong’ kod mirimba mager!

Ezekiel 28:25

Ruoth Nyasaye nomedo wacho niya, “Abiro dwoko jo-Israel ka agolo kuom ogendini mane akeyogie, mi ogendini duto nong’e ni an Ng’ama Ler. Jo-Israel nodag e pinygi giwegi, mane amiyo Jakobo jatichna.

Ezekiel 28:26

Ginidag kuno gi kue, kendo giniger udi, mi gipidh mzabibu. Anakum ogendini mokiewo kodgi duto, mane ojarogi, mi Israel nobed gi kue. Eka gining’e ni an e Ruoth Nyasaye ma Nyasachgi.”

Ezekiel 36:24

Anagolu e kind ogendini modak e pinje mopogore opogore, mi adwoku e pinyu uwegi.

Hosea 1:11

Bang’e jo-Israel gi jo-Juda nochak oriwre kanyakla achiel, mi gichak gidhi nyime maber. Kamano chieng’ Jezreel nobed chieng maduong’ adier!”

Hosea 3:5

To achien jo-Israel noduog ir ruoth Nyasachgi, kendo ir Daudi ruodhgi, kendo ka ndalogo ochopo, to giniluor Ruoth Nyasachgi, mi giyud michne mabeyo.

Joel 3:20

Abiro chulo kuor ni jonekgo, kendo joketho ok nawe mak akumo. Ji nodag e piny Juda gi Jerusalem nyaka chieng’, kendo Ruoth Nyasaye nodag e got Sayun.”

Zefania 3:20

Ka kinde ochopo monego achokue, to anakelu dala. Anamiu pak kod huma e kind ogendini duto mae piny, ka adwokonu gueth mane un-go chon, mana kuneno. An Ruoth Nyasaye ema awacho kamano.”

Zekaria 14:11

Ji nodag Jerusalem gi kue, ka onge ng’ama bwogogi ni ibiro kuong’ dalagi mondo okethi.

Zekaria 3:10

Chakre chieng’no un duto unudag e miechu gi kue, ka ng’ato ka ng’ato luongo wadgi mondo odhi olime. An Ruoth Nyasaye Manyalo Gik moko Duto ema awacho kamano.’ ”