Jeremia 23:6 - MUMA MALER 2015

⁶ E ndalo lochne, jo-Juda nodag gi kue, kendo jo-Israel bende nodag maonge ng’ama chandogi. Ginichak ruodhno ni ‘Ruoth Nyasaye ma resowa.’ ”

Motingʼo Loko Manyien

⁶ E ndalone Juda noresi kendo Israel nodag gi kwe. Ma e nying ma ibiro luongego: Jehova Nyasaye mamiyo wabedo jo-ratiro.”

Jeremia 23:6 ပူးပေါင်းရင်းမြစ်များ

1 Ruodhi 4:25

E ndalo Solomon duto, jo-Juda gi jo-Israel duto nodak e miechgii gi kue, chakre Dan yo nyandwat, nyaka Beer-sheba, yo milambo.

Zaburi 45:5

Aserni magi bitho, kendo hobo chuny wasiki. Ogendini podho apodha e tiendi.

Wuok 9:26

To mak mana piny Goshen kende mane jo-Israel odakie, ema ne ok ogoyo.

Isaya 2:4

Enong’ad bura ka othego ogendini mopogore opogore kendo enoyal pinje mang’eny. Ng’ato ka ng’ato nothedh liganglane mondo obed kwer. Tongegi to ginithedh rabetni. Onge oganda moro ma noked gi oganda machielo, kendo ji ok nochak opuonjre lweny.”

Isaya 32:1

Winjuru! Ruoth moro biro biro ma norit piny e yo makare, kendo jotende noti gi adiera.

Isaya 32:18

Kamano joga nobed e piny mokue, ka gidak gi mor, ma onge koko.

Isaya 33:22

nimar Ruoth Nyasaye en jang’adnwa bura. En e ruodhwa, ma ketonwa chik, kendo en ema noreswa.

Isaya 33:5

Ruoth Nyasaye duong’ moloyo, nikech odak e polo malo. Opong’o Sayun gi adiera kod tim makare,

Isaya 35:9

Sibuoche ok nodhi kuno, kendo onge kata mana ondiek mager ma nosud machiegni kode. To yorno ema joma Ruoth Nyasaye osewaro nowuothie.

Isaya 42:6

“An Ruoth Nyasaye, aseluongi ni mondo itim gima kelo resruok. Asemako lweti mondo ariti, kendo anami ibed ng’at ma kelo singruok e kinda gi ji,

Isaya 45:17

Jo-Israel to Ruoth Nyasaye noresi gi resruok mosiko. Piny ok nochak ochamgi, kata ok ginichak gigore nyang’eng’o kendo nyaka chieng’.

Isaya 54:17

To koro onge gir lweny molosi ni mondo ohinyi, ma nohinyi, bende inilo buche duto modonjnie. Mano e pok ma jotich Ruoth Nyasaye yudo. Adier, mano e gueth ma asemiyogi. An Ruoth Nyasaye ema awacho kamano.”

Isaya 7:14

Koro Ruoth Nyasaye owuon biro miyou ranyisi ma chalo kama: Nyako moro osemako ich, kendo obiro nywolo wuowi, ma obiro chako ni Emanuel, (ma tiende ni, Nyasaye ni kodwa.)

Isaya 9:6

nikech nonywolnwa nyathi. Adier, ibiro miyowa wuowi, kendo loch nobed e lwete. Noluong nyinge ni, Jabura Mahono, Nyasaye Maratego,, Wuoro ma nyaka chieng’, kendo Ruodh Kue.

Jeremia 29:11

An awuon ema ang’eyo gima achanonu. En gima ber to ok gima rach, kendo abiro kelonu gik mabeyo duto mugeno. An Ruoth Nyasaye ema awacho kamano.

Jeremia 30:10

“Un nyikwa Jakobo jatichna, kik ubed maluor. Ee, un jo-Israel, kik chunyu parre, nikech abiro resou mi agolu e piny mabor motueueno. Nyikwa Jakobo noduogi kendo ginidag gi kue, maonge ng’ama bwogogi. An Ruoth Nyasaye ema awacho kamano.

Jeremia 31:23

Ruoth Nyasaye ma Nyasach Israel wacho niya, “Ka asedwoko jo-Israel e pinygi, to ginichak giwach e piny Juda gi mier mage kama: ‘Mad Ruoth Nyasaye guedh got maler mar Jerusalem ma en kama ler modakie.’

Jeremia 32:37

Kinde moro anachokgi, kagologi e pinje duto ma nobed ka asekeyogie, ka akecho kendo ka mirimba ger, mi aduoggi ka eri mondo gidagie gi kue.

Jeremia 33:15

E kindeno anakel nyakwar Daudi hie, mi enotim gik malong’o kendo makare.

Jeremia 33:16

E ndalogo nores jo-Juda, kendo jo-Jerusalem nodag gi kue. Omiyo ginichak dalagi ni, ‘Ruoth Nyasaye moresowa.’

Ezekiel 21:27

Adier, abiro ketho dalano chuth, mi lokre gunda. To mano ok notimre nyaka chop ka ruoth mowinjore gi loch obiro, kendo en ema abiro miye osimbono.

Ezekiel 28:26

Ginidag kuno gi kue, kendo giniger udi, mi gipidh mzabibu. Anakum ogendini mokiewo kodgi duto, mane ojarogi, mi Israel nobed gi kue. Eka gining’e ni an e Ruoth Nyasaye ma Nyasachgi.”

Ezekiel 38:14

“Kuom mano, wuod dhano, dhiyo inyis Gog ni an Ruoth Nyasaye awachone kama: ‘E kinde ma joga Israel odakie gi kueno,

Ezekiel 48:35

Kamano bor ohingano duto nobed mita alufu ochiko. To nying dalano mosiko nobed, ‘Ruoth Nyasaye ni ka.’

Daniel 9:24

“Nyasaye oseketo ni jou gi dalau higni mia ang’wen gi piero ochiko mondo kethogi gi richogi orumie. Bang’e nowe ni ji richogi, kendo nogur tim makare mosiko mondo weche mag fweny gi weche makare otimre adier, eka opwodh Kama Ler Moloyo.

Daniel 9:7

In Ruoth Nyasaye pile isebedo kitimo gik makare, to wan jo-Juda gi jo-Jerusalem gi jo-Israel duto mane ikeyo e pinje machiegni gi maboyo nikech ne waweyi, ema wasebedo ka watimo timbe mag wichkuot.

Hosea 1:11

Bang’e jo-Israel gi jo-Juda nochak oriwre kanyakla achiel, mi gichak gidhi nyime maber. Kamano chieng’ Jezreel nobed chieng maduong’ adier!”

Hosea 1:7

to anaher jo-Juda. An Ruoth Nyasaye anaresgi, to ok naresgi gi lweny, kata gi gilweny.”

Hosea 2:18

“Bang’ mano anatim singruok gi le mae thim gi winy mae kor polo kod gik mamol e lowo ni kik gihiny joga. Eka natur atung’ gi ligangla kod gimoro amora mar lweny, mi aywegi oko e piny mondo joga odag gi kue.

Obadia 1:17

“To jomoko modak e got Sayun biroo tony kuno, mi kanyono nobed kama ler, kendo joka Jakobo nokaw piny ma margi giwegi.

Obadia 1:21

Jo-Israel biro dhi e got Sayun mondo oresi, mi god Esau nobed e bwo lochgi. To Ruoth Nyasaye ema nobed ruoth.

Zefania 3:13

Jo-Israel modong’ noyud kar resruok e nying Ruoth Nyasaye. Ok ginichak gitim timbe mamono, kendo weche mag miriambo miwuondogo ji ok nowuog e dhogi, nimar ginichal gi rombe machiemo kendo nindo piny, ma onge ng’ama bwogo.’ ”

Zekaria 10:6

Abiro miyo jo-Juda bed marateke, kendo abiro miyo jo-Israel locho. Bende anachak aguedhgi, nikech asekechogi, mi ginichal ka gima ne ok ajwang’ogi, nikech an Ruoth Nyasachgi, kendo abiro dwoko kwayogi.

Zekaria 3:10

Chakre chieng’no un duto unudag e miechu gi kue, ka ng’ato ka ng’ato luongo wadgi mondo odhi olime. An Ruoth Nyasaye Manyalo Gik moko Duto ema awacho kamano.’ ”

Jo-Rumi 3:22

En e yo ma Nyasaye miyogo dhano bet e winjruok kode nikech yie ma oyiego kuom Yesu Kristo. Yorno ni thuolo ni ji duto moyie, nikech onge gima gipogorego.

1 Jo-Korintho 1:30

Osekelou e achiel gi Kristo Yesu, kendo osemiyo Kristo obedo riekowa. Kuom Kristo bende ema Nyasaye osemiyo wabet e winjruok kode, kendo osemiyo wabedo joge kendo wayudo warruok.

2 Jo-Korintho 5:21

Kristo ne onge gi richo kata matin, to Nyasaye notime richo nikech wan, mondo kuom en wabed joma kare kaka Nyasaye.

Jo-Filipi 3:9

ka ariwora kode eringruok achiel. Koro ok adwar ni mondo okwana ka ng’ama dwaro bedo e winjruok gi Nyasaye nikech rito Chik, to adwaro bedo ng’ama Nyasaye osemiyo bedo e winjruok kode nikech oyie kuom Kristo.