Jeremia 17:22 - MUMA MALER 2015

²² Kata mana ting’o gik moko ka gigolo e utgi kik giting’. Nyaka girit chieng’ Sabato obed maler, kaka ne achiko kweregi, kendo kik giti tich moro chieng’no.

Motingʼo Loko Manyien

²² Kik ukel misike koa ei uteu kata timo tich moro chiengʼ Sabato, to rit chiengʼ Sabato maler, mana kaka ne achiko kwereu.

Jeremia 17:22 ပူးပေါင်းရင်းမြစ်များ

Nehemia 13:15

E ndalo gogo naneno jomoko e piny Juda mabiyo mzabibu chieng’ Sabato, mondo olosgo divai, kod joma choko divai gi mzabibu gi ng’owo gi gik ohala moko ma giyieyo kuom kenje chieng’ Sabato, kendo gikelo Jerusalem. Mi nakwerogi ni kik gihon chiemo chieng’ Sabato.

Wuok 23:12

“Unuti kuom ndalo auchiel, to chieng’ mar abiriyo kik uti, mondo dhou gi kenjeu oyue, kendo mondo chuny wasumbu kod chuny jodak oduogi.

Isaya 58:13

Ka urito chieng’ Sabato maler, ma ok utiyo tijeu uwegi, kendo ka ok utimo gik ma un ema udwaro chieng’no, to uhulo ni chieng’no en chieng’ mor, kendo chiengg’ mowal ni Ruoth Nyasaye, kendo umiyo Ruoth Nyasaye duong’ kuom weyoo loko ohala, kendo kuweyo weche manono,

Jeremia 17:24

“Nyisgi ni nyaka giluora gi chunygi duto. Kik giting’ misigo moro amora ka gikadho e dhorangeye mag dalani chieng’ Sabato, to girit chieng’ Sabato obed maler, mak gitiyo tich moro.

Ezekiel 20:12

Ne aketo ndalo mag Sabatona obed ranyisi mar winjruok e kinda kodgi, mondo oparnigi ni an Ruoth Nyasaye ema ayierogi mondo gibed maga.

Ezekiel 22:8

Ok uluoro kuonde mowalna, bende ok urit Sabatona.

Tim jo-Lawi 19:3

Ng’ato ka ng’ato kuomu nyaka luor min gi wuon, kendo nyaka rit Sabato maga. An e Ruoth Nyasaye ma Nyasachu.

Tim jo-Lawi 23:3

Unuti tijeu kuom ndalo auchiel, to chieng’ mar abiriyo en chieng’ yueyo moyiedhi. En odiechieng chokruok maler, ma kik utimie tich moro amora, nikech en sabato mar Ruoth Nyasaye kuonde duto mudakie.

Zekaria 1:4

Kik ubed machal gi kwereu mane jonabi machon ywaknigi kawacho ni, ‘Ruoth Nyasaye Manyalo Gik Moko Duto wacho niya, “Weuru yoreu maricho kod timbeu mamono mondo uduog ira.” ’ To ne ok gichiko itgi kata dewo wechena ne ok gidewo. An Ruoth Nyasaye ema awacho kamano.

Luka 23:56

Bang’e ne gidok Jerusalem, mi giloso mo mang’ue ng’ar kod yath madum mamit. Chieng’ Sabato to ne giyueyo kaka Chik Musa dwaro.

Luka 6:5

Eka nowachonigi niya, “Wuod Dhano en ruodh Sabato bende.”

Fweny 1:10

To chieng’ Ruoth, Roho ne omaka, mi awinjo dwol maduong’ maywak ka tung’ ka wuoyo gi yoka ng’eya.