Isaya 66:4 - MUMA MALER 2015

⁴ e kaka an bende abiro yieronigi masiche mondo omakgi, ka akelo kuomgi gik ma giluoro, nimar ne alwongo, to onge ng’ama dwoka, kendo ne awuoyo, to onge ng’ama winja. To ne gitimo timbe mamono ma ok ayiego, eka giyiero mana gik ma adagi.”

Motingʼo Loko Manyien

⁴ omiyo an bende abiro yieronegi masiche mondo omakgi kendo abiro kelo kuomgi gik ma giluoro. Nimar kane aluongo, to onge ngʼat mane odwoka, kendo kane awuoyo, to onge ngʼat mane owinjo. Negitimo timbe mamono e nyima, kendo ne giyiero mana gik mamorogi.”

Isaya 66:4 ပူးပေါင်းရင်းမြစ်များ

2 Ruodhi 21:2

Timbe Manase ne richo e nyim Ruoth Nyasaye, kaka timbe makuero mag ogendini mane Ruoth Nyasaye oriembo mondo owe thuolo ni jo-Israel.

2 Ruodhi 21:6

Nowang’o wuode bende, kotimogo misango. Noyie gi jokor wach gi jo nyakalondo kod ajuoke. Timbene maricho ne ng’eny e nyim Ruoth Nyasaye, omiyo mirima nomako Ruoth Nyasaye.

Zaburi 81:12

Kuom mano, ne aweyogi mondo gidhi, ka wigi tek kamano, mondo gitim mana gik ma gin giwegi ema gidwaro.

Ngeche 1:24

Asebedo ka aluongou ni mondo ubi, to ok usewinja ngang’, bende ok usedewa!

Ngeche 10:24

Gima jaricho oluoro ema timorene. Ng’at makare to yudo mana gima odwaro.

Isaya 50:2

Kuom mano, ere gima omiyo ne ok ayudo ng’ato, kane abiro iru? Koso kane aluongo, to ere gima omiyo ng’ato ne ok odwoka? Uparo ni bada chiek ma ok nyal warou, kata ni aonge gi teko ma daresugo? Ooyo, ka akok, to nam duono, bende aore lokore piny motwo, mi rech manie igi tho kendo dum marach nikech pi onge.

Isaya 59:15

Kuom mano, adiera olal nono, kendo ka ng’ato obet motang’ ni richo, to ikwane mana ka janeko! Ruoth Nyasaye noneno ni adiera onge, omiyo iye nowang’.

Isaya 59:7

Tiendgi rikni ka gidhi timo richo, kendo giyot ni chuero remo maonge ketho. Paro mopong’o chunygi en mana paro mamono, kendo kamoro amora ma gidhiyoe, to masira gi chandruok ema dong’ie.

Isaya 65:12

aseng’adonu buch tho, kendo uduto ibiro negu, nikech ne aluongou, to ne ok udwoka, bende ne alosonu, to ne udagi winja. To ne utimo timbe mamono ma ok ayiego, kuyiero mana gik ma adagi.

Isaya 65:2

Ne arieyo bada odiechieng’ duto, ka ahombo joma wigi tek, mane luwo mana yoregi maricho, katimo dwarogi giwegi.

Isaya 65:3

Gin joma ne kwinya pilepile, kaneno, ka gitimo misengni e puothe, kendo giwang’o ubani e kende molos gi matafali.

Isaya 65:7

Ne uwang’o ubani e gode duto madongo gi matindo, kukweda, omiyo abiro kwongo pimo pok monego uyudi, eka achulu kaka owinjore!”

Jeremia 35:17

Omiyo an Ruoth Nyasaye Manyalo Gik Moko Duto kendo ma Nyasach Israel abiro kelo kuomu un jo-Juda gi jo-Jerusalem masiche duto mane asesiemougo, nikech ne ok unyal winja ka awuoyo kodu, bende ne ok unyal dwoka ka aluongou.”

Jeremia 7:13

To koro usetimo richogo duto! Kata obedo ni ne akawo chandruok, mi aloso kodu, to ne ok udewa, bende kane aluongou, to ne ok uyiena.

Jeremia 7:30

“Jo-Juda osetimo gima rach e nyima. Giseketo nyisechegi makuero e Hekalu mara, mi gidwanyo. An Ruoth Nyasaye ema awacho kamano.

Ezekiel 11:8

Ang’eyo ni uluoro lweny, to lweny muluorono ema abiro kelonu.

Ezekiel 14:4

“Omiyo nyisgi ni an Ruoth Nyasaye awacho kama: An awuon ema nadwok ng’ato ang’ata ma ja-Israel moketo chunye kuom lamo nyiseche manono, kendo oyie mondo nyisechego otere e richo, to pod eka biro mondo openj janabi wach! Anadwoke dwok ma oromo gi lamo nyiseche mang’eny manonogo!

Ezekiel 20:25

Bang’e ne amiyogi buche maricho kod chike ma ok kel ngima.

Mathayo 24:24

nikech Mesia mag miriambo kod jonabi ma ok madier notuchi. Ginitim ranyisi madongo kod honni, mondo kanyalore to giwuondgo kata mana joma Nyasaye oyiero.

1 Samuel 8:19

Kata kamano, ji nodagi winjo dwond Samuel, mi ne giwachone niya, “Ooyo, nyaka wabed gi ruoth ma ritowa,