Isaya 54:4 - MUMA MALER 2015

⁴ Kik ibed maluor, kata kik chunyi nyosre, nikech ok niyud wich kuot. Ndalo biro chopo ma wiyi nowilie gi wich kuot mane iyudo ka pod itin, kendo ok nichak ipar chandruok mane ineno kane idong’ chi liel,

Motingʼo Loko Manyien

⁴ “Kik ibed maluor; nikech ok iniyud wichkuot. Kik ibed gi luoro mar yudo wichkuot; nikech ok nojari. Wiyi nowil gi wichkuot mane iyudo ka in nyako, kendo ok inichak ipar chandruok mane ineno kane ibedo dhako ma chwore otho.

Isaya 54:4 ပူးပေါင်းရင်းမြစ်များ

Ayub 11:16

Bang’e wiyi nowil gi chandruokni duto, mana ka koth mochue ochok ma wich wilgo.

Isaya 25:8

Enotiek tho nyaka chieng’. Bang’e enoywe pi wang’ ng’ato ka ng’ato, kendo nogol achaye man kuom joge e piny duto. Ruoth Nyasaye ema owacho kamano.

Isaya 29:22

Kuom mano, Ruoth Nyasaye ma Nyasach joka Jakobo, kendo mane owaro Ibrahim wacho kama: “Koro Jakobo ok bi yudo wichkuot, kendo kibaji ok nogoye,

Isaya 4:1

E kindeno chwo manok kende ema nodong’, kendo mon abiriyo nobed ka laro dichwo achiel, ka wachone niya, “Yie mondo wabed mondi waduto. Chiemo mwachamo gi lewni mwarwako to wabiro yudo wawegi, to yie ayieya oluongwa mana ni mondi, mondo kik wane wichkuot ni waonge gi chwo.”

Isaya 41:10

Kik uluor gimoro nikech an kodu. Kik kibaji gou, nimar an e Nyasachu. Amiyou teko, kendo akonyou, bende asirou gi bada ma korachwich ma alochogo.

Isaya 41:14

In oganda Jakobo, in kudni akuda, to kik ibed maluor. Yaye, in Israel ma onge ndhathe, kik kibaji goyi. An Ruoth Nyasaye ema awacho kamano.

Isaya 50:7

To Ruoth Nyasaye biro konya, omiyo onge ayany moro ma nyalo hinya. Kuom mano aseguro wiya matek ka lwanda, ka ang’eyo ni ok nayud wichkuot,

Isaya 51:7

Winjuru, un joma ong’eyo tim makare kaka obet, kendo ma keto chunygi kuom chikna. Kik uluor achaya mag ji, kendo ayany ma giyanyougo kik gou kibaji,

Isaya 54:14

Enogeri e mise mar tim makare, kendo inibed mabor gi kuonde mithiroe ji, omiyo ok nibed maluor, bende nibed mabor gi masiche, mi ok ginisud machiegni kodi.

Isaya 61:7

Kar bedo gi wichkuot, to unuyud pok nyadiriyo, kendo kar yudo achaya, to unubed mamor gi poku. Kamano unuyud pok nyadiriyo e pinyu, mi ubed gi mor mochwere,

Isaya 65:16

Ng’ato ang’ata ma dwaro mondo oyud gueth e piny, to nyaka kwa mana Nyasach adiera mondo oguedhe. Bende ng’at ma kuong’ore e piny ka, to nyaka kuong’re mana e nying Nyasach adiera, nikech wich nowil gi thagruok machon, mi lal nono e wang’a.

Jeremia 31:19

Kata obedo ni ne wabaro mi waweyi, to piyopiyo nono ne wadwaro duogo. Kane isekumowa, to ne wakulo wiwa kwakuyo. Wiwa ne okuot ka chunywa lit, nikech richo mane watimo kapod wayom.’

Ywagruok 1:1

Mano kaka dala Sayun mane ji ng’enyie tinde odong’ nono! Chon ogendini ne kwane ka dala maduong’, to koro osedong’ mana ka chi liel. Adier, chon ne en ruodh mier duto, to tinde ochalo mana ng’ama tiyo tich misumba.

Ezekiel 16:22

E kinde duto mane itimo timbe maricho mag chode, ne ok iparoe ngang’ ndalo mane in nyathi, ka in duk, kendo ichadhori gi remo.”

Ezekiel 16:43

Wiyi ne owil gi rit mane aritigo kapod itin, mi iwang’o iya gi gik moko duto mane itimo. Mano emomiyo anakumi moromo gi timbeni duto, nimar ne imedo timbe mag dwanyruok kuom timbe duto makuero ma isetimo! An Ruoth Nyasaye ema awacho kamano.”

Ezekiel 36:15

Ok anayie mondo ogendini onyier godego, kata mondo ji ojargi. Bende ok ginichak gima jo-Israel nyithindgi. An Ruoth Nyasaye ema awacho kamano.

Joel 2:21

“Kuom mano in lowo kik ibed maluor, to bed gi mor kendo gi ilo, nikech Ruoth Nyasaye osetimoni gik madongo!

Zefania 3:11

Chieng’no, in Jerusalem ok niyud wichkuot kuom timbeni mamono mane ipiemgo koda, nimar e kindeno anagol jogi ma josunga kendo ma jong’ayi, mi ok nichak isungri kendo e goda maler.

Zekaria 10:6

Abiro miyo jo-Juda bed marateke, kendo abiro miyo jo-Israel locho. Bende anachak aguedhgi, nikech asekechogi, mi ginichal ka gima ne ok ajwang’ogi, nikech an Ruoth Nyasachgi, kendo abiro dwoko kwayogi.

1 Petro 2:6

kaka Muma wacho niya, “Neuru, aketo kidi moyier e Sayun. En kidi motegno man gi duong’ moriwo kor ot. Ng’at moyie kuome to ok none wichkuot.”