Isaya 31:4 - MUMA MALER 2015

⁴ Ruoth Nyasaye osewachona niya, “Kaka sibuor kata nyathi sibuor ng’ur, kachamo chiayo mosemako, to ok odew, bende ok oluor kata ka jokwath mang’eny ochokore ka goyo koko, mondo oriembe, e kaka Ruoth Nyasaye Manyalo Gik Moko Duto nolor piny mondo oked ewi got Sayun.

Motingʼo Loko Manyien

⁴ Ma e gima Jehova Nyasaye wachona: Mana kaka sibuor ngʼur konyono chiayo mosemako piny, kendo kata obedo ni jokwath duto oyworo ka goyo koko, to ok odew bende ok oluor, e kaka Jehova Nyasaye Maratego, biro biro mondo oked ewi got Sayun.

Isaya 31:4 ပူးပေါင်းရင်းမြစ်များ

2 Weche mag Ndalo 20:15

Nowacho niya, “Un jo-Juda duto gi joma odak Jerusalem, kod ruoth Jehoshafat, winjuru gima Ruoth Nyasaye owachonu. Owacho ni kik uluor oganda maduong’ni, kendo chunyu kik parre, nimar lweny ok en maru to en mar Nyasaye.

Wuok 14:14

Ruoth Nyasaye biro kedonu, omiyo un ling’uru aling’a.”

Wuok 14:25

Nomiyo tiend gechegi omoko, mi koro ne ok ginyal ringo maber, nyaka jo-Misri nowacho niya, “Ruoth Nyasaye ema kedonigi kodwa.”

Isaya 10:16

Kuom mano, Ruoth Nyasaye Manyalo Gik Moko Duto biro kelo tuo kuom jolwej Asuria marateke, chakre e wigi nyaka lith tiendgi, kendo tuo noliel ka mach ei ringregi.

Isaya 12:6

Un joma odak Sayun, koguru gi mor, nimar Ng’ama Ler mar Israel odak e dieru gi duong’ne duto.”

Isaya 30:30

Bang’e Ruoth Nyasaye nomi winj dwonde man gi duong’, kendo nonyis bade motimo mach mawang’o gik moko duto, ka lor gi mirima mager, ka polo mor gi koth maduong’, machue gi pe kod yamo mager.

Isaya 30:32

Un to nubed mamor kugoyo thumbe, kendo uwer e kinde duto ma ruoth Nyasaye goyogie.

Isaya 42:13

Ruoth Nyasaye biro wuok oko ka thwon maratego. Enobed gi mirima mager mana ka jalweny, kendo enokogi ka ogoyo sigich lweny, mi olo wasike.

Jeremia 50:44

“An Ruoth Nyasaye abiro biro mana ka sibuor mochomo lek moloth, kowuok e bungu moyugno manie geng aora Jordan, kendo anami jo-Babulon mwomre gi ng’uech kawuok e dalagi. Bang’e ng’at ma ayiero jatelo norit ogandano. “Ere ng’ama inyalo pimo koda? Koso ere ng’ama dihedhre piem koda. Jatelo mane ma dikwer wachna?

Hosea 11:10

Abiro ruto ni wasik jo-Israel ka sibuor, mi joga biro biro ira. Gibiro ringo ira ka gia yo podho chieng’.

Amos 3:8

“Ere ng’ama ok diluor ka sibuor ruto? Koso ere janabi ma diling’ mak ohulo gima Ruoth Nyasaye owachone?”

Zekaria 12:8

“Chieng’no an Ruoth Nyasaye nabed okumba ni jo-Jerusalem, mi kata mana ng’ama yomyomie moloyo kuomgi nobed motegno ka Daudi, kendo joka Daudi nobed jotend ji mana kaka Nyasaye kata malaika mare.

Zekaria 14:3

Eka Ruoth Nyasaye nowuogi mi ked gi ogendinigo mana ka gima okedo e paw lweny.

Zekaria 2:5

Ruoth Nyasaye owacho ni obiro bedone ohinga mar mach molwore, kendo obiro bedone duong’ maler e diere.”

Zekaria 9:15

Ruoth Nyasaye Manyalo Gik Moko Duto ema nobed okumbagi mi ginilo lweny ka ginyono kite mag orujre piny. Ginigo koko ka joma omer, mi ginineg ji, mi rembgi chuer mana ka remb misango miolo gi tawo e tunge mag kendo-mar-misango.

Zekaria 9:8

“Anachung’ e pinya ka jarito, mondo ng’ato kik donji kata wuogi, mi wasigu ok nochak olo joga nimar aseneno thagruokgi gi wang’a.”

Fweny 10:3

Nokok gi dwol maduong’ machalo mana dwond sibuor maruto. Kane osekok kamano, to polo abiriyo nomor,

Fweny 5:5

To ng’at achiel kuom jodongogo nokona niya, “We ywak, nikech Sibuor moa e dhood Juda, ma nyakwar Daudi, ema oselocho! Emomiyo en gi ratiro mar ketho kido abiriyogo, mi oel kitabuno.”