Isaya 25:2 - MUMA MALER 2015

² Iseketho mier, mi udi momukore odhurore pidhe pidhe. Adier, iseloko mier mochiel motegno pidhe mag kite, mi udi mabeyo mag jopinje mamoko osekethore chuth, kendo ok nochak oger.

Motingʼo Loko Manyien

² Isemiyo dala maduongʼ omukore, modhurore pidhe pidhe, dalano mochiel motegno okethore, dala maduongʼ ma jopinje mamoko noketoe genogi oserumo; bende ok nochak ogere kendo.

Isaya 25:2 ပူးပေါင်းရင်းမြစ်များ

Ayub 12:14

Ka Nyasaye ema omuko gimoro, to ere ng’ama nyalo gere kendo? Koso ka Nyasaye ema oketo ng’ato e tuech, koro ere ng’ama digonye?

Isaya 13:20

Ng’ato ok nochak odag kuno kuom tienge duto mabiro. Onge ja-Arabu ma nogur hembe kanyo, bende onge jakwath ma nokwa jambgi kuno.

Isaya 13:21

Kanyo ema ondiegi mae thim nonindie, kendo gik maricho mag bungu nopong’ udi man kuno. Tula mag thim bende nodagie, kendo jochiende notugie.

Isaya 13:22

Otoche noywagre e udigo. Bwe bende nodagi e udi madongo mabeyo. Yaye! Ndalo Babulon sudo machiegni. Adier, kinde matin ema odongne!

Isaya 14:23

Abiro loko Babulon siany, kendo time kama chiewo ema dakie. Anakethe chuth mana ka gima oywe gi yuech.” Mago e weche mar Ruoth Nyasaye Manyalo Gik Moko Duto.

Isaya 17:1

Ma e wach mane Nyasaye onyiso e fweny kuom Damaski: Damaski biro kethore chuth, mi ute mukre kendo dhurre pidhe pidhe.

Isaya 17:3

Piny Israel ok nochak oobed gi dala mochiel motegno, bende Damaski ok nochak obed gi ruoth, kendo jo-Aram manok modong’ noneg duto, nimar duong’gi nolal nono, mana kaka duong’ mar Israel biro lal. Mago e weche mag Ruoth Nyasaye Manyalo Gik Moko Duto.

Isaya 21:9

to koro echa aneno joidh farese ka biro, kaachiel gi geche lweny ma farese ariyo ariyo ywayo.” Eka nawinjo dwoko niya, “Babulon osepodho! Osepodho, kendo nyisechene manono osemuki moriere piny.”

Isaya 23:11

Ruoth Nyasaye oserieyo bade e nam mondo olok loch ruodhi, bende osegolo chik mondo omuk miech Kanaan mochiel motegno.

Isaya 23:13

Ranguru uneye piny jo-Babulon. Jo-Babulon ema nolok Turo thim ma ondiegi dakie, to jo-Asuria ok ema noloke. Ginidhur lowo mondo ginyon ka giidho ohingane, kendo ginimuk ut ruodhi, mi giketh dalano chuth.

Isaya 24:10

Dala Manono nokethre chuth, kendo ot ka ot nolor mondo joyeko kik donjie.

Isaya 25:12

Ruoth Nyasaye nomuk ohinga margi marabora ma gigeng’orego, mi ruombre piny e buru.”

Isaya 26:5

Joma ne odak e dala moting’ore osedwoko piny, kendo osemuko dalagi, mi orwombore piny e buru,

Isaya 27:10

To dala ma ochiel motegno nodong’ gunda. Enobed dala mojwang’ maonge ng’ama odakie, kendo nolokre thim. Jamni nokwa kuno, ka chamo bede yien.

Isaya 32:14

Ji noring owe udi mabeyo madongodongo duto, mi dala ma yande ji thothie nodong’ nono. Nobed lek maber ni le mae thim, kendo jamni bende nokwae. Kuonde moting’ore mochiel motegno mag siro lweny, kod kuonde maboyo mag rito, nolokre thim kuom ndalo mang’eny,

Isaya 32:19

Tik gode ma otimo bungu nobed mang’ich maber, kendo mier manie pap nobed gi kue.

Isaya 34:13

Kudho ema noyugno e udi madongodongo man kuno, kendo aila kod pedo nogawre e mier mage mochiel gi ohinga. Enobed piny marach ma ondiegi ema nitie, kendo ma tula ema odakie.

Isaya 37:26

To in Senakerib, kata obedo ni iwacho kamano, donge ing’eyo ni an Ruoth Nyasaye ema ne achano chon mondo gigo otimre? Adier, ne achanogi chon, to koro amiyo gitimore. An ema ne achano mondo imuk mier mochiel motegno, olokre gundni,

Jeremia 51:26

Onge kidi moro kata achiel ma nogol e gundani mondo ogedgo. Ibiro chalo gi thim nyaka chieng’. An Ruoth Nyasaye ema awacho kamano.

Jeremia 9:11

Ruoth Nyasaye owacho niya, “Abiro loko miech Jerusalem gundni kama ondiegi ema odakie, kendo miech Juda abiro loko thim.”

Rapar mar Chik 13:16

Nyaka uchok mwandu duto mag dalano kanyakla, kendo uket e laru manie dier dalano. Eka uwang’ dala duto, kaachioel gi gik moko duto manie iye ka misango miwang’o pep ni Ruoth Nyasaye ma Nyasachu. Dalano ok noger kendo, to nodong’ gunda nyaka chieng’.

Fweny 18:19

Ne gibuko wigi buru ka giywak kendo gidengo niya, “Yaye! Mano gima lit manade mosetimore ni dala maduong’ni! En dala ma ji duto mane nigi yiedhi odokoe joma omew nikech mwandune mathoth. To osekethe mana kuom sa achiel kende, mi odoko gunda!