Hosea 12:6 - MUMA MALER 2015

⁶ Kuom mano, un nyikwa Jakobo, genuru kuom Ruoth Nyasachu, kendo udog ire. Beduru joadiera kendo joma timo gik makare, kendo keturu chunyu pile kuom Ruoth Nyasachu.

Motingʼo Loko Manyien

⁶ To nyaka uduog ir Nyasachu; beduru johera kendo joma ngʼado bura makare, bende keturu chunyu kuom Nyasachu kinde duto.

Hosea 12:6 ပူးပေါင်းရင်းမြစ်များ

Chakruok 49:18

“A Ruoth Nyasaye, arito warruok moa kuomi!

Zaburi 123:2

Kaka jatich rango ruodhe, kendo kaka jatich ot manyako rango wuon ot motiyone, e kaka wan bende wasiko kwarangi, nyaka chop ikechwa, A Ruoth Nyasachwa.

Zaburi 27:14

Genuru kuom Ruoth Nyasaye. Ee, genuru kuome, kendo kik chunyu nyosre.

Zaburi 37:7

Bed gi kue e nyim Ruoth Nyasaye, kendo hori mos kirite. Kik iwe chunyi chandre nikech ji madhi maber, kata nikech joma timo timbe maricho.

Wuok 3:15

Nyasaye nochako owacho ni Musa niya, “Nyaka iwach ni jo-Israel kama: ‘Ruoth Nyasaye ma Nyasach kwereu, ma Nyasach Ibrahim, gi Isaka kod Jakobo, oseora iru.’ Ma e nyinga ma nyaka chieng’, kendo ma tienge mabiro duto noluongago.

Ngeche 1:23

Chikuru itu ka akwerou gimoro. Abiro ng’adonu rieko, kendo abiro puonjou wechena,

Ngeche 21:3

Ruoth Nyasaye ohero mondo itim gik makare kendo mowinjore moloyo timone misengni.

Isaya 1:16

nikech lwetu otimo remo. Lwokreuru mondo ubed maler, bende goluru timbeu mamono oko e wang’a,

Isaya 30:18

To kata kamano, Ruoth Nyasaye pod dwaro ng’wononu, kendo ogombo ahinya mondo okechu, nimar en Nyasaye ma jaadiera. Mano kaka jogo duto mogeno kuome gin johawi!

Isaya 31:6

Yaye, jo-Israel, duoguru ir Nyasaye ma useweyo chuth,

Isaya 40:31

To joma ogeno kuom Ruoth Nyasaye, tekogi noduogi. Ginihu ka ongo, mana ka gima gin gi buombegi, kendo giniringi, to ok giniol, bende giniwuothi, to tekregi ok norum.

Isaya 58:6

Donge kit tueyo chiemo ma adwaro en ni mondo ugony tonde mag richo, kendo utur jok duto, mondo joma isando oyud yueyo?

Isaya 8:17

Arito Ruoth Nyasaye ma pando wang’e ni joka Jakobo, ka ageno mana en.

Jeremia 22:15

Bende gero ut sida mabeyo moloyo mag jomoko nyalo nyiso ni in ruoth adier? “Wuoru nodak maber. Pile ne en ng’at makare kendo jaadiera, omiyo gik moko duto mane otimo ne odhi maber.

Ezekiel 18:30

“Emomiyo an Ruoth Nyasaye anyisou un jo-Israel ni abiro kumo ng’ato ka ng’ato kuomu mana maromre gi timbene. Kuom mano, weuru timbeu mamono duto mondo kik uwe richo tieku.

Hosea 10:12

Bang’e ne awachonigi niya, ‘Chwouru timbe makare, eka unuka gueth mawuok kuomgi. Paruru okang’, nikech en kinde ma onego uduogie ira, an Ruoth Nyasachu, mi nabi kendo aol gueth kuomu.’

Hosea 14:1

Duoguru ir Ruoth Nyasachu un jo-Israel. Richou osemiyo uchwanyoru, mi upodho.

Hosea 4:1

Ruoth Nyasaye ni kod wach ni ji modak e pinyni. Omiyo un jo-Israel chikuru itu mondo uwinj ane gima owacho. Owacho kama: “Dimbruok kod hera onge e pinyni, kendo ji ok oyie kata mana kuom Nyasaye.

Joel 2:12

Ruoth Nyasaye owacho niya, “To kata mana sani, lokreuru gi chunyu duto, mondo uduog ira kuriyo kech, kendo kuywak kendo kukuyo.

Joel 2:13

Chunyu mondo otur, eka onyis ni uywagoru, to kik uyiech ayiecha lepu.” Duoguru ir Ruoth Nyasaye ma Nyasachu, nikech ong’won kendo okecho ji. Iye ok wang’ piyo, kendo onyiso herane mosiko, bende chunye lor a kuom kelo ni ji masira.

Amos 4:13

Nyasaye ema noloso gode, kendo ochueyo yamo. Onyiso dhano parone, bende oloko ler mar odiechieng’ bedo mudho. En e ruodh piny duto, kendo nyinge en Ruoth Nyasaye Manyalo Gik Moko Duto.

Amos 5:24

Weuru bura makare omol ka pi, kendo tim makare bende omol ka aora ma ok duon.

Mika 6:8

To, in dhano, Ruoth Nyasaye osenyisi yo maber monego iluw. Odwaro mondo itim gik makare, kendo iher ji gi ng’wono, bende iluor Ruoth Nyasachi gi chunyi mamuol.

Mika 7:7

An to abiro manyo Ruoth Nyasaye. Abiro rito Nyasaye jawarna, kendo Nyasacha biro winjo wachna.

Habakuk 2:3

To fweny mibiro yudono nigi kinde moketne, kendo ka kindeno ochopo, to gigo notimre mana ma piyopiyo mak orem. Kata ka ineno ni odeko, to rite arita, nikech notimre maonge kiawa, kendo mana e kinde mowinjore.”

Zefania 3:8

“Kuom mano an Ruoth Nyasaye, awachonu niya, ‘Ritauru! Adier, rituru chieng’ ma abiro chung’ie ka ayalou, nimar asechano choko ogendini kod dhoudi kanyakla, mondo aol kuomgi mirimba duto maliet ka mach, kendo mabiro wang’o piny duto ma tiek pep.

Zekaria 1:3

Emomiyo wach ni ji ni Ruoth Nyasaye Manyalo Gik Moko Duto owacho kama: Duoguru ira mondo an bende aduog iru.

Zekaria 7:9

“An Ruoth Nyasaye ne awacho niya, ‘Ng’aduru bura kare, ka ng’ato ka ng’ato miyo wadgi luor kendo timone ng’wono.

Zekaria 8:16

To gik ma onego utim e magi: Ng’ato ka ng’ato nyaka wach mana adiera kende ni wadgi, kendo nyaka uyal bura kare, kendo gi adiera, mondo kue obedie.

Tich Joote 2:38

To Petro nowachonigi niya, “Lokreuru, kendo ng’ato ka ng’ato kuomu nyaka batisi e nying Yesu kristo, mondo richou owenu, eka Nyasaye nomiu Roho Maler.

Tich Joote 26:20

Mokwongo nanyiso joma odak Damaski kendo modak Jerusalem kod joma odak e piny Judea duto, ni nyaka gilokre giwe richogi giduog ir Nyasaye, kendo gitim gik manyiso ni giselokore. Eka ne anyiso joma ok jo-Yahudi bende kamano.

Jakobo 1:27

Lemo mar adier kendo maler e nyim Nyasaye Wuoro, en limo nyithi kiye gi mond liete e chandruokgi, kendo bende gi ritruok kuom richo mag piny.

Jakobo 2:13

Jang’ad bura ok nokech ng’at ma ok kech ji. Ng’at ma kecho ji to onge gima oluoro kuom jang’ad bura.