Fweny 6:14 - MUMA MALER 2015

¹⁴ Polo noban ka kalatas, mi olal nono, kendo gode gi chulni duto nogol oa kuonde ma gintie.

Motingʼo Loko Manyien

¹⁴ Polo nolal nono ka kitabu mibano kendo gode duto gi chula duto nogol oa kuonde mane gintie.

Fweny 6:14 ပူးပေါင်းရင်းမြစ်များ

Zaburi 102:26

Gin to ginirum; in to isiko mochwere. Giduto ginidok moti, kaka law doko moti, kendo inilokgi kaka iloko law mi girum chuth.

Isaya 34:4

E ndalono gik moko duto manie polo malo noleny, mi lal nono. Polo bende nodol mana ka kalatas, kendo sulue nolwar piny mana ka oboke moner, kata ka olemo mochiek.

Isaya 54:10

Kata da bed ni gode madongo lal nono, kendo gode matindo gol, to an herana ok nolal nono, bende singruok mar kue mane atimo ok nogol kuomi. An Ruoth Nyasaye ma kechoi ema awacho kamano.

Jeremia 3:23

Onge resruok ma wanyalo yudo kuom lemo ewi gode, kata kuom joma goyo koko kuonde moting’ore. Konyruok ma wayudo wan jo-Israel, wuok mana kuom Ruoth Nyasaye ma Nyasachwa.

Jeremia 51:25

Babulon, ichalo gi got maketho piny ngima, to an Ruoth Nyasaye an jasiki. Abiro maki, mi agoyi piny milokri buru.

Ezekiel 38:20

Rech duto manie nam, gi winy manie kor polo, kod le mae thim gi gik mamol piny, kaachiel gi dhano duto mae piny notetni e nyima. Gode nomukre, kendo hohni bende noruombre piny, kendo ohingni duto nopodhi.

Nahum 1:5

Gode madongo gi matindo tetni e nyime, kendo leny nono. Piny duto kod joma odakie bende tungni.

Habakuk 3:10

bende ka gode orangi, to tetni ka luoro omako. Ohula mwomo ka ridore, kendo nam matut wuo matek ka apaka gingore.

Habakuk 3:6

Ka ochung’ to piny yiengni, kendo ka ong’icho, to ogendini kirni, bende gode duto ma nyaka nene barore kendo nimo. Pod owuotho mana kaka ne owuotho chon.

2 Petro 3:10

To chieng’ Ruoth nobi mana ka jakuo, kendo chieng’ onogo polo nolal nono ka riadore matek, kendo gik mae kor polo nowang’ mi rum pep. Piny bende nolal kaachiel gi gik manie iye.

Fweny 16:20

Chulni duto nolal nono kaachiel gi gode duto.

Fweny 20:11

Eka ne aneno kom duong’ mang’ongo marachar kod jal mobetie. Piny gi polo noringo oa e nyime mi olal nono.

Fweny 21:1

Bang’ mano, naneno polo manyien gi piny manyien. Polo mokwongo gi piny mokwongo noserumo, kendo nam bende noselal nono.