2 Timotheo 4:8 - MUMA MALER 2015

⁸ Koro gima okanna en mana osimbo mimiyo joma kare, ma Ruoth ma jang’ad bura makare biro miya chieng’ birone. To ok an kenda ema nomiya osimbo, to nomi koda ka ji duto morito birone gi chunygi duto.

Motingʼo Loko Manyien

⁸ Kendo koro osekan-na osimbo mar ngima makare, ma Ruoth, ma en jangʼad bura makare, biro sidhona e odiechiengʼno. Ok an kenda ema nomiyago, to nomi ji duto mosebedo ka geno dwoke.

2 Timotheo 4:8 ပူးပေါင်းရင်းမြစ်များ

Chakruok 18:25

Adier, ok dineg jomaonge ketho kaachiel gi joma nigi ketho. Ok inyal timo kamano, nikech kapo ni itimo kamano, to jomaonge ketho diyud mana kum maromre gi joma nigi ketho. To mano ok nyalre, nikech Jang’ad Bura mar piny ngima nyaka ng’ad bura kare.”

Zaburi 31:19

Mano kaka gik mikano ni joma oluori beyo! Rit miritogo joma ogeno kuomi bende lich miwuoro.

Zaburi 7:11

En e jang’ad bura makare, kendo pile okwedo joricho.

Ngeche 4:9

En ema nobedni osimbo mar duong’.”

Malaki 3:17

Ruoth Nyasaye Manyalo Gik Moko Duto owacho niya, “Chieng’ ma ang’adoe bura, to ginibed joga awuon kendo ginibed mwanduna. Anabednigi mang’won mana kaka wuoro bedo mang’won ni wuode moluore.

Mathayo 24:36

“To onge ng’ama ong’eyo chieng’ ma gigo notimre, kata sa ma ginitimree. Kata malaika mae polo, kata mana Wuowi ok ong’eyo to Wuoro kende ema ong’eyo.

Mathayo 7:22

Ka chieng’ giko ochopo, to ji mathoth nowachna niya, ‘Ruoth! Ruoth! Donge ne wakoro wach e nyingi, kendo wagolo jochiende e nyingi? Koso donge e nyingi ema ne watimoe honni?’

Luka 10:12

Awachonu ni Chieng’ Bura, Nyasaye nokum dalano malit moloyo kaka nokum Sodom!

Jo-Rumi 2:5

To in wiyi tek, kendo itamori yie, omiyo ikano kum ni in iwuon ndalo mar mirima, tiende ni chieng’ ma Nyasaye noelie bura mare makare.

Jo-Rumi 8:23

Ok mago kende, to wan bende wachur e iwa wawegi, ka warito mondo Nyasaye olokwa nyithinde, komiyowa thuolo chutho. Wachur kamano kata obedo ni Nyasaye osemiyowa Roho kaka mich mokwongo mar gueth ma wabiro yudo achien.

1 Jo-Korintho 2:9

To riekono koro osefwenyore, mana kaka Muma wacho niya, “Gik ma wang’ pok oneno, kendo ma it pok owinjo, bende mapok odonjo e chuny dhano, e gik ma Nyasaye oiko ni joma ohere.”

1 Jo-Korintho 3:13

to tich ng’ato ka ng’ato nong’ere malong’o mana Chieng’ Giko. Chieng’no nobi gi mach, kendo mach notem tich mane ng’ato ka ng’ato otiyo.

1 Jo-Korintho 9:25

Bende ji duto madwaro piem e tugo, ritore kuom chike duto. Gin gitimo kamano mondo giyud osimbo makethore. Wan to waritore mondo wayud osimbo ma ok kethre.

2 Jo-Korintho 5:2

Adier, ka pod wan e kiru ma wan-go e pinykani, to wachur kwagombo mondo warwakre gi odwa manie polo,

Jo-Filipi 3:11

ka ageno ni, kanyalore, to an bende nochiera kuom joma otho.

Jo-Kolosai 1:5

Kane wach maradier, ma en Wach Maber obironu mokwongo, ne uwinjo wach geno ma okelo. Kuom mano, yieu kod herau owuok kuom gima ugeno ma okannu maber e polo.

1 Jo-Thesalonika 1:10

Bende giwacho kaka koro urito Wuode mondo obi oa e polo. Wuodeno en Yesu, mane ochiero oa kuom joma otho, kendo moresowa kuom mirima mabiro.

1 Jo-Thesalonika 5:4

To un owetewa, ok un e mudho, ma dimi odiechieng’no pou ka jakuo,

2 Jo-Thesalonika 2:8

Bang’e Ng’at Mochayo Chik nothinyre, to Ruoth Yesu nobi gi duong’ne duto, mi nonege gi muya moa e dhoge, kendo notiek tekone duto.

1 Timotheo 6:19

Ka gitimo kamano, to ginikan mwandu ma nobednigi mise maber e ndalo mabiro, mondo giyud ngima ma en ngima maradier.

2 Timotheo 1:10

To koro oseele kuom fwenyruok mar Jawar Kristo Yesu e piny. Kristo ema nosetieko tho, kendo osenyisowa ratiro kuom Injili ni ngima ma nyaka chieng’ nitie.

2 Timotheo 1:12

Mano ema omiyo aneno masira kama, to wiya ok nyal kuot, nikech ang’eyo Jal mane ayie kuome, kendo aonge gi kiawa ni gima asemiye, onyalo ritona nyaka chop chieng’ Bura.

2 Timotheo 1:18

Ing’eyo maber ahinya kaka ne okonya e yore mathoth e dala mar Efeso! Ruoth mondo okeche chieng’ Bura.

2 Timotheo 2:5

Jang’uech maringo kar tugo bende ok yud osimbo mar locho ka ok oringo kaka chik dwaro.

2 Timotheo 4:1

E nyim Nyasaye kendo e nyim Kristo Yesu, mabiro ng’ado bura ni joma ngima gi joma otho, aparo ni Kristo biro duogo mondo olochi. Omiyo amiyi chik ni,

Tito 2:13

kendo warito gueth ma wageno yudo, ma en fwenyruok mar duong’ maler mar Kristo Yesu, Nyasachwa maduong’ kendo Jawar.

Jo-Hibrania 12:11

E sa mikumoe ng’ato, to kum ok nenre ka gima ber, to onenore mana malit. Achien to, joma osepuonji e yor kum nyago olemo mokue, tiende ni ngima maler.

Jo-Hibrania 9:28

Mano e kaka Kristo bende ne ochiw ka misango dichiel kende, mondo oting’ richo mag ji mang’eny, to obiro fwenyore kendo mar ariyo, to ok ni mondo ogol richo, to mana ni mondo okel warruok ni jogo morite.

Jakobo 1:12

Ng’at ma nano ka iteme en jahawi, nikech koseloyo tem to noyud osimbo mar ngima ma Ruoth nosingore ni nomi jogo mohere.

1 Petro 1:4

En geno mar yudo mwandu mosiko nyaka chieng’. Okanonugo e polo, kuma ok onyal kethoree kata towie.

1 Petro 5:4

Eka ka jakwath maduong’ obiro, to unuyud osimbo mar duong’ ma ok kethre, manyiso ni uselocho.

Fweny 1:7

Neuru, obiro gi boche polo, kendo ng’ato ka ng’ato nonene. Jogo mane ochwowe nonene, kendo ogendini duto mag piny nobed gi kuyo nikech en. Ber mondo obed kamano! Amin.

Fweny 19:11

Eka ne aneno polo ka oyawore, kendo ne aneno faras marachar ka ni kanyo, to Jal mane oidhe iluongo ni Ng’ama Igeno, kendo Jaadiera. Iluonge kamano nikech ong’ado bura kare, kendo okedo e yo makare.

Fweny 2:10

Kik iluor sand ma ibiro yudo, nikech jachien biro bolo jomoko kuomu e jela mondo otemu, kendo ubiro yudo sandruok kuom ndalo apar. To bed jaadiera nyaka kar tho, mi anamiyi osimbo mar ngima, kaka ranyisi ni iselocho.

Fweny 22:20

Jal manyiso wechegi duto wacho niya, “Adier, abiro piyo!” Obed kamano! Bi, Ruoth Yesu!

Fweny 4:10

to jodongo piero ariyo gang’wen-go podho e nyim Jal mobet e kom duong’no, kendo gilamo Jal mantie nyaka chieng’. Gibolo osimbegi e nyim komno, ka giwacho niya,

Fweny 4:4

To e alwora mar komno ne nitie kombe mamoko piero ariyo gang’wen, ma jodongo piero ariyo gang’wen obetie. Ne girwako lewni marachere, kendo ne gisidho osimbe mag dhahabu e wigi.