2 Ruodhi 2:4 - MUMA MALER 2015

⁴ Elija nowacho ni Elisha niya, “Yie idong’ ka, nikech Ruoth Nyasaye oora nyaka Jeriko.” To nodwoke niya, “Gi nying Ruoth Nyasaye, kendo gi nyingi iwuon, ok naweyi.” Omiyo ne gidhi nyaka Jeriko.

Motingʼo Loko Manyien

⁴ Eka Elija nowachone Elisha niya, dongʼ kae, nimar Jehova Nyasaye oora Jeriko. To ne odwoke niya, “Akwongʼora gi nying Jehova Nyasaye mangima kod nyingi iwuon ni ok anaweyi.” Omiyo giduto negidhi Jeriko.

2 Ruodhi 2:4 ပူးပေါင်းရင်းမြစ်များ

1 Ruodhi 16:34

Ndalo Ahab ema Hiel ja-Bethel nogeroe Jeriko. Kane oketo mise, Abiram wuode makayo notho, kendo ka nochungo dhorangeyene, Segub wuode machogo notho, mana kaka Ruoth Nyasaye nomiyo Joshua wuod Nun owacho.

2 Ruodhi 2:2

Elija nowacho ni Elisha niya, “Yie idong’ ka, nikech Ruoth Nyasaye oora nyaka Bethel.” To Elisha nodwoke ni, “Gi nying Ruoth Nyasaye, kendo gi nyingi iwuon, ok naweyi.” Omiyo ne gidhi nyaka Bethel.

2 Ruodhi 4:30

To min nyathi nowachone niya, “Gi nying Ruoth Nyasaye, kendo gi nyingi iwuon, ok naweyi.” Omiyo Elisha nochung’ modhi kode.

Luka 19:1

Yesu nodonjo Jeriko, kendo kane oyudo okadho e dier dalano,

Tich Joote 11:23

Kane ochopo kuno, mi oneno kaka Nyasaye oseguedho ji, ne odoko mamor, mi ojiwogi giduto, mondo giket chunygi kuom Ruoth, kendo gipadre kuome.

Tich Joote 2:42

Jogo noketo chunygi kuom puonj joote, kendo kuom timo gik moko duto kaachiel, kendo kuom chamo Sap Ruoth, kendo kuom lemo.

Joshua 6:1

Ranga Jeriko nolor matek mondo ogeng’ jo-Israel oko, kendo onge ng’ama ne nyalo donjo kata wuok.

Joshua 6:26

Chieng’no Joshua nokwero ji gi kuong’ niya, “Ruoth Nyasaye mondo okum ng’at ma notem gero Jeriko kendo! Koketo mise mare, to wuode makayo notho, kendo kochungo dharangaye, to wuode ma chogo notho.”

Ruth 1:16

To Ruth nodwoke niya, “Kik ichuna ni mondo apogra kodi, mi adog mak aluwi, nikech kuma idhiye ema nadhiye, kendo kama idakie ema nadagie. Jou nobed jowa, kendo Nyasachu nobed Nyasacha.

1 Samuel 1:26

mowacho niya, “A jaduong’, an e dhako mane ochung’ kalamo Ruoth Nyasaye cha.